Juray Soura Bible
ଜିସାୟ 46
ବେଲ୍ସନୁମନ୍ ଆକୋଙ୍ଣ୍ତାୟ୍ଜି ଅଡ଼୍କୋନ୍ ଆ ଜନ୍ତୁଜି ଡୁଙ୍ଗୁଲେ ଲୋମ୍ତଜି, କମ୍ପୋଙ୍ଲୋଙନ୍ ଆତ୍ରଞିତନ୍ ଆଜନ୍ତୁଜି ଅଙ୍ଗା ଆଜନବ୍ଜି ଆମ୍ୱେଞ୍ଜି ବୋୟ୍ଲେ ଏପାଙ୍ତେ ତିଆତେ ଆର୍ରମଙ୍ଗାଏନ୍ ଆ ଜନ୍ତୁଜି ଅନ୍ତମ୍ । ଆନିଞ୍ଜି ବରୁମ୍ତଜି ଆରି ଅଡ଼୍କୋଞ୍ଜି ବରୁମ୍ଲେ ଡକୋତଞ୍ଜି, ଆ କାବ୍ବାଡ଼ାଞ୍ଜି ଡୋବ୍ଲେ ଅଃରପ୍ତିଏ ବନ୍ଡ ତିକ୍କି ଆତିନସନ୍ ବଣ୍ତିଆୟ୍ତଞ୍ଜି ।
ଏ ଜାକୁବନ୍ ଆକେଜ୍ଜା ଡ ଇସ୍ରାଏଲନ୍ ଆ କେଜ୍ଜାମର୍ଜି ଲାଙ୍ଲେନେ ବର୍ରନେଞେନ୍ ଅମ୍ଡଙ୍ବା; ଆରିଙ୍ରିଙ୍ଲଅ କୋଲ୍ଲେ ଆପ୍ରାଙ୍ଲବେନ୍ ଡ କମ୍ପୋଲୋଙନ୍ ଆଡ୍ରକୋଲନ୍ ଆଡିନ୍ନା ସିଲଡ୍ ବୋୟ୍ଲେ ପାଙ୍ଲବେନ୍ କି କୋକ୍କୋନେ ଡିନ୍ନାନ୍ ସିଲଡ୍ ଜୁବାୟ୍ଲେ ପାଙ୍ଲବେନ୍; ଆରି ଞେନ୍ ଆମ୍ୱେଞ୍ଜି ଆସନ୍ ବନୁଡାଇଙ୍ଜାୟ୍ ଅଡ଼େ ଆଗୁର୍ ଉଉନ୍ ଜାୟ୍ ବୋୟ୍ଲେ ଓରୋଙ୍ତବେନ୍ କି ଆମ୍ୱେଞ୍ଜି ଆଡଙ୍ ଞେନ୍ ଗଡ଼େଲବେନ୍ କି ଞେନ୍ ବୋୟ୍ଲେ ଡୋବ୍ତବେନ୍ ।
ଆମ୍ୱେଞ୍ଜି ଞେନ୍ ଆଡଙ୍ ଅନ୍ତମ୍ ଆନା ସମାନେମେତିୟ୍ ଅଡ଼େ ଆନା ସରିନ୍ ଏଅବ୍ଜଙ୍ତିୟ୍, ଞେନ୍ ଏମାୟ୍ନେବା ? ଆନିଞ୍ଜି ସୁନାନ୍ ତୋଡ଼ାନ୍ ବୟନ୍ ରୁପାନ୍ ମୁନ୍ନାନ୍ ତନୁଡ଼େଲୋଙନ୍ ତୁଡ଼େତଜି ଆରି ଆନିଞ୍ଜି ସୁନାରିନ୍ ମୁଲନ୍ ତିୟ୍ଲେ କୋଙ୍ଡାଜନ୍ ତୁବ୍ଲେ ତୁଡ଼ୁମ୍ଡାଲେ ସେଙ୍କେରାତଜି । ଆନିଞ୍ଜି ଆ ତରଙ୍ଲୋଙଞ୍ଜି ବୋୟ୍ଲେ ଆଜାଗାଲୋଙ୍ଜି ତନଙ୍ଲେ ଡକୋତନ ଆନିନ୍ ତେତ୍ତେ ସିଲଡ୍ ଅଡ଼େନ୍ନେ; ଆରି ଆନିନ୍ ଆନ୍ନିଙ୍ ଓଡେନ୍ଜାୟ୍ଡେନ୍ ଜାଲଙ୍ଲେ ଅଃରପ୍ତିଏ, ଅଡ଼େ ଡଣ୍ତାୟ୍ ଡିନ୍ନାଇଙନ୍ ଅଃଡ୍ଡୋବେ ।
ଏ ଓବାମର୍ରଜି ଆମ୍ବେଞ୍ଜି କେନ୍ ଆତେ ଇୟ୍ମାବା, ଏ ଇର୍ସେମର୍ଜି କେନ୍ ଆତେ ମନ୍ନେଲେ ଇୟ୍ୟମବା । ପାପୁର୍ ବିସୟଞ୍ଜି ଇୟ୍ୟମବା; ଇନିଆସନଗାମେଣ୍ତେନ୍ ଞେନ୍ ଇସ୍ୱରନ୍ ଆରି ଞେନ୍ ଅନ୍ତମ୍ ଇସ୍ୱରନ୍ ଆନ୍ନିଙ୍ତଡ୍; ଞେନ୍ ତିକ୍କି ଆବର୍ରନେଜି ଆମ୍ମୁଙ୍ମା ସିଲଡ୍ ବର୍ରନାୟ୍ ଅଡ଼େ ଇନିଆକାବାଡ଼ା ଲୁମ୍ଲାୟ୍ କେନ୍ ଆବର୍ରନେ ଆମ୍ମୁଙ୍ମା ବର୍ରବେନ୍, ଆରି ବର୍ରତନାୟ୍ ତନ୍ତ୍ରଞେନ୍ ଗବ୍ରିୟ୍ତାୟ୍ କି ଅଡ଼୍କୋନ୍ ମନ୍ନଲୋଙ୍ ଆଇସ୍ସୁଜି ଗବ୍ରିତାୟ୍, ଞେନ୍ ଡରୁଙ୍ୟୋଙ୍ଗଡ୍ ସିଲଡ୍ ଅଡ଼ାଙ୍ତିଡନ୍, ସଙାୟ୍ ଡେସାନ୍ ସିଲଡ୍ ମନ୍ରାଞ୍ଜି ଏଓଡେତାୟ୍ ଞେନ୍ ଏବର୍ତନାୟ୍ କି ଏଗବ୍ରିତାୟ୍ ଞେନ୍ ଇନି ଇୟ୍ୟମ୍ତାୟ୍ ତି ବାତ୍ତେ ଗବ୍ଡେଲ୍ତାୟ୍ ।
ଡରମ୍ମଲୋଙନ୍ ସିଲଡ୍ ସବ୍ଙାୟ୍ଲନ୍ ଆଡ୍ରକୋତନ୍ ଆମନ୍ରାଜି ରଡୋ ଉଗ୍ଗର୍ମରନ୍ ବର୍ରନେଞେନ୍ ଅମ୍ଡଙ୍ବା । ଡରମ୍ମଞେନ୍ ଅମଙ୍ବେନ୍ ପାଙ୍ଲାୟ୍ ତି ବାତ୍ତେ ସଙାୟ୍ ଅଡ଼େ କି ଅନୁର୍ଞେନ୍ ଅଃଡିଙାୟ୍; ସେଙ୍କେରାଞେନ୍ ଇସ୍ରାଏଲନ୍ ଆସନ୍ ଜିରୁସାଲମନ୍ ଅନୁରନ୍ ତୁବ୍ତାୟ୍ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.