Juray Soura Bible
ମନଙ୍ ଞନଙ୍ଞଙ୍ବର୍ 25
ସୋଲ୍ମନନ୍ ଆ ଞନଙ୍ଞଙ୍ବର୍
ଜାୟ୍ତାନ୍ ଆଇଡିଡନ୍ ଆ ଞନଙ୍ଞଙ୍ବର୍ ଅଡ଼୍କୋନ୍ ନିୟ୍ ସଲୋମନନ୍ ଆନିଡ୍ ଡ ଜିଉଦାନ୍ ଆ ରାଜା ଇସକିଅନ୍ ଆମନ୍ରାଜି ତିଆତେ ବାରିଡେଞ୍ଜି । କଡାଡ଼ିନ୍ ଆସସ ଇସ୍ୱରନ୍ ଆ ପନେମେଙ୍; ବନ୍ଡ କଡାଡ଼ିନ୍ ଆସନାୟ୍ଡଙ୍ ରାଜାନ୍ ଆ ପନେମେଙ୍ । ରୁଆଙନ୍ ଏଙ୍ଗାଲେ ସଙାୟ୍ ଆରି ପୁର୍ତିନ୍ ଏଙ୍ଗାଲେ ଜରୁ, ତିଅନ୍ତମ୍ ରାଜାଞ୍ଜି ଆଉଗ୍ଗର୍ ଆବର୍ନେ ରପ୍ତି ଅଃଜନାବୋ । ରୁପ୍ପାନ୍ ସିଲଡ୍ ରାମିନ୍ ଆନ୍ନାବା, ତିଡେନ୍ ସୁନାରିନ୍ ଆସନ୍ ଅବୟ ସିମ୍ମାନ୍ ଗଡେଲ୍ତେ । ରାଜାନ୍ ଆତେମଡ୍ ସିଲଡ୍ ପେଲ୍ଲାମରଞ୍ଜିଆଡଙ୍ ସବ୍ଙାୟ୍ବା, ଆରି, ଆ କୁର୍ସିନ୍ ଡରମ୍ମଲୋଙନ୍ ଗରିତେ । ରାଜାନ୍ ଆତେମଡ୍ଲୋଙ୍ ଆମନ୍ଡମନ୍ ସେଙ୍କେଡଙ୍ନେ, ଆରି ସୋଡ଼ାମରଞ୍ଜି ଆଡ୍ରକୋନେଲୋଙ୍ ତନଙ୍ଡଙ୍ । ଇନିଆସନ୍ଗାମେଣ୍ତେନ୍ ଅଙ୍ଗା ଆ ମନାନ୍ନେମରନ୍ଆଡଙ୍ ଅମଡ୍ନମ୍ ଗିଜେନ୍, ଆତେମଡ୍ଲୋଙନ୍ ଆମନ୍ଆଡଙ୍ ଅନବ୍ଜାୟ୍ତାନ୍ ଆଡ୍ରେତମନ୍ ଆପାଲ୍ତେଙ୍, ଆର୍ପାୟ୍ ତେନେ ଜିରାୟ୍, ଗାମ୍ଲେ ଆମନ୍ଆଡଙ୍ ଆନୋଡ୍ଡେ ମନଙ୍ । କନାୟ୍କାୟନ୍ ଆସନ୍ ଏରବ୍ବୋମଙ୍ ଡୁଙ୍ଲନ୍ ଏଜିର୍ଡଙ୍, ଅସମଁୟ୍ ଏଜିରେନ୍ଡେନ୍ ତୟ୍ଲିସିଙ୍ନମ୍ ଆମନ୍ରା ତିକ୍କି ଆମନ୍ଆଡଙ୍ ଗବ୍ରୟ୍ଲମ୍ଡେନ୍ ଆମନ୍ ଇନି ଏଙ୍ଗାତନ୍ ? ତୟ୍ଲିସିଙ୍ନମ୍ ଆମନ୍ରା ସରିନ୍ କଡାଡ଼ିଲନ୍ ଅଲ୍ବାଡ୍ଡେନମ୍ ସବ୍ଙାୟ୍ବା, ବନ୍ଡ ଆନ୍ନାମରନ୍ ଆସସବର୍ ଏବର୍ଡଙ୍ନେ । ଇଜ୍ଜାଡେନ୍ ଅନମ୍ଡଙ୍ମରନ୍ ଆମନ୍ଆଡଙ୍ ତିକ୍କଲାୟ୍ଲମ୍ଡେନ୍, ଡୁର୍ନାମନମ୍ ଅସଙାଜେ । ରୁପ୍ପାସିମ୍ଲୋଙନ୍ ଆ ଡନକ୍କୋନ୍ ସୁନ୍ନାଗୋନ୍ ଆ ସେଓ ଜଅ ଏଙ୍ଗାଲେ, ଆଜାଡ଼ିଡମନ୍ ଆବର୍ତନ୍ ଆମନ୍ରା ଆବର୍ନେ ତିଅନ୍ତମ୍ । ଡାଲ୍ଡାଲ୍ଲୁଡନ୍ ଡ ମଡ଼ିର୍ ସୁନ୍ନାନ୍ ଆ ରନୁରୁଜି ଏଙ୍ଗାଲେ, ଡାଲୁଡ୍ଲେ ଆରମ୍ଡଙ୍ତେନ୍ ଆଲୁଡ୍ ଆସନ୍ ଗିଆନଡମନ୍ ଆମନ୍ରା ଆ କଁନୟ୍ବର୍ ତିଅନ୍ତମ୍ । ଜନ୍ରୋମ୍ଗାଜନ୍ ଆଡିଡ୍ ସସିରାଡାନ୍ ଆ ଜଏଙ୍ ଏଙ୍ଗାଲେ, ଅପ୍ପାୟ୍ଡିଁୟ୍ ମନ୍ରାଞ୍ଜି ଆସନ୍ ଡର୍ନେଡମ୍ ଆ କବରପାଙ୍ଲଙ୍ମରନ୍ ତିଅନ୍ତମ୍; ଇନିଆସନ୍ଗାମେଣ୍ତେନ୍ ଆନିନ୍ ଆନିନ୍ଡମ୍ ଆ ସାଉକାରଞ୍ଜି ଆପୁରାଡ଼ା ସବ୍ୟୁତେ । ତରୁବ୍ତଡନ୍ ଆ ମେଗ ଡ ରିଙ୍ଗେନ୍ ଏଙ୍ଗାଲେ, ଆନିନ୍ଡମ୍ ଆ ତନିୟ୍ତିୟ୍ ଆ ବିସୟଲୋଙ୍ କାଣ୍ତାରେଙ୍ ପୋପୋଡ଼ାଲନ୍ ଆବର୍ତନ୍ ଆମନ୍ରା ତିଅନ୍ତମ୍ । ସନଏନ୍ ବାତ୍ତେ ରାଜ୍ୟପାଡ଼ନ୍ ମବ୍ଲଁୟ୍ତନ୍, ଆରି ଲବଡ୍ଡିନ୍ ଆଲାଙ୍ ଅଜାଙନ୍ ଲବ୍ଗଡ୍ତେ । ଆମନ୍ ଆଡଙନ୍ ଞାଙେନ୍ ପଙ୍ ? ଡିଅଙ୍ଗା ସନାୟ୍ସାୟ୍ନମ୍, ଡିୟ୍ତେ ଜୋମା; ଗୋଗୋୟ୍ ଜୋମେନ୍ଡେନ୍ ଆମନ୍ ତିଆତେ ବେୟ୍ତେ । ଆମନ୍ ତୟ୍ଲିସିଙ୍ନମ୍ ଆମନ୍ରା ଆସିଙ୍ ଇୟିୟ୍ଲଡଙେ, ଇଜ୍ଜାଡେନ୍ ଆନିନ୍ ମୁସଲ୍ଡାୟମ୍ଲେ ଆମନ୍ଆଡଙ୍ ଏଡ଼ୁର୍ମଡ୍ତମ୍ । ତୟ୍ଲିସିଙନ୍ ଆ ବିରୁଦଲୋଙ୍ ଆନା ପାତ୍ୟା ସାକ୍କି ତିୟ୍ତେ, ଆନିନ୍ ସେଲାନ୍ ଡ କଡ଼ିବନ୍ ଡ ତଡ଼କୁନ୍ ଅନ୍ତମ୍; ଆରପିୟ୍ଜିନ୍ ଡ ଗୁଲିଆନ୍ ଆଜଲଜନ୍ ଆଜଙ୍ ଏଙ୍ଗାଲେ, ବିକ୍କଡ଼ନ୍ ଆଡିଡ୍ ବାଁୟ୍ସିମରନ୍ ଆମଙ୍ଲୋଙ୍ ଆଡର୍ନେ ଅନ୍ତମ୍ । ରଙାଗାଜନ୍ ଆଡିଡ୍ ସିନ୍ରିନ୍ ତବ୍ଲେ ଆପନାଙ୍ ଡ ଅଲିଲୋଙନ୍ ସବୁର୍ଡାନ୍ ଆମନାୟ୍ମର୍ ଏଙ୍ଗାଲେ, ଡୁକ୍କଲନ୍ ଆଡ୍ରକୋତନ୍ ଆମନ୍ରା ଆମଙ୍ କନନନ୍ ଆକ୍ରନ୍ତେନ୍ ଆମନ୍ରା ତିଅନ୍ତମ୍ । ବନେରାମର୍ବେନ୍ ଆଡୋଲେୟ୍ ଡକୋଏନ୍ଡେନ୍, ଆନିନ୍ଆଡଙ୍ ଗାଗାନେନ୍ ତିୟ୍ବା; ଆରି, ଆଇର୍ଗାଲ୍ ଡକୋଏନ୍ଡେନ୍, ଗାଡାନେନ୍ ତିୟ୍ବା; ସିଲଡ୍ତ୍ତେ ଆମନ୍ ଆବବ୍ଲୋଙନ୍ ଆରଡ଼େତୋଡନ୍ କୁଡ଼ାୟ୍ଲେ ଡକ୍କୋତେ,ଆରି ପ୍ରବୁନ୍ ଆମନ୍ଆଡଙ୍ ଓଞୋଲ୍କୁଜନ୍ ତିୟ୍ତମ୍ । ଏଙ୍ଗାଲେ ଅର୍କାବଡ଼ିଗଡ୍ ଆରିଙ୍ଗେ ତରୁବନ୍ ଆନମ୍ଡୁଙ୍, ତିଅନ୍ତମ୍ ବର୍ରେଙ୍ଲନ୍ ଆପ୍ରାଙ୍ତେନ୍ ଆଲାଙ୍ ବନ୍ଡ୍ରାବ୍ ଗନିୟ୍ଗିଜନ୍ ଆନମ୍ଡୁଙ୍ । ଗୋଡ଼େବଜନ୍ ସରିନ୍ ଆବୟନ୍ ଆସିଙ୍ଲୋଙ୍ ମାୟ୍ଲନ୍ ଆଡକୋନେ ଆପାଲ୍ତେଙ୍ ବିଲେଙନ୍ ବକୁନେଲୋଙ୍ ଆଡକୋନେ ଆର୍ପାୟ୍ ମନଙ୍ । ଇର୍ଗାଲ୍ ପରାନ୍ନାନ୍ଆଡଙ୍ ଆ ଜଏଙ୍ ଡାଆନ୍ ଆଗନା ଏଙ୍ଗାଲେ, ସଙାୟ୍ ଡେସାନ୍ ସିଲଡ୍ ମନଙ୍ବରନ୍ ତିଅନ୍ତମ୍ । ପରାନ୍ସାତ୍ତିନ୍ ଆକୁଆ ଡ ଆରୁଜନ୍ ଆଡ୍ରୁଙ୍ଡମ୍ନେଡା ଏଙ୍ଗାଗୋ, ପେଲ୍ଲାମରନ୍ ଆମୁକ୍କାଲୋଙ୍ ପରାନ୍ସାତ୍ତିନ୍ ଆକାବ୍ବାଡ଼ାଲୋଙ୍ ଆଗ୍ରଲୋତେନ୍ ଆ ଡରମ୍ମମର୍ ଏତ୍ତେଗୋମା । ଗୋଗୋୟ୍ ଆଡଙ୍ଡାନ୍ ଆଜନୋମ୍ ଏଙ୍ଗାଲେ ମନଙ୍ତଡ୍, ତିଅନ୍ତମ୍ ମନ୍ରାଞ୍ଜି ଆନିନ୍ଡମ୍ ଆ ପନେମେଙ୍ ଆସନାୟ୍ ପନେମେଙ୍ତଡ୍ । ଆନା ଆନିନ୍ଡମନ୍ ଆଡଅଙ୍ ଆୟତଲେ ଡକ୍କୋଲେ ଅରପ୍ତିଏ, ଆନିନ୍ ଆପଲାଙ୍ ଡ କାନ୍ତିତଡନ୍ ଗଡ଼ାନ୍ ଅନ୍ତମ୍ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.