Juray Soura Bible
ଜିସାୟ 32
ଅବୟ୍ ଡରମ୍ମ ରାଜା
ଗିୟ୍ବା ଅବୟ୍ ରାଜାନ୍ ଡରମ୍ମନ୍ ବାତ୍ତେ ସାସନତେ, ଆରି ସୋଡ଼ାମରଞ୍ଜି ଆଜାଡ଼ି ପନ୍ସୁଆତିତଜି । ଏନ୍ନେଗନ୍ ଡେଏନ୍ଣ୍ଡେନ୍ ଅଡ଼୍କୋ ମନ୍ରାନ୍ ରିଙ୍ଗେନ୍ ଆରି ଜଡ଼ିରିଙ୍ତିରନ୍ ସିଲଡ୍ ଲରୋଲୋନେନ୍ ଅନ୍ତମ୍, ଆରିଙ୍ରିଙ୍ଲୋଙନ୍ ଡୁଙ୍ଡମ୍ନେଡାନ୍ ଡ ତ୍ତଗୋଲଲୋଙନ୍ ସୋଡ଼ା ଅରେଙନ୍ ଆ ଲୁମ୍ମୁନ୍ ଅନ୍ତମ୍ ଡେତେ । ଆନାଜି ଗିୟ୍ଲେ ରପ୍ତିତଜି ଆମଡଞ୍ଜି ଆରି କରାରୁଆ ଅଃଗିଜେଜି, ଆନାଜି ଆଲୁଡ୍ ଅମ୍ଡଙ୍ତଜି ଆନିଞ୍ଜି ଡାଲୁଡ୍ତଜି । ଇଃୟମ୍ଲେ ଅଃରପ୍ତିଏଞ୍ଜି ଆମନ୍ରାଜି ଗିଆନନ୍ ଞାଙ୍ତଜି ଆରି ଆଜାଡ୍ଡାମରଞ୍ଜି ରେୟ୍ଲଙ୍ ବର୍ରନ୍ ରପ୍ତିତଜି । ଆନ୍ନିଙ୍ ଇଃୟମଲେ ଅଃରପ୍ତିଏଜି ଆରି ଅବୟ୍ ଆଉଲ୍ଲୁ ମରନ୍ ମନାନେନ୍ ଅଃଡେଏ ଆରି ଅବୟ୍ ଇସ୍କତାମରନ୍ ସୋଡ଼ାମର୍ ଗାମ୍ଲେ ଅଃରପ୍ତିଏଜି । ଇନିଆସନ୍ଗାମେଣ୍ଡେନ୍ ଅବୟ୍ ଇସ୍କତାମରନ୍ ଇସ୍କତାବରନ୍ ବର୍ତନେ ଆରି ଆଜାଡ଼ିବରନ୍ ଅଃନିୟମେ କି ଅଃଲୁମେ । ଆନିନ୍ ଇନି ଲୁମ୍ତେ ଆରି ବର୍ତନେ ପ୍ରବୁନ୍ ଆସନ୍ ଗରନ୍ରୟ୍ଡାନ୍, ଆରି ଆନିନ୍ ଡୋଲେୟ୍ମରଞ୍ଜି ଡ ଆ ଇର୍ଗାଲ୍ ମରଞ୍ଜି ଇନ୍ନିଙ୍ ଅଃନବ୍ଜୋମ୍ଜୋମେଜି କି ଅଃନବ୍ଗାଗାଏଜି । ଆରି ପେଲ୍ଲାମରଞ୍ଜି ଆନିୟମ୍ ଅଡ଼୍କୋନ୍ ପରାନ୍ସାତ୍ତିନ୍; ଆନିନ୍ ଲଗଡ୍ମରଞ୍ଜି ଆଜାଡ଼ିନ୍ ଆବର୍ତଞ୍ଜି ଆଡିଡ୍ କାକୁର୍ତିମରନ୍ଆଡଙ୍ କଣ୍ଡାୟ୍ ବର୍ରେ ଅନବ୍ସେଡନ୍ ଆସନ୍ ଇୟମ୍ତେ । ବନ୍ଡ ସୋଡ଼ାମରନ୍ ଆନିଃୟମ୍ ଆଜାଡ଼ିନ୍ ଆରି ସୋଡ଼ାମରନ୍ ଆବର୍ନେ ବାତ୍ତେ ଗନବ୍ରିନ୍ ଡେତେ ।
ଜିରୁସାଲମନ୍ ଆଇବୟ୍ଜି
ଏ ଆଇବୟ୍ଜି ଆନାଜି ଇନ୍ନିଙ୍ ଏର୍ନିୟମ୍, ଏରାମ୍ମୁୟ୍ ଏଡକୋତନ୍, ଞେନ୍ ଇନି ଗାମ୍ତାୟ୍ ଅମ୍ଡଙ୍ବା । ଇନ୍ନିଙ୍ ଏର୍ନିୟମ୍ ଏଡ୍ରକୋତନ୍ ଆଇବୟ୍ଜି, ଆଜିର୍ତାୟଁନ୍ ଆବର୍ସେଙ୍ ଆମ୍ବେନ୍ ମୁସୁକାମତବେନ୍ ଇନିଆସନ୍ଗାମେଣ୍ଡେନ୍ ଦ୍ରାକ୍ୟାଜନ୍ ଆରନୋଡ୍ ଆସନ୍ ଆମ୍ବେନ୍ ଦ୍ରାକ୍ୟାଜନ୍ ଏଃଞାଙେ । ଆମ୍ବେନ୍ ଇନ୍ନିଙ୍ ଏର୍ନିୟମ୍, ଏରାମ୍ମୁୟ୍ ଏଡକୋତନ୍, ବନ୍ଡ ବତଙ୍ବା, ସିନ୍ରିବେଞ୍ଜି ଅଡ଼ିୟ୍ଲନ୍ କୁଣ୍ଟୁବ୍ଲୋଙ୍ବେନ୍ ଅକାକାବନ୍ ରେଡ୍ଡୁବ୍ନାବା । ଡୁକ୍କଡାଲନ୍ ମାୟଙ୍ଲୋଙ୍ବେନ୍ ତିଡ୍ଡମ୍ନାବା ଇନିଆସନ୍ଗାମେଣ୍ଡେନ୍ ଅଡ଼୍କୋ କତ୍ତଲଞ୍ଜି1 ଆରି ଦ୍ରାକ୍ୟାକୋତାଲୋଙ୍ବେନ୍ ଇନ୍ନିଙ୍ ଏଃନେଲେ । ମନ୍ରାଞେଞ୍ଜି ଆବସେଙ୍ଲୋଙ୍ ଅବ୍ବାଙନ୍ ଡ କାନ୍ତେସିଗାଜନ୍ ଲାମାଜେନ୍ । ଏରାମ୍ମୁୟ୍ ଆଡ୍ରକୋଲଞ୍ଜି ଆସିଙ୍ମର୍ଜି ଡ ଜୋମ୍ଲେଗାଲେ ଆଡ୍ରକୋଲଞ୍ଜି ଆଗଡ଼ା ତି ଅନ୍ତମ୍ ଡେତେ । ରାଜାସିଙନ୍ ନିୟ୍ ଅସେଡ୍ତେ ଆରି ମନ୍ରାନ୍ ଆଡ୍ରକୋତଞ୍ଜି ଆଗଡ଼ା ଆନ୍ନିଙ୍ ଅଃଡକୋନେଜି । ଜରଗ୍ଗେସିଙନ୍ ଡ ଜନଗ୍ଗେମରଞ୍ଜି ଅଡ଼୍କୋନ୍ ଅଡ଼୍କୋ ଡିନ୍ନାନ୍ ଆସନ୍ ଲୋଙରନ୍ ଗଡେଲ୍ତେ । ଜାଡ଼ିଆ ଗୋଡୋୟଁନ୍ ଡ ଜନ୍ତୁଜି ତେତ୍ତେ ଜୋମ୍ଜୋମ୍ତଞ୍ଜି ।
ବନ୍ଡ ଇସ୍ୱରନ୍ ଆପୁରାଡ଼ା ଅମଙ୍ଲୋଙ୍ଲେନ୍ ଆପ୍ପାୟ୍ଲାୟ୍ଡେନ୍ । ଇନ୍ନିଙ୍ ଅଃନେଲେନ୍ ଆବସେଙ୍ ଏଲ୍ତେ ଆରି ଆରେଲ୍ତେନ୍ ଆବସେଙ୍ ରିଜାଲ୍ଲଗାମ୍ଲେ ଡନିଡିନ୍ ଡେତେ । ଆବନେଡ଼ା ଆରେଲ୍ତେନ୍ ଆବସେଙ୍ରେଙନ୍ ଡରମ୍ମନ୍ ଡ ଆଜାଡ଼ିନ୍ ଡକୋତନେ । ଇନିଆସନ୍ଗାମେଣ୍ଡେନ୍ ଡରମ୍ମ କାବ୍ବାଡ଼ାନ୍ ସନୟୁନ୍ ଡେତ ଆରି ଡରମ୍ମ ଆ ଜଅ ଅଡ଼୍କୋଡିନ୍ନାନ୍ ଆସନ୍ ଗରିତେ ଆରି ଅରାସାନେନ୍ ଡେତେ । ଇସ୍ୱରନ୍ ଆମନ୍ରାଜି ଇନ୍ନିଙ୍ ଅଃନିୟମେଜି, ଆରି ରମ୍ମଙ୍ରମ୍ମଙ୍ ଆସିନ୍ ସୟୁନ୍ ବାତ୍ତେ ଏରାମ୍ମୁୟ୍ ଡକୋତଞ୍ଜି । ବନ୍ଡ ଆତନଙ୍ ଜାଡ଼ିଆନ୍ ଆଡ଼େର୍ତିରନ୍ ବାତ୍ତେ ଅଃମ୍ମୋସାତେ ଆରି ଗଡ଼ାଞ୍ଜି ଅବ୍ସେତେ । ବନ୍ଡ ଆମ୍ବେନ୍ ଆସିର୍ବାଦନ୍ ଏଞାଙ୍ତେ ଆମ୍ବେନ୍ ଅଡ଼୍କୋ ଡାଆଜଙ୍ରେଙନ୍ ଜମ୍ମଲନ୍ ଏବୁଡ୍ତେ ଆରି ତାଙ୍ଲେୟଞ୍ଜି ଡ ଗୋଡୋୟଁଞ୍ଜି ଜନୋମନ୍ ଞାଙ୍ତଜି ।
Source notes (1)
- Footnote ଜେଲ୍ଜେଲ୍ ଲବନ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.