Juray Soura Bible
ଜିସାୟ 42
ପ୍ରବୁନ୍ ଆ ସନେଡା କମ୍ୱାରି
କମ୍ୱାରିଞେନ୍ ଗିୟ୍ବା, ଞେନ୍ ଆନିନ୍ଆଡଙ୍ ତନ୍ଡମ୍ତାୟ୍, ସନେଡାମର୍ଞେନ୍ଆଡଙ୍ ଗିୟ୍ବା, ଞେନ୍ ଆନିନ୍ ଆ ତୋଣ୍ତୋ ପୁରାଡ଼ାଞେନ୍ ଡକୋତାୟ୍; ଆନିନ୍ ବଡେସାବାୟ୍ ଆମଙ୍ଲୋଙ୍ ଆଜାଡ଼ି ବିସାରନ୍ ପାଙ୍ତାୟ୍ । ଆନିନ୍ ଅସଜିରେ କି ଆକ୍ରାନ୍ ଅଃବାବ୍ବାବେ, ଅଡ଼େ ତଙର୍ଲୋଙନ୍ ଆସରଙନ୍ ଅନବ୍ଅମ୍ଡଙେ । କୁରିଙ୍ଗାବନ୍ ଅଲ୍ଗଡେ କି ସଦୁମନ୍ ଆବଲ୍ବଲନ୍ ଅପ୍ଞିଡେ ଆନିନ୍ ଆଜାଡ଼ିନ୍ ପନ୍ସୁଆତିତେ । ଆନିନ୍ ପୁର୍ତିଲୋଙନ୍ ଆଜାଡ଼ି ବିସାରନ୍ ଅନ୍ରଙ୍ ତୁବେନ୍ ଜାୟ୍ ଅନବ୍ମୁସୁକ୍କାନେ ଆରି ଅନବ୍ବୋର୍ସାନେ; ଆରି, ଡେପ୍ପାଞ୍ଜି ଆ ବନାଁୟ୍ବରନ୍ ଜଗେଲେ ଡକୋତଞ୍ଜି । ଆନ୍ନା ରୁଆଙନ୍ ତୁବ୍ଲେ ଉରାଡେନ୍; ଆନ୍ନା ପୁର୍ତିନ୍ ଡ ତେତ୍ତେ ସିଲଡ୍ ଆ ଡରୁଙ୍ଲନାଞନ୍ ଅଡ଼୍କୋନ୍ ବେଲେନ୍, ଆନ୍ନା ତେତ୍ତେଲୋଙ୍ ଆମନ୍ରାଜିଆଡଙ୍ ତନଙ୍ୟମନ୍ ତିୟ୍ତେ ଆରି ତି ତେତ୍ତେ ଆବରୁଲେତେଞ୍ଜି ଆମନ୍ରାଜିଆଡଙ୍ ପୁରାଡ଼ାନ୍ ତିୟ୍ତେ, ତି ଆ ସଦାପ୍ରବୁ ଇସ୍ୱର କେନ୍ ଆବର୍ନେ ବର୍ତନେ; “ଞେନ୍ ସଦାପ୍ରବୁ, ଡରମ୍ମଲୋଙନ୍ ଆମନ୍ଆଡଙ୍ ଓଡ୍ଡେମ୍ ଆରି ଅସିନମ୍ ଞମ୍ଲେ ଆମନ୍ଆଡଙ୍ ଡୋବ୍ତମ୍, ଆରି ଆ କାଡ଼ୁମରଞ୍ଜି ଆମଡ୍ ରନୋନ୍ ଆସନ୍, ଆବଣ୍ତିମରଞ୍ଜିଆଡଙ୍ ବଣ୍ତିସିଙନ୍ ସିଲଡ୍ ଆରି ଆଲୋଙଡ୍ଲୋଙନ୍ ଆତଙ୍କୁମନ୍ ଆମନ୍ରାଜିଆଡଙ୍ ବଣ୍ତିସିଙନ୍ ସିଲଡ୍ ଅମ୍ଡୁଙ୍ଲେ ଆନୋରୋଙ୍ ଆସନ୍, ଞେନ୍ ଆମନ୍ଆଡଙ୍ ମନ୍ରାଞ୍ଜି ଆନସୟ ଅନ୍ତମ୍ ଆରି ଅଡ଼୍କୋ ଡେସାବାୟ୍ଜି ସନାଆର୍ ଅନ୍ତମ୍ ତବ୍ନଙ୍ତମ୍ । ଞେନ୍ ସଦାପ୍ରବୁ; କେନ୍ଆତେ ଅଞୁମ୍ଞେନ୍, ଗନୁଗୁ ପନେମେଙ୍ ଞେନ୍ ଆନ୍ନା ଆ ଇସ୍ୱରଆଡଙ୍ ଅଃତିୟାୟ୍ ଆରି କୁଣ୍ଡାୟଞ୍ଜିଆଡଙ୍ ସନେଙ୍କେଞେନ୍ ଅଃତିୟାଜି । ଗିୟ୍ବା, ଆମ୍ମୁଙ୍ ଆବର୍ନେଜି ଡେଡମେନ୍ । ଆରି ଞେନ୍ ରଙ୍ ବର୍ନେଞ୍ଜି ଏବର୍ତନାୟ୍ ତିଅଡ଼୍କୋନ୍ ଅନ୍ରଙ୍ ପଡାବାଞନ୍ ଆମ୍ମୁଙ୍ ତିଆବର୍ନେ ଞେନ୍ ଆମ୍ବେଞ୍ଜିଆଡଙ୍ ଅବ୍ଜନାତବେନ୍ ।”
ଅବୟ୍ ସନେଙ୍କନ୍ କନନ୍
ସମେଁୟ୍ଡ୍ରଲୋଙନ୍ ଆଜିର୍ତେଞ୍ଜି ଆରି ସମେଁୟ୍ଣ୍ଡ୍ରାଲୋଙନ୍ ଡକୋନ୍ ଅଡ଼୍କୋମନ୍ରାନ୍, ଏ ମଡ୍ଡି ସମେଁୟ୍ଣ୍ଡ୍ରାଲୋଙନ୍ ଡକୋନ୍ ଆ ଡେସାଜି ପ୍ରବୁନ୍ ଆସନ୍ ଅବୟ୍ ରଙ୍ କନନନ୍ କନ୍ବା, ଆନିନ୍ଆଡଙ୍ ସେଙ୍କେବା ସମ୍ପରା ପୁର୍ତିନ୍ ଆନିନ୍ଆଡଙ୍ ସେଙ୍କେଏତଜି । ଆରିଙ୍ରିଙ୍ରେଙନ୍ ଡ ତେତ୍ତେ ଆଗଡ଼ାଜି ଅଡ଼୍କୋନ୍ କେଦାରଲୋଙନ୍ ଡକୋନ୍ ଆମନ୍ରାଜି ଅବ୍ସର୍ରଙ୍ଲନ୍ ଆନିନ୍ଆଡଙ୍ ସେଙ୍କେଏତଜି, ସେଲା ଗଡ଼ାନ୍ ଆମନ୍ରାଜି କନେତଜି ଆରି ତୋଣ୍ଡୋବରୁନ୍ ସିଲଡ୍ ଆନିଞ୍ଜି ସୋଡ଼ା ସର୍ରଙନ୍ ବାତ୍ତେ କନେତଜି । ଆନିଞ୍ଜି ପ୍ରବୁନ୍ଆଡଙ୍ ଗନୁଗୁ ପନେମେଙନ୍ ତିୟେତଜି ଆରି ମଡ୍ଡି ସମେଁୟ୍ଣ୍ଡ୍ରାଲୋଙନ୍ ଡକୋନ୍ ଆ ଡେସାଜି ଆମଙ୍ଲୋଙ୍ ଇସ୍ୱରନ୍ ଗନୁଗୁ ପନେମେଙ୍ ଅପ୍ପୁଙ୍ବରେତଜି । ପ୍ରବୁନ୍ ଅଲ୍ଜୁଜ୍ଜେମରନ୍ ଅନ୍ତମ୍ ଅଲ୍ଜୁଜ୍ଜେନ୍ ଆସନ୍ ଡୁଙ୍ତନାୟ୍; ଆନିନ୍ ଅଲ୍ଜୁଜ୍ଜେନ୍ ଆସନ୍ ଅବ୍ଜାଡାଲନ୍ ଆରି ଅନୁୟୁବନ୍ ଡକୋ । ଆନିନ୍ ଅଲ୍ଜୁଜ୍ଜେଇଙନ୍ ଅନ୍ତମ୍ ବାବ୍ବାବ୍ତେ ଆରି ବନେରାମରଞ୍ଜି ଆ ବିରୁଦଲୋଙ୍ ପ୍ରବୁନ୍ ଆ ବୋର୍ସାନ୍ ଅବ୍ତୁୟ୍ତେ ।
ଇସ୍ୱରନ୍ ଆ ସନାୟ୍ସି ଆସନ୍ ପ୍ରତିଗା ସନିବ୍ଡେୟ୍
ଇସ୍ୱରନ୍ ଗାମେନ୍, ଞେନ୍ ଗୋଗୋୟ୍ ଡିନ୍ନାଜାୟ ଅବ୍କଡ଼ିଙ୍ଲନ୍ ସେଡ୍ଲାୟ୍; ଞେନ୍ ମନ୍ରାଞେଞ୍ଜି ଅଃଜାଲଙ୍ଲାଜି । ବନ୍ଡ ନମି ଞେନ୍ କୋକ୍କୋଡନ୍ବଜନ୍ ଅନ୍ତମ୍ ବାବ୍ବାବ୍ତାୟ୍; ଞେନ୍ ଆବସରିନ୍ ବାଉଲ୍ଲି କାଉଲ୍ଲି ଡେତିୟ । ଞେନ୍ ବରୁଞ୍ଜି ଡ ତଡ଼କୁବଞ୍ଜି ଅବ୍ସେଡ୍ତାୟ୍ ଆରି ତେତ୍ତେ ଡକୋନ୍ ଆରାନୁବ୍ଜି ଆରି ଅଜିଙଞ୍ଜି ଅବ୍ସର୍ତାୟ୍ । ଆରି ଅଲଞ୍ଜି ଡ ଡୁଙ୍ଡମ୍ନେଡାନ୍ ଅବ୍ସର୍ତାୟ୍ । ଅଙ୍ଗା ତଙର୍ ଆ କାଡ଼ୁମରଞ୍ଜି ଜନାଜି ତଡ୍ ତି ଆତଙର୍ଗଡ୍ ଞେନ୍ ଆନିଞ୍ଜିଆଡଙ୍ ତୁରିୟ୍ଲେ ଓରୋଙ୍ତାଜି । ଞେନ୍ ଆତେମଡଞ୍ଜି ଲୋଙଡନ୍ଆତେ ସାଆର୍ ଆରି ଏଡେଡ୍ଉଡୁଡନ୍ ଆତଙର୍ ବିଙୟ୍ତାୟ୍ । କେନ୍ ଅଡ଼୍କୋନ୍ ଆକାବାଡ଼ା ଲୁମ୍ଲେ ଞେନ୍ ଆନିଞ୍ଜିଆଡଙ୍ ଅଃନମ୍ରେଙାଜି । ଆନାଜି କୁଣ୍ଡାୟନ୍ ଆମଙ୍ ଡର୍ତଞ୍ଜି, ଆରି ଚଞ୍ଚଲୋଙ୍ ଆତୁବ୍ତୁବନ୍ ଆକୁଣ୍ଡାୟ୍ଆଡଙ୍ ଆମ୍ବେଞ୍ଜି ଇସ୍ୱରଲେନ୍ ଗାମ୍ଲେ ବର୍ତଞ୍ଜି, ଆନିଞ୍ଜି ୟର୍ମୋଡ୍ତଜି ଆରି ଗରୟ୍ତଜି ।
ଇସ୍ରାଏଲଞ୍ଜି ଞନଙ୍ନେନ୍ ଆସନ୍ ଇଡ୍ନିଙ୍ତଡ୍
ପ୍ରବୁନ୍ ବର୍ତନ୍, ଏ ଆକାଲ୍ଲାମରଞ୍ଜି, ଅମ୍ଡଙ୍ବା, ଏ ଆ କାଡ଼ୁମରଞ୍ଜି ଆମ୍ବେଞ୍ଜି ଗନିଜନ ଆସନ୍ ଆଙାଙ୍ବା । କମ୍ବାରିଞେନ୍ ଅମ୍ରେଙ୍ଲେ ଆନା ଆକାଡ଼ୁ ? ଅଡ଼େ ଅନାପ୍ପାୟ କବର୍ପାଙ୍ମରନ୍ ଅନ୍ତମ୍ କାଲାମରନ୍ ଆନା ? ଞେନ୍ ସରିନ୍ ମାୟ୍ଲନ୍ ଆଡ୍ରକୋତନ୍ ଆମନ୍ରା କାଡ଼ୁମରନ୍ ଅନ୍ତମ୍ ଡ ଇସ୍ୱରନ୍ ଆ କମ୍ୱାରି କାଡ଼ୁମରନ୍ ଅନ୍ତମ୍ ଆନା ଡକୋ ? ଆମ୍ବେଞ୍ଜି ଗୋଗୋୟ୍ ବିସୟ ଏଗିୟ୍ତାୟ୍, ବନ୍ଡ ଏଃନମ୍ଡଙେ ଆଲୁଡନ୍ ଅନୁରନ୍ ଡକୋ, ବନ୍ଡ ଆନିନ୍ ଅନମ୍ଡଙେ । ଇସ୍ୱରନ୍ ଆ ଡରମ୍ମ ଆସନ୍ ବନାଁୟ୍ବରନ୍ ଅନବ୍ସୋଡ଼ାନ୍ ଆସନ୍ ସନେନ୍ସେନନ୍ ତିୟ୍ଲେ ସର୍ରଡାଏନ୍ । ବନ୍ଡ କେନ୍ ଆମନରାଜି ଆସେସେ ଆରୁୟ୍ରୁୟ୍ କେନ୍ ଅଡ଼୍କୋଞ୍ଜି ଲୋଓଙ୍ଲୋଙନ୍ ଆଜିଜି ଡ ବଣ୍ତିସିଙ୍ଲୋଙନ୍ ଆସସଜି ଆନିଞ୍ଜି ଅଡ଼େ ଅନୁରନ୍ ଆସନ୍ ଅବୟ୍ତଡ୍ଜି; ଆନିଞ୍ଜି ଆରୁୟ୍ତବୋଞ୍ଜି ଆମନ୍ରାଜି ଅନ୍ତମ୍ ଡ ଆବ୍ଡିଲେମ୍ଭାଗାମ୍ଲେ ବନର୍ର ମରନ୍ ଆନ୍ନିଙ୍ତଡ୍ । କେନ୍ ଆବର୍ନେଲୋଙ୍ ଆନା ଅଲୁଡ୍ଲୋଙନ୍ ଅମ୍ଡଙ୍ତେ ଆନିନ୍ ତିକ୍କି ଆଡିନ୍ନା ଆସନ୍ ଇୟ୍ୟମ୍ତେ, ଅମଙ୍ବେନ୍ ଏନ୍ନେଗନ୍ ଆମନ୍ରା ଆନା ଡକୋ ? ଜାକୁବନ୍ ଆର୍ରନୁୟ୍ ଡ ଇସ୍ରାଏଲନ୍ ଜୁରୁମର୍ରଞ୍ଜି ଆମନ୍ରାଞ୍ଜି ଆସିଲୋଙ୍ ଆନା ତିୟେଞ୍ଜି ? ଆବିରୁଡଲୋଙଞ୍ଜି ଞେନ୍ ଇର୍ସେନ୍ ଲୁମ୍ଲବୋ ମନ୍ରାଞ୍ଜି ଆତଙରଡ୍ ଞାନେନ୍ ଆସନ୍ ଅଃନିସୁମ୍ଲଜି ଆନିଞ୍ଜି ବନାଁବରନ୍ ଅଃମ୍ମାନ୍ନେଲଜି ତି ଆବର୍ନେ ଇସ୍ୱରନ୍ ଅଃବ୍ବର୍ରନ୍ ପଙ୍ ? ତି ଆସନ୍ ଆଉପ୍ରେଙନ୍ ଆନିନ୍ ଗୋଗୋୟ୍ ବର୍ରାବେନ୍ ଡ ଜୁଜନେନ୍ ଆସନ୍ ବ ତି ବୋର୍ସାନ୍ ତିଏନ୍ କି ଏର୍ରେତଗୋନ୍ ଡୁଡୁଏନ୍ ବନ୍ଡ ଆନିନ୍ ଅସୟ୍ଲୋ ଅଡ଼େ ତଗୋନ୍ ଅଃଡ୍ଡୁଡୁଲୋ ଏଲେଜାକିଁୟ୍ଡେନ୍ କେନ୍ ଆତେଜି ଅଃନିୟମ୍ଲୋ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.