Juray Soura Bible
ଜିସାୟ 64
ଆନା ଡେସାବାଜି ଏଙ୍ଗାଲେ ତେମଡ୍ନମ୍ ବରୁଞ୍ଜି ବତଙ୍ତଜି ତିଆସନ୍ ଆମନ୍ ରୁଆଙନ୍ ସିଲଡ୍ ପଡ୍ଲନ୍ ଜିରାୟ୍, ତଗୋନ୍ ଅଙଲନ୍ ଆଜ୍ରୋମ୍ତେନ୍ ଅନ୍ତମ୍, ତଗୋନ୍ ଡାଆନ୍ ଆରବ୍ଗୋଗ୍ଗୋତେନ୍ ଅନ୍ତମ୍ ଆମ୍ବେନ୍ ବନେରାନମ୍ଜିଆଡଙ୍ ଅଞୁମ୍ନମ୍ ଆନବ୍ଜନା ଆସନ୍ ପଡ୍ଲନ୍ ଜରିର୍ରାଞୟ୍ ଆରି ଜାତିମରଞ୍ଜି ତେମଡ୍ନମ୍ ବତଙ୍ତଜି ବନ, ଞେନ୍ ଅଙ୍ଗାତେ ଏନ୍ନାସାଲନାୟ୍ ତିଆଡିଡ୍ ଆମନ୍ ପଡ୍ଲନ୍ ଜିର୍ରାୟ୍ ଆରି ଆମନ୍ ସାନ୍ନି କାବ୍ବାଡ଼ାନ୍ ଲୁମେନ୍ ତିଆସନ୍ ବରୁଞ୍ଜି ତେମଡ୍ନମ୍ ବତଙେଞ୍ଜି । ଇନିଆସନ୍ଗାମେଣ୍ଡେନ୍ ଆନା ଆନିନ୍ ଜନଗ୍ଗେମରନ୍ ଆସନ୍ ଆକାବ୍ବାଡ଼ାନ୍ ଲୁମ୍ତେ ଗବ୍ଡେଲ୍ତଜି, ଆମନ୍ ଅମ୍ରେଙ୍ଲେ ଆନ୍ନା ଇସ୍ୱରନ୍ ଆସନ୍ ଆମ୍ମୁଙ୍ ମା ସିଲଡ୍ ମନ୍ରାନ୍ ଅଲୁଡନ୍ ବାତ୍ତେ ଅନ୍ରଙ୍ ଅମ୍ଡଙେ ଆରି ଅମଡନ୍ ବାତ୍ତେ ଅନ୍ରଙ୍ ଅମ୍ଡେ । ଅଙ୍ଗା ଆମନ୍ରା ସର୍ଡାନ୍ ବାତ୍ତେ ଡରମ୍ମ କାବ୍ବାଡ଼ାନ୍ ଲୁମ୍ତେ, ଅଙ୍ଗା ମନ୍ରାଜି ତଙର୍ଗଡ୍ନମ୍ ଆମନ୍ଆଡଙ୍ ମନ୍ନେତମ୍ଜି, ଆନିଞ୍ଜି ସରିନ୍ ଆମନ୍ ଏଲ୍ରବାଙ୍ତେ; ଗିୟ୍ବା, ଆମନ୍ ବରାବ୍ଲମ୍, ଇନିଆସନ୍ଗାମେଣ୍ଡେନ୍ ଞେନ୍ ଇର୍ସେନ୍ ଏଲୁମ୍ଲାୟ୍ ଆରି ଇର୍ସେକାବ୍ବାଡ଼ାନ୍ ଲୁମ୍ ଗୋଗୋୟ୍ ଡିନ୍ନାଜାୟ୍ ଏଡକୋଲନାୟ୍, ଇନ୍ଲେଞ୍ଜି ଏଙ୍ଗାଲେ ଅନୁରନ୍ ଏଞାଙାୟ୍ ? ଇନିଆସନ୍ଗାମେଣ୍ଡେନ୍ ଞେନ୍ ଅଡ଼୍କୋନ୍ଲେନ୍ ଏର୍ମଡ଼ିର୍ମରନ୍ ଅନ୍ତମ୍ ଡେଲଲେନ୍ ଆରି କାବ୍ବାଡ଼େଲେଞ୍ଜି ଅଡ଼୍କୋନ୍ ଏର୍ମଡ଼ିର୍ ସିନ୍ରିନ୍ ଅନ୍ତମ୍ ଡେଏନ୍ ଆରି ଞେନ୍ ଅଡ଼୍କୋନ୍ଲେନ୍ ଆସରଲନ୍ ଅନ୍ତମ୍ ଡେଲଲେନ୍ ଆରି ଇର୍ସେଲେଞ୍ଜି ଅଡ଼୍କୋନ୍ ରିଙ୍ଙ୍ଗେନ୍ ଅନ୍ତମ୍ ଇନ୍ଲେଞ୍ଜିଆଡଙ୍ ପାଙ୍ରିଙ୍ତଲେନ୍ । ଆନା ପାର୍ତନା ଡାଲନ୍ ଆନ୍ନିଙ୍ ଅମଙ୍ବାନମ୍ ଅଃୟର୍ନାଜି, ଆନ୍ନିଙ୍ ସନାୟ୍ସିନ୍ ଆସନ୍ ଅମଙ୍ବାନମ୍ ଅଃନିୟେଜି । ତିଆସନ୍ ଆମନ୍ ଅମଙ୍ବାଲେନ୍ ସିଲଡ୍ ମୁକାନମ୍ ଅବ୍ସସଏନ୍ ଆରି ଇର୍ସେଲେନ୍ ଆସନ୍ ଆମନ୍ ଲନ୍ଲେନ୍ଆଡଙ୍ ଅମ୍ରେଙ୍ଲଲେନ୍ ।
ବନ୍ଡ ଏ ପ୍ରବୁ, ନମି ଆମନ୍ ଆପ୍ପେୟ୍ଲେନ୍ ଡେଲମ୍; ଇନ୍ଲେଞ୍ଜି ଲବନ୍, ଆମନ୍ କୁମ୍ବିୟ୍ମର୍ଲେନ୍, ଆରି ଞେନ୍ ଅଡ଼୍କୋନ୍ଲେନ୍ ଅସିନମ୍ ବାତ୍ତେ ଆ ତୁନ୍ଡ୍ରୁବ୍ମର୍ଜି । ଏ ପ୍ରବୁ, ଗୋଗୋୟ୍ ଡିନ୍ନାଜାୟ୍ ଇନ୍ଲେଞ୍ଜିଆଡଙ୍ ବାବ୍ରାବ୍ଡଙ୍ଲେନ୍, ଅଡ଼େ ଆଏଡ଼ର୍ ଆସନ୍ ଇର୍ସେଲେନ୍ ମନ୍ନଲୋଙ୍ନମ୍ ଡକ୍କୋଡଙ୍; ଞେନ୍ ଏକାକୁର୍ତିତନାୟ୍, କାନକାରମ୍ ଗାମ୍ଲେନ୍, ଇନିଆସନ୍ଗାମେଣ୍ଡେନ୍ ଞେନ୍ ଅଡ଼୍କୋନ୍ଲେନ୍ ମନ୍ରାନମ୍ଜି । ମଡ଼ିର୍ ଗଡ଼ାନମ୍ଜି ଅଡ଼୍କୋନ୍ ଆରି ସିଓନ ଗଡ଼ାନ୍ ନିୟ୍ ଆରିଙ୍ରିଙ୍ ଡେଏନ୍, ଆରି ଜିରୁସାଲମନ୍ ରିଡ଼ାଙାଜେନ୍ କି ଲବଲୋଙନ୍ ମାୟ୍ଲନ୍ । ପୁର୍ବାନ୍ ଜୋଜୋଲେଞ୍ଜି ଅଙ୍ଗାଲୋଙ୍ ଆମନ୍ଆଡଙ୍ ସେଙ୍କେଲମ୍ଜି, ତି ମଡ଼ିର୍ ଡ ମନଙ୍ଡମନ୍ ଅସିଙ୍ଲେନ୍ ତଗୋଙ୍ ବାତ୍ତେ ଜୋମ୍ତୋଡେନ୍ ଆରି ଅଡ଼୍କୋନ୍ ମରଙୟ୍ଡାନ୍ ଆଡ୍ରକୋନେଲେଞ୍ଜି ଅଡ଼୍କୋନ୍ ଗୁରୁଡେଆୟ୍ତେ । ଏ ପ୍ରବୁ, କେନ୍ ଅଡ଼୍କୋନ୍ ଡେଏନ୍ ଜନଙ୍ଡେନ୍ ଆମନ୍ ଇନି ଡଙ୍ଡଙ୍ଡମ୍ଲନ୍ ଡକୋତନ୍ ପଙ୍ ? ଆମନ୍ ରିଙ୍ ଗାମ୍ଲେ ଡକୋଡାଲନ୍ ଇନ୍ଲେଞ୍ଜିଆଡଙ୍ ଡଣ୍ଡାୟ୍ତଲେନ୍ ?
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.