Juray Soura Bible
ପର୍ତମ୍ମୁ 7
ବୁବ୍ଡାନ୍
ପ୍ରବୁନ୍ ନୋଅନ୍ଆଡଙ୍ ବରେନ୍, “ଆମ୍ବେନ୍ କୁତ୍ତାମାବେନ୍ ସରିନ୍ ଜାଜ୍ଜଲୋଙନ୍ ଗନ୍ନାବା; ଇନିଆସନ୍ଗାମେଣ୍ଡେନ୍ ପୁର୍ତିଲୋଙନ୍ ଆମନ୍ ଡରମ୍ମମର୍ ଗାମ୍ଲେ ଗନିୟ୍ଗିୟ୍ଲୋଙ୍ଞେନ୍ ରାଙ୍ଡାଏନ୍ । ପୁର୍ତିଲୋଙନ୍ ସିଲଡ୍ ପରାନ୍ନାନ୍ ଡନୋବନ୍ ଆଞନାଙ୍ ଆସନ୍ ମଡ଼ିର୍ ଜନ୍ତୁଜି ସାତଟା ଲେକାୟ୍ ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ଆରି ଏର୍ମଡ଼ିର୍ ଜନ୍ତୁଜି ତଙ୍ବୟ୍ ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ଆତେ ଆମ୍ବେଞ୍ଜି ସରିନ୍ ପାଙ୍ବା । ଆରି ଅନ୍ତିଡଞ୍ଜି ନିୟ୍ ଆଇନ୍ ଡ ଓବ୍ବାନ୍ ଆତେ ସାତଟାଲେକାୟ୍ ପାଙା ଏତ୍ତେଲ୍ଡେନ୍ ଅନ୍ତିଡଞ୍ଜି ଡ ଜନ୍ତୁଜି ଆ କେଜ୍ଜା ଗୋଗୋୟ୍ତଜି । ଇନିଆସନ୍ଗାମେଣ୍ଡେନ୍ ଗରଡ଼େଲାଞନ୍ ଆ ପରାନ୍ନାଜି ଅଡ଼୍କୋନ୍ ଞେନ୍ ରବ୍ବୁତାଜି ଆରି ଲଙେ ସିଲଡ୍ ସାତ ଡିନା ଡେଏନ୍ ସିଲଡ୍ଡେନ୍ ତରୁବନ୍ ପତାୟ୍ତାୟ୍1 ଆରି ବାକୁଡ଼ି ଡିନା ଜାୟ୍ ତମ୍ବା ତଗଲ୍ ତରୁବନ୍ ଅଡ଼ୋତାୟ୍ ।” ପ୍ରବୁନ୍ ଆବ୍ରାଞେନ୍ ଅନ୍ତମ୍ ନୋଅନ୍ ଅଡ଼୍କୋନ୍ ଲୁମେନ୍ ।
ନୋଅନ୍ ତୁଡ୍ରୁସଅ ବର୍ସେଙ୍ ଆଡ୍ରେନ୍ ଆଡିଡ୍ ପୁର୍ତିନ୍ ବୁବ୍ଡାଏନ୍ । ବୁବ୍ଡାନ୍ ସିଲଡ୍ ଡନୋବନ୍ ଆଞନାଙ୍ ଆସନ୍ ନୋଅନ୍, ଡ ଆଡୁକ୍ରିନ୍, ଡ ଆ ଅନଞ୍ଜି, ଡ ଆକଉନଞ୍ଜି ସରିନ୍ ଜାଜ୍ଜଲୋଙନ୍ ଗନ୍ଲଞ୍ଜି । ଇସ୍ୱରନ୍ ଆବ୍ରାଞେନ୍ ଅନ୍ତମ୍ ମଡ଼ିର୍ ଅଡ଼େ ଏର୍ମଡ଼ିର୍ ଜନ୍ତୁନ୍ ଡ ଅନ୍ତିଡଞ୍ଜି ଆରି କିମ୍ପୋଙନ୍ ବାତ୍ତେ ଆତ୍ରଙିୟ୍ତଞ୍ଜି ଅଡ଼୍କୋନ୍ ଆଜନ୍ତୁଜି ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ଆତେ ତଙ୍ବାଗୁ ଲେକାୟ୍, ନୋଅନ୍ ଆମଙ୍ ଜିର୍ରେ ଜାଜ୍ଜଲୋଙନ୍ ଇୟ୍ଲେ ଗନେଜି । ସାତ ଡିନା ଆଡ୍ରେନ୍ ସିଲଡ୍ ଇସ୍ୱରନ୍ ପୁର୍ତିନ୍ ଆନବ୍ବୁବ୍ଡା ଆସନ୍ ତରୁବନ୍ ଆପ୍ପାୟ୍ଲାୟ୍2 ।
ବାଗୁ ଆଙ୍ଗାୟ୍ ସତର ଡିନା ଆଡ୍ରେନ୍ ଆଡିଡ୍ ନୋଅନ୍ ତୁଡ୍ରୁସଅ ବର୍ସେଙ୍ ଡେଏନ୍, ଆରି ପୁର୍ତିଲୋଙନ୍ ପୋପୋଡାନ୍ ଡୁଙ୍ଲନାୟ୍ ଆରି ରୁଆଙନ୍ ଆସନଙ୍ ଅଡ଼୍କୋନ୍ ରୋଆୟ୍ଲନ୍, ଆରି ତମ୍ବା ତଗଲ୍ ବାକୁଡ଼ି ଡିନା ପୁର୍ତିଲୋଙନ୍ ତରୁବନ୍ ଅଡ଼ୋଲାୟ୍ । ତି ଆ ଡିନା ନୋଅନ୍ ଡ ଆଡୁକ୍ରିନ୍ ଆରି ଆ ଡାଙ୍ଗାଡ଼ାଅନଞ୍ଜି, ସେମ, ଆମ ଡ ଜେପତନ୍ ଆରି ୟାଗି ଆ କଉନଞ୍ଜି ସରିନ୍ ଜାଜ୍ଜଲୋଙନ୍ ଗନ୍ଲଞ୍ଜି । ସାଇନ୍ ଡ ଜାଡ଼ିଆନ୍ ଅଡ଼୍କୋନ୍ ଆ ଜନ୍ତୁଜି ଡ କିମ୍ପୋଙନ୍ ବାତ୍ତେ ଆତ୍ରଙିୟ୍ତନ୍ ଡ ଅଡ଼୍କୋନ୍ ସନ୍ନା ସୋଡ଼ା ଆ ଅନ୍ତିଜି ଆନିଞ୍ଜି ସରିନ୍ ଅମ୍ମ ଜାଜ୍ଜନ୍ ଜିରେଞ୍ଜି । ଆତ୍ରଙ୍ୟମ୍ତନ୍ ଅଡ଼୍କୋନ୍ ଆ ଜନ୍ତୁଜି ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ଆତେ ତଙ୍ବାଗୁ ନୋଅନ୍ ଆମଙ୍ ଜିର୍ରେ ଜାଜ୍ଜଲୋଙନ୍ ଗନ୍ଲଞ୍ଜି, ଇସ୍ୱରନ୍ ଆବ୍ରାଞେନ୍ ଅନ୍ତମ୍ ଅଡ଼୍କୋନ୍ ଆ ଜନ୍ତୁ ଅବୟ୍ ଓବ୍ବାନ୍ ଡ ଅବୟ୍ ଆଇନ୍ ଆତେ ନୋଅନ୍ ଆମଙ୍ ଜିର୍ରାଜି, ଆରି ପ୍ରବୁନ୍ ଜାଜ୍ଜନ୍ ଆସନଙ୍ ଇଙଡେନ୍ ।
ବାକୁଡ଼ି ଡିନା ଜାୟ୍ ପୁର୍ତିଲୋଙନ୍ ଜଡ଼ିତିରନ୍ ଅଡ଼ୋଲାୟ୍, ଆରି ଡାଆନ୍ ଗୋଗୋୟ୍ଲେ ଆପ୍ରାଙେନ୍ ଜାଜ୍ଜନ୍ ଡାଆଲୋଙନ୍ ମଙେନ୍ । ଆରି ଡାଆନ୍ ଗୋଗୋୟ୍ଲେ ଆପ୍ରାଙେନ୍ ଜାଜ୍ଜନ୍ ଡାଆଲୋଙନ୍ ମଙେନ୍ । ପୁର୍ତିଲୋଙନ୍ ଡାଆନ୍ ଗୋଗୋୟ୍ଲେ ଆପ୍ରାଙେନ୍ ସୋଡ଼ାରାନ୍ ଆ ବରୁଜି ଅଡ଼୍କୋନ୍ ମାୟାଏନ୍; ତରୁବ୍ଡାନ୍ ଗୋଗୋୟ୍ଲେ ପାଙେନ୍ ଆରି ସୋଡ଼ାରାନ୍ ଆବରୁଜି ଅଡ଼୍କୋନ୍ ମାବ୍ୟାଡାଲେ ଆବବ୍ ବୁରନ୍ ସିଲଡ୍ ପନ୍ଦର ସନ୍ତି ଜାୟ୍ ତୋଣ୍ଡୋନ୍ ଡାଆନ୍ ଡୋଲନେ । ତିଆସନ୍ ପୁର୍ତିଲୋଙନ୍ ଅଡ଼୍କୋନ୍ ଆ ପରନ୍ନାଜି ଅନ୍ତିଡନ୍, ଜନ୍ତୁନ୍, ଆରି ମନ୍ରାଞ୍ଜି ରବୁଏଞ୍ଜି । ଆସର୍ଲଲୋଙନ୍ ଡକୋଲନ୍ ଆତ୍ରଙ୍ୟମ୍ଲଞ୍ଜି ପରାନ୍ନାଞ୍ଜି ଅଡ଼୍କୋନ୍ ରବୁଆଜେଞ୍ଜି । ପୁର୍ତିଲୋଙନ୍ ଡକୋନ୍ ଅଡ଼୍କୋନ୍ ଆ ପରାନ୍ନାଜି ଇସ୍ୱରନ୍ ରବ୍ବୁଏନ୍ । ଆନିନ୍ ମନ୍ରାନ୍, ଜନ୍ତୁଜି, ଆରି ଅନ୍ତିଡଞ୍ଜି ରବ୍ବୁଆଜେନ୍ । ନୋଅନ୍ ଡ ଜାଜ୍ଜଲୋଙନ୍ ଆନିନ୍ ସରିନ୍ ଆଡ୍ରକୋଲଞ୍ଜି ଅଡ଼୍କୋନ୍ ଆ ଜନ୍ତୁଜି ତୁମ୍ ଡନୋବନ୍ ଞାଙେଞ୍ଜି3 । ଏନ୍ନେଗନ୍ ପୁର୍ତିନ୍ ବସଅ ପଚାସ ଡିନା ଜାୟ୍ ଡାଆଲୋଙନ୍ ତବୁବ୍ଲେ ଡକୋଲନ୍ ।
Source notes (3)
- Footnote ଆପ୍ପାୟ୍ତାୟ୍
- Footnote ସୁସୁଏନ୍
- Footnote ଅମେଙେଞ୍ଜି
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.