Juray Soura Bible
ଜିସାୟ 58:11
Verse 11 is marked below, with the whole chapter around it. Read from the start
ଆଜାଡ଼ିନ୍ ଆନମ୍ନେନ୍
ପ୍ରବୁନ୍ ବର୍ତନେ, “ରେୟ୍ଲଙ୍ ଆରି ଅବ୍ସର୍ରଙ୍ଲନ୍ ଅପ୍ପୁଙ୍ବର୍ବା, ପନେଡନ୍ ଅନ୍ତମ୍ ସର୍ରଙ୍ନମ୍ ଅବ୍ସଡ୍ଡାଆ, ଆନିଞ୍ଜି ଏର୍ଡରମ୍ମ କାବ୍ବାଡ଼ାନ୍ ଆସନ୍ ମନ୍ରାଞେଞ୍ଜିଆଡଙ୍ ଡ ଜାକୁବନ୍ ଆକେଜ୍ଜାଜିଆଡଙ୍ ଆ ଇର୍ସେନ୍ ଆସନ୍ ଆନିଞ୍ଜି ଅବ୍ଜନାବାଜି । ଡେଲୋଜନଙ୍ଡେନ୍ ଆନିଞ୍ଜି ଅଡ଼୍କୋ ଡିନ୍ନାନ୍ ଞେନ୍ଆଡଙ୍ ସାୟ୍ଡଙ୍ଲିୟ୍ଞ୍ଜି ଆରି ତଙର୍ଲେନ୍ ଆବର୍ନେ ଜନନାନ୍ ଆସନ୍ ସର୍ଡାଏଞ୍ଜି; ଅଙ୍ଗା ଆକେଜ୍ଜମର୍ଜି ଡରମ୍ମ କାବ୍ବାଡ଼ାନ୍ ଲୁମ୍ତଜି ଆରି ଇସ୍ୱରନ୍ ଆ ବନାଁୟ୍ବର୍ ଅଃନମ୍ରେଙେଜି, ଆନିଞ୍ଜି ଅନ୍ତମ୍ ଆନିଞ୍ଜି ଡରମ୍ମ ବନାୟ୍ବରନ୍ ଆବର୍ନେ ଞେନ୍ଆଡଙ୍ ବର୍ତିୟ୍ଞ୍ଜି ଆରି ଇସ୍ୱରନ୍ ଆମଙ୍ବା ଆୟର୍ନେ ଆସନ୍ ସର୍ଡାତଜି ।”
ଆନିଞ୍ଜି ବର୍ତଞ୍ଜି, ଇନ୍ଲେଞ୍ଜି ଇନିବା ଆନମ୍ତମ୍ବୋ ଇନିବା ଆମ୍ବେନ୍ ଏଗ୍ଗିଜେ ? ଇନ୍ଲେଞ୍ଜି ଇନିବା ତର୍ଡମ୍ ତର୍ଡମ୍ ଆପରାନ୍ନା ଅବ୍ଡଣ୍ଡାୟ୍ ତବୋ ଇନିବା ଆମ୍ବେନ୍ ଏଃନିୟମେ ? ଗିୟ୍ବା, ଆନମ୍ନାଇଙନ୍ ଆମ୍ବେନ୍ ତର୍ଡମ୍ ଏରାମ୍ମୁୟ୍ ଡକୋନେନ୍ ଆସନ୍ ଏଏର୍ତେ ଏଗୋୟ୍ତେ ଆରି ଅବ୍ବୋର୍ସାଲନ୍ ଏକାବ୍ବାଡ଼ାତନେ । ଗିୟ୍ବା, ଆମ୍ବେଞ୍ଜି ଗୋଡ଼େନ୍, ଅଲ୍ତିଡନ୍ ଡ ଏପେଲ୍ଲାତନ୍ ଆରି ତର୍ଡମ୍ କୁମ୍କୁମ୍ସିଲଡ୍ ଆମ୍ବେନ୍ ଏଲ୍ତିତେ । ଆମ୍ବେନ୍ ଏଇଃୟମ୍ତେ ଡ ଏନ୍ନେଲେ ଏଆନମ୍ଲନାୟ୍ ଡେନ୍ ଇସ୍ୱରନ୍ ପାର୍ତନାଲେନ୍ ଅମ୍ଡଙ୍ତେ ଏଗାମ୍ତେ ପଙ୍ ? ଇନି ମନ୍ରାନ୍ ଆପରାନ୍ନା ଡନଣ୍ଡାୟନ୍ ଆସନ୍ ଏନ୍ନେଗନ୍ ଆନମ୍ନେ ଞେନ୍ ଏଃଗବ୍ରିଲାୟ୍ ପଙ୍ ? କୁରିଙ୍ଜିଙନ୍ ଅନ୍ତମ୍ ଅବବନ୍ ବବ୍ରୁମ୍ତେ, ଆରି ଲୁଲ୍ଲୁଡନ୍ ଆସନ୍ ଅକାକାବନ୍ ଡ କୋମାବନ୍ ଜାୟ୍ତାନ୍ ବେଲ୍ବା । କେନ୍ ଆନମ୍ନେ ପଙ୍ ପ୍ରବୁନ୍ ଜାତେଗାମ୍ଲେ ଏଇଃୟମ୍ତେ ?
ଏନ୍ନେଗନ୍ ଆନମ୍ନେ ଞେନ୍ ଅଡ୍ସେଡାଲାୟ୍, ପେଲ୍ଲାଡମନ୍ ଅନ୍ତମ୍ ଆଜନିବାନ୍ ଉୟ୍ବା, ରାଙଙ୍ଲୋଙନ୍ ଆଜନିବାଡ୍ ଉର୍ବା ଆରି ଗୋଡ଼େନ୍ ଆରମ୍ଡୁଙ୍ତାଞଞ୍ଜି ଆମନ୍ରାଜିଆଡଙ୍ ଉମ୍ରେଙ୍ବାଜି, ଆରି ଅଡ଼୍କୋନ୍ ଆ ରାଙଙ୍ ଲବ୍ଗଡ୍ବା । ଆଡୋଲେୟ୍ମରନ୍ଆଡଙ୍ ଜନୋମନ୍ ବାନ୍ତେବା, ଅସିଙ୍ତଡନ୍ ଡ ଡୋଲେୟ୍ମରଞ୍ଜିଆଡଙ୍ ଅସିଙ୍ବେନ୍ ଓରୋଙ୍ବା, ସିନ୍ରିତଡନ୍ ଆମନ୍ରାଆଡଙ୍ ସିନ୍ରିନ୍ ଅବ୍ଜିଜିବା ଆରି ତର୍ଡମ୍ କୁଲମ୍ମର୍ବେଞ୍ଜିଆଡଙ୍ ସନାୟ୍ସିନ୍ ଆନମ୍ନେନ୍ ଆସନ୍ ଏଅସାଡଙ୍ତେ । ଏନ୍ନେଲେ ଏଲୁମେନ୍ଣ୍ଡେନ୍ ଆଡ୍ରୁଙ୍ୟୋଙ୍ତାଞନ୍ ଡୋତ୍ତାନ୍ ଆସନାଆର୍ ଅନ୍ତମ୍ ଡେତବେନ୍, ଆରି ପନାରାବେନ୍ ଲମନଙ୍ତବେନ୍ । ଆମନ୍ଆଡଙ୍ ଡନୋବନ୍ ଆସନ୍ ଅଡ଼୍କୋ ଡିନ୍ନାନ୍ ଞେନ୍ ଆମ୍ବେଞ୍ଜି ସରିନ୍ ଡକୋତନାୟ୍; ଆରି ଞେନ୍ ଆମ୍ବେଞ୍ଜି ସରିନ୍ ଡକୋଲନାୟ୍ଡେନ୍ ଅଡ଼େଙ୍ଗା ଜାକିଁୟ୍ଡେନ୍ ଡନୋବନ୍ ଏଞାଙ୍ତେ । ତିଆଡିଡ୍ ଆମ୍ବେନ୍ ଏଓଡ୍ଡେତେ ଆରି ପ୍ରବୁନ୍ ଜାଲଙ୍ତବେନ୍; ଆମ୍ବେନ୍ ଏୟେତେ ଆରି ଆନିନ୍ ଗାମ୍ତେ ଞେନ୍ ତେନ୍ନେ ଡକୋ । ଅମଙ୍ଲୋଙ୍ବେନ ସିଲଡ୍ ଆମ୍ବେନ୍ ରାଙଙନ୍ ଏଉୟ୍ତେ ଆରି ଅଣ୍ଡେର୍ସିବେନ୍ ଅବ୍ତୁୟ୍ଲେ ପରାନ୍ସାତ୍ତିନ୍ ଆବର୍ନେ ଏବର୍ତନେ । ଆମ୍ବେନ୍ ଆଡୋଲେୟ୍ମରନ୍ ଜନୋମନ୍ ତିୟ୍ବା ଆରି ଡୁକମରନ୍ ଆପରାନ୍ନା ଅବ୍ସର୍ଡାବା, ଏତ୍ତେଲ୍ଡେନ୍ ଆଲୋଙଡ୍ରେଙନ୍ ସନାଆର୍ବେନ୍ ରାଙ୍ଡାତେ ଆରି ଲନୋଙଡ୍ବେନ୍ ତମ୍ମାବ୍ ଆସନାଆର୍ ଅନ୍ତମ୍ ଡେତେ । ପ୍ରବୁନ୍ ଅଡ଼୍କୋ ଡିନ୍ନାନ୍ ଆମ୍ବେନ୍ଆଡଙ୍ ତଙରନ୍ ଅବ୍ତୁୟ୍ତବେନ୍ ଆରି ଆରିଙ୍ରିଙ୍ରେଙନ୍ ପରାନ୍ନାବେନ୍ ଅବ୍ସର୍ଡାତେ । ଅଜାଙ୍ବେଞ୍ଜି ରବ୍ଡୋତେ ଆରି ଆମ୍ବେନ୍ ଡାଆନ୍ ଆର୍ରୁଡାତେଞ୍ଜି ଆକୋତ୍ତା ଡ ଡାଆନ୍ ଅଃନଞଡେନ୍ ଆ ଡୁଙ୍ଡମ୍ନେଡାନ୍ ଅନ୍ତମ୍ ଡେତେ । ଆର୍ରିଡ଼ାଙେନ୍ ଗଡ଼ାତାଲନ୍ ମନ୍ରାବେଞ୍ଜି ବାର୍ତୁବ୍ତଜି ଆରି ଆପାପୁରନ୍ ଜିମ୍ମି ଅବ୍ଡୋତଜି, ଆମ୍ବେଞ୍ଜି ଆରିଡ଼ାଙ୍ କିନ୍ତାଲନ୍ ଆତନ୍ରୁବ୍ମର୍ଜି, ଆରସେଡେନ୍ ଆସିଂଜି ଡ ତଙରନ୍ ବନାର୍ତୁବନ୍ ଗାମ୍ଲେ ଜନାତଜି ।
ଲୋଲୋନେ ଡିନ୍ନା ବନାୟ୍ବରନ୍ ଆମନାନ୍ନେ
ଆମ୍ବେନ୍ ଲୋଲୋନେ ଡିନ୍ନାନ୍ ଆମ୍ବେନ୍ ମଡ଼ିର୍ ଗାମ୍ଲେ ଏଇଃୟମେନ୍ଡେନ୍ ତିଆଡିନ୍ନା ଇସ୍ସୁମ୍ବେନ୍ ବାତ୍ତେ ଏଲୁମ୍ଡଙ୍, ପ୍ରବୁନ୍ ମଡ଼ିର୍ ଡିନ୍ନାନ୍ ମନାନ୍ନେନ୍ ଡିନ୍ନା ଗାମ୍ଲେ ଏବର୍ରନ୍ଡେନ୍ ତିଆଡିଡ୍ ତର୍ଡମ୍ କାବ୍ବାଡ଼ାନ୍, ବନୁଲେନ୍ ଅଡ଼େ କଡାଡ଼ିଲନ୍ ଏର୍ଡକୋନେନ୍ ଲୋଲୋନେ ଡିନ୍ନାନ୍ ମାନ୍ନେବା । ଇନିଆସନ୍ଗାମେଣ୍ଡେନ୍ ପ୍ରବୁନ୍ କେନ୍ ଆବର୍ନେ ବର୍ରନେ, ଆମ୍ବେନ୍ ପ୍ରବୁନ୍ ଆମଙ୍ ଏସର୍ଡାତନ୍ । ଞେନ୍ ସମ୍ପରା ପୁର୍ତିଲୋଙନ୍ ଆମନ୍ଆଡଙ୍ ମାନ୍ନେତମ୍ଜି, ଆପ୍ପେୟ୍ବେନ୍ ଜାକୁବନ୍, ତରିୟ୍ଲାଞନ୍ ଆଲବ ଆମ୍ବେନ୍ ଏଞାଙ୍ତେ1 ।
Source notes (1)
- Footnote ଏଜୋମ୍ତେ
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.