Juray Soura Bible
ଜିସାୟ 39
ବାବିଲୋନ୍ ଗଡ଼ାନ୍ କବରପାଙ୍ବମର
(୨ ରାଜାଞ୍ଜି ୨୦:୧୨-୧୯)
ଆବନେଡ଼ା, ବାବିଲୋନ୍ ଆରାଜା, ବଲଦାନନ୍ ଆଡଙ୍ଗାଡ଼ାଅନ୍, ମେରୋଦକ ବଲ୍ଦନନ୍, ଇଜକିଅ ରାଜାନ୍ ଆସୁ ମନଙେନ୍ ଗାମ୍ଲେ ଅମ୍ଡଙେନ୍, ତିଆସନ୍ ଆନିନ୍ ଇଜକିଅନ୍ ଆମଙ୍ବା ଅବୟ୍ ଅଲାନ୍ ଇଡେନ୍ ଆରି ଏର୍ଜାଡ଼ିକାନ୍ ତନିୟ୍ତିୟନ୍ ଆପ୍ପାୟେନ୍ । ଇଜକିଅନ୍ ବାବିଲୋନନ୍ ଆ ପାଙ୍ଲଙ୍ବର୍ମରଞ୍ଜିଆଡଙ୍ ସଙ୍କଡ଼େଏଞ୍ଜି ଆରି ଜାଏଞ୍ଜି କି ଆନିଞ୍ଜିଆଡଙ୍ ରୁପାନ୍, ସୁନ୍ନାନ୍, ମସଲାଞ୍ଜି, ଲଙିଡ୍ ଜିନିସଞ୍ଜି, ଆରି ସିପ୍ପାୟଞ୍ଜି ଆଞନନ୍ର୍ରମ୍ଜି ଡ ତରର୍ତୁମ୍ସିଙନ୍ ନିୟ୍ ଡକୋନ୍ଆତେ ଅଡ଼୍କୋ ଅବ୍ତୁଜେଞ୍ଜି, ଏନେଲେ ଅନ୍ନିଙ୍ଜା ଆଜନବ୍ ଆସିଙନ୍ ଅଡ଼େ ଅଡ଼୍କୋ ରାଜ୍ୟନ୍ ଇନ୍ନିଙ୍ ଅଃଡ୍ଡକୋଲୋ । ଆବନେଡ଼ା ପୁର୍ବାଃତେବର୍ନେମର୍ ଜିସାୟନ୍ ଇଜକିଅ ରାଜାନ୍ ଆମଙ୍ବା ଇୟ୍ଲେ ବରେ, “କେନ୍ ଆମନ୍ରାଜି ଅଙ୍ଗାଲୋଙ୍ ସିଲଡ୍ ଇୟ୍ଲାଜି ଆରି ଆନିଞ୍ଜି ରାଜାନ୍ଆଡଙ୍ ଇନି ଗାମେଞ୍ଜି ?”
ଇଜକିଅନ୍ ଜାଲଙ୍ଲେ ଗାମେନ୍, “ଆନିଞ୍ଜି ସାଙାୟ୍ ବୟନ୍ ସଙାୟ୍ ଡେସା ବାବିଲୋନନ୍ ସିଲଡ୍ ଇୟ୍ଲାଜି ।”
“କେନ୍ଆନିଞ୍ଜି ରାଜାସିଙ୍ଲୋଙନ୍ ଇନିଜି ଗିଜେଞ୍ଜି ?”
“ଇଜକିଅ ରାଜାନ୍ ଗାମେନ୍, ଆନିଞ୍ଜି ଅଡ଼୍କୋନ୍ ଗିଜେଞ୍ଜି ରାଜାସିଙ୍ଲୋଙନ୍ ଇନିଜି ଡକୋ ଅଡ଼୍କୋନ୍ ଗିଜେଞ୍ଜି ଇନ୍ନିଙ୍ ଏର୍ଗନିୟ୍ ଅଃଡକୋଲଞ୍ଜି ।”
ତିଆସନ୍ ଜିସାୟନ୍ ରାଜାନ୍ଆଡଙ୍ ବରେନ୍, “ଅଡ଼୍କୋନ୍ବେନ୍ ଇସ୍ୱରନ୍ ଆବର୍ନେ ଅମ୍ଡଙ୍ବା । ବଡିନ୍ନା ଜିର୍ତାୟ ରାଜାସିଙ୍ଲୋଙ୍ନମ୍ ଇନିଜି ଡକୋ, ଆରି ପୁର୍ବା ଜୋଜୋନମ୍ଞ୍ଜି ଆଜୋଜୋଜି ଇନିଜି ଅଡ଼୍କୋନ୍ ଡକ୍କୋଲେ ଜିରେଞ୍ଜି, ତି ଅଡ଼୍କୋନ୍ ବଡିନ୍ନା ବାବିଲୋନନ୍ ପନାଙନ୍ ଡେତେ, ଇନ୍ନିଙ୍ ଆରି ଅଃଡକୋଏ । ମନ୍ରାନମ୍ଜି ଡ କେଜ୍ଜାଡମ୍ନମ୍ଜିଲୋଙ୍ସିଲଡ୍ ଲାଙ୍ଲେନ୍ନେ ଅନୋରୋଙ୍ଡେତଜି ଆରି ଆନିଞ୍ଜିଆଡଙ୍ ମାୟ୍ତଲିଆଞ୍ଜି ଅନ୍ତମ୍ ବାବିଲୋନ୍ ରାଜାସିଙ୍ଲୋଙନ୍ ଆନିଞ୍ଜି ଡକୋତଞ୍ଜି ।”
ଇଜକିଅ ରାଜାନ୍ ଜନାଲେ ରପ୍ତିଏନ୍ ଡ ଆନିନ୍ ଆମେଙ୍ମତ୍ତାନା ଜାୟ୍ ସନୟୁନ୍ ଡ ଆଜାଡ଼ିନ୍ ସଙାୟ୍ତେ, ତିଆସନ୍ ଆନିନ୍ ଜାଲଙ୍ଲେ ଗାମେନ୍, “ଆମନ୍ ଇସ୍ୱରନ୍ ଆବର୍ନେ ବର୍ନେନ୍ ଆତେ ଆଜାଡ଼ିନ୍ ।”
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.