Juray Soura Bible
ମନଙ୍ ଞନଙ୍ଞଙ୍ବର୍ 13
ଗିଆନଡମନ୍ ଆଡାଙ୍ଗାଡ଼ାଅନ୍ ଆପ୍ପେୟନ୍ ଆ ଞନଙ୍ଞଙ୍ବର୍ ଅମ୍ଡଙ୍ତେ; ବନ୍ଡ ନିଣ୍ତୟ୍ମରନ୍ ଆ ଞନଙ୍ଞଙ୍ବରନ୍ ଅଃନମ୍ଡଙେ ।
ମନ୍ରାନ୍ ଆତଅଡ୍ ଆବର୍ତନ୍ ଆବର୍ନେ ଆ ଜଅ ବାତ୍ତେ ସୁକ୍କା ଡକୋତନ୍, ବନ୍ଡ ବାଁୟ୍ସିମରନ୍ ଆପୁରାଡ଼ା ସଙ୍ଗତାନ୍ ଞାଙ୍ତେ ।
ଅଙ୍ଗା ଆମନ୍ରା ଆନିନ୍ଡମନ୍ ଆତଅଡନ୍ ଡଙ୍ତେ, ଆନିନ୍ ଆନିନ୍ଡମନ୍ ଆପରାନ୍ନା ଡୋବ୍ତେ; ବନ୍ଡ ଅଙ୍ଗା ଆମନ୍ରା ଏର୍ନିୟମନ୍ ବର୍ତନେ, ଆନିନ୍ ଅସେଡ୍ତେ ।
ଆଡ଼ସାମରନ୍ ଆ ମନ୍ନଲୋଙ୍ ସାଜେନ୍ ଜନଙ୍ଡେନ୍ ଇନ୍ନିଙ୍ ଅଃଞାଙେ, ବନ୍ଡ ଲଡୟ୍ କାବ୍ବାଡ଼ାମରନ୍ ଆପରାନ୍ନା ଜେଲ୍ଜେଲ୍ତେ ।
ଡରମ୍ମମରନ୍ ପାତ୍ୟାନ୍ ଏଡ଼ୁର୍ମଡ୍ତେ; ବନ୍ଡ ପେଲ୍ଲାମରନ୍ ସଅଡମନ୍ ଅନ୍ତମ୍, ଆରି ଆନିନ୍ ଗରୟ୍ମଡ୍ତେ ।
ଡରମ୍ମଗଡନ୍ ଲଗଡ୍ ତଙର୍ଗଡ୍ ଆଜରୁର୍ତେଞ୍ଜି ଆମନ୍ରାଜି ଡୋବ୍ତେ ; ବନ୍ଡ ପେଲ୍ଲାଗଡନ୍ ଇର୍ସେମରନ୍ ସବ୍ଡିଡ୍ତେ ।
ଲାଙ୍ଲେଡ୍ ମନ୍ରାନ୍ ଆନିନ୍ଡମ୍ ଗମାଙ୍ ଗାମ୍ଲେ ଅବ୍ତୁୟ୍ତନେ, ବନ୍ଡ ଆମଙ୍ବାନ୍ ଇନ୍ନିଙ୍ତଡ୍, ଲାଙ୍ଲେଡ୍ ମନ୍ରାନ୍ ଆନିନ୍ଡମ୍ ଡୋଲେୟ୍ମର୍ ଗାମ୍ଲେ ଅବ୍ତୁୟ୍ନେ, ବନ୍ଡ ଆମଙ୍ବା ଜବ୍ର ରନ୍ନା ଡକୋ ।
ମନ୍ରାନ୍ ଆନର୍ଜେ ଆ ପରାନ୍ନାନ୍ ଆତନାଣ୍ତେ ଅନ୍ତମ୍; ବନ୍ଡ ଡୋଲେୟ୍ମରନ୍ ବନବ୍ତଙନ୍ ଅଃନମ୍ଡଙେ ।
ଡରମ୍ମମରନ୍ ଆସନାଆର୍ ସର୍ଡାତନ୍; ବନ୍ଡ ପେଲ୍ଲାମରନ୍ ଆ ପିଙ୍କ ପନବ୍ଞିଡନ୍ ଡେତେ ।
କଙ୍କ୍ରିନ୍ ଡକୋଏଣ୍ଡେନ୍ ଗୋଡ଼େନ୍ତୁମ୍ ଡୁଙ୍ତନାୟ୍ । ବନ୍ଡ ମନଙ୍ ଞନଙ୍ଞଙ୍ବରନ୍ ଆଞରିତେନ୍ ଆମନ୍ରା ଆମଙ୍ ଗିଆନନ୍ ଡକୋ ।
ପାତ୍ୟାନ୍ ବାତ୍ତେ ଆନର୍ଜେ ରନ୍ନାନ୍ ରସମ୍ତେ, ବନ୍ଡ ଅସିନ୍ ବାତ୍ତେ କାବ୍ବାଡ଼ାଲନ୍ ଆରର୍ଜେତେନ୍ ଆନର୍ଜେ ଗୋଗୋୟ୍ତେ ।
ଅଙ୍ଗାଆତେ ଆସାଲନ୍ ଡକୋତମ୍ବୋ ତିଆତେ ଅଃଲଞାଙ୍ଲବଡେନ୍ ଉଗ୍ଗର୍ଲୋଙନ୍ ମାଡ୍ଡ ଡଣ୍ତଡମ୍; ବନ୍ଡ ଉଗ୍ଗର୍ଲୋଙନ୍ ଆରାସାତମ୍ବନ୍ଆତେ ଞାଙ୍ଲବଡେନ୍ ତିଆତେ ଅନମେଙ୍ନୁବନ୍ ଅନ୍ତମ୍ ।
ଅଙ୍ଗା ଆମନ୍ରା ଞନଙ୍ଞଙ୍ବରନ୍ ଆଲ୍ଲେତେ, ଆଡଅଙ୍ଲୋଙନ୍ ଆନିନ୍ ଅନବ୍ସେଡନ୍ ପାଙ୍ତାୟ୍ ବନ୍ଡ ଆନା ବନାଞନ୍ଆଡଙ୍ ବତଙ୍ତେ, ଆନିନ୍ ଓଞୋଲ୍କୁଜନ୍ ଞାଙ୍ତେ ।
ରନବୁନ୍ ଅନୋଡ଼େଙନ୍ ସିଲଡ୍ ଅନାବ୍ୟର୍ ଆସନ୍ ଗିଆନମରନ୍ ଆ ବନାଁୟ୍ବର୍ ଅନମେଙନ୍ ଆ ଡୁଙ୍ଡମ୍ନେଡାନ୍ ଅନ୍ତମ୍ ।
ମନଙ୍ ବୁଡ୍ଡିମରନ୍ ଆ ଜଅ ସନାୟୁମନ୍, ବନ୍ଡ ବାଁୟ୍ସିମରନ୍ ଆ ତଙର୍ ସଙ୍କଡ଼ା ।
ଡିଲେ ସାଲ୍ଲାକିମରନ୍ ବୁଡ୍ଡିନ୍ ବାତ୍ତେ କାବ୍ବାଡ଼ାତନ୍, ବନ୍ଡ ଉଲ୍ଲୁମରନ୍ ଏର୍ଗିଆନନ୍ ବର୍ରେଙ୍ଲନ୍ ପାଙ୍ତେ ।
ପେଲ୍ଲା ପାଙ୍ଲଙ୍ବର୍ମରନ୍ ତନଙଡ୍ଲୋଙନ୍ ଗଲୋତେ; ବନ୍ଡ ଡର୍ନେଡମନ୍ ଆ ପାଙ୍ଲଙ୍ବର୍ମରନ୍ ସୁକ୍କାନ୍ ପାଙ୍ତାୟ୍ ।
ଅଙ୍ଗା ଆମନ୍ରା ସାସନନ୍ ଆଲ୍ଲେତେ, ଆନିନ୍ ଡୋଲେୟ୍ମର୍ ଡେତେ ଆରି ଗନ୍ଡ୍ରୟ୍ଜନ୍ ଞାଙ୍ତେ; ବନ୍ଡ ଆନା ଞନଙ୍ଞଙ୍ବରନ୍ ଜାତେ, ଆନିନ୍ ସନେଙ୍କେନ୍ ଞାଙ୍ତେ ।
ଉଗର୍ଲୋଙ୍ ଆର୍ଲଡୟ୍ଲଙ୍ତନ୍ ଆତେ ଞାଙ୍ଲବଡେନ୍ ପରାନ୍ନାନ୍ ଜବୁଙ୍ଡମ୍ ଡେତେ,ଆରି ଉଲ୍ଲୁମରନ୍ ପରାନ୍ସାତ୍ତିନ୍ ଆକାବ୍ବାଡ଼ା ଆନମ୍ରେଙ୍ ଏଡ଼ୁର୍ମଡ୍ତେ ।
ଗିଆନମରନ୍ ସରିନ୍ ତଙିୟ୍ନାବା, ସିଲଡ୍ତ୍ତେ ଆମ୍ୱେନ୍ ଗିଆନମରନ୍ ଡେତବେନ୍; ବନ୍ଡ ଉଲ୍ଲୁମରନ୍ ସରିନ୍ ଆଗଡ଼ିନେ ପନବ୍ରଡନ୍ ଞାଙ୍ତେ ।
ଇର୍ସେମରଞ୍ଜିଆଡଙ୍ ପରାନ୍ସାତ୍ତିନ୍ ସଣ୍ତୋଙ୍ତେ; ବନ୍ଡ ଡରମ୍ମମରନ୍ଆଡଙ୍ ମନଙ୍ ଓଞୋଲ୍କୁଜନ୍ ତନିୟନ୍ ଡେତେ ।
ମନଙ୍ମରନ୍ ଆ ଉଲେଙନଞ୍ଜି ଆସନ୍ ଡନେନ୍ ଅମ୍ରେଙ୍ଲେ ଜିର୍ତେ; ବନ୍ଡ ଇର୍ସେମରନ୍ ଆନର୍ଜେ ଡରମ୍ମମରନ୍ ଆସନ୍ ତର୍ତୁମ୍ତେ ।
ଡୋଲେୟ୍ମରନ୍ ଅର୍ରନ୍ ବାତ୍ତେ ଜନ୍ରୋମନ୍ ଗୋଗୋୟ୍ ଅବ୍ଗୁର୍ତେ ବନ୍ଡ ଲାଙ୍ଲେଡ୍ ମନ୍ରା ବୁର୍ଡନ୍ ଆସନ୍ ଅସେଡ୍ତେ ।
ଆନା ଡାଙ୍ଗୋନ୍ ଆ ଆଞନର୍ରମ୍ ଅଃଗୟେ, ଆନିନ୍ ଆ ଡାଙ୍ଗଡ଼ାଅନନ୍ଆଡଙ୍ ଏଡ଼ୁର୍ମଡ୍ତେ; ଆରି ଆନା ଆନିନ୍ଆଡଙ୍ ଡୁଙ୍ୟମ୍ତେ, ଆନିନ୍ ଅବ୍ତାଡ଼ନ୍ ଆନିନ୍ଆଡଙ୍ ପବ୍ରଡ୍ତେ ।
ଡରମ୍ମମରନ୍ ଆ ପରାନ୍ନାନ୍ ଅଃବୋଓ ଜୋମ୍ତେ, ବନ୍ଡ ଇର୍ସେମରନ୍ ଆ କିମ୍ପୋଙ୍ ଅଃବୋଓଏ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.