Kaike Standard Traslation
यूह 15:5
Verse 5 is marked below, with the whole chapter around it. Read from the start
येसु तेम्मा धाव
“तेम्मा अङ्गुरन तङ्पु ङा जेङ्पा, रे ङन पा किसान जेङ्पा। ङन ङ्याबो ङिह्पा धा पुरू सुई फल मछ्याःङ नुई नू थुम्नान। रे फल छ्यानान धा पुरूग हेँ ह्याल्म फल छ्याःयो र्वार्वा नुई थुम्नान। ङै ङेनकाङ्मोः र्वापान बचनजै ङेन ङूई छाङ्म रातपा ङ्याह्। ङान ङ्याबो छ्योवा, रे ङा ङेन ङ्याबो छ्युङ्नान। कुजुई धा अङ्गुरन तङ्पुन ङ्याबो मछ्युङ्ङिन अन जेँजै फल छ्या मतैनान, झामखेखे ङेन ङन ङ्याबो मछ्युङ्ङिन ङेनजै र्वार्वा फल छ्यामतैनान।”
“अङ्गुरन बुता ङा जेङ्पा, ङेन चन धाव जेङ्पा। यदि सुई ङन ङ्याबो लुईङिन, रे ङा नुग लुईङिन, नुई फल लै छ्यानान। तैङर्वाङिन ङा लम भाभा ङेन तये खे मतैनान। सुई सिमि ङन ङ्याबो मलुईङिन, अन धालैम खोलोः पन्नान, रे अन खार्नान। झाम धाव सिमिवजै रूनान, रे मेह्ग पन्नान, रे मन कोःनान। ङेन ङन ङ्याबो छ्युँङिन, रे ङन बचन ङेन ङ्याबो लुईङिन, रे ङेनकाङ्मोः तै स्याँ तोला, रे अन ङेन भिह्तु राह्नान ङ्याह्। ङेनजै फल लै छ्याछ्या ङन चेला जेङ्पा र्वानान पर्मानित खेङिन अनगै ङन पान महिमा राह्नान ङ्याह्।” “पाई कुजुई ङा मया खेपा ङ्याह्, ङै र्वार्वा ङेनकाङ्मोः मया खेपा ङिह्पा। ङेन ङन मयाग छ्योवा। यदि ङन आग्याव ङ्याङ्ङिन ङेन ङन मयाग छ्युङ्नान ङ्याह्, कुजुई ङै ङन पान आग्याव ङ्याम्पा ङिह्पा रे नुन मयाग छ्युङ्नान।”
ङै अन ल्होई ङेनकाङ्मोः अन्नकारन र्वापा ङिह्पा, कि ङन किम्म ङेन ङ्याबो रायो, रे ङेन किम्म हाति र्वार्वा रायो। “ङन आग्या अनै जेङ्पा, कि ङै ङेनकाङ्मोः कुजुई मया खेपा, ङेनजै तीजै-घङग झामखेखेई मया ख्या।1 जेँन फुरीवन भिह्तु जेँन परान बिन्चेन खेरे किम मया घङ सुईनै मराह्नान। ङा ङेनकाङ्मोः कन आग्या खेँ, अन ङेनजै ङ्याङ्ङिन, ङेन ङन फुरी जेङ्पा। तान धेरा ङा ङेनकाङ्मोः राङ्पा मर्वाचे, तैङर्वाङिन नुन मालिकजै तै खेँ र्वार्वा राङ्पाः क्युई राह्नान। जेङ्नै ङै ङेनकाङ्मोः फुरी र्वापा ङिह्पा, तैङर्वाङिन तै ङै ङन पा लम ताह्पा, ङै अन ङेन पुरूग स्याप्पा ङिह्पा। ङाः ङेनजै मदम्बो, जेङ्नै ङै ङेनकाङ्मोः दम्पा रे ङेनकाङ्मोः दम्पा, कि ङेन वया, रे फल छ्या, आलै ङेन फल लुईपाई रायो। अन्नकारन ङेनजै पान ङ्याबो ङन मिह्नग तै तोल्दरा, नुई ङेनकाङ्मोः अन बिन्नान ङ्याह्। ङा ङेनकाङ्मोः अन आग्या बिन्चे, कि ङेनजै तीजै-घङग मया ख्या।
सन्सारजै चेलाकाङ्मोः मस्याङ्पा
“यदि सन्सारजै ङेनकाङ्मोः मस्याङ्ङिन, ङेनकाङ्मोः क्युई रायो, कि ङेनकाङ्मोः मस्याङ्चेन खेरे ङू नुई ङाः मस्याङ्पा जेङ्पा। यदि ङेन अन सन्सारन जेङ्ङिनता सन्सारजै ङेनकाङ्मोः जेँन सिमि छुछु मया खेनान ङ्याह्। जेङ्नै ङेन अन सन्सारन नङ्पा। ङेनकाङ्मोः सन्सारलै ङै दम्पा, अन्नकारन सन्सारजै ङेनकाङ्मोः मस्याँ। ङै ङेनकाङ्मोः र्वापान बचन ह्याका झ्वा, ‘राङ्पा यिमन मालिक खेरे किम मराह्नान।’ ख्युई ङाः तेपफाङ्ङिन ङेनकाङ्मोः र्वार्वा तेपफान्नान ङ्याह्। ख्युई ङन बचन ङ्याङ्ङिन ङेनकोन बचन यङ ङ्यान्नान ङ्याह्।2 जेङ्नै ख्युई अन ल्होई पुरू ङन मिह्न्न खातिर ङेनकाङ्मोः खेनान ङ्याह्, तैङर्वाङिन ख्युई ङाः फेन्नानग मस्योँ। ङा मस्वापा जेङ्न रे ख्युकाङ्मोः मस्याप्पा जेङ्न ख्यु तीपान दोसी राह्नान मह्या, जेङ्नै ता ता जेँन तीपान भिह्तु ख्युन ङ्याबो बहाना तये मह्या। सुई ङा ङान्ज्यान खेँ, नुई ङन पाः र्वार्वा ङान्ज्यान खेनान। यदि घङ सुई मखेपान धोन ङै ख्युन घूँ मखेपा राङिन ख्यु तीपान दोसी राह्नान मह्या। जेङ्नै ता ख्युई ङा रे ङन पा ङ्योरुमग रङ्पा ङिह्पा रे ङान्ज्यान खेपा ङिह्पा। जेङ्नै, कानुनग सर्पा अन केह्ः पुरा राचेन भिह्तु अन रह्पा ङ्याह्, ‘ख्युई ङा भाछ्योवा ङान्ज्यान खेबो।’3
“जब सल्ला बिन्नान्न सिमि स्वानान, सू ङा पा लम ङेन स्याह् फेन्नान ङिह्पा, आथबा तेम्मान आत्मा, सु पान लम स्वानान, नुई ङन भारेः साँचि बिन्नान ङ्याह्। ङेन सुरुलै ङन ङ्याबो लुईपा राह्राह्, ङेन यङ ङन साँचि जेङ्पा।”
Source notes (3)
- Cross-reference यूह १३:३४; १५:१७; १ यूह ३:२३; २ यूह ५
- Cross-reference मत्ती १०:२४; लुक ६:४०; यूह १३:१६
- Cross-reference भजन ३५:१९; ६९:४; १०९:३
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.