Juray Soura Bible
ପର୍ତମ୍ମୁ 21
ଇସାକନ୍ ଆକନୋଡ୍
ତି ସିଲଡ୍ଲ୍ଲନ୍ ପ୍ରବୁନ୍ ଆବର୍ନେ ଅନ୍ତମ୍ ସାରାନ୍ଆଡଙ୍ ଆସିର୍ବାଦଏନ୍; ଆରି ପ୍ରବୁନ୍ ଇନି ବର୍ରନେ, ସାରାନ୍ ଆସନ୍ ତିଆତେ ଲୁମେନ୍ । ସିଲତ୍ତେ ଅବ୍ରାଆମନ୍ ଆବ୍ରୁଡାଏନ୍ ଆଡିଡ୍ ସାରାନ୍ ତିଲ୍କୋଡେନ୍ ଆରି ଇସ୍ୱରନ୍ ବାତ୍ତେ ଆଗ୍ରବ୍ରିଏନ୍ ଆବନେଡ଼ା ଓବ୍ବାଅନନ୍ କୋଡେନ୍ । ଅବ୍ରାଆମନ୍ ତି ଆ ଅନ୍ ଇସାକ1ଅବ୍ଞୁମେନ୍ । ଆରି, ଇସ୍ୱରନ୍ ଆବନାଁୟ୍ବର୍ ଅନ୍ତମ୍ ଅବ୍ରାଆମନ୍ ଆ ଡାଙ୍ଗଡ଼ାଅନନ୍ ଇସାକନ୍ଆଡଙ୍ ଆଟଡିନାଲୋଙ୍ ଗନଡ୍ରେଡେବନ୍ । ଅବ୍ରାଆମନ୍ ବସଅ ବର୍ସେଙ୍ ଆଡ୍ରେନ୍ ଆଡିଡ୍ ଆ ଡାଙ୍ଗଡ଼ାଅନନ୍ ଇସାକନ୍ଆଡଙ୍ କୋଡେଞ୍ଜି । ଆରି ସାରାନ୍ ବର୍ରନେ, “ଇସ୍ୱରନ୍ ଞେନ୍ଆଡଙ୍ ଅବ୍କିୟ୍କିୟ୍ଲିଁୟ୍ ଆରି ଅବ୍ସର୍ଡାଲିଁୟ୍, କେନ୍ଆତେ ଅମ୍ଡଙ୍ଲେ ଅଡ଼୍କୋ ମନ୍ରାନ୍ ଞେନ୍ ସରିନ୍ କିୟ୍ତଜି ।” ଆନିନ୍ ଆରି ବର୍ରନେ, “ସାରାନ୍ ପସିଜଞ୍ଜିଆଡଙ୍ ମେମେଅନ୍ତନ୍, କେନ୍ ଆବର୍ନେ ଅବ୍ରାଆମନ୍ଆଡଙ୍ ଆନା ବର୍ରେ ରପ୍ତିଏବନ୍ ? ଏଲେଜାକିଁୟ୍ଡେନ୍ ଅବ୍ରାଆମନ୍ ଆବନୁଡାଇଙ୍ ସାରାନ୍ ଅବୟ୍ ଓବ୍ବାସିଜନ୍ କୋଡେନ୍ ।”
ଆରି ପସିଜନ୍ ଆସ୍ରୋଡ଼ାଏନ୍ ସିଲଡ୍, ଆନିଞ୍ଜି ଆନିନ୍ଆଡଙ୍ ମେମେନ୍ ଅବ୍ନୁମ୍ରେଙେଞ୍ଜି; ଆରି ଅଙ୍ଗା ଆଡିଡ୍ ଇସାକନ୍ଆଡଙ୍ ମେମେନ୍ ଅବ୍ନୁମ୍ରେଙେଞ୍ଜି, ତି ଆଡିଡ୍ ଅବ୍ରାଆମନ୍ ସୋଡ଼ା ବୁଜିନ୍ ତୁବେନ୍ ।
ଆଗାରନ୍ ଡ ଇସ୍ମାଏଲନ୍ ଆନମ୍ଡୁଙ୍
ତି ସିଲଡ୍ଲ୍ଲନ୍ ମିସରିଆବୟ୍ ଆଗାରନ୍ ଅବ୍ରାଆମନ୍ ଆସନ୍ ଅଙ୍ଗା ଆ ଓବ୍ବାସିୟ୍ କୋଡେନ୍, ତି ଆ ପସିୟ୍ ଇସାକନ୍ଆଡଙ୍ ଆଗ୍ରବ୍ରଜେନ୍, ସାରାନ୍ ଗିଜେନ୍ । ତିଆସନ୍ ଆନିନ୍ ଅବ୍ରାଆମନ୍ଆଡଙ୍ ବରେନ୍, “ଆମନ୍ କେନ୍ ଆ କମ୍ୱାରିବୟ୍ ଡ ଆ ଅନନ୍ଆଡଙ୍ ଗଙ୍ତିଡାଜି; ଇନିଆସନ୍ଗାମେଣ୍ଡେନ୍ କେନ୍ ଆ କମ୍ୱାରିବୟ୍ ଆଅନ୍ ଅନ୍ଞେନ୍ ଇସାକନ୍ ସରିନ୍ ଡକୋଲନ୍ ଅଃରପ୍ତିଏଜି ।” କେନ୍ ଆବର୍ନେ ଅବ୍ରାଆମନ୍ ଅମ୍ଡଙ୍ଲେ ଆଅନ୍ଡମନ୍ ଆସନ୍ ଦୁକଲନେ, ଇନିଆସନ୍ଗାମେଣ୍ଡେନ୍ ଇସ୍ମାଏଲନ୍ ନିୟ୍ ଆ ଅନନ୍ । ତିଆଡିଡ୍ ଇସ୍ୱରନ୍ ଅବ୍ରାଆମନ୍ଆଡଙ୍ ବରେନ୍, “ଆମନ୍ କେନ୍ ଆ ଓବ୍ବାସିୟ୍ ଡ କମ୍ୱାରିବୟ୍ନମ୍ ଆସନ୍ ଦୁକଡଙ୍ନେ । ସାରାନ୍ ଆମନ୍ଆଡଙ୍ ଇନି ଗାମ୍ତମ୍, ଆବର୍ନେନ୍ ଅମ୍ଡଙା; ଇନିଆସନ୍ଗାମେଣ୍ଡେନ୍ ଇସାକନ୍ଆମଙ୍ ସିଲଡ୍ କେଜ୍ଜାନମ୍ ଅଡ଼୍କୋ ମନ୍ରାନ୍ ଜନାତଜି । ଆରି କେନ୍ ଆ କମ୍ୱାରିବୟ୍ ଆଅନ୍ କେଜ୍ଜାନମ୍, ତିଆସନ୍ ଞେନ୍ ଅମଙ୍ବେନ୍ ସିଲଡ୍ ଅବୟ୍ କେଜ୍ଜାନ୍ ଅମ୍ଡୁଙ୍ତାୟ୍ ।”
ତି ସିଲଡ୍ଲ୍ଲନ୍ ଅବ୍ରାଆମନ୍ ଡୋତାନ୍ ଡୋଲନ୍ ରୁଟିନ୍ ଡ ଆବରିୟ୍ କୋମ୍ପାଡାନ୍ ପାଙ୍ଲେ ଆଗାରନ୍ ଆତାରଙ୍ଲୋଙ୍ ଅଃବୋୟେନ୍ ଆରି ପସିଜନ୍ଆଡଙ୍ ସୋରୋପ୍ପାୟ୍ଲେ ଆନିନ୍ଆଡଙ୍ ଆପ୍ପାୟେନ୍ । ସିଲତ୍ତେ ଆନିନ୍ ଡୁଙ୍ଲନ୍ ବେର୍ସେବା ଆଞୁମ୍ ଆରିଙ୍ରିଙ୍ ତଙର୍ବାନ୍ ମଙ୍ଗାଏଞ୍ଜି । କୋମ୍ପାଲୋଙନ୍ ଆ ଡାଆ ଆରଞିଡେନ୍, ଆଗାରନ୍ ଅବୟ୍ ବୁଡ୍ଡାଲୋଙନ୍ ପସିଜନ୍ଆଡଙ୍ ଉମ୍ରେଙେନ୍ ଆରି ଆନିନ୍ ଆମୁକ୍କାବାନ୍ ସିଲଡ୍ ଡାସାଙାୟ୍ ଜିର୍ରେ ତଙ୍କୁମେନ୍; ଇନିଆସନ୍ଗାମେଣ୍ଡେନ୍ ଆନିନ୍ ବର୍ରନେ, “ପସିୟ୍ଞେନ୍ ଆରନବୁ ଞେନ୍ ଅଃଗିଜାୟ୍ ।” ଆନିନ୍ ତେତ୍ତେ ତଙ୍କୁମ୍ଡାଲେ ଅବ୍ସର୍ରଙ୍ଲନ୍ ୟେୟେଡାଲନେ ।
ତିଆଡିଡ୍ ଇସ୍ୱରନ୍ ପସିଜନ୍ ଆସର୍ରଙ୍ ଅମ୍ଡଙେନ୍; ଆରି ଇସ୍ୱରନ୍ ଆ ପାଙ୍ଲଙ୍ବର୍ମର୍ ରୁଆଙନ୍ ସିଲଡ୍ ଓଡ୍ଡେଲେ ଆଗାରନ୍ଆଡଙ୍ ବରେନ୍, “ଏ ଆଗାର, ଆମନ୍ ଇନି ଡେଲମ୍ ? ବତଙ୍ଡଙମ୍ । ଇନିଆସନ୍ଗାମେଣ୍ଡେନ୍ ଅଙ୍ଗାଲୋଙ୍ ପସିଜନ୍ ଡକୋଲନ୍ ୟେଏନ୍ ଇସ୍ୱରନ୍ ଅମ୍ଡଙେନ୍ । ଆମନ୍ ତନଙ୍ଲେ ପସିଜନ୍ଆଡଙ୍ ଅବ୍ଡୋଲେ ଲୋଲ୍ଲୋଆ2 । ଞେନ୍ ଆମଙନ୍ ସିଲଡ୍ ଅବୟ୍ ସୋଡ଼ା କେଜ୍ଜାନ୍ ଅମ୍ଡୁଙ୍ତାୟ୍ ।” ତିଆଡିଡ୍ ଇସ୍ୱରନ୍ ଆନିନ୍ଆଡଙ୍ ଅବ୍ରୟ୍ମଡେନ୍, ଆନିନ୍ ଅବୟ୍ କୁଆନ୍ ଗିଜେନ୍ । ଆନିନ୍ ତେତ୍ତେ ଇୟ୍ଲେ କୋମ୍ପାଲୋଙନ୍ ଡାଆନ୍ ଗେନ୍ଲେ ପସିଜନ୍ଆଡଙ୍ ଅବ୍ଗାଏନ୍ । ଇସ୍ୱରନ୍ ପସିଜନ୍ ସରିନ୍ ଆଡ୍ରକୋଲନ୍ ଆସନ୍ ଆନିନ୍ ସୋଡ଼ାଏନ୍; ଆରି ପାରଣ ଆରିଙ୍ରିଙ୍ରେଙନ୍ ଡକୋଡାଲନ୍ ଞଙାତୁଞନ୍ ଞଙ୍ଲନ୍ ବାନୁଆଲନେ । ଆନିନ୍ ପାରଣ ଆଞୁମ୍ ଆରିଙ୍ରିଙ୍ରେଙନ୍ ଡକୋଲନ୍ ତି ସିଲଡ୍ଲ୍ଲନ୍ ଆୟୋଙନ୍ ଅବୟ୍ ମିସର୍ ଡେସାବୟ୍ ଆ ଡାଙ୍ଗଡ଼ିଅନ୍ ବାତ୍ତେ ଆନିନ୍ଆଡଙ୍ ଅବ୍ବିବାଏନ୍ ।
ଅବ୍ରାଆମନ୍ ଡ ଅବିମେଲକନ୍ ଆ ସନିବ୍ଡେୟ୍ବରନ୍
କେନ୍ ଆଡିଡ୍ ଅବିମେଲକନ୍ ଡ ପିକୋଲ୍ ଆଞୁମ୍ମର୍ ଆ ସିପ୍ପାୟନ୍, ଅବ୍ରାଆମନ୍ଆଡଙ୍ ବରେଞ୍ଜି, “ଅଡ଼୍କୋନ୍ ଲନୁମ୍ଲୋଙ୍ନମ୍ ଇସ୍ୱରନ୍ ଡକୋ । ତିଆସନ୍ ଆମନ୍ ଞେନ୍ ଡ ଅନ୍ଲେନ୍, ଆରି ଉଲ୍ଲେଙ୍ଲେଞ୍ଜି କଣ୍ଡାୟ୍ଲେ ଇନ୍ନିଙ୍ ଏଙ୍ଗାଡଙ୍ଜି । ଞେନ୍ ଆମନ୍ଆଡଙ୍ ଏଙ୍ଗାଲେ କାନକାରମ୍ ଏଗାମ୍ଲମ୍, ତିଅନ୍ତମ୍ ଆମନ୍ଆଡଙ୍ ଡ ଡରକୋନେନମ୍ ଆରି କେନ୍ ଆଡେସା କାନକାରମ୍ ଏଗାମ୍ତାୟ୍ ତିଆସନ୍ ଇସ୍ୱରନ୍ ଆଞୁମ୍ଲୋଙ୍ ପର୍ମାଡ଼ାଲନ୍ ବର୍ନା ।”
ସିଲତ୍ତେ ଅବ୍ରାଆମନ୍ ବର୍ରନେ, “ଞେନ୍ ପର୍ମାଡ଼ାଲନାୟ୍ ।”
ଆରି ଅବିମେଲକନ୍ ଆ କମ୍ୱାରିଜି ଅବ୍ରାଆମନ୍ ଆକୁଆ ବଡଗାଁୟ୍ ରୁଜେଞ୍ଜି ତିଆସନ୍ ଅବ୍ରାଆମନ୍ ଅବିମେଲକନ୍ଆଡଙ୍ କନେଁୟ୍ ଗୋ ବରେନ୍ । ଅବିମେଲକନ୍ ବର୍ରନେ, “କେନ୍ ଆକାବ୍ବାଡ଼ା ଆନା ଲୁମେନ୍, ତିଆତେ ଞେନ୍ ଜନା ତଡ୍ । ଆରି ଆମନ୍ ଞେନ୍ଆଡଙ୍ ଅନବ୍ ଜନାଲିଁୟ୍; କେନ୍ ଆବର୍ନେ ଞେନ୍ ଲଙେ ଅମ୍ଡଙ୍ଲାୟ୍ ।” ଆରି ଅବ୍ରାଆମନ୍ ମେଣ୍ତାନ୍ ଡ ତାଙ୍ଲିୟନ୍ ପାଙ୍ଲେ ଅବିମେଲକନ୍ଆଡଙ୍ ତିୟେନ୍, ଆରି ବାଗୁଞ୍ଜି ଅବୟ୍ ଅନଗଡନ୍ ଗବ୍ରିଏଞ୍ଜି । ଆରି ଅବ୍ରାଆମନ୍ ଗୋସ୍ସା ସିଲଡ୍ ସାତଟା ଆ ଅନ୍ ମେଣ୍ତାନ୍ ଆନ୍ନାଲେ ଡକ୍କୋଏନ୍, ଅବିମେଲକନ୍ ଅବ୍ରାଆମନ୍ଆଡଙ୍ ବରେନ୍, “ଆମନ୍ ଇନି ଆସନ୍ କେନ୍ ସାତଟା ଆ ଅନ୍ ମେଣ୍ତାନ୍ ଆନ୍ନାଲେ ଡକ୍କୋଏନ୍ ?”
ଅବ୍ରାଆମନ୍ ବର୍ରନେ, “ଞେନ୍ କେନ୍ ଆକୁଆ ଗାୟ୍ଲାୟ୍, ତି ଆ ସାକିନ୍ ଆସନ୍ ଅମଙ୍ଞେନ୍ ସିଲଡ୍, କେନ୍ ସାତଟା ଆ ଅନ୍ ମେଣ୍ତାନ୍ ଆମନ୍ ପାଙା ।” ତିଆସନ୍ ତି ଆଡ୍ରକୋନେ ଆଞୁମ୍ ବେର୍ସେବା3 ଡେଏନ୍, ଇନିଆସନ୍ଗାମେଣ୍ଡେନ୍ ତି ତେତ୍ତେ ବାଗୁଞ୍ଜି ପର୍ମାଡ଼ାଲଞ୍ଜି ।
କେନ୍ଅନ୍ତମ୍ ଆନିଞ୍ଜି ବେର୍ସେବାଲୋଙନ୍ ଅନଗଡନ୍ ଗବ୍ରିଏଞ୍ଜି, ଅବିମେଲକନ୍ ଡ ପିକୋଲ୍ ଆଞୁମ୍ମର୍ ଆ ସିପ୍ପାୟନ୍ ଡୋଲନ୍ ପଲେସ୍ଟିଅଞ୍ଜି ଆଡେସା ୟର୍ରଞ୍ଜି । ତି ସିଲଡ୍ଲ୍ଲନ୍ ଅବ୍ରାଆମନ୍ ତି ଆ ବେର୍ସେବାନ୍ ଆତୁୟାୟ୍ ଅବୟ୍ ଜାଉଁନୁବନ୍ ଗୁଏନ୍ ଆରି ତି ଆଡ୍ରକୋନେଲୋଙ୍ ଇସ୍ୱର ପ୍ରବୁନ୍ ଆଞୁମ୍ଲୋଙ୍ ପାର୍ତନାଲନେ । ଆରି ଅବ୍ରାଆମନ୍ ପଲେସ୍ଟିଅଞ୍ଜି ଆଡେସାଲୋଙ୍ ଗୋଗୋୟ୍ ଡିନା ଡକୋଲନେ ।
Source notes (3)
- Footnote ଆଗ୍ରାମ୍ଗାମ୍ କନିୟ୍
- Footnote ଅସିନମ୍ ବାତ୍ତେ ଞମା
- Footnote ପର୍ମାଡ଼ା କୁଆ
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.