Juray Soura Bible
ମନଙ୍ ଞନଙ୍ଞଙ୍ବର୍ 23
ଅଙ୍ଗା ଆଡିଡ୍ ଆମ୍ୱେନ୍ ରାଜ୍ୟପାଡ଼ନ୍ ସରିନ୍ ଗାଗାନେନ୍ ଏତଙ୍କୁମ୍ତେ, ତିଆଡିଡ୍ ମୁକ୍କାଲୋଙ୍ବେନ୍ ଆନା ଡକୋ, ତିଆତେ ଜୁବାୟ୍ଲେ ମନଙ୍ ଇୟମା । ଅସମଁୟ୍ ଆମନ୍ ଅବ୍ରୋଜୋମ୍ମର୍ ଡେଏନ୍ଡେନ୍, ଆମନ୍ ସଙ୍କାଲୋଙ୍ନମ୍ କୁଣ୍ତିନ୍ ଆମନକୁନ୍ ଡକୋତେ । ଆ ମନ୍ନା ଜନୋମନ୍ଆଡଙ୍ ଏଲୋବଡଙ୍; ଇନିଆସନ୍ଗାମେଣ୍ତେନ୍ ତିଆତେ ତନୋର୍ତୋର୍ ଜନୋମ୍ ଡକୋତେ ।
ଗମାଙ୍ମର୍ ଆଡନେ ଆସନ୍ ଆମନ୍ଡମ୍ଆଡଙ୍ ଅମଙ୍ଗାଡଙ୍; ଆମନ୍ଡମନ୍ ଆ ବୁଡ୍ଡିଲୋଙ୍ ସାଲ୍ଲାକିଡଙ୍ନେ । ଅଙ୍ଗାଆତେ ଅବୟ୍ତଡ୍, ଆମନ୍ ପଙ୍ ତିଆସନ୍ ଏର୍ସେଡ୍ମଡ୍ନେନ୍ ଆମନ୍ ଆଙ୍ଗାଙ୍ଲନ୍ ଡକୋତନ୍ ? ଇନିଆସନ୍ଗାମେଣ୍ତେନ୍ ରୁଆଙ୍ଲୋଙନ୍ ଆରେଙେଙ୍ଡାତନ୍ ଆ ଅଡ଼ାଙ୍ ଅନ୍ତିଡ୍ ଅନ୍ତମ୍ ଅନର୍ଜେନ୍ ଆନିନ୍ଡମ୍ ଆସନ୍ ଡକ୍କୋତେ ।
ଏର୍ମନଙ୍ ଗିୟ୍ମଡ୍ମରନ୍ ଆଡାରେୟ୍ ଏଜୋମ୍ଡଙ୍, ଆରି ଆ ମନ୍ନା ଜନୋମନ୍ଆଡଙ୍ ଏଲୋବଡଙ୍; ଇନିଆସନ୍ଗାମେଣ୍ତେନ୍ ଆନିନ୍ ଏଙ୍ଗାଲେ ଆନିନ୍ଡମ୍ ଆ ମନ୍ନଲୋଙନ୍ ଇୟମ୍ତେ, ଆନିନ୍ ତିଅନ୍ତମ୍; ଆନିନ୍ ଜୋମ୍ବା ଗାବା ଗାମ୍ଲେ ଆମ୍ୱେନ୍ଆଡଙ୍ ବର୍ତବେନ୍ ଆଜାଡ଼ିଡମ୍, ବନ୍ଡ ଅମଙ୍ବେନ୍ ଆ ମନନ୍ ଅବୟ୍ତଡ୍ । ଆମନ୍ ଅଙ୍ଗା ବଅନାଙ୍ଗୁମ୍ ଜନୋମ୍ଜୋମନ୍ ଜୋମେନ୍, ତିଆତେ ଆମନ୍ ବେୟ୍ତେ; ଆରି, ଜବୁଙ୍ ବର୍ନେନମ୍ଞ୍ଜି ଅବ୍ସେଡ୍ତେ ।
ଉଲ୍ଲୁନ୍ ଆଲୁଡ୍ବାନ୍ ବର୍ନେନ୍ ଏବର୍ଡଙ୍ନେ, ଇନିଆସନ୍ଗାମେଣ୍ତେନ୍ ଗିଆନବର୍ନମ୍ଜି ଆନିନ୍ ଏଡ଼ୁର୍ମଡ୍ତେ ।
ପାପୁର୍ ସଣ୍ତିନ୍ ଏଡେଡ୍ଡଙ୍, ଆରି କୋନ୍ରାସିଜନ୍ ଆବସେଙ୍ଲୋଙ୍ ଏଗନ୍ଡଙ୍ । ଇନିଆସନ୍ଗାମେଣ୍ତେନ୍ ଆ ତନାଣ୍ତେମରଞ୍ଜି ବପ୍ପୁଡମ୍; ଆନିନ୍ ଆଡନେଗଡନ୍ ତନଙ୍ଡାଲେ ଆମନ୍ ବୟନ୍ ଜୁଜ୍ଜେତନ୍ ।
ଞନଙ୍ଞଙ୍ବର୍ଲୋଙନ୍ ମନ୍ନନମ୍ ଡ ଗିଆନନ୍ ଆବର୍ନେଲୋଙ୍ ଡାଲୁଡା ।
ପସିଜନ୍ଆଡଙ୍ ପନବ୍ରଡନ୍ ଆତନିୟ୍ ଏଅବ୍ବାଡ଼ଡଙ୍, ଆମନ୍ ଆନିନ୍ଆଡଙ୍ ଡାଙ୍ଗୋନ୍ ବାତ୍ତେ ତିଡେନ୍ ଜନଙ୍ଡେନ୍ ଆନିନ୍ ଅରବ୍ବୁଏ । ଆମନ୍ ଆନିନ୍ଆଡଙ୍ ଡାଙ୍ଗୋନ୍ ବାତ୍ତେ ତିଡ୍ତେ ଆରି ପାତାଡ଼ନ୍ ସିଲଡ୍ ଆ ପରାନ୍ନାନ୍ ଡୋବ୍ତେ ।
ଏ ଡାଙ୍ଗଡ଼ାଅଞେନ୍, ଉଗ୍ଗର୍ନମ୍ ଗିଆନଡମ୍ ଡେଏନ୍ଡେନ୍, ମନଞେନ୍ ଜବ୍ର ମଅଁୟ୍ତେ । ଓଓ, ଉସାଲ୍ତମ୍ନମ୍ ଆଜାଡ଼ିଡମ୍ ଆବର୍ନେ ବର୍ରନ୍ଡେନ୍, ଉଗ୍ଗର୍ଞେନ୍ ମଅଁୟ୍ତନେ ।
ଉଗ୍ଗର୍ନମ୍ ଇର୍ସେମରଞ୍ଜିଆଡଙ୍ ଇସ୍କତ୍ତାଡଙେ,ଆରି ଆମନ୍ ଡିତାନ୍ ସଦାପ୍ରବୁନ୍ଆଡଙ୍ ବତଙ୍ଲେ ଡକୋନା । ଇନିଆସନ୍ଗାମେଣ୍ତେନ୍ ଆଜାଡ଼ିଡମ୍ ଓଞୋଲ୍କୁଜନ୍ ଡକୋ; ଆରି ଅରାସାନେନମ୍ ଡନେଡନ୍ ଅଡ୍ଡେଏ ।
ଏ ଡାଙ୍ଗଡ଼ାଅନ୍ଞେନ୍, ଅମ୍ଡଙା, ଗିଆନମରନ୍ ଡେଆ,ଆରି ମନ୍ନନମ୍ଆଡଙ୍ ମନଙ୍ ତଙର୍ଗଡ୍ ତାଙରା । ଦ୍ରାକ୍ୟାଡାଲୋଙନ୍ ମଗାଡ୍ଡଙ୍ନେ ଆରି ଅବ୍ରୋଲନ୍ ଜେଲୁନ୍ ଆଜରୋମ୍ତେଞ୍ଜି ଆମନ୍ରାଜି ସରିନ୍ ଏଗଡ଼ିଡଙ୍ନେ । ଇନିଆସନ୍ଗାମେଣ୍ତେନ୍ ଗାସାଲ୍ମରନ୍ ଡ ଅବ୍ରୋଜୋମ୍ମରନ୍ ଡୋଲେୟ୍ମର୍ ଡେତେ; ଆରି ମବ୍ମବ୍ଡାନ୍ ଆନା ଲଡୟ୍ତେ ଆନିନ୍ ଆପତ୍ତେକାବନ୍ ଜିଜିତନ୍ ।
ଆକ୍ରୋଡ୍ଲମନ୍ ଆପେୟନ୍ ଆବର୍ନେ ଅମ୍ଡଙା, ଆରି ଅୟୋଙ୍ନମ୍ ବୁଡିଏନ୍ଡେନ୍, ଆନିନ୍ଆଡଙ୍ ଏଡ଼ୁର୍ମଡ୍ଡଙ୍ ।
ଆଜାଡ଼ିନ୍ ଞିଆ, ତିଆତେ ଏତମ୍ଡଙ୍; ଗିଆନନ୍ ଡ ଞନଙ୍ଞଙ୍ବରନ୍ ଡ ମନଙ୍ ଅନିୟମନ୍ ଞିଆ ।
ଡରମ୍ମମରନ୍ ଆପେୟ୍ ମାଡ ସର୍ଡାତନେ,ଆରି ଗିଆନସିଜନ୍ ଆକୋକୋଡନ୍ମର୍ ଆନିନ୍ ଆସନ୍ ମଅଁୟ୍ତନ୍ ।
ଆପେୟ୍ନମ୍ ଡ ଅୟୋଙ୍ନମ୍ ମଅଁୟ୍ନେତଜି, ଅଙ୍ଗା ଆଇବୟ୍ ଆମନ୍ଆଡଙ୍ ପାଙ୍ଗୁରନ୍ଲମ୍ ଆନିନ୍ ସର୍ଡାନେତୋ ।
ଏ ଡାଙ୍ଗଡ଼ାଅନ୍ଞେନ୍, ଉଗ୍ଗର୍ନମ୍ ଞେନ୍ଆଡଙ୍ ତିୟିଁୟ୍, ଆରି ଅମଡ୍ନମ୍ ତଙର୍ଞେନ୍ ସଣ୍ତୋଙ୍ଲେ ସର୍ଡାନେତୋ । ଇନିଆସନ୍ଗାମେଣ୍ତେନ୍ ଜୋଣ୍ତଡ଼ିନ୍ ଜରୁ ଲୋଓଙ୍, ଆରି ବମନ୍ରା ଆଡୁକ୍ରି ରକ୍କୋଡ୍ କୁଆନ୍ ଅନ୍ତମ୍ । ଆରି ଆନିନ୍ ଜୁରୁମରଞ୍ଜି ଅନ୍ତମ୍ ଡଲ୍ଲେ ଡକୋତନ୍, ଆରି ମନ୍ରାଞ୍ଜି ଆମଙ୍ଲୋଙ୍ ବାଁୟ୍ସିମରଞ୍ଜି ଡନିଡିନ୍ ଅବ୍ଗୋଗୋୟ୍ତେ ।
ଆନା ଡୁକ୍କତନ୍ ? ଆନା ଇନ୍ନିଙ୍ ସୁକ୍କାତଡ୍ ? ଆନା ଗୋଡ଼େନ୍ ? ଆନା ଅଲ୍କଁୟ୍ତଜି ? ଆନା କାଜ୍ଜାନ୍ନିୟ୍ ଆପାରା ? ଆନା ଆମଡ୍ ମିଞାମ୍ଗୋ ? ଅଙ୍ଗା ଆମନ୍ରାଜି ଦ୍ରାକ୍ୟାଡାନ୍ ଆଗନାଲୋଙ୍ ଗୋଗୋୟ୍ ଅୟମ୍ ତଙ୍କୁମ୍ତଜି, ଅଙ୍ଗା ଆମନ୍ରାଜି ଆମାୟ୍ମାୟନ୍ ଆ ଅଲି ସାୟ୍ଲେ ବୁଲ୍ଲେତଜି, ଆନିଞ୍ଜି । ତି ଆମନ୍ରାଜି ଆ ଦ୍ରାକ୍ୟାଡାନ୍ ଲୁଲୁଏନ୍ଡେନ୍ ଆରି ସିମ୍ମାଲୋଙନ୍ କିଃଲାୟ୍ଜେନ୍ଡେନ୍ ଆରି ଉଗୁରିୟ୍ ଆର୍ରିଙୟ୍ତେନ୍ ଆଡିଡ୍ ଆମ୍ବେନ୍ ଆନିନ୍ଆଡଙ୍ ଏଆଙାଙ୍ଡଙ୍ । ଆତନିକ୍କି ତିଆତେ ଜାଆଡନ୍ ଅନ୍ତମ୍ ଡୋଲ୍ଡୋଲ୍ତନ୍ ଆରି ଅନାଗାଜଡନ୍ ଅନ୍ତମ୍ ରବ୍ବୁତେ । ଅମଡ୍ବେନ୍ ଆନ୍ନାନ୍ ଆନ୍ନାନ୍ ଗିୟ୍ଗିୟ୍ତନ୍, ଉଗ୍ଗର୍ବେନ୍ ପରାନ୍ସାତ୍ତିନ୍ ଆବର୍ନେ ବର୍ତନେ । ଆରି, ଆମନ୍ ସମେଁୟ୍ଣ୍ଡ୍ରାଲୋଙନ୍ ଆର୍ଲୁଡ୍ତେନ୍ ଆମନ୍ରା ଅଡ଼େ ଜାଜନ୍ ଆସୋଣ୍ତାଙ୍ ଆତୋଣ୍ତୋ ଆଲନୁଡ୍ମର୍ ଅନ୍ତମ୍ ଡେତେ । ଆମନ୍ ବର୍ତନ୍, ଆନିଞ୍ଜି ଞେନ୍ଆଡଙ୍ ତିଡ୍ଲିଁୟ୍ଞ୍ଜି, ବନ୍ଡ ଅପାରାଲିଁୟ୍, ଆନିଞ୍ଜି ଞେନ୍ଆଡଙ୍ ତିଡ୍ଲିଁୟ୍ଞ୍ଜି ବନ୍ଡ ଅଜିଡ୍ଜନଙ୍ ଞେନ୍ ଅଃନିମ୍ଲନାୟ୍; ଞେନ୍ ଆଙ୍ଗା ସେତ୍ତାତିଁୟ୍ ? ଆରି ଞେନ୍ ଅଲିନ୍ ସାୟ୍ଲାୟ୍ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.