Juray Soura Bible
ଜିସାୟ 35
ମଡ଼ିର୍ଗଡନ୍ ଆ ତଙର୍
ଆସର୍ଲନ୍ ସର୍ଡାତଞ୍ଜି,
ଆରି ଆରିଙ୍ରିଙ୍ ଜାଡ଼ିଆଲୋଙନ୍ ତାର୍ବାନ୍ ପୁତ୍ତେତେ ।
ଆସର୍ଲନ୍ କନନ୍ତନେ ଆରି ସର୍ଡାତନେ;
ତିଆତେ ଲିବାନୋନନ୍ ଆବରୁ ଅନ୍ତମ୍ ଅରିସୁମ୍ଡାନ୍
ଆରି ସାରୋଣନ୍ ଡ କର୍ମିଲ୍ ଲବନ୍ ଅନ୍ତମ୍ କତ୍ତଲନ୍1 ଡେତ ।
ଅଡ଼୍କୋମନ୍ରାନ୍ ଇସ୍ୱରନ୍ ଆଗନୁଗୁ ଗିୟ୍ତଜି,
ଡ ଆ ଆମନନଙନ୍ ଗିୟ୍ତଜି ।
ଲବାୟ୍ସିବେନ୍ ରବ୍ଡୋବା
ଆରି ଲବାୟ୍ ମେଡ୍ଡଡ଼ିଞ୍ଜି ରବ୍ଡୋବା ।
ବନ୍ତଙିୟ୍ମରଞ୍ଜିଆଡଙ୍ ବର୍ବାଜି,
ଅବ୍ବୋର୍ସାନାବା ଆରି ଏବତଙ୍ଡଙ୍,
“ଆମ୍ବେଞ୍ଜି ଆଡନୋବ୍ ଆସନ୍ ଇସ୍ୱରନ୍ ଜିର୍ତାୟ୍,
ବନେରାବେଞ୍ଜି ଆଡନଣ୍ଡାୟ୍ ଆସନ୍ ଇସ୍ୱରନ୍ ଜିର୍ତାୟ୍ ।”
ତିଆଡିଡ୍ ଆ କାଡ଼ୁମରଞ୍ଜି ଗିୟ୍ଲେ ରପ୍ତିତଜି,
ଆରି ଆକାଲ୍ଲମରଞ୍ଜି ଅମ୍ଡଙ୍ଲେ ରପ୍ତିତଜି ।
ଆସୋତ୍ତାମରଞ୍ଜି ତଙିୟ୍ଲନ୍ ରପ୍ତିତଜି ଆରି ତଙ୍ତଜି,
ଆଜାଡ୍ଡାମରଞ୍ଜି ବର୍ରନ୍ ରପ୍ତିତଜି ଆରି ସର୍ଡାନ୍ ବାତ୍ତେ ସେଙ୍କେତଜି ।
ପଡ଼ିଆରେଙନ୍ ଡାଆନ୍ ଡୁଙ୍ତନାୟ୍ ଆରି ଆରିଙ୍ରିଙ୍ ରେଙନ୍ ଡୁଙ୍ଡମ୍ନେଡାନ୍ ପେତେ;
ତ୍ତଗୋ ଡମନ୍ ଆଲକିୟ୍ଲୋଙ୍ ଡାଆନ୍ ଡୁଙ୍ତନାୟ୍ ।
ଆରି ଆସର୍ଲଲୋଙନ୍ ଡୁଙ୍ଡମ୍ନେଡାନ୍ଡେତେ ।
ଅଙ୍ଗାଲୋଙ୍ ବୋଡ଼ାଞ୍ଜି ଡକୋଲଞ୍ଜି,
ତିସେଙ୍ ଅଗାବନ୍, ଅଜିଙନ୍ ଡ କୁରିଙ୍ଜିଙନ୍ ଡୁଙ୍ତନାୟ୍ ।
ତେତ୍ତେ ଅବୟ୍ ଲାଆଙ୍ ସୋଡ଼ା ତଙରନ୍ ଡେତେ,
ତି ଆଞୁମନ୍ ଅନୋଡେନ୍ ଡେତେ “ମନଡ଼ିର୍ ତଙରନ୍ ।”
ଅନ୍ନିଙ୍ ଆ ଇର୍ସେମରନ୍ ତି ଆତଙର୍ଗଡ ଜିର୍ରେ ଅଃରପ୍ତିଏ;
ଓଲ୍ଲୁମରଞ୍ଜି ତି ଆତଙର୍ଗଡ୍ ଜିରେଞ୍ଜିଡେନ୍ ଅଃନାଡ଼ଏଜି ।
ତେତ୍ତେ ସିଂଅ କିଡନ୍ ଅଃଡ୍ଡକୋଏ;
ବରନ୍ତଙନ୍ ଜାଡ଼ିଆ ଜନ୍ତୁଜି ତି ଆତଙର୍ଗଡ୍ ଅଃଜିରେଜି ।
ଆନାଜି ଇସ୍ୱରନ୍ ଡୋବ୍ତଜି
ଆନିଞ୍ଜି ତୁମ୍ ତି ଆତଙର୍ଗଡ ଜିର୍ତଜି ।
ଇସ୍ୱରନ୍ଆମଙ୍ସିଲଡ୍ ଅନୁରନ୍ ଆଞରାଙେଞ୍ଜି ଆମନ୍ରାଜି କନନନ୍ କନ୍ଲେ ସିଓନ ଗଡ଼ାନ୍ ୟର୍ତନାଜି
ଆଏଡ଼ର୍ ଆମନଙ୍ ଅବବ୍ଲୋଙନ୍ ଆ ରନୁବ୍ବବ୍ଗୋନ୍ ଡକୋତନ୍ ଆନିଞ୍ଜି ସର୍ଡାନ୍ ଡ ମନଞନ୍ ଞାଙ୍ତଜି
ଆଡୁକଞ୍ଜି ଡ ଆୟନେଞ୍ଜି ସଙାୟ୍ତେ ।
Source notes (1)
- Footnote ପୁପ୍ପୁବ୍ପେପ୍ପେବ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.