Juray Soura Bible
ପର୍ତମ୍ମୁ 40
ଜୋସେପନ୍ ଗନୁମ୍ନ୍ତେନ୍ ଆ ଅର୍ତ ଆବନର୍
କେନ୍ ଅଡ଼୍କୋନ୍ ଆ ଗନଡେଲ୍ଜି ସିଲଡ୍ ମିସ୍ରିୟନ୍ ଆ ରାଜା ଆଗାଗାନେ ଆପନାଙ୍ତିୟ୍ମର୍ ଡ ସୁପକାରନ୍ ଆ ସାଉକାରଞ୍ଜି ମିସ୍ରିୟ ରାଜାନ୍ ଆ ବିରୁଦଲୋଙ୍ ଇର୍ସେନ୍ ଲୁମେଞ୍ଜି । ସିଲତ୍ତେ ପାରୋନ୍ ଆ ମୁଡ଼ା ଗାଗାନେନ୍ ଆପନାଙ୍ତିୟ୍ମର୍ ଡ ଆ ମୁଡ଼ା ଡିଙ୍ଡିଙ୍ନେମରନ୍ କେନ୍ ବାଗୁ କମ୍ୱାରିଞ୍ଜିଆଡଙ୍ ବରାବେନ୍, ଆରି ଜନଗ୍ଗେମର୍ ଅଙ୍ଗା ଆବଣ୍ତିସିଙ୍ଲୋଙ୍ ଜୋସେପନ୍ ଆବଣ୍ତି ଡକୋଏନ୍, ତେତ୍ତେ ଆନିଞ୍ଜିଆଡଙ୍ ବଣ୍ତିଲେ ଡକୋଏନ୍ । ସିଲତ୍ତେ ଜନଗ୍ଗେମର୍ ଜୋସେପନ୍ ଆସିଲୋଙ୍ ଆନିଞ୍ଜିଆଡଙ୍ ସୋରୋପ୍ପାୟେନ୍, ଜୋସେପନ୍ ଆନିଞ୍ଜିଆଡଙ୍ ତୁର୍ଡାଏନ୍ । କେନ୍ଅନ୍ତମ୍ ଆନିଞ୍ଜି ଅସୋୟ୍ ଡିନା ବଣ୍ତିସିଂଙ୍ଲୋଙନ୍ ଡକୋଲଞ୍ଜି । ତି ସିଲଡ୍ଲ୍ଲନ୍ ମିସ୍ରିୟ ରାଜାନ୍ ଗାଗାନେନ୍ ଆପନାଙ୍ତିୟ୍ମର୍ ଡ ରାଜାନ୍ ଆଡିଁୟ୍ଡିଁୟ୍ନେମର୍ ବାଗୁଞ୍ଜି ଆବତଗଲନ୍ ତରଙ୍ଆନ୍ନା ବାଗୁ ଗନୁମ୍ତେନ୍ ଗିଜେଞ୍ଜି । ସିଲତ୍ତେ ଜୋସେପନ୍ ଡୋତାନ୍ ଆନିଞ୍ଜି ଆମଙ୍ ଆରିୟେନ୍ ଆଡିଡ୍ ଆମୁକାଞ୍ଜି ଆମୁସୁକା ଗିଜେନ୍ । ସିଲତ୍ତେ ପାରୋନ୍ ଅଙ୍ଗା ଆକମ୍ୱାରିଜି ଆନିନ୍ ସରିନ୍ ଆ ସାଉକାରନ୍ ଆବଣ୍ତିସିଙ୍ଲୋଙ୍ ଆବଣ୍ତି ଡକୋଏଞ୍ଜି, ଆନିଞ୍ଜିଆଡଙ୍ ଆନିନ୍ ବରେନ୍, “ଲଙେ ମୁକାବେନ୍ ଇନିବା ଆମୁସୁକା ?” ଆନିଞ୍ଜି ଜାଲଙେଞ୍ଜି, “ଞେନ୍ ଗନୁମ୍ନ୍ତେନ୍ ଏଗିୟ୍ଲାୟ୍, ବନ୍ଡ ତି ଆଗନୁମ୍ତେ ଆଗରାମ୍ଗାମ୍ ଇନି ଅଃଗନ୍ଲୁଡ୍ଲେନ୍ ।” ଜୋସେପନ୍ ଆନିଞ୍ଜିଆଡଙ୍ ବର୍ନେ, “ଗନୁମ୍ତେନ୍ ଆଗରାମ୍ଗାନ୍ ଇନି ଆନ୍ନିଙ୍ ବର୍ରନ୍ ଅଃରପ୍ତିଏଜି ।”
ସିଲତ୍ତେ ମୁଡ଼ା ଗାଗାନେନ୍ ଆପାଙ୍ତିୟ୍ମର୍ ଜୋସେପନ୍ଆଡଙ୍ ଆ ଗନୁମ୍ନ୍ତେନ୍ ଆବର୍ନେ ବରେନ୍, “ଗିଜା, ଅବୟ୍ ଦ୍ରାକ୍ୟାନୁବନ୍ ମୁକାବାଞେନ୍ ଡକୋଏନ୍, ତି ଆ ଦ୍ରାକ୍ୟାନୁବ୍ଲୋଙ୍ ୟାଗି ଆକେଣ୍ତାରନ୍ ଡକୋଏନ୍, ଆରି, ତିଆତେ ଲେଡେଙେନ୍, ସିଲତ୍ତେ ତାର୍ବାଏନ୍, ଆରି ଅଡ଼୍କୋନ୍ ଆମଡ୍ଡିଲୋଙ୍ ଆତୋପାତୋପା ଅଙ୍ଗୁରନ୍ ଅଗୁରେନ୍ । ତିଆଡିଡ୍ ଅସିଲୋଙ୍ଞେନ୍ ପାରୋନ୍ ଆଗରାଗାନେସିମ୍ ଆଡ୍ରକୋଏନ୍ ଆସନ୍ ତି ଆସିମ୍ମାଲୋଙ୍ ଞେନ୍ ତି ଆ ଦ୍ରାକ୍ୟାଜ କୁମ୍ଜଡ୍ଲେ ପାରୋନ୍ ଆସିଲୋଙ୍ ତି ଆସିମ୍ମା ତିୟ୍ଲାୟ୍ ।” ସିଲତ୍ତେ ଜୋସେପନ୍ ଆନିନ୍ଆଡଙ୍ ବରେନ୍, “କେନ୍ ଆଗ୍ରାମ୍ଗାମ୍ ତି ୟାଗି କେଣ୍ତାରନ୍ ୟାଗି ଡିନ୍ନା ।” ୟାଗି ଡିନାଲୋଙ୍ ପାରୋନ୍ ଆମନ୍ଆଡଙ୍ ଓଡ୍ଡେଲେ ତର୍ମକୁମ୍ନେଲୋଙ୍ନମ୍ ଆରି ରୟଙନ୍ ତିୟ୍ତମ୍; ସିଲତ୍ତେ ଆମନ୍ ପୁର୍ବାନ୍ ଅନ୍ତମ୍ ଗାଗାନେନ୍ ଆପନାଙ୍ତିୟ୍ମର୍ ଡେଆନ୍ଡେଲେ ଆରି ପାରୋନ୍ ଆସିଲୋଙ୍ ଗାଗାନେନ୍ ତିୟ୍ତେ । ବନ୍ଡ ଆମନ୍ ସୁକାଲମ୍ଡେନ୍, ଞେନ୍ଆଡଙ୍ ମନ୍ନେଇଁୟ୍, ଆରି, ଞେନ୍ଆଡଙ୍ ସାୟୁମ୍ଲେ ପାରୋନ୍ ଆମୁକାବା ବର୍ନେଞେନ୍ ବର୍ରନ୍ ଞେନ୍ଆଡଙ୍ ବଣ୍ତିସିଙ୍ଲୋଙନ୍ ସିଲଡ୍ ଉରିଁୟ୍ । ଇନିଆସନ୍ଗାମେଣ୍ଡେନ୍ ଏବ୍ରିଅଞ୍ଜି ଆଡେସା ସିଲଡ୍ ମନ୍ରାଞ୍ଜି ଡଅଙ୍ଞେନ୍ ରାଉଡାଲନ୍ ଓରୋଙ୍ଲିଁୟ୍ଜି; ଆରି, କେନ୍ ଆଡ୍ରକୋନେଲୋଙ୍ ଜାୟ୍ ଞେନ୍ ଇନ୍ନିଙ୍ ଅଃଲୁମ୍ଲାୟ୍, ବନ୍ଡ ଆନିଞ୍ଜି ଞେନ୍ଆଡଙ୍ ବଣ୍ତିସିଙ୍ଲୋଙନ୍ ଡକ୍କୋତିଞ୍ଜି ।
ସିଲତ୍ତେ ଆନିନ୍ ମନଙ୍ ବାଣ୍ତାଏନ୍, ମୁଡ଼ା ଡିଙ୍ଡିୟ୍ନେମରନ୍ କେନ୍ ଗିୟ୍ଲେ ଜୋସେପନ୍ଆଡଙ୍ ବରେନ୍, “ଞେନ୍ ଜାୟ୍ ଗନୁମ୍ତେନ୍ ଗିୟ୍ଲାୟ୍; ଗିଜା, ଅବବ୍ଲୋଙ୍ଞେନ୍ ବଗୁରୁଲ୍ଲି ରୁଟିନ୍ ଡକୋଏନ୍ । ତୋଣ୍ତୁନ୍ ଆ ଗୁରୁଲ୍ଲିଲୋଙ୍ ପାରୋନ୍ ଆ ଗାଗାନେ ଆସନ୍ ଏର୍ଜାଡ଼ିକାନ୍ ଆଡନିଞନ୍ ଡକୋଏନ୍; ଆରି ଅନ୍ତିଡଞ୍ଜି ଜିର୍ରେ ଅବବ୍ଲୋଙ୍ଞେନ୍ ଆଡ୍ରକୋଏନ୍ ଆ ଗୁରୁଲ୍ଲି ସିଲଡ୍ ପାଙ୍ଲେ ଜୋମେଞ୍ଜି ।” ତିଆଡିଡ୍ ଜୋସେପନ୍ ଜାଲଙ୍ଲେ ବରେନ୍, “କେନ୍ ୟାଗି ଡାଲାନ୍ ଆଗରାମ୍ଗାମ୍ ୟାଗି ଡିନା ।” ୟାଗି ଡିନାଲୋଙ୍ ପାରୋନ୍ ଆମନ୍ଆଡଙ୍ ସିଲଡ୍ ଅବବ୍ନମ୍ ଆଙ୍ସାଲେ ଆମନ୍ଆଡଙ୍ ଅରାଲୋଙନ୍ ୟୁତମ୍, ଆରି, ଅନ୍ତିଡଞ୍ଜି ଜିର୍ରେ ଜେଲୁନମ୍ଜି ଜୋମ୍ତଜି । ତି ସିଲଡ୍ଲ୍ଲନ୍ ୟାଗି ଡିନାଲୋଙ୍ ପାରୋନ୍ ଆକ୍ରୋକ୍କୋଡ୍ ଡିନା ଆରଡ଼ୋଲାଞନ୍ ଆନିନ୍ ଅଡ଼୍କୋନ୍ ଆ କମ୍ୱାରିଞ୍ଜି ଆସନ୍ ବୁଜିନ୍ ତୁବେନ୍ । ସିଲତ୍ତେ ଆନିନ୍ ଆନିନ୍ଡମ୍ ଅଡ଼୍କୋନ୍ ଆ କମ୍ୱାରି ଆଗନିୟ୍ଗିୟ୍ଲୋଙ୍ ଆମୁଡ଼ ଗାଗାନେନ୍ ଆପନାଙ୍ତିୟ୍ମର୍ ଡ ଆମୁଡ଼ ଡିଁୟ୍ଡିଁୟ୍ନେମରନ୍ ଅବ୍ଡେଏନ୍ । ଆରି, ଜୋସେପନ୍ ଆବର୍ରନ୍ ଅନ୍ତମ୍ ପାରୋନ୍ ମୁଡ଼ା ଗାଗାନେନ୍ ଆପନାଙ୍ତିୟ୍ମର୍ ଆନିନ୍ଡମ୍ ଆତ୍ରଙ୍କୁମ୍ଲୋଙନ୍ ଆରି ତବ୍ନଙେନ୍; ସିଲତ୍ତେ ଆନିନ୍ ପାରୋନ୍ ଆସିଲୋଙ୍ ଗରାଡାନେସିମନ୍ ତିୟେନ୍ । ବନ୍ଡ ଆନିନ୍ ମୁଡ଼ା ସୁପକାରନ୍ଆଡଙ୍ ଅରାଲୋଙନ୍ ୟୋଡେନ୍; ଏଲେଜାକିଁୟ୍ଡେନ୍, ମୁଡ଼ ଗାଗାନେନ୍ ଆପନାଙ୍ତିୟ୍ମର୍ ଜୋସେପନ୍ଆଡଙ୍ ଅଃମନେଲୋ, ଆନିନ୍ ଜୋସେପନ୍ଆଡଙ୍ କରୋଡାଏନ୍ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.