Juray Soura Bible
ପର୍ତମ୍ମୁ 42
ଜୋସେପନ୍ ଆବୋଞାଙ୍ଜି ମିସର୍ ଡେସାନ୍ ଆଜନିର୍
ଆରି ମିସର୍ ଡେସାଲୋଙ୍ ଜନ୍ରୋମନ୍ ଡକୋ, କେନ୍ ଆବର୍ନେ ଅମ୍ଡଙ୍ଲେ ଜାକୁବନ୍ ଆ ଡାଙ୍ଗାଡ଼ାଅନଞ୍ଜିଆଡଙ୍ ବରେନ୍, “ଆମ୍ୱେଞ୍ଜି ଇନିବା ତର୍ଡମ୍ ଅର୍ନାଙ୍ଗାଙ୍ଲେ ଏଡକୋତନେ ?” ଆନିନ୍ ଆରି ବର୍ନେ, “ଗିୟ୍ବା, ଞେନ୍ ଅମ୍ଡଙ୍ଲାୟ୍, ମିସର୍ ଡେସାଲୋଙନ୍ ଜନ୍ରୋମନ୍ ଡକୋ; ତିଆସନ୍ ଆମ୍ୱେଞ୍ଜି ତେତ୍ତେ ଇୟ୍ଲେ ଇନ୍ଲେଞ୍ଜି ଆସନ୍ ଜନ୍ରୋମନ୍ ଞିଲେ ପାଙ୍ଗାୟ୍ବା; ସିଲତ୍ତେ ଇନ୍ଲେଞ୍ଜି ଏର୍ରନବ୍ବୁନ୍ ଅମେଙ୍ଲଙ୍ତନେ ।” ତି ସିଲଡ୍ଲ୍ଲନ୍ ଜୋସେପନ୍ ଆବୋଞାଙ୍ଜି ଦସଜଣ ଜନ୍ରୋମନ୍ ଆଞନି ଆସନ୍ ମିସର୍ ଡେସାନ୍ ଇୟେଞ୍ଜି । ବନ୍ଡ ଜାକୁବନ୍ ଜୋସେପନ୍ ଆବୋଞାଙ୍ଡମନ୍ ବିନ୍ୟାମିନ୍ଆଡଙ୍ ଆବୋଞାଙଞ୍ଜି ସରିନ୍ ଅଃନାପାୟ୍ଲୋ; ଇନିଆସନ୍ଗାମେଣ୍ଡେନ୍ ଆନିନ୍ ବର୍ନେ, “ଓଡେନ୍ନଙ୍ କେନ୍ ଆନିନ୍ନିୟ୍ ଇନ୍ନିଙ୍ ଡେଡଙ୍ ।” ତିଆଡିଡ୍ ତେତ୍ତେ ଆରିୟେଞ୍ଜି ଆ ମନ୍ରାଜି ସରିନ୍ ଇସ୍ରାଏଲନ୍ ଆ ଡାଙ୍ଗାଡ଼ାଅଞ୍ଜି ଜାୟ୍ ଜନ୍ରୋମନ୍ ଆଞନି ଆସନ୍ ଇୟେଞ୍ଜି; ଇନିଆସନ୍ଗାମେଣ୍ଡେନ୍ କିଣାନ୍ ଡେସାଲୋଙ୍ ଜାୟ୍ କାନ୍ତାରାନ୍ ଡକୋଏନ୍ । ତି ଆଡିଡ୍ ଜୋସେପନ୍ ତି ଆଡେସା ଆସୋଡ଼ାମର୍ ଆଡ୍ରେନ୍ ଆସନ୍ ଡେସାନ୍ ଅଡ଼୍କୋନ୍ ଆମନ୍ରାଜିଆଡଙ୍ ଜନ୍ରୋମନ୍ ତମେନ୍; ସିଲତ୍ତେ ଜୋସେପନ୍ ଆବୋଞାଙ୍ଜି ଜିର୍ରେ ଆନିନ୍ଆଡଙ୍ ଲୋମେଞ୍ଜି । ତିଆଡିଡ୍ ଜୋସେପନ୍ ଆବୋଞାଙଞ୍ଜିଆଡଙ୍ ଗିୟ୍ଲେ ଅଃମଡେନ୍, ବନ୍ଡ ଆନିଞ୍ଜି ଆମୁକାବା ଏର୍ନଃମଡନ୍ ଆ ମନ୍ରା ଅନ୍ତମ୍ ଞଡ୍ରମ୍ଲେ ସାଞେଙ୍ଲେ ବରେନ୍, “ଆମ୍ୱେଞ୍ଜି ଅଙ୍ଗା ଆଜାଙ୍ଲ ସିଲଡ୍ ଏଇୟ୍ଲାୟ୍ ?” ଆନିଞ୍ଜି ବର୍ରଞ୍ଜି, “କିଣାନ୍ ଡେସା ସିଲଡ୍ ଜନୋମ୍ଜୋମନ୍ ଆଜନବ୍ ଆଞନି ଆସନ୍ ଏଇୟ୍ଲାୟ୍ ।” ଜୋସେପନ୍ ଆବୋଞାଙଞ୍ଜିଆଡଙ୍ ଅଃମଡେନ୍ ବନ୍ଡ ଆନିଞ୍ଜି ଆନିନ୍ଆଡଙ୍ ଅଃମଡ୍ଲେ ଅଃରପ୍ତିଲଜି । ସିଲତ୍ତେ ଜୋସେପନ୍ ଆନିଞ୍ଜି ଆବର୍ନେ ଅଡ଼୍କୋନ୍ ଆଗନୁମ୍ତେବାନ୍ ଗିଜେନ୍, ତିଆତେ ମନେଲେ ଆନିଞ୍ଜିଆଡଙ୍ ବରେନ୍, “ଆମ୍ୱେଞ୍ଜି ରାଉମର୍ଜି; ଡେସାନ୍ ଆ ସରିଡ୍ସିଡ୍ବର୍ ଆସନାୟ୍ ଆସନ୍ ଆମ୍ୱେଞ୍ଜି ଏଇୟ୍ଲାୟ୍ ।” ଆନିଞ୍ଜି ବର୍ଲଞ୍ଜି, “ଇଜା ପ୍ରବୁ, ତି ତଡ୍, କମ୍ୱାରିନମ୍ଞ୍ଜି କେନ୍ ଜନୋମ୍ଜୋମନ୍ ଆଜନବ୍ ଆଞନି ଆସନ୍ ଇୟ୍ଲାଜି ।” ଇନ୍ଲେଞ୍ଜି ଅଡ଼୍କୋନ୍ ଆବମନ୍ରା ଆଡାଙ୍ଗାଡ଼ାଅନ୍, ଞେନ୍ ଡରମ୍ମମର୍ଜି, କମ୍ୱାରିନମ୍ଞ୍ଜି କେନ୍ ରାଉମର୍ଜି ତଡ୍ । ସିଲତ୍ତେ ଆନିନ୍ ଆନିଞ୍ଜିଆଡଙ୍ ବରେନ୍, “ଇଜା, ଇଜା, ଆମ୍ୱେନ୍ ଡେସାନ୍ ଆ ସରିଡ୍ସିଡ୍ବର୍ ଆସନାୟ୍ ଏଇୟ୍ଲାୟ୍ ।” ଆନିଞ୍ଜି ବର୍ଲଞ୍ଜି, “କମ୍ୱାରିନମ୍ଞ୍ଜି କେନ୍ ବାର ବନୋଞାଙ୍, କିଣାନ୍ ଆଡେସାବାୟ୍ ଆବମନ୍ରାନ୍ ଆଡାଙ୍ଗାଡ଼ାଅନ୍; ଆରି ଗିଜା, ଆସନ୍ନା ବନୋଞାଙ୍ଲେନ୍ ଆପେୟ୍ଲେନ୍ ଆମଙ୍ବା ଡକୋ, ଆରି, ଅବୟ୍ନେ ଅବୟ୍ ତଡ୍ ।” ସିଲତ୍ତେ ଜୋସେପନ୍ ଆନିଞ୍ଜିଆଡଙ୍ ବରେଞ୍ଜି, “ଞେନ୍ ଆମ୍ୱେଞ୍ଜିଆଡଙ୍ ରାଉମର୍ଜି ଗାମ୍ଲେ ଏବର୍ରନାୟ୍, ଆମ୍ୱେଞ୍ଜି ଆଜାଡ଼ିନ୍ ମା କେନ୍ ଆମନ୍ରାଜି ।” କେନ୍ ବାତ୍ତେ ଆମ୍ୱେନ୍ଆଡଙ୍ ମନାଲନ୍ ଡେତେ; ଞେନ୍ ପାରୋନ୍ ଆନମେଙ୍ ବର୍ସେଙ୍ ପର୍ମାଡ଼ାଲନ୍ ଏବର୍ତନାୟ୍, ଆସନ୍ନା ବନୋଞାଙ୍ବେନ୍ କେନ୍ ତେନେ ଅଃଜିରାୟ୍ଡେନ୍, ଆମ୍ୱେଞ୍ଜି କେନ୍ ତେନେ ସିଲଡ୍ ଜିର୍ରେ ଏରପ୍ତିଏ । ଅମଙ୍ବେନ୍ ସିଲଡ୍ ଆନ୍ନିଙ୍ ଅବୟ୍ନେ ଆପ୍ପାୟ୍ବା, ଆନିନ୍ ଓବ୍ବାବେନ୍ଆଡଙ୍ ଓରୋଙାୟ୍ତୋ, ଆମ୍ୱେଞ୍ଜି ଆବଣ୍ତି ଡକୋନାବା; ବର୍ନେବେନ୍ ଆଜାଡ଼ିନ୍ ଅଡ଼େ ଇଜା, ମନାଲନ୍ ଡେଏନ୍ ଡେନ୍ ଗିୟ୍ତାତେ; ଇଜ୍ଜାଡେନ୍ ଆମ୍ୱେନ୍ ପାରୋନ୍ ଆନମେଙ୍ ବର୍ସେଙ୍ ପର୍ମାଡ଼ାଲନ୍ ଏବର୍ତନାୟ୍, ଆମ୍ୱେଞ୍ଜି ରାଉମର୍ଜି । ସିଲତ୍ତେ ଜୋସେପନ୍ ଆନିଞ୍ଜିଆଡଙ୍ ୟାଗି ଡିନା ବଣ୍ତିସିଙ୍ଲୋଙନ୍ ବଣ୍ତିଲେ ଡକୋଏନ୍ । ଆରି, ୟାଗି ଡିନାଲୋଙ୍ ଜୋସେପନ୍ ଆନିଞ୍ଜିଆଡଙ୍ ବର୍ରନେ, “ଇସ୍ୱରନ୍ଆଡଙ୍ ଞେନ୍ ବତଙ୍ତାୟ୍; ତିଆସନ୍ କେନ୍ ଆଲନୁମ୍ ଲୁମ୍ବା, ତିଡେନ୍ ଅମେଙ୍ତବେନ୍ । ଆମ୍ୱେଞ୍ଜି ଡରମ୍ମମର୍ ଡେନ୍, ତିଡେନ୍ ଅମଙ୍ବେନ୍ ସିଲଡ୍ ବବୋନୋଞାଙ୍ଆଡଙ୍ କେନ୍ ଆବଣ୍ତିସିଙ୍ଲୋଙ୍ ବଣ୍ତିଲେ କାନ୍ତାରାନ୍ ଆସନ୍ ଅସିଙନ୍ ଜନ୍ରୋମନ୍ ପାଙ୍ବା । ବନ୍ଡ ଆମ୍ୱେଞ୍ଜି ଆସନ୍ନା ବନୋଞାଙ୍ବେନ୍ ଆଡଙ୍ ଅମଙ୍ଞେନ୍ ଓରୋଙାୟ୍ବା, ସିଲତ୍ତେ ବର୍ନେବେନ୍ ଆଜାଡ଼ିନ୍ ଡେଏଣ୍ଡେନ୍, ଆମ୍ୱେଞ୍ଜି ଅଃରବୁବେନ୍ ।” ସିଲତ୍ତେ ଆନିଞ୍ଜି ଆବର୍ନେନ୍ ଅନ୍ତମ୍ ଲୁମେଞ୍ଜି । ସିଲତ୍ତେ ଆନିଞ୍ଜି ତର୍ଡମ୍ ଅଲ୍ବରେଞ୍ଜି, “ଇନ୍ଲେଞ୍ଜି ଆଜାଡ଼ିନ୍ ବୋଞାଙ୍ଲେନ୍ ଆବର୍ନେଲୋଙ୍ ଡୋସା; ଆନିନ୍ ଆକରାକୁର୍ତିଲନ୍ ଆଡିଡ୍ ଇନ୍ଲେଞ୍ଜି ଆ ପରାନ୍ନା କିଃଲାୟ୍ବିଲାୟ୍ ଆଡ୍ରେନ୍ ଗିୟ୍ଲବୋ ବନ୍ଡ ଅଃନମ୍ଡଙ୍ଲବୋ, ତିଆସନ୍ ଇନ୍ଲେଞ୍ଜିଆଡଙ୍ କେନ୍ ଆଗ୍ନେଗେ ଞାଙ୍ଲବୋ ।” ତିଆଡିଡ୍ ରୁବେନନ୍ ଆନିଞ୍ଜିଆଡଙ୍ ବେରେନ୍, “ଆମ୍ୱେଞ୍ଜି ତି ଆପସିୟ୍ ଆବର୍ନେଲୋଙ୍ ଇର୍ସେନ୍ ଏଲୁମ୍ଡଙେ, କେନ୍ ଆବର୍ନେ ପଙ୍ ଞେନ୍ ଆମ୍ୱେଞ୍ଜିଆଡଙ୍ ଅଃବର୍ରବେନ୍ ? ଡେଲୋଜନଙ୍ଡେନ୍ ଆମ୍ୱେଞ୍ଜି ଏଃନମ୍ଡଙ୍ଲୋ; ତିଆସନ୍ ଗିୟ୍ବା, ନମି ଆମିଞାମନ୍ ଆଡନୁଲ୍ ପନରଡନ୍ ଞାଙ୍ତବୋ ।” ଆନିଞ୍ଜି ଇନି ଗାମେଞ୍ଜି ଜୋସେପନ୍ ଆ କଡାଡ଼ିଞ୍ଜି ଜନାଏନ୍, ବନ୍ଡ କେନ୍ଆତେ ଆନିଞ୍ଜି ଅଜନାଲଜି, ଇନିଆସନ୍ଗାମେଣ୍ଡେନ୍ ଆନିନ୍ ବନାଣ୍ଡାବର୍ ମରନ୍ ବାତ୍ତେ ଆନିଞ୍ଜି ସରିନ୍ କଡାଡ଼ିଲଞ୍ଜି । “ତି ସିଲଡ୍ଲ୍ଲନ୍ ଜୋସେପନ୍ ଆନିଞ୍ଜି ଆମଙ୍ ସିଲଡ୍ ଜିର୍ରେ ଇୟ୍ଲେୟେଏ; ଆରି ଜିର୍ରେ ଆନିଞ୍ଜି ସରିନ୍ କଡାଡ଼ିଲନ୍ ଆନିଞ୍ଜି ସିଲଡ୍ ସିମିଅନନ୍ଆଡଙ୍ ଞମ୍ଲେ ଆତେମଡଞ୍ଜି ଜିଏନ୍ ।”
ଜୋସେପନ୍ ଆବୋଞାଙ୍ଜି କିଣାନନ୍ ଡେସାନ୍ ୟର୍ରଞ୍ଜି
ସିଲତ୍ତେ ଜୋସେପନ୍ ଆସିମ୍ମାଲୋଙଞ୍ଜି ଜନ୍ରୋମନ୍ ବବ୍ରିୟ୍ଲେ ଡିଲେ ମନ୍ରାନ୍ ଆଜନିରାଲୋଙ୍ ତଙ୍କାନ୍ ଆନାବ୍ଡିଡ୍ ଡ ତୁଙାର୍ ତଙରନ୍ ଆଗାଗାନେ ଆସନ୍ ଜନବନ୍ ଆତନିୟ୍ ବାଞେଞ୍ଜି; ସିଲତ୍ତେ ତିଅନ୍ତମ୍ ଲୁମେଞ୍ଜି, ସିଲତ୍ତେ ଆନିଞ୍ଜି ରମ୍ମଙ୍ ରମ୍ମଙ୍ ଆଗୋଡୋଞ୍ଲୋଙ୍ ଜନ୍ରୋମନ୍ ଅଃବୋୟ୍ଲେ ତେତ୍ତେ ସିଲଡ୍ ଜିରେଞ୍ଜି । ବନ୍ଡ ଆପ୍ରଡ୍ଲୋଙ୍ଲଞ୍ଜି ଆଡ୍ରକୋନେଲୋଙ୍ ବୟ୍ନେ ଗୋଡୋଁୟନ୍ ଗାଗାନେନ୍ ଆତନିୟ୍ ଆସନ୍ ଜନିରାନ୍ ଆରୁଜେନ୍, ଆଡାବ୍ବୋନ୍ ଗିଜେନ୍; ଇନିଆସନ୍ଗାମେଣ୍ଡେନ୍ ଜନିରାଲୋଙନ୍ ଡାବ୍ବୋନ୍ ଡକୋଏନ୍ । ସିଲତ୍ତେ ଆନିନ୍ ଆବୋଞାଙଞ୍ଜିଆଡଙ୍ ବରେନ୍, “ଡାବ୍ବୋଞେନ୍ ଆବ୍ଡିଡ୍ଲିଁୟ୍ଜି; କେରେ ଗିୟ୍ବା, ତିଆତେ ଜନିରାଲୋଙ୍ଞେନ୍ ଡକୋ, ” ଆନିଞ୍ଜି ବତଙେଞ୍ଜି ଆରି ଆନିଞ୍ଜି ତର୍ଡମ୍ କଡାଡ଼ିଲନ୍ ଅଲ୍ବରେଞ୍ଜି, “ଇସ୍ୱରନ୍ ଇନ୍ଲେଞ୍ଜି ଆସନ୍ ଇନିକେନ୍ ଆକାବ୍ବାଡ଼ା ଲୁମେନ୍ ?” ତି ସିଲଡ୍ଲ୍ଲନ୍ ଆନିଞ୍ଜି କିଣାନ୍ ଡେସାଲୋଙ୍ ଆପେୟଞ୍ଜି ଜାକୁବନ୍ ଆମଙ୍ବା ଅଡ଼ୋଲେ ଆନିଞ୍ଜି ଆସନ୍ ଇନିଜି ଗଟେଏନ୍, ତି ଅଡ଼୍କୋନ୍ ଆନିନ୍ଆଡଙ୍ ବରେଞ୍ଜି, “ଅଙ୍ଗା ଆ ମନ୍ରା ତି ଆଡେସା ଆ ସାଉକାର, ଆନିନ୍ ଇନ୍ଲେଞ୍ଜିଆଡଙ୍ ଡେସାନ୍ ଆରାଉମର୍ ଇଃୟମ୍ଡାଲେ ନିଣ୍ତୟ୍ବରନ୍ ବର୍ରନେ ।” ସିଲତ୍ତେ ଇନ୍ଲେଞ୍ଜି ଆନିନ୍ଆଡଙ୍ ଏବର୍ରାୟ୍, “ଇନ୍ଲେଞ୍ଜି ଡରମ୍ମମର୍ଜି, ରାଉମର୍ଜି ତଡ୍, ଞେନ୍ ବାର ବନୋଞାଙ୍, ଅଡ଼୍କୋନ୍ଲେନ୍ ଆବୟନ୍ ଆପେୟ୍ ଆଅନ; ଅମଙ୍ବାଲେନ୍ ଅବୟ୍ନେ ଅବୟ୍ ତଡ୍, ଆରି, କିଣାନ୍ ଡେସାଲୋଙ୍ ଆପେୟ୍ଲେନ୍ ଆମଙ୍ବା ଆରି ଅବୟ୍ ଆସନ୍ନା ବନୋଞାଙ୍ ଡକୋ ।” ତିଆଡିଡ୍ ଡେସାନ୍ ଆ ସାଉକାର ତି ଆ ମନ୍ରା ଇନ୍ଲେଞ୍ଜିଆଡଙ୍ ବରଲେନ୍, “କେନ୍ଆତେ ଏଲୁମେନ୍ ଡେନ୍ ଞେନ୍ ଆମ୍ୱେଞ୍ଜିଆଡଙ୍ ଡର୍ନେମର୍ଜି ଗାମ୍ଲେ ଏଡର୍ତନାୟ୍; ଆମ୍ୱେଞ୍ଜି ବୋଞାଙ୍ବେନ୍ଆଡଙ୍ ଅମଙ୍ବାଲେନ୍ ଡକ୍କୋଲେ ଆକାନ୍ତାରା ଆସନ୍ ଜନ୍ରୋମନ୍ ଞମ୍ଲେ ଅସିଙ୍ବେନ୍ ଜିର୍ବା । ଆରି, ଆସନ୍ନା ବନୋଞାଙ୍ବେନ୍ ଅମଙ୍ବାଲେନ୍ ଓରୋଙାୟ୍ବା, ତିଡେନ୍ ଆମ୍ୱେଞ୍ଜି ଡରମ୍ମମର୍ଜି, ରାଉମର୍ଜି ତଡ୍, କେନ୍ଆତେ ଏଡର୍ତନାୟ୍; ସିଲତ୍ତେ ବୋଞାଙ୍ବେନ୍ ଆଡଙ୍ ଅସିଲୋଙ୍ବେନ୍ ଏସୋରୋପ୍ପାୟ୍ତମ୍, ଆରି, ଆମ୍ୱେଞ୍ଜି କେନ୍ ଆଡେସାଲୋଙ୍ ବେବାରଲନ୍ ଏରପ୍ତିତେ ।” ତି ସିଲଡ୍ଲ୍ଲନ୍ ଆନିଞ୍ଜି ଆଜନିରାଞ୍ଜି ଅବ୍ରିକାଏଞ୍ଜି, ଡିଲେ ମନ୍ରାନ୍ ଆଜନିରାଲୋଙ୍ ସିଲଡ୍ ଆଗନବନ୍ ଆଡାବ୍ବୋ ଞାଙେଞ୍ଜି । ତି ଅଡ଼୍କୋନ୍ ଆତଙ୍କା ମୁନା ଗିୟ୍ଲେ, ଆନିଞ୍ଜି ଡ ଆପେୟଞ୍ଜି ବତଙେନ୍ । ସିଲତ୍ତେ ଆପେୟଞ୍ଜି ଜାକୁବନ୍ ବରନେ, “ଆମ୍ୱେଞ୍ଜି ଞେନ୍ଆଡଙ୍ ଅଅନ୍ତଡ୍ ଏମ୍ମେତିଁୟ୍ ? ଜୋସେପନ୍ ମନ୍ରା ତଡ୍; ସିମିୟୋନନ୍ ମନ୍ରା ତଡ୍; ଆରି ବିନ୍ୟାମିନନ୍ଆଡଙ୍ ନିୟ୍ ଆନୋରୋଙ୍ ଏଇଃୟମ୍ତେ । କେନ୍ ଆଦୁକ ଞେନ୍ ଆସନ୍ ଡକୋଏନ୍ ।” ରୁବେନନ୍ ଆପ୍ପେୟନ୍ଆଡଙ୍ ବରେନ୍, “ଞେନ୍ ବିଞ୍ଜାମିନ୍ଆଡଙ୍ ଅମଙ୍ବାନମ୍ ଅଃନୋରୋଙ୍ଲାୟ୍ଡେନ୍, ଆମନ୍ ବାଗୁନ୍ ଡାଙ୍ଗାଡ଼ାଅନ୍ଞେଞ୍ଜିଆଡଙ୍ ରବ୍ବୁଆ । ଆନିନ୍ଆଡଙ୍ ଅସିଲୋଙ୍ଞେନ୍ ସୋରୋପ୍ପାୟଁୟ୍, ଆରି ଞେନ୍ ଆନିନ୍ଆଡଙ୍ ଅବ୍ୟର୍ନେତା ।” ତି ସିଲଡ୍ଲ୍ଲନ୍ ଆନିନ୍ ବର୍ରନେ, “ଡାଙ୍ଗଡ଼ାଅଞେନ୍ ଆମ୍ୱେଞ୍ଜି ସରିନ୍ ଅଃଜ୍ଜିରେ, ଆବୋଞାଙନ୍ ରବୁଏନ୍, ଆନିନ୍ ତୁମ୍ ଅବୟ୍ନେ ଡକୋ; ଆମ୍ୱେଞ୍ଜି ଅଙ୍ଗା ଆତଙର୍ଗଡ୍ ଏଜିର୍ତେ, କେନ୍ ଆନିନ୍ଆଡଙ୍ ଇନ୍ନିଙ୍ ଆତନଙଡ୍ ଗଟେଏନ୍ଣ୍ଡେନ୍, ତିଡେନ୍ ଆମ୍ୱେଞ୍ଜି ଡଅଙ୍ଞେନ୍ ୟେୟେଡାନ୍ ବାତ୍ତେ କେନ୍ ଆବୁଡାଇଙ୍ଞେନ୍ ମସାନ୍ନିନ୍ ଏଆପ୍ପାୟ୍ତିଁୟ୍ ।”
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.