Kaike Standard Traslation
यूह 16:33
Verse 33 is marked below, with the whole chapter around it. Read from the start
“ङै ङेनकाङ्मोः अन र्वापा ङिह्पा, अन्नकारन कि ङेनजै जेँन बिस्वास नख्योवाःयो। ख्युई ङेनकाङ्मोः यहूदी आराधनालयलै छ्यूनान ङ्याह्। बास्तबग झाःमन भेला स्वायङ ङ्याह्, जब ङेनकाङ्मोः सन्नानजै परमेस्वरन सेवा खेयङ ङिह्पा र्वार्वा छुनान ङ्याह्। ख्युई अन धोन खेनान ङ्याह्, तैङर्वाङिन ख्युई पाः स्योपा मह्या, रे ङन ङ्याबो मस्योँ। जेङ्नै अन ल्होई ङै ङेनकाङ्मोः स्याप्पा ङिह्पा, कि जब अन भेला स्वानान, तब ङेनकाङ्मोः तै र्वापा ङ्याह् अन ङेनकाङ्मोः ह्याका राह्नान ङ्याह्। ङूई ङै ङेनकाङ्मोः अन ल्होई मर्वापा, तैङर्वाङिन ङा ङेनकाङ्मोः ङ्याबो ङ्याह्।”
पबित्र आत्मान धोन
“ता ङा ङाः फेन्नान्न स्याह् वैईपाई छ्युङ्पा ङिह्पा, जेङ्नै ‘ङेन खाः वैनान?’ र्वार्वा ङेनको सुई ङाः मलोङ्ङ। जेङ्नै ङै ङेनकाङ्मोः अन ल्होई र्वापान कारन ङेन सम बैरागजै नाङ्पा ङ्याह्। जेङ्नै ङा ङेनकाङ्मोः तेम्मा ल्होई र्वाचे, ङा वैचेगै ङेन भलो ङिह्पा। तैङर्वाङिन ङा मवैङिन, सल्ला बिन्नान्न सिमि ङेन स्याह् स्वानान मह्या। जेङ्नै वैङिन ङा नू ङेन स्याह् फेन्नान ङिह्पा। आलै जब नु स्वानान, नुई सन्सारग तीपा, तेम्मा रे न्यायन भारेः दोसी ठहर्याई खेनान ङ्याह्। तीपान भारेः, ख्यु गलति ङ्याह् तैङर्वाङिन ख्यु ङन लाह्ः बिस्वास मखेँ, नुई परमेस्वरन ङू तै चन लः ङ्याह्, अनै थन्नान तैङर्वाङिन ङा पान स्याह् वैयङ ङिह्पा, रे ङेन ङाः ह्याङ रङ्नान मह्या। रे न्यायन भारेः, तैङर्वाङिन अन सन्सारन हाकिमग ङूलै यङ दोसी थर्याई खेतपा ङ्याह्।”1 “ङै ङेनकाङ्मोः र्वाचेन ल्होई हेँ लै ङ्याह्, जेङ्नै चोँ ङेन अन ल्होई कूमतैनान।”
जब नु आथबा तेम्मान आत्मा स्वानान ङ्याह्, तब नुई ङेनकाङ्मोः पुरू तेम्माग र्वानान ङ्याह्। नु ङन लम र्वानान मह्या। नुई तै ताह्नान, अनै र्वानान ङ्याह्, रे राम स्वानान ल्होईव ङेनकाङ्मोः स्यान्नान ङ्याह्। नुई ङन महिमा खेनान ङ्याह्, तैङर्वाङिन तै ङन जेङ्पा, अन ङनलम वव्वै ङेनकाङ्मोः स्यान्नान ङ्याह्। हाति पान ङ्याबो ङ्याह्, अन ङन जेङ्पा। अन्नकारन ङै र्वापा, तै ङन जेङ्पा अन ङनलम वव्वै आत्माई ङेनकाङ्मोः बिन्नान रे स्यान्नान ङ्याह्।
तूरि रे किम्म
“ङाईन ङिक ङेनजै ङा ह्याङ रङ्नान मह्या, आलै ङाईन ङिक ङा ह्याङ रङ्नान ङ्याह्।”
तब नुन कान-कान चेलावजै तीजै-घङग र्वाबो, “नुई ङ्योअग अन तै र्वापा जेअँ? ‘ङाईन ङिक ङेन ङा रङ्नान मह्या, आलै ह्याङ ङाईन ङिक ङेन ङा रङ्नान ङ्याह्,’ रे ‘तैङर्वाङिन ङा पान स्याह् वैनान’।” ख्युई र्वाबो, “नुई ‘ङाई बेर’ र्वापान अर्थ तै जेङ्पा? ङी क्युई मीपा, नु तै र्वाङ।” चेलावजै नू लोस्सुम खेँ र्वानान येसु क्युई रह्बो, रे नुई र्वाबो, “‘ङाईन ङिक ङेन ङाः रङ्नान मह्या आलै ङाईदिन ङिक ङा रङ्नान ङ्याह्’ र्वानान ल्होईन धा तै जेङ्पा र्वानान भारेः तै ङेन राह्ङराङ्साः ल्होई र्वापाई ङिह्पाऊ? तेम्माई, ङा ङेनकाङ्मोः र्वाचे, ङेन दोःनान ङ्याह् रे समतूई दानान ङ्याह्, जेङ्नै सन्सार स्याङ्नान ङ्याह्। ङेन उदास राह्नान ङ्याह्, जेङ्नै ङेनकोन बैराग किम्मः फिन्नान ङ्याह्। वैचा केह्तौ चिमिचा झर राह्नान तैङर्वाङिन नुन भेला स्वापा राह्नान, जेङ्नै जब नुई वैचा केह्नान, तब नू अन झरन ह्याका मराह्नान तैङर्वाङिन सन्सारग ती वैचा केह्बो र्वानान ल्होईग नु स्याङ्नान।2 झामखेखेई चोँ ङेनकाङ्मोः समतु राह्नान, जेङ्नै ङा ह्याङ ङेनकाङ्मोः रङ्नान ङिह्पा, रे ङेन सम किम्म राह्नान ङ्याह्। आलै सुई ङेन किम्म ङेन लम तल्नान मह्या।”
“जब अन दिन स्वानान। ङेनजै ङा तये लोन्नान मह्या। तेम्माई ङा ङेनकाङ्मोः र्वाचे, ङेनजै ङन मिह्नग पान ङ्याबो तै तोल्नान, नुई अन ङेनकाङ्मोः बिन्नान ङ्याह्। चोँनबेर ङेनजै ङन मिह्नग तये तोल्पा मह्या। तोला, आलै ङेनजै देन्नान ङ्याह्। झामखेखे ङेन किम्म पुरा रायो।”
सन्सारन लाह्ः क्याल्पा
“अन ल्होई ङै ङेनकाङ्मोः द्रिस्तान्तग र्वापा ङिह्पा। जेङ्नै भेला स्वायङ ङ्याह्, जब ङा ङेन ङ्याबो ह्याङ द्रिस्तान्तग ल्होई र्वानान मह्या, जेङ्नै पान भारेः ङेनकाङ्मोः ल खेखे स्यान्नान ङ्युँ। अन्न लाह् ङेनजै ङन मिह्नग तोल्नान ङ्याह्। ङा ङेन भिह्तु पा छ्याःफुल्नान ङ्युँ र्वार्वा ङेनकाङ्मोः मर्वा, तैङर्वाङिन पा जेँजै ङेनकाङ्मोः मया खेँ, तैङर्वाङिन ङेनजै ङा मया खेपा ङिह्पा, रे ङा परमेस्वर लम स्वापा र्वार्वा बिस्वास खेपा ङिह्पा। ङा पान लम स्वापा, आलै सन्सारग स्वापा ङिह्पा, रे ह्याङ ङा सन्सारग ख्योवाख्योवा पान स्याह् वैयङ ङिह्पा।”
येसुन चेलावजै र्वाबो, “ता ङेन मङी खेखे र्वाङ, द्रिस्तान्तग नङ्पा। ता ङी हाकोपा, ङेनग तैस्याङ पुरू क्युई ङ्याह्, आलै ङेनग सुई मलोईखाईमे मह्या। अन्नकारन ङि बिस्वास खेनान, कि ङेन परमेस्वर लम स्वापा जेङ्पा।”
येसुई ख्युकाङ्मोः झब बिम्बो, “तै ङेन ता बिस्वास खेनौ? सेह्ना, भेला स्वायङ ङ्याह्, तेम्माई स्वातपा ङ्याह्, जब ङेन छरपस्त राह्राह् जेँनै यिम वैनान ङ्याह् रे ङाः तितिमाई ख्योवानान ङ्याह्। जेङ्नै ङा तितिमाई मीपा, तैङर्वाङिन पा ङन ङ्याबो ङिह्पा।3 ङेनको ङन स्यीह् छ्युङ्छ्युङ् किम्म धेत्तया र्वार्वाई ङै ङेनकाङ्मोः अन ल्होई पुरू र्वापा जेङ्पा। सन्सारग ङेनकाङ्मोः तूरि राह्नान ङ्याह्, जेङ्नै हिम्मत ख्या, ङै सन्सारग क्याल्पा ङिह्पा।”
Source notes (3)
- Cross-reference यूह १२:३१
- Cross-reference यसै २६:१७; मीका ४:९
- Cross-reference यूह ८:२९
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.