Kaike Standard Traslation
मत्ती 1
येसु मसिहन खेपुलव
(लुक ३:२३-३८)
अन दाऊद रे अब्राहामन सन्तान येसु मसिहन खेपुलवन सुची जेङ्पा। अब्राहाम इसहाकन पा ङ्याह्। इसहाक याकूबन पा ङ्याह्, याकूब यहूदा रे नुन थिक्कोवन पा ङ्याह्, यहूदा फारेस रे जाहेरन पा ङ्याह्, ख्युन मा तामार ङ्याह्। फारेसन ङोह्जो हेस्रोन, हेस्रोन्न ङोह्जो आराम, आराम अम्मीनादाबन पा, अम्मीनादाब नहसोन्न पा, नहसोन सल्मोन्न पा,1 सल्मोन बोअजन पा ङ्याह्। नुन मा राहाब ङ्याह्। बोअज ओबेदन पा ङ्याह्। नुन मा रुथ ङ्याह्। आबेद यिसैन पा, यिसै दाऊद झलीन पा ङ्याह्। दाऊद सोलोमन्न पा ङ्याह्। सोलोमन्न मा उरियाहन मिसा ङ्याह्।2 सोलोमन रहबामन पा, रहबाम अबियान पा, अबिया आसान पा, आसा यहोसापातन पा, यहोसापात यहोरामन पा, यहोराम उज्जियाहन पा, उज्जियाह योतामन पा, योताम आहाजन पा, आहाज हिजकियान पा, हिजकिया मनस्सेन पा, मनस्से अमोन्न पा, अमोन योसियाहन पा, योसियाह यकोनियास रे नुन भाइवन पा ङ्याह्। ख्यु बेबिलोनग यहूदीकाङ्मोः बन्दी दोङदोङ वप्पो मन्नै भेला केह्पा ङ्याह्।3 बेबिलोनग भन्दि दोङदोङ वप्मी: यकोनियास सालतिएलन पा ङ्याह्, सालतिएल यरुबाबेलन पा, यरुबाबेल अबिउदन पा, अबिउद एल्याकिमन पा, एल्याकीम आजोरन पा, आजोर सादोकन पा, सादोक आखिमन पा, आखिम एलिउदन पा, एलिउद एलाजारन पा, एलाजार मत्तान्न पा, मत्तान याकूबन पा ङ्याह्। याकूब मनै योसेफन पा ङ्याह्, सुन मिसा मरियम ङ्याह्। अन्नै मरियमलम येसु केह्बो, सू मसिह र्वानान। झामखेखे अब्राहामलै दाऊदथाल पुस्ता च्युल्लि, दाऊदलै बेबिलोनग बन्दी दोङदोङ साःनान्न भेला बेर पुस्ता च्युल्लि, रे बेबिलोनग बन्दी दोङदोङ साःनान्न भेलालै मसिहन भेला बेर पुस्ता च्युल्लि रह्पा।
येसु मसिह केह्पा
(लुक २:१-७)
येसु मसिह झामखेखे केह्बो: नुन मा मरियमग योसेफन तोल्पा ङ्याह्, जेङ्नै ख्युन मिह्जी मराह्रेई मरियम पबित्र आत्मालम फौरिमा रह्पा क्युई रह्बो। जेङ्नै नुन पसा योसेफ धार्मिक सिमि रह्पान कारन, नू ब्याफास्सुम मखेरे नू तै मर्वारे ख्योवासुम खेबो। जेङ्नै जब नुई अन ल्होई नावा खेईखेई छ्युङ्पा ङ्याह्, मङग परमप्रभुन दुत रङबो, रे नू झाःम र्वाबो, “योसेफ, दाऊदन ङोह्जो, मरियमग जेँन मिसान रुपग यिम वच्चे नङिना, तैङर्वाङिन सु नुन फौग ङ्याह्, नु पबित्र आत्मालम जेङ्पा। नुई ङोह्जोदी केह्नान ङ्याह्, रे नाई नुन मिह्न येसु नाह्नाःयो, तैङर्वाङिन नुई जेँन सिमिकाङ्मोः ख्युन तीपालै बचाई खेनान ङ्याह्।” भबिस्यबक्तालम परमप्रभुई र्वापान बचन पुरा राचेन भिह्तुई अन पुरू रह्पा जेङ्पा:4 “सेह्ना, कन्या फौरिमा राह्नान ङ्याह्, रे नुई ङोह्जोदी केह्नान ङ्याह्, रे नुन मिह्न इम्मानुएल नान्नान ङ्याह्,” कन्न अर्थ जेङ्पा, “परमेस्वर ङिन ङ्याबो।”5 योसेफ मिवालै साप्पो, रे परमप्रभुन दुतजै र्वापालैम नुई मरियमग जेँन मिसान रुपग स्वीकार खेखे यिम वप्पो। मरियमजै ङोह्जो मकेह्न बेर योसेफ नुन ङ्याबो मआःबो। योसेफजै नुन मिह्न येसु नाह्म्बो।
Source notes (5)
- Cross-reference रूथ ४:१९-२२
- Cross-reference २ सामू १२:२४
- Cross-reference यर २७:२०
- Cross-reference यसै ७:१४
- Cross-reference यसै ७:१४
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.