Juray Soura Bible
ପର୍ତମ୍ମୁ 23
ସାରାନ୍ ଆରନବୁ
ସାରାନ୍ ବସଅ ବକୁଡ଼ି ସାତ ବର୍ସେଙ୍ ଅମେଙ୍ଲେ ଡକୋଲନେ । ତି ସିଲଡ୍ଲ୍ଲନ୍ ସାରାନ୍ କିଣାନ୍ ଆଡେସା କିରିୟତ୍-ଅର୍ବଲୋଙ୍, ଆଗ୍ରାମ୍ଗାମ୍ ଇବ୍ରୋଣ ଗଡ଼ାଲୋଙନ୍ ରବୁଏନ୍ । ତିଆସନ୍ ଅବ୍ରାଆମନ୍ ସାରାନ୍ ଆସନ୍ ଇୟମ୍ଲେ ୟେୟେଡାଲନ୍ ।
ଅବ୍ରାଆମନ୍ ଆଡୁକ୍ରିନ୍ ଆ ମଡ଼ୋ ଅମ୍ରେଙ୍ଡାଲେ ଏତରନ୍, ଆଅନ୍ଞ୍ଜିଆଡଙ୍ ଇୟ୍ଲେ ବରେଜି, “ଞେନ୍ ବଡେସାମର୍ ଡ ଜିର୍ଜିରିୟ୍ମର୍; ଆମ୍ବେଞ୍ଜି ସରିନ୍ ତେତ୍ତେ ଡକୋତନାୟ୍; ଞେନ୍ଆଡଙ୍ ମଡ଼ୋନ୍ ଆତନିଲ୍ ଆସନ୍ ଅସୋୟ୍ ଲବନ୍ ଞନିନ୍ ତିୟିଁୟ୍ବା, ଏତ୍ତେଲ୍ଡେନ୍ ଞେନ୍ ଡୁକ୍ରିଞେନ୍ ଆମଡ଼ୋ ତିଲ୍ଲେ ।”
ତିଆସନ୍ ଏତରନ୍ ଆଅନ୍ଞ୍ଜି ଅବ୍ରାଆମନ୍ଆଡଙ୍ ଜାଲଙ୍ଲେ ବରେଞ୍ଜି, “ଏ ପ୍ରବୁ, ବର୍ନେଲେନ୍ ଅମ୍ଡଙା; ଆମନ୍ ଅମଙ୍ବାଲେନ୍ ବୋର୍ସା ରନପ୍ତି ରାଜା; ନମି ମନଙ୍ ତରିଲ୍ନେଲୋଙ୍ଲେନ୍ ଡୁକ୍ରିନମ୍ ଆମରା ତିଲ୍ଲା, ଅମଙ୍ବାଲେନ୍ ସିଲଡ୍ ଆନ୍ନିଙ୍ ଡୁକ୍ରିନମ୍ ଆମଡ଼ୋ ତିଲ୍ତିଲନ୍ ଆସନ୍ ଆନ୍ନିଙ୍ ଅଃରଙେଜି ।”
ତି ଆଡିଡ୍ ଅବ୍ରାଆମନ୍ ଡୋଲନ୍ ତଦେସିଅନ୍ ଆ ମନ୍ରାଜିଆଡଙ୍, ଆଗରାମ୍ଗାମ୍ ଏତରନ୍ ଆ ଅଞ୍ଜିଆଡଙ୍ ଲୋମେଞ୍ଜି ଆରି କଡାଡ଼ିଡାଲନ୍ ବରେଞ୍ଜି, “ଗନିୟ୍ଗିୟ୍ଲୋଙ୍ ଞେନ୍ ଡୁକ୍ରିଞେନ୍ ଆମରା ମସାନ୍ନିଲୋଙନ୍ ତିଲ୍ତିଲନ୍ ଆସନ୍ ଆମ୍ୱେଞ୍ଜି ଏଅଡ଼େଏଣ୍ଡେ, ଏତ୍ତେଲ୍ଡେନ୍ ବର୍ନେଞେନ୍ ଅମ୍ଡଙ୍ବା; ଆମ୍ୱେଞ୍ଜି ଞେନ୍ ଆସନ୍ ସୋଅରନ୍ ଆ ଡାଙ୍ଗାଡ଼ାଅନ୍ ଇପ୍ରୋଣନ୍ଆଡଙ୍ ବରା । ଆନିନ୍ ଅମଙ୍ବାବେନ୍ ତରିଲ୍ତିଲ୍ନେନ୍ ଆସନ୍ ମଲେକାରେଙନ୍ ଆ ଲବରେଙନ୍ ଡକୋନ୍ ଆଲୋଙର୍ ଞେନ୍ ଞନିନ୍ ତିୟିଁୟ୍ବା; ଡାବ୍ବୋନ୍ ଡିଅଙ୍ଙ୍ଗା ଡେତେ ପାଙ୍ବା ।”
ତି ଆଡିଡ୍ ଇପ୍ରୋଣନ୍ ଏତରନ୍ ଆ ଡାଙ୍ଗାଡ଼ାଅନଞ୍ଜି ଆମଙ୍ ଆତଙ୍କୁମ୍ ଡକୋଏନ୍; ତି ଆସନ୍, ଇତ୍ତିୟନ୍ ଇପ୍ରୋଣନ୍ ଆନିନ୍ ଆ ଗଡ଼ାନ୍ ଆଗ୍ରନ୍ନେମର୍ ଏତରନ୍ ଆଡାଙ୍ଗାଡ଼ାଅନ୍ ଅଡ଼୍କୋଞ୍ଜି ଆତେମଡ୍ଲୋଙ୍ ଅବ୍ରାଆମନ୍ଆଡଙ୍ ଜାଲଙ୍ଲେ ବରେନ୍, “ସାଉକାର, ଏତ୍ତେଲେ ଡେଡଙ୍ ତଡ୍, ବର୍ନେଞେନ୍ ଅମ୍ଡଙ୍ବା; ଞେନ୍ ଆମନ୍ଆଡଙ୍ ତି ଆଡ୍ରକୋନେ ଡ ତେତ୍ତେ ଡକୋନ୍ ଆଲୋଙର୍ ତିୟ୍ଲମ୍; କେଜ୍ଜାଡମ୍ଞେନ୍ ଆ ଡାଙ୍ଗାଡ଼ାଅଞ୍ଜି ଆତେମଡ୍ ତି ଆତେ ଆମନ୍ଆଡଙ୍ ତିୟ୍ଲମ୍, ଆମନ୍ ଡୁକ୍ରିନମ୍ ଆମଡ଼ୋ ତିଲ୍ଲା ।” ବନ୍ଡ ଅବ୍ରାଆମନ୍ ତି ଆଡେସା ଆ ମନ୍ରାଜି ଆତେମଡ୍ ତୁଡ଼ୁମ୍ଲେ ଲୋମେନ୍ ଆରି ତି ଆଡେସା ଆ ମନ୍ରାଜି ଆରମ୍ଡଙ୍ତେଞ୍ଜି ଅନ୍ତମ୍ ଇପ୍ରୋଣନ୍ଆଡଙ୍ ବର୍ନେ, “ଆମନ୍ ତି ଆତେ ଞେନ୍ଆଡଙ୍ ତିୟ୍ଲିଁଡେନ୍, ତିଡେନ୍ କାକୁର୍ତିତନାୟ୍, ବର୍ନେଞେନ୍ ଅମ୍ଡଙା; ଞେନ୍ ତି ଆବସେଙ୍ ଆଡାବ୍ବୋ ତିୟ୍ତମ୍, ତି ଆଡ୍ରକୋନେ ଡୁକ୍ରିଞେନ୍ ଆମରା ତିଲ୍ତାୟ୍ ।” ସିଲତ୍ତେ ଇପ୍ରୋଣନ୍ ଅବ୍ରାଆମନ୍ଆଡଙ୍ ଜାଲଙ୍ଲେ ବରେନ୍, “ପ୍ରବୁ, ବର୍ନେଞେନ୍ ଅମ୍ଡଙା; ଲବନ୍ ଆମୁଲ୍ଲ ଉଞ୍ଜିସଅ ରୁପାଡାବ୍,1 ଆମନ୍ ଡ ଞେନ୍ ଆସନ୍ ଡିଅଙ୍ଗା ? ତି ଆସନ୍ ଆମନ୍ ଡୁକ୍ରିନମ୍ ଆମରା ତିଲ୍ବା ।” ଇପ୍ରୋଣନ୍ ଆ ବର୍ନେନ୍ ଅମ୍ଡଙ୍ଲେ ଅବ୍ରାଆମନ୍ ଇତିୟନ୍ ଆ ଡାଙ୍ଗାଡ଼ାଅଞ୍ଜି ଆତେମଡ୍ ଇପ୍ରୋଣନ୍ ଆଡନିଡି ଅନ୍ତମ୍ ଅବ୍ତାଡ଼ନ୍ ଆତମ୍ତମ୍ନେମରଞ୍ଜି ଆଞରମ୍ମେଞ୍ଜି ଉଞ୍ଜିସଅ ରୁପାନ୍ ତୁଡ଼େଲେ ଇପ୍ରୋଣନ୍ଆଡଙ୍ ତିୟେନ୍ । ତିଆସନ୍ ମମ୍ରିନ୍ ଆମୁକ୍କାବା ମକ୍ପେଲାଲୋଙ୍ ଇପ୍ରୋଣନ୍ ଅଙ୍ଗା ଆବସେଙ୍ ଡକୋଏନ୍, ତି ଆବସେଙ୍ ଡ ଲୋଙରନ୍ ଡ ତି ଆବସେଙ୍ ଅବ୍ୟର୍ୟର୍ ଆରାନୁବନ୍ ଅବ୍ରାଆମନ୍ ଆତେ ଡକୋଏନ୍ । ତି ଅଡ଼୍କୋନ୍ ଏତରନ୍ ଆ ଡାଙ୍ଗାଡ଼ାଅଞ୍ଜି ଆତେମଡ୍, ଆଗ୍ରାମ୍ଗାମ୍, ଆ ଗଡ଼ାନ୍ ଆଗରନ୍ନେ ଅଡ଼୍କୋ ମନ୍ରାନ୍ ଆତେମଡ୍ ଅବ୍ରାଆମନ୍ ଆତନିୟ୍ ଆସନ୍ ଗବ୍ରିଏଞ୍ଜି ।
ସିଲତ୍ତେ ଅବ୍ରାଆମନ୍ ମମ୍ରିନ୍ ଆମୁକ୍କାବା ମକ୍ପେଲାନ୍ ଆବସେଙ୍ ଆଲୋଙର୍ଲୋଙ୍ ଆ ଡୁକ୍ରିନ୍ ସାରାନ୍ ଆମରା ତିଲେନ୍ । ତି ଆଡ୍ରକୋନେ କିଣାନ ଆ ଡେସାନ୍ ଆ ଇବ୍ରୋଣନ୍ । କେନ୍ ଅନ୍ତମ୍ ମସାନ୍ନିନ୍ ଆଞନାଙ୍ ଆସନ୍ ତି ଆବସେଙ୍ ଡ ତେତ୍ତେ ଡକୋନ୍ ଆଲୋଙର୍ ଅବ୍ରାଆମନ୍ ଆଞନାଙ୍ ଆସନ୍ ଏତରନ୍ ଆ ଡାଙ୍ଗାଡ଼ାଅଞ୍ଜି ବାତ୍ତେ ଗନବ୍ରିନ୍ଡେଏନ୍ ।
Source notes (1)
- Footnote ଆଗ୍ରାମ୍ଗାମ୍ ୪.୫କେଜି ରୁପାନ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.