Juray Soura Bible
ମନଙ୍ ଞନଙ୍ଞଙ୍ବର୍ 2
ଗିଆନ୍ ଆ ଓଞୋଲ୍କୁୟ୍
ଏ ଅ ଅନ୍ଞେନ୍, ଆମନ୍ ବର୍ନେଞେନ୍ ଅମ୍ଡଙା, ଆରି ବନାଁୟ୍ବର୍ଞେନ୍ ମନ୍ନଲୋଙ୍ନମ୍ ଡକ୍କୋଆ । ଆମନ୍ ଗିଆନବାନ୍ ଡାଲୁଡା ଆରି ବୁଡ୍ଡିଲୋଙନ୍ ମନନ୍ ତିୟେଣ୍ଡେନ୍ । ଓଓ, ଆମନ୍ ମନଙ୍ ଅନିୟମନ୍ ଆଡଅଙ୍ ଓଡ୍ଡେଆ; ଆରି ବୁଡ୍ଡିନ୍ ଆସନ୍ ସୋଡ଼ା ସର୍ରଙନ୍ ବାତ୍ତେ ଓଡ୍ଡେଆ; ରୁପ୍ପାନ୍ ଅନ୍ତମ୍ ଆନିନ୍ଆଡଙ୍ ସାୟ୍ବା ଆରି ଆତିଲ୍ତିଲନ୍ ଆରନ୍ନା ଅନ୍ତମ୍ ସାୟ୍ଡଙ୍ବା । ଏତ୍ତେଲ୍ଡେନ୍ ଆମନ୍ ପ୍ରବୁନ୍ ଆବର୍ନେ ଆବନତଙ୍ ଜନାତମ୍ ଆରି ଇସ୍ୱରନ୍ ଆ ଗିଆନ୍ ବରନ୍ ଞାଙ୍ତେ । ଇନିଆସନ୍ଗାମେଣ୍ତେନ୍ ପ୍ରବୁନ୍ ଗିଆନନ୍ ତିୟ୍ତେ; ଆତଅଡନ୍ ସିଲଡ୍ ଗିଆନନ୍ ଡ ବୁଡ୍ଡିନ୍ ଡୁଙ୍ତନାୟ୍ । ଆନିନ୍ ମନଙ୍ ମରଞ୍ଜି ଆସନ୍ ଗିଆନନ୍ ତର୍ତୁମ୍ତେ, ଆନିନ୍ ଲବଡ୍ଡିମରଞ୍ଜି ଆସନ୍ ଡରଙ୍ନେନ୍ ଅନ୍ତମ୍ । ଆନିନ୍ ଆଜାଡ଼ି ତଙରନ୍ ଡୋବ୍ଲେ ରପ୍ତିତେ,ଆରି ଆ ବୟ୍ଲେମରଞ୍ଜି ଆଜନିର୍ ତୁରିୟ୍ତଜି ।
ତିଆସନ୍ ଆମ୍ୱେନ୍ ଡରମ୍ମଗଡନ୍ ଡ ମନଙ୍ ଅନିୟମନ୍, ନିଆୟନ୍ ଡ ଅଡ଼୍କୋ ମନଙ୍ ତଙରନ୍ ଜନାତମ୍ । ଇନିଆସନ୍ଗାମେଣ୍ତେନ୍ ଗିଆନନ୍ ଉଗ୍ଗର୍ଲୋଙ୍ବେନ୍ ଗନ୍ତେ,ଆରି ପଡ଼େନେନ୍ ପରାନ୍ନାବେନ୍ ମଅଁୟ୍ତେ । ସିଲଡ୍ତ୍ତେ ମନଙ୍ ଅନିୟମନ୍ ଆମନ୍ ଆତୋଣ୍ତୋ ଜନଗ୍ଗେମର୍ ଡେତେ, ବୁଡ୍ଡିନ୍ ଆମନ୍ଆଡଙ୍ ଡୋବ୍ତମ୍ । ସିଲଡ୍ତ୍ତେ ଅଙ୍ଗା ଆମନ୍ରାଜି ଆଲ୍ଲେବରନ୍ ବର୍ତଞ୍ଜି, ଅଙ୍ଗା ଆମନ୍ରାଜି ଲୋଙଡ୍ ତଙର୍ଲୋଙନ୍ ତଙିୟ୍ନେନ୍ ଆସନ୍ ମନଙ୍ ତଙରନ୍ ଅମ୍ରେଙ୍ତଜି, ଅଙ୍ଗା ଆମନ୍ରାଜି ଏର୍ମନଙ୍ କାବ୍ବାଡ଼ାନ୍ ଆଲନୁମ୍ ଆସନ୍ ସର୍ଡାତଞ୍ଜି ଆରି ପେଲ୍ଲାମରଞ୍ଜି ଅନାଲ୍ଲେଲୋଙ୍ ମଅଁୟ୍ତଞ୍ଜି, ଅଙ୍ଗା ଆମନ୍ରାଜି ତର୍ଡମ୍ ତର୍ଡମ୍ ଆତଙର୍ ପରାନ୍ସାତ୍ତିନ୍ ଆରି ତର୍ଡମ୍ ତର୍ଡମ୍ ଆତଙର୍ ଏର୍ମନଙ୍, କେନ୍ ଅନ୍ତମ୍ ଏର୍ମନଙ୍ କାବ୍ବାଡ଼ାମରଞ୍ଜି ଆତଙର୍ ସିଲଡ୍ ଆମନ୍ଆଡଙ୍ ଡନୋବନ୍ ଡେତେ ।
ଆରି, ଅବୟ୍ନେ ଆଡୁକ୍ରି ତୋଙ୍କା, ଆନା ଆବନେଣ୍ତିଆଇଙନ୍ ଆସାଙ୍ଗଆଡଙ୍ ଅମ୍ରେଙ୍ଲେ ଆ ଇସ୍ୱରନ୍ ଆନଗଡ୍ କରୋଡାତେ । ଆନା ଆସିଙ୍ ରନବ୍ବୁବାନ୍ ଆରି ଆନା ଆତଙର୍ ରନବ୍ବୁବାନ୍ ଜିର୍ତେ, ଆନା ଆମଙ୍ବା ଜନିରନ୍ଡେଏଣ୍ଡେନ୍ ଆନ୍ନିଙ୍ ଅଃୟର୍ନାଜି । ଆରି ଅନମେଙନ୍ ଆତଙର୍ଗଡ୍ ଅଃଞାନେ । କେନ୍ଅନ୍ତମ୍ ଅବୟ୍ନେ ଆଡୁକ୍ରି ଆମଙ୍ବା ଆଜନିର୍ ସିଲଡ୍ ଆମନ୍ଆଡଙ୍ ଡନୋବନ୍ ଡେତେ । ତି ଆସନ୍ ଆମନ୍ ଡରମ୍ମମରଞ୍ଜି ଆତଙର୍ଗଡ୍ ତଙିୟ୍ନା ଆରି ଡରମ୍ମମରଞ୍ଜି ଆତଙର୍ଗଡ୍ ତଙିୟ୍ନେନ୍ ଅବ୍ନୋକ୍କାନା, ଇନିଆସନ୍ଗାମେଣ୍ତେନ୍ ଲଗଡ୍ମରଞ୍ଜି ଡେସାଲୋଙ୍ ଡକୋତଞ୍ଜି,ଆରି ବୟ୍ଲେମରଞ୍ଜି1 ତେତ୍ତେ ଅଡ଼୍କୋ ଡିନ୍ନାନ୍ ଡକୋତଞ୍ଜି । ବନ୍ଡ ପେଲ୍ଲାମରଞ୍ଜି ଡେସାନ୍ ସିଲଡ୍ ଅନବ୍ସେଡନ୍ ଡେତଜି ଆରି ବାଁୟ୍ସିମରଞ୍ଜି ତେତ୍ତେ ସିଲଡ୍ ଅନମ୍ଡୁଙନ୍ ଡେତେ ।
Source notes (1)
- Footnote ଏର୍ନିଣ୍ଡୟ୍ମରନ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.