Juray Soura Bible
ପର୍ତମ୍ମୁ 48
ଇପ୍ରିଅମନ୍ ଡ ମନସିନ୍ଆଡଙ୍ ଜାକୁବନ୍ ଆସିର୍ବାଦ
ତି ଅଡ଼୍କୋନ୍ ଆଗନଟେ ସିଲଡ୍ ଅବୟ୍ନେ ଜୋସେପନ୍ଆଡଙ୍ କବରନ୍ ଆପ୍ପାୟ୍ଲେ ବରେନ୍; “ଗିଜା, ଆପେୟ୍ନମ୍ ଅସୁତେ,” ସିଲତ୍ତେ ଆନିନ୍ ବାଗୁ ଆଡାଙ୍ଗାଡ଼ାଅନନ୍ ମନଃସି ଡ ଇପ୍ରିଅମନ୍ଆଡଙ୍ ସରିନ୍ ଓରୋଙେନ୍ । ତିଆଡିଡ୍ ଅବୟ୍ନେ ଜାକୁବନ୍ଆଡଙ୍ ବରେନ୍, “ଗିଜା, ଡାଙ୍ଗାଡ଼ାଅନ୍ନମ୍ ଜୋସେପନ୍ ଅମଙ୍ବାନମ୍ ଜିର୍ରାୟ୍,” ସିଲତ୍ତେ ଜାକୁବନ୍ ଆନିନ୍ଡମ୍ ଅଃବପୁଲନ୍ ଆର୍ଲୁଡ୍ଲୁଡନ୍ ସିଲଡ୍ ଡୁଲନ୍ ତଙ୍କୁମେନ୍ । ତି ସିଲଡ୍ଲ୍ଲନ୍ ଜାକୁବନ୍ ଜୋସେପନ୍ଆଡଙ୍ ବରେନ୍, “କିନାନ୍ ଆ ଡେସା ଲୁସ୍ ଆଞୁମ୍ ଆଡ୍ରକୋନେଲୋଙ୍ ଇସ୍ୱରନ୍ ଞେନ୍ଆଡଙ୍ ଅବ୍ତୁୟ୍ଡାଲନ୍ ଆସିର୍ବାଦଲେ କେନ୍ ଆବର୍ନେ ବର୍ରନେ, ଗିଜା, ଞେନ୍ ଆମନ୍ଆଡଙ୍ ଏଅବ୍ ଗୋଗୋୟ୍ତମ୍ ଡ ଗୋଗୋୟ୍ କେଜ୍ଜା ଏଏମ୍ମେତମ୍ ଆରି ଅମଙ୍ନମ୍ ସିଲଡ୍ ଏର୍ଜାଡ଼ିକାନ୍ ଆ ମନ୍ରା ଆରନୁକୁ ଅମ୍ଡୁଙ୍ତାୟ୍, ଆରି, ତିକ୍କି କେଜ୍ଜାନମ୍ଜିଆଡଙ୍ କେନ୍ ଆଡେସା ତିୟ୍ତାୟ୍ ।” ତିଆସନ୍ ମିସର୍ ଡେସା ଅମଙ୍ବାନମ୍ ଞେନ୍ ଅନ୍ରଙ୍ ଇୟାଞନ୍ ଆମ୍ମୁଙ୍ ଅଙ୍ଗା ବାଗୁ ଡାଙ୍ଗଡ଼ାଅନମ୍ ମିସର୍ ଡେସାଲୋଙ୍ କନୋଡ୍କୋଡନ୍ ଡେଏଞ୍ଜି, ଆନିଞ୍ଜି ଞେନ୍ଆତେ ଡେତଜି, ରୁବେନନ୍ ଡ ସିମିୟୋନନ୍ ଅନ୍ତମ୍ ଇପ୍ରିଅମନ୍ ଡ ମନଃସିନ୍ ଞେନ୍ଆତେ ଡେତଜି । ଆରି, କେନ୍ ଆନିଞ୍ଜି ସିଲଡ୍ଲ୍ଲନ୍ ଆମନ୍ ଅଙ୍ଗା ଆଅଞ୍ଜି କୋଡ୍ତଜି, ଆନିଞ୍ଜି ଆମନ୍ଆତେ ଡେତଜି ଆରି ସୋଡ଼ା ବନୋଞାଙଞ୍ଜି ଆଞୁମ୍ଲୋଙ୍ ରମ୍ମଙ୍ ରମ୍ମଙ୍ ସନୋଡ଼ାନେଲୋଙନ୍ ଅନୋଡେନ୍ ଡେତଜି । ପଦନ୍ ଅରାମନ୍ ସିଲଡ୍ କିଣାନ୍ ଡେସାନ୍ ଞେନ୍ ଜରିର୍ରାଞନ୍ ଆଡିଡ୍ ଇପ୍ରାତାନ୍ ଅଡ଼ୋବେନ୍ ଆସନ୍ ଅସୋୟ୍ ସଙାୟ୍ ତଙରନ୍ ଆଡ୍ରକୋଏନ୍ ଆଡିଡ୍ ତଙର୍ବାନ୍ ତେମଡ୍ଞେନ୍ ରାଏଲନ୍ ରବୁଏନ୍; ସିଲତ୍ତେ ଞେନ୍ ଇପ୍ରାତା, ଆଗ୍ରାମ୍ଗାମ୍, ବେତଲିଅମନ୍ ଆନେଙ୍ ତଙର୍ବାନ୍ ଆନିନ୍ଆଡଙ୍ ତିଲ୍ଲାୟ୍ । ତି ସିଲଡ୍ଲ୍ଲନ୍ ଜାକୁବନ୍ ଜୋସେପନ୍ ଆ ଡାଙ୍ଗାଡ଼ାଅନଞ୍ଜିଆଡଙ୍ ଗିୟ୍ଲେ ବରେନ୍, “କେନ୍ଆନିଞ୍ଜି ଆନ୍ନା ?” ସିଲତ୍ତେ ଜୋସେପନ୍ ଆପେୟନ୍ଆଡଙ୍ ବରେନ୍, “କେନ୍ଆନିଞ୍ଜି ଡାଙ୍ଗାଡ଼ାଅନ୍ଞେଞ୍ଜି, ଇସ୍ୱରନ୍ କେନ୍ଆନିଞ୍ଜିଆଡଙ୍ କେନ୍ ଆଡେସାଲୋଙ୍ ଞେନ୍ଆଡଙ୍ ତିୟ୍ଲିଁୟ୍ ।” ସିଲତ୍ତେ ଜାକୁବନ୍ ବରର୍ନେ, “କାକୁର୍ତିତନାୟ୍, କେନ୍ ଆନିଞ୍ଜିଆଡଙ୍ ମଙ୍ବାଞେନ୍ ଓରୋଙାୟ୍, ଞେନ୍ କେନ୍ ଆନିଞ୍ଜିଆଡଙ୍ ଆସିର୍ବାଦତାଜି ।” ତି ଆଡିଡ୍ ଜାକୁବନ୍ ଆବ୍ରୁଡାଡମେନ୍ ଆସନ୍ ମନଙ୍ ଗିୟ୍ଲେ ଅରପ୍ତିଲୋଜି । ତିଆସନ୍ ଜୋସେପନ୍ ଆମଙ୍ବାନ୍ ଆନିଞ୍ଜିଆଡଙ୍ ଆରୋରୋଙେନ୍ ସିଲଡ୍, ଆନିନ୍ ଆନିଞ୍ଜିଆଡଙ୍ ଜୋର୍ଜୋର୍ରେ କୋଣ୍ତୋଏଞ୍ଜି ଆରି, ଜାକୁବନ୍ ଜୋସେପନ୍ଆଡଙ୍ ବରେନ୍, “ଞେନ୍ ଇୟମ୍ଲାୟ୍, ମୁକାନମ୍ ଆରି ଗିୟ୍ଲେ ଅଃରପ୍ତିଆୟ୍; ବନ୍ଡ ଗିଜା, ଇସ୍ୱରନ୍ କେଜ୍ଜାନମ୍ ଜାୟ୍ ଞେନ୍ଆଡଙ୍ ଅବ୍ତୁୟ୍ଲିଁୟ୍ ।” ସିଲତ୍ତେ ଜୋସେପନ୍ ଆପେୟନ୍ ଆବୁଲୁଲୋଙନ୍ ସିଲଡ୍ ଆନିଞ୍ଜିଆଡଙ୍ ଓରୋଙ୍ଲେ ଆନିନ୍ଡମ୍ ତୁଡ଼ୁମ୍ଲେ ଲୋମେନ୍ । ତି ସିଲଡ୍ଲ୍ଲନ୍ ଜୋସେପନ୍ ବାଗୁଞ୍ଜିଆଡଙ୍ ଓରୋଙ୍ଲେ ଆର୍ଜଡ଼ୋମ୍ ସିଲଡ୍ ଇପ୍ରିଅମନ୍ଆଡଙ୍ ଞମ୍ଲେ ଜାକୁବନ୍ ଆ ଅର୍କାବଡ଼ିସିବାନ୍ ଡ ଅର୍ଜଡ଼ୋମ୍ସିବାନ୍ ମନଃସିନ୍ଆଡଙ୍ ଞମ୍ଲେ ଜାକୁବନ୍ ଆର୍ଜଡ଼ୋମ୍ସିବା ତବ୍ନଙେନ୍ । ସିଲତ୍ତେ ଜାକୁବନ୍ ଆର୍ଜଡ଼ୋମ୍ସିନ୍ ଆର୍ସାମ୍ଲେ ଆସନ୍ନା ବନୋଞାଙ୍ ଇପ୍ରିଅମନ୍ ଆବବ୍ଲୋଙ୍ ଡକୋଏନ୍, ଆରି, ମନଃସିନ୍ ଆବବ୍ଲୋଙ୍ ଆ ଅର୍କାବଡ଼ିସିନ୍ ଡକୋଏନ୍, ଆନିନ୍ ଇୟମ୍ଲେ ଆନିନ୍ଡମ୍ ଆସି ଏତ୍ତେଏନ୍; ଇନିଆସନ୍ଗାମେଣ୍ଡେନ୍ ମନଃସିନ୍ ଆପର୍ତମ୍ମୁକୋଡ୍ ଡକୋଏନ୍ । ତି ସିଲଡ୍ଲ୍ଲନ୍ ଆନିନ୍ ଜୋସେପନ୍ଆଡଙ୍ ଆସିର୍ବାଦଲେ ବରେନ୍, “ଅଙ୍ଗା ଆ ଇସ୍ୱର ଆତେମଡ୍ ପୁର୍ବା ଜୋଜୋଞେନ୍ ଅବ୍ରାଆମନ୍ ଡ ଇସାକନ୍ ସରିନ୍ ବୁଲେଏନ୍, ଆରି ଅଙ୍ଗା ଆ ଇସ୍ୱର କନୋଡ୍କୋଡ୍ ଡିନାଞେନ୍ ସିଲଡ୍ଲ୍ଲନ୍ ନମିଆନ୍ତାନ୍ ଞେନ୍ଆଡଙ୍ ତୁର୍ତୁର୍ତିଁୟ୍, ଅଙ୍ଗା ଆ ପାଙ୍ଲଙ୍ବର୍ମର୍ ଅଡ଼୍କୋନ୍ ଆତନଙଡ୍ ସିଲଡ୍ ଞେନ୍ଆଡଙ୍ ଡୋବ୍ଲିଁୟ୍, ଆନିନ୍ କେନ୍ ଆପସିୟ୍ଜିଆଡଙ୍ ଆସିର୍ବାଦଏତୋ; କେନ୍ଆନିଞ୍ଜି ଅଞୁମ୍ଲୋଙ୍ଞେନ୍ ଡ ପୁର୍ବା ଜୋଜୋଞେନ୍ ଅବ୍ରାଆମନ୍ ଡ ଇସାକନ୍ ଆଞୁମ୍ଲୋଙ୍ ଅନୋଡେନ୍ ଡେଏତଜି, ଆରି, କେନ୍ଆନିଞ୍ଜି ଡେସାଲୋଙନ୍ ଗୋଗୋୟ୍ଲେ ମନ୍ରାଏତଜି ।”
ତିଆଡିଡ୍ ଇପ୍ରିଅମନ୍ ଆବବ୍ଲୋଙ୍ ଆପେୟନ୍ ଆର୍ଜଡ଼ୋମ୍ସି ଗିୟ୍ଲେ ଜୋସେପନ୍ ବରାବେନ୍; ତିଆସନ୍ ଇପ୍ରିଅମନ୍ ଆବବ୍ ସିଲଡ୍ ମନଃସିନ୍ ଆବବ୍ଲୋଙ୍ ଆଡନକ୍କୋ ଆସନ୍ ଆପ୍ପେୟନ୍ ଆସି ତେକ୍କେଲେ ବରେନ୍, “ଆପେୟ୍, ଏନେଲେ ତଡ୍, କେନ୍ ଆନିନ୍ ଆସୋଡ଼ା ଡାଙ୍ଗାଡ଼ାଅନ୍, କେନ୍ ଆବବ୍ଲୋଙନ୍ ଅର୍ଜଡ଼ୋମ୍ସିନମ୍ ଡକ୍କୋଆ ।” ବନ୍ଡ ଆପ୍ପେୟନ୍ ଅଃମାନେଲୋ, ଆରି ବର୍ରନେ, “ଞେନ୍ ଜନା, ଏ ଡାଙ୍ଗାଡ଼ାଅନ୍, ଞେନ୍ ଜନା । ଆନିନ୍ ନିୟ୍ ବକେଜ୍ଜାମର୍ ଡେତେ ଆରି ଆନିନ୍ ନିୟ୍ ସୋଡ଼ା ଡେତେ ଡ ଆସନ୍ନା ବନୋଞାଙ୍ ଆନିନ୍ ସିଲଡ୍ ଗୋଗୋୟ୍ ସୋଡ଼ା ଡେତେ ଆରି ଆକେଜ୍ଜାନ୍ ବରିୟ୍ ଡେତଜି ।” ତିଆସନ୍ ଇସ୍ରାଏଲନ୍ ଇପ୍ରିଅମନ୍ ଡ ମନସିନ୍ଆଡଙ୍ ଆସିର୍ବାଦଲେ ବର୍ରନେ, ଅଙ୍ଗାଆଡିଡ୍ ଇସ୍ରାଏଲନ୍ ଆନ୍ନାମରଞ୍ଜିଆଡଙ୍ ଆସିର୍ବାଦତଜି, ତିଆଡିଡ୍ ଅଞୁମ୍ନମ୍ ଞମ୍ତଜି । ଆନିଞ୍ଜି ବର୍ତଞ୍ଜି ଇପ୍ରିଅମନ୍ ଡ ମନସିନ୍ ଅନ୍ତମ୍ ଇସ୍ୱରନ୍ ଆମ୍ବେଜିଆଡଙ୍ ଏମ୍ମେବେନ୍ତୋ । ଆରି ଜାକୁବନ୍ ଜୋସେପନ୍ଆଡଙ୍ ବରେନ୍, “ଗିଜା, ଞେନ୍ ରବୁତିଞ୍; ବନ୍ଡ ଇସ୍ୱରନ୍ ଆମ୍ୱେଞ୍ଜି ସରିନ୍ ଡକୋତେ ଆରି ଆମ୍ୱେଞ୍ଜିଆଡଙ୍ ଆପେୟ୍ବେନ୍ ଆଡେସା ଆବ୍ଡିଡ୍ଲେ ଓରୋଙ୍ତବେନ୍ ।” କଡ଼ିବ୍ଞେନ୍ ଡ ଞଙାନ୍ ବାତ୍ତେ ଇମୋରିଅଞ୍ଜି ଆସିଲୋଙ୍ ସିଲଡ୍ ଅଙ୍ଗା ଆବନ୍ତା ଞାଙ୍ଲାୟ୍, ବୋଞାଙ୍ନମ୍ଞ୍ଜି ସିଲଡ୍ ତି ଆବନନ୍ତା ଗୋଗୋୟ୍ ଆମନ୍ଆଡଙ୍ ତିୟ୍ଲମ୍ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.