Juray Soura Bible
ଜିସାୟ 55
ଇସ୍ୱରନ୍ ଆସନାୟୁମ୍
ଏ ଆଇର୍ଗାଲ୍ମର୍ଜି ଅଡ଼୍କୋମ୍ବେନ୍ ଡାଆରେଙନ୍ ଜିରାୟ୍ବା, ଆନାଆମଙ୍ ଇନ୍ନିଙ୍ ତଙ୍କାତଡ୍ ଆନିନ୍ ଇୟାୟ୍ତୋ; ଆମ୍ବେଞ୍ଜି ଜିରାୟ୍ବା ଞିଲେ ଜୋମ୍ମବା; ଜିରାୟ୍ବା ତଙ୍କାନ୍ ଏର୍ତନିୟନ୍ ଦ୍ରାକ୍ୟାଡାନ୍ ଡ ଆଡୁବନ୍ ଞିବା ।
ଇନିଗାମ୍ଲେ ଅଃଜୋମ୍ବନ୍ ଆ ଜିନିସଜି ଆସନ୍ ତଙ୍କାନ୍ ଏକର୍ସତେ ? ଅଡ଼େ ଅଙ୍ଗାତେ ଅଃବୋଓଲଙ୍ନେ ଇନିଆସନ୍ ଆମ୍ବେଞ୍ଜି ଏକାବାଡ଼ାତନ୍ ? ବର୍ରନେଞେନ୍ ମନଙ୍ ଅମ୍ଡଙ୍ବା ଡ ମନଙ୍ ଆଜନବ୍ଜି ଜୁମବା କି ଜେଲ୍ଜେଲନ୍ ଆ ଜିନିସଜି ଆସନ୍ ପ୍ରାନ୍ନାବେନ୍ ସର୍ଡାନେନ୍ ତିୟ୍ବା ।
ଡଲୁଲେ ଅମଙ୍ଞେନ୍ ଜିର୍ରାୟ୍ବା ଅମଙ୍ଡଙ୍ବାଆମ୍ବେଞ୍ଜି ପ୍ରାନ୍ନାବେନ୍ ଅମେଙ୍ତେ ଆମ୍ୱେନ୍ ଡ ଞେନ୍ ଅଃନ୍ନଞିଡେନ୍ ଆନସୟ, ଦାଉଦନ ଅଙ୍ଗା ଅନଗଡ୍ ତିୟ୍ଲାୟ୍ ତିଆତେ ଏଗବ୍ରିବା ।
ଗିୟ୍ବା ଞେନ୍ ଆବିରଣ୍ତାଜି ଆସନ୍ ସାକିନ୍ ଅନ୍ତମ୍ ଏତିୟ୍ତାୟ୍, ଆନିନ୍ ଅଡ଼୍କୋ କେଜ୍ଜାମର୍ଞ୍ଜି ଆସୋଡ଼ା ଗାମ୍ଲେ ବୁଡ଼ାରନ୍ ଏତିୟ୍ଲାୟ୍ ।
ଅଙ୍ଗା କେଜ୍ଜାଜି ଆମ୍ବେନ୍ ଏଜନାଏ ଆନିଞ୍ଜି ଆଡଙ୍ ଏଓଡେତେ ଡ ଅଙ୍ଗା କେଜ୍ଜାଜି ଅଃଜ୍ଜନାଲଜି ଅମଙ୍ବେନ୍ ଇର୍ରତାଜି । ଇସ୍ରାଏଲନ୍ ଆଇସ୍ଵର ଡରମ୍ମ ଅନ୍ତମ୍ କେନ୍ ଆତେ ଗଟେତେ; ଇନିଆସନ୍ଗାମେଣ୍ଡେନ୍ ଆନିନ୍ ଆଡଙ୍ ସନେନ୍ସେନ୍ ତିୟ୍ତବେନ୍ ।
ଅଙ୍ଗାଜାୟ୍ ଇସ୍ୱରନ୍ ଏଞାଙ୍ତେ ତି ଆଡିଡ୍ନିୟ୍ ଆନିନ୍ ସାୟ୍ବା ଆନିନ୍ ତୁୟାୟ୍ ଡକୋଲନ୍ଡେନ୍ ଆମଙବାନ୍ ପ୍ରାର୍ତନାବା ।
ଇର୍ସେମରନ୍ ଆତଙନ୍ ଡ ଏର୍ଡମ୍ମମରନ୍ ଆନିୟମନ୍ ଅଡ଼୍କୋନ୍ ଅମ୍ରେଙେତୋ, ଆନିନ୍ ଇସ୍ୱରନ୍ ଆମଙ୍ ୟର୍ରନାୟ୍ତୋ, ତିଲୋଙ୍ ଆନିନ୍ ସନାୟୁମନ୍ ତିୟ୍ତେ; ଆରି ଆନିନ୍ ଇସ୍ୱରନ୍ ଆମଙ୍ ୟର୍ରନାୟ୍ତତୋ, ଇନିଆସନ୍ଗାମେଣ୍ଡେନ୍ ଆନିନ୍ କେମ୍ମାନ୍ ତନିୟନ୍ ଆସନ୍ ଡକୋ ।
ଇସ୍ୱରନ୍ ବର୍ତନ୍, ସିନ୍ତାଞେନ୍ ଏଙ୍ଗାଲେ ସିନ୍ତାବେନ୍ ଏତେଲ୍ତଡ୍, ଆରି ତଙରବେନ୍ ଏଙ୍ଗାଲେ ତଙ୍ରଞେନ୍ ଏତେଲ୍ତଡ୍ ।
ଇନିଆସନ୍ଗାମେଣ୍ତେନ୍ ପୁର୍ତିନ୍ ସିଲଡ୍ ରୁଆଙନ୍ ଡିଅଙ୍ଗାଆଡେଙ୍ଗା, ଏତେଲେମା ତଙର୍ବେନ୍ ସିଲଡ୍ ତଙର୍ଞେନ୍ ଡେଙ୍ଗା ଡକୋ, ସିନ୍ତବେନ୍ ସିଲଡ୍ ସିନ୍ତାଞେନ୍ ସିଲଡ୍ ଗୋଗୋୟ୍ ଡକୋ ।
ଏଙ୍ଗାଲେ ତରୁବନ୍ ଡ ଆଡ଼େରନ୍ ରୁଆଙନ୍ ସିଲଡ୍ ଅଡେତାୟ୍ ଆରି ତେତେଲୋଙ୍ ଅୟର୍ରନେ, ବନ୍ଡ ଲବରେଙନ୍ ଡାଆନ୍ ଗନ୍ଲେ ଲବେଡାୟ୍ତେ, ଆରି ତାର୍ବାତ୍ତେ ଜଅନ୍ ଅଜତେ ଅଗାବନ୍ ଲେଡେଙ୍ତେ ଅର୍ରମରନ୍ ଆଜମ୍ମଲନ୍ ପଡ଼ାବ୍ତାୟ୍ ଡ ମନ୍ରାଞ୍ଜି ଆଗାନେ ଆସନ୍ ଜନୋମନ୍ ଞାଙ୍ତଜି ।
ଞେନ୍ ଇନି ବର୍ରତନାୟ୍ ତି ଆତେ ମା ଡେତେ ତାତ୍ତେ କାଜ୍ଜାନ୍ ଅଡ଼େ କି ଅମଙ୍ଞେନ୍ ଅୟର୍ରନାୟ୍,ଞେନ୍ ଇନି ଅସ୍ସୁମତିୟ ତାତ୍ତେମା ଡେତେ ଅଡ଼େ ଞେନ୍ ଅଙ୍ଗାକାବ୍ବାଡ଼ା ଅପ୍ପାୟତା ତି ଆତେ ଏଙ୍ଗାଲ୍ ଜାକିଁୟ୍ ଡେତେ ।
ତିଆସନ୍ “ଆମ୍ବେଞ୍ଜି ସର୍ଡାନ୍ ବାତ୍ତେ ସୟୁ ଗାମ୍ଲେ ଆମ୍ମୁଙ୍ ପାଙ୍ତବେଞ୍ଜି; ବରୁନ୍ରେଙନ୍ ମୁକାଗଡ୍ବେନ୍ ବାବ୍ବାବ୍ଲେ ଗନ୍ତଞ୍ଜି କି ବସେଙ୍ରେଙନ୍ ଆରାନୁବ୍ଜି ତାର୍ଜୋବ୍ସିତଞ୍ଜି ।
ଅବ୍ବାଙ୍ନୁବନ୍ ଆପାଲ୍ତେଙ୍ ଦେବଦାରୁ ଡ କାନ୍ତେସିଗାଜନ୍ ଆପାଲ୍ତେଙ୍ ମଞ୍ଜାତିନୁବନ୍ ଡୁଙ୍ତନାୟ୍ । ଆରି ତିଆତେ ପ୍ରବୁନ୍ ଆ ଗନୁଗୁ ଅନ୍ତମ୍ ଆରି ଅଃମୋସ୍ସାଏନ୍ ଆଏଡ଼ର୍ ଅରମ୍ମଡନ୍ ଅନ୍ତମ୍ ଡକୋତନ୍ ।”
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.