Juray Soura Bible
ପର୍ତମ୍ମୁ 19
ଲୋଟନ୍ ଆଡନୋବ୍
ତି ସିଲଡ୍ଲ୍ଲନ୍ ଆର୍ରବୁଏନ୍ ଆଡିଡ୍ ତି ବାଗୁ ରୁଆଙ୍ପାଙ୍ଲଙ୍ବର୍ମରନ୍ ସଦୋମଗଡ଼ାନ୍ ଅଡ଼ୋଏଞ୍ଜି, ତି ଆଡିଡ୍ ଲୋଟନ୍ ସଦୋମ ଗଡ଼ାନ୍ ଆଗ୍ରନ୍ନେ ଡୁଆରାଲୋଙନ୍ ଆତଙ୍କୁମ୍ ଆଡ୍ରକୋଲନ୍ ଆସନ୍ ଆନିଞ୍ଜିଆଡଙ୍ ଗିୟ୍ଲେ ଆନିଞ୍ଜି ସରିନ୍ ଆଲ୍ରନବାଙ୍ ଆସନ୍ ଡୋଲନ୍ ଜିରେନ୍, ଆରି ତୁଡ଼ୁମ୍ଲେ ଲୋମ୍ଲେ ବର୍ରନେ
“ଏ ପ୍ରବୁଞେଞ୍ଜି, ଞେନ୍ କାକୁର୍ତିତନାୟ୍, ଲଙେ ଆତଗଲ୍ କେନ୍ କମ୍ୱାରିବେନ୍ ଆସିଙ୍ ଜିର୍ରେ ଡକୋନାବା ଆରି ଆଜଙ୍ନାବା; ତି ସିଲଡ୍ଲ୍ଲନ୍ ଡୋତାନ୍ ଡୋଲନ୍ ଜିର୍ବା ।” ତି ସିଲଡ୍ଲ୍ଲନ୍ ଆନିଞ୍ଜି ବର୍ରଞ୍ଜି, “ଇଜ୍ଜା; ଇନ୍ଲେଞ୍ଜି ଡାଣ୍ତନ୍ ତମଗଲ୍ ଏଡକୋତନାୟ୍ ।”
ବନଡ୍ ଲୋଟନ୍ ଆକରାକୁର୍ତ୍ତିଲନ୍ ଆନିଞ୍ଜି ଆନିନ୍ ସରିନ୍ ଆସିଙନ୍ ଇୟ୍ଲେ ଗନେଜି । ତି ସିଲଡ୍ଲ୍ଲନ୍ ଆନିନ୍ ଆନିଞ୍ଜି ଆସନ୍ କମିରନ୍ ଏର୍ମନାୟନ୍ ଆ ରୁଟି ବାତ୍ତେ ଆଜନୋମଞ୍ଜି ଡିଞେନ୍ ଆରି ଆନିଞ୍ଜି ଗାଗାଲଞ୍ଜି ।
ବନ୍ଡ ଆନିଞ୍ଜି ଅନ୍ରଙ୍ ଲୁଡେଞ୍ଜି ଆମ୍ମୁଙ୍, ସଦୋମନ୍ ଆ ମନ୍ରାଜି ଅଡ଼୍କୋନ୍ ଆବୁଡା ଆବେଣ୍ଡିଆ ଜିର୍ରେ ଆସିଙନ୍ ଅବ୍ୟର୍ୟର୍ ଗେରେଏଞ୍ଜି । ଆରି, ଲୋଟନ୍ଆଡଙ୍ ଓଡ୍ଡେଲେ ବରେଞ୍ଜି, “ଲଙେ ଆତଗଲ୍ ଅଙ୍ଗା ମନ୍ରାଜି ଅସିଙ୍ନମ୍ ଇୟ୍ଲାଜି, ଆନିଞ୍ଜି ଅଡ଼େଙ୍ଗା ? ଆନିଞ୍ଜିଆଡଙ୍ ଅମ୍ଡୁଙ୍ଲେ ଅମଙ୍ବାଲେନ୍ ଓରୋଙାୟ୍ । ଞେନ୍ ଆନିଞ୍ଜି ସରିନ୍ ଡଅଙ୍ଡାଗେ ଇର୍ସେ କାବ୍ବାଡ଼ାନ୍ ଏଲୁମ୍ତାୟ୍ ।”
ତି ସିଲଡ୍ଲ୍ଲନ୍ ଲୋଟନ୍ ଡୁଙ୍ଲନ୍ ସନଙନ୍ ଇଙଡ୍ଲେ ବର୍ରନେ, “ଏ ବୋଞାଙ୍ଜି, ଞେନ୍ କାକୁର୍ତିତନାୟ୍, ଏନ୍ନେଲେ ପରାନ୍ସାତ୍ତିନ୍ ଆକାବ୍ବାଡ଼ା ଏଲୁମ୍ଡଙ୍ । ଗିୟ୍ବା, ଓବ୍ବାମରନ୍ ଏର୍ସନୁଙେନ୍ ବାଗୁ ଡାଙ୍ଗଡ଼ିଅନ୍ଞେନ୍ ଡକୋ ଆନିଞ୍ଜିଆଡଙ୍ ଅମଙ୍ବାବେନ୍ ଓରୋଙ୍ତାୟ୍, ଗନିୟ୍ଗିୟ୍ଲୋଙ୍ବେନ୍ ଇନି ମନଙ୍, ତିଆତେ ଆନିଞ୍ଜି ଆସନ୍ ଲୁମ୍ବା, ବନ୍ଡ ତି ଆ ମନ୍ରାଜିଆଡଙ୍ ଇନ୍ନିଙ୍ ଏଏଙ୍ଗାଡଙ୍, ଇନିଆସନ୍ଗାମେଣ୍ଡେନ୍ କୁଲମ୍ମର୍ଞେନ୍ ତିଆସନ୍ ଆନିଞ୍ଜି ଅସିଙ୍ଞେନ୍ ଡକୋଲଞ୍ଜି ।”
ତିଆଡିଡ୍ ଆନିଞ୍ଜି ବର୍ରଞ୍ଜି, “ଡିନା ।” ଆରି ବର୍ରଞ୍ଜି, “କେନ୍ ଆ ମନ୍ରା ଅମଙ୍ବାଲେନ୍ ଡକୋନେବାନ୍ ଜିର୍ରେ ପନ୍ସୁଆତିମର୍ଲେନ୍ ଆଡନେ ଇସ୍ସୁମ୍ତେ; ନମି ଆନିଞ୍ଜି ଅମ୍ରେଙ୍ଲେ ଆମନ୍ଆଡଙ୍ ଗୋଗୋୟ୍ ଆପରାନ୍ସାତି ଆ କାବ୍ବାଡ଼ା ଆଲନୁମ୍ ଏଲୁମ୍ତାୟ୍ ।” ତି ସିଲଡ୍ଲ୍ଲନ୍ ଆନିଞ୍ଜି ତି ଆ ମନ୍ରା, ଆଗ୍ରାମ୍ଗାମ୍, ଲୋଟନ୍ଆଡଙ୍ ରୁମ୍ପେଲ୍ଲେ ବଡଗାଁୟ୍ ସନଙନ୍ ଆପନାଲ୍ ଆସନ୍ ସାଜେଞ୍ଜି । ବନ୍ଡ ତି ବାଗୁ ମନ୍ରା ଲୋଟନ୍ଆଡଙ୍ ଅମସିଙନ୍ ଆମଙ୍ବାଞ୍ଜି ଡିଙ୍ଲେ ଓରୋଙ୍ଲେ ସନଙନ୍ ଇଙଡେଞ୍ଜି । ଆରି ସନଙ୍ବାନ୍ ଆଡ୍ରକୋଲଞ୍ଜି ସନ୍ନା ସୋଡ଼ା ଅଡ଼୍କୋ ମନ୍ରାନ୍ଆଡଙ୍ ଅବ୍କାଡ଼ୁଏଞ୍ଜି; ସିଲତ୍ତେ ଆନିଞ୍ଜି ସନଙନ୍ ସାୟ୍ଲେ ସାୟ୍ଲେ ମଙ୍ଗାଆଜେଞ୍ଜି ।
ଲୋଟନ୍ ସଦୋମ ଗଡ଼ାନ୍ ଅମ୍ରେଙେନ୍
ତି ସିଲଡ୍ଲ୍ଲନ୍ ତି ଆ ମନ୍ରାଜି ଲୋଟନ୍ଆଡଙ୍ ବରେଞ୍ଜି, “କେନ୍ ଆଡ୍ରକୋନେଲୋଙ୍ ମନ୍ରାନମ୍ଜି ଆରି ଆନାଜି ଡକୋ ଡାଙ୍ଗଡ଼ାଅନମ୍, ଡାଙ୍ଗଡ଼ିଅନମ୍, ରେୟାମ୍ନମ୍ ଡ ଡିଅଙ୍ଗା ମନ୍ରା କେନ୍ ଆଗଡ଼ାଲୋଙ୍ ଡକୋଜି, ତି ଆନିଞ୍ଜିଆଡଙ୍ କେନ୍ ଆଡ୍ରକୋନେ ସିଲଡ୍ ଓରୋଙାଜି; ଇନିଆସନ୍ଗାମେଣ୍ଡେନ୍ ଞେନ୍ କେନ୍ ଆଡ୍ରକୋନେ ଏଅବ୍ସେଡ୍ତାୟ୍ । କେନ୍ ଆ ଗଡ଼ା ଆ ମନ୍ରା ଆ ସଙ୍ଗତାଲୋଙ୍ ସୋଡ଼ା ସର୍ରଙନ୍ ଆୟନେ ପ୍ରବୁନ୍ ଅମ୍ଡଙେନ୍ ତିଆସନ୍ କେନ୍ ଆ ଗଡ଼ା ଆନବ୍ସେଡ୍ ଆସନ୍ ପ୍ରବୁନ୍ ଇନ୍ଲେଞ୍ଜିଆଡଙ୍ ଆପ୍ପାୟ୍ଲଲେନ୍ ।”
ତି ସିଲଡ୍ଲ୍ଲନ୍ ଲୋଟନ୍ ଅମସିଙନ୍ ସିଲଡ୍ ଡୁଙ୍ଲନ୍ ଆ ଡାଙ୍ଗଡ଼ିଅନଞ୍ଜି ସରିନ୍ ଞାଙ୍ବୟ୍ନେନ୍ ଆସ୍ରାଜେଞ୍ଜି ଆରେୟାମ୍ଜିଆଡଙ୍ ବରେନ୍, “ଡୋନାବା, କେନ୍ ତେନ୍ନେ ସିଲଡ୍ ଡୁଙ୍ନାବା, ପ୍ରବୁନ୍ କେନ୍ ଆଗଡ଼ା ଅବ୍ସେଡ୍ତେ,” ବନ୍ଡ ଆ ରେୟାମଞ୍ଜି ଆବର୍ନେନ୍ ପଣ୍ତିଆବର୍ଗୋ ଅବ୍ଡିସୟେଞ୍ଜି ।
ଆବାର୍ତାନ୍ ଆସ୍ରାଆରେନ୍ ସିଲଡ୍, ପାଙ୍ଲଙ୍ବର୍ମରଞ୍ଜି ଲୋଟନ୍ଆଡଙ୍ ଅବ୍ତନ୍ଦ୍ରାଏନ୍ । “ଲଜିର୍ବା” ଗାମ୍ଲେ ଆନିଞ୍ଜି ବର୍ରଞ୍ଜି । “ଡୁକ୍ରିନମ୍ ଡ ତେନ୍ନେ ଡକୋନ୍ ବାଗୁ ଡାଙ୍ଗଡ଼ିଅନ୍ଜି ସରିନ୍ ଜିର୍ବା, ଇଜ୍ଜାଡେନ୍ ଗଡ଼ାନ୍ ଆପନବ୍ରଡ୍ଲୋଙ୍ ଅସେଡ୍ତଜି ।” ଡେଲୋଜନଙ୍ଡେନ୍ ଆନିନ୍ ଅବ୍ଡିଙ୍ଲନେ; ତି ସିଲଡ୍ଲ୍ଲନ୍ ପ୍ରବୁନ୍ ଆନିନ୍ଆଡଙ୍ କାନକାରମ୍ ଆଗ୍ରାମେନ୍ ଆସନ୍ ଆନିଞ୍ଜି ଆନିନ୍ ଡ ଆଡୁକ୍ରିନ୍ ଡ ବାଗୁ ଆ ଡାଙ୍ଗଡ଼ିଅନନ୍ ଆସି ଞମ୍ଲେ ଆନିଞ୍ଜିଆଡଙ୍ ଗଡ଼ାନ୍ ସିଲଡ୍ ଅମ୍ଡୁଙେଞ୍ଜି । କେନ୍ଅନ୍ତମ୍ ଆନିଞ୍ଜିଆଡଙ୍ ଅମ୍ଡୁଙ୍ଲେ ଆରୋରୋଙେଞ୍ଜି ସିଲଡ୍ ଆମଙଞ୍ଜି ସିଲଡ୍ ଅବୟ୍ନେ ଲୋଟନ୍ଆଡଙ୍ ବରେନ୍, “ପ୍ରାନାନ୍ ଆନମେଙ୍ ଆସନ୍ ଜିର୍ବା; ଏଆୟର୍ଗୁଡ଼ିଡ୍ ଡଙ୍ନେ ଆରି କେନ୍ ଆତୁୟାୟ୍ରେଙ୍ ନିୟ୍ ଏଡକୋଡଙ୍ନେ; ବରୁନ୍ ଜିର୍ବା; ଇଜ୍ଜାଡେନ୍ ଅସେତବେନ୍ ।”
ତି ସିଲଡ୍ଲ୍ଲନ୍ ଲୋଟନ୍ ଜାଲଙ୍ଲେ ବର୍ରନେ, “ଏ ପ୍ରବୁଞେନ୍, ଏତ୍ତେଲେ ଡେଡଙ୍ ତଡ୍ । କେନ୍ ଆ କମ୍ୱାରିମରନ୍ଆଡଙ୍ କାନକାରମ୍ ଗାମ୍ଲେ ପରାନ୍ନାନାଞେନ୍ ଅମ୍ମେଙ୍ଲିୟ୍ଡେନ୍; ଞେନ୍ ବରୁନ୍ ଅଃଜିରେ; ଅସମୟ୍ ବରନ୍ତଙନ୍ ଜିର୍ରାୟ୍ଡେନ୍ ରବୁତିଁୟ୍ । ଗିୟ୍ବା, ଜନିରନ୍ ତି ଆଗଡ଼ା ଆତୁୟାୟ୍ । ତି ଆଗଡ଼ା ସନ୍ନା ତି ଆଗଡ଼ା ଆଜନିର୍ ଆସନ୍ ବାଞିୟ୍ ଏତ୍ତେଲ୍ଡେନ୍ ପରାନ୍ନାଞେନ୍ ଅମେଙ୍ତେ ?”
ତି ସିଲଡ୍ଲ୍ଲନ୍ ଆନିନ୍ ବର୍ରନେ, “ମନଙ୍, ଞେନ୍ କେନ୍ ଆବର୍ନେ ଆମ୍ବେନ୍ଆଡଙ୍ କାନକାରମ୍ ଗାମ୍ଲେ ତି ଆ ଗଡ଼ା ଆବର୍ନେ ଆମ୍ବେନ୍ ଏବର୍ରନେ । ତି ଆଗଡ଼ା ଅନବ୍ସେବ୍ବୋ । ଆମ୍ୱେନ୍ ତି ଆଡ୍ରକୋନେବାନ୍ ଲଜିର୍ବା, ଇନିଆସନ୍ ଗାମେଣ୍ଡେନ୍ ଆମ୍ୱେନ୍ ତେତ୍ତେ ଏଜ୍ଜିର୍ରଡେନ୍, ଞେନ୍ ଇନ୍ନିଙ୍ ଲୁମ୍ଲେ ଏରପ୍ତିଆୟ୍ ।” ତି ଆସନ୍ ତି ଆଡ୍ରକୋନେ ଆଞୁମ୍ ସୋୟର୍1 ଡେଏନ୍ ।
ସଦୋମନ୍ ଡ ଅମୋରାନ୍ ଆନସେଡ୍
ଆଡ୍ରୁଙ୍ୟୋଙେନ୍ ଆବନେଡ଼ା ଲୋଟନ୍ ସୋୟର୍ ଡେସାନ୍ ଅଡ଼ୋଏନ୍ । ପ୍ରବୁ ରୁଆଙନ୍ ସିଲଡ୍ ସଦୋମ୍ ଡ ଅମୋରାନ୍ ଡେସାଲୋଙନ୍ ଗନ୍ଦକନ୍ ଡ ତଗୋନ୍ ରବ୍ବୁଏନ୍ ତି ଆଗଡ଼ା ଡ ଆରିଙ୍ରିଙ୍ରେଙନ୍ ଡ ତେତ୍ତେ ଡକୋନ୍ ଆମନ୍ରା ଡ ଆବସେଙ୍ଜି ଅଡ଼୍କୋନ୍ ଆ ଜିନିସଜି ଅବ୍ସେଡ୍ତେ । ବନ୍ଡ ଲୋଟନ୍ ଆଡୁକ୍ରି ଆୟର୍ଗୁଡ଼ିଲନ୍ ଆରାଙାଙେନ୍ ଆସନ୍ ଆନିନ୍ ବସିଡ୍ ସୋଣ୍ଡାଙନ୍ ଗଡେଲେନ୍ । ଆରି ଅବ୍ରାଆମନ୍ ଅନ୍ର୍ରଙନ୍ଡୋତାନ୍ ଡୋଲନ୍ ଅଙ୍ଗା ଆଡ୍ରକୋନେଲୋଙ୍ ଆମ୍ମୁଙ୍ ପ୍ରବୁ ଆମୁକ୍କାବା ଆତନଙ୍ ଡକୋଲନେ, ତି ଆଡ୍ରକୋନେବାନ୍ ଅଡ଼ୋଏନ୍ ସଦୋମନ୍ ଡ ଅମୋରାନ୍ ଡ ଆରିଙ୍ରିଙ୍ବସେଙ୍ରେଙନ୍ ଅଡ଼୍କୋନ୍ ଆଙାଙେନ୍, ତି ଆଡେସା ସିଲଡ୍ ବରନ୍ତଙନ୍ ଇଟାନ୍ ଆସ୍ରୟ୍ତବନ୍ ଆଓମୋଡ୍ ଅନ୍ତମ୍ ଆଡ୍ରୋଲନ୍ ଗିଜେନ୍ । କେନ୍ଅନ୍ତମ୍ ତି ଆରିଙ୍ରିଙ୍ବସେଙ୍ରେଙନ୍ ଅଡ଼୍କୋନ୍ ଆଗଡ଼ା ଅଡ଼୍କୋନ୍ ଆରବ୍ସେଡେନ୍ ଆଡିଡ୍ ଇସ୍ୱରନ୍ ଅବ୍ରାଆମନ୍ଆଡଙ୍ ମନ୍ନେଏନ୍, ଆରି ଅଙ୍ଗା ଅଙ୍ଗା ଆଗଡ଼ାରେଙ୍ ଲୋଟନ୍ ଡକୋଲନେ, ତି ଆଗଡ଼ାରେଙ୍ ଅନବ୍ସେଡନ୍ ଆଡ୍ରେନ୍ ଆଡିଡ୍ ଆରବ୍ସେଡନ୍ ଆଡ୍ରେଲୋଙେନ୍ ସିଲଡ୍ ଲୋଟନ୍ଆଡଙ୍ ଡୋବେନ୍ ।
ମୋୟାବିଅଞ୍ଜି ଡ ଅମ୍ମୋନିଅଞ୍ଜି ଆ ସନୁସୁ
ଏନ୍ନେଗନ୍ ଲୋଟନ୍ ସୋୟର୍ଲୋଙନ୍ ଡକୋନେ ଆସନ୍ ବତଙେନ୍ ତିଆସନ୍ ତେତ୍ତେସିଲଡ୍ ଡୁଙ୍ଲନ୍ ବାଗୁ ଆ ଡାଙ୍ଗଡ଼ିଅନନ୍ ବାତ୍ତେ ବରୁଲୋଙନ୍ ଡକୋଲଞ୍ଜି; ତିଆସନ୍ ଆନିନ୍ ଡ ବାଗୁନ୍ ଆ ଡାଙ୍ଗଡ଼ିଅନନ୍ ସରିନ୍ ବରୁଲୋଙନ୍ ଡକୋଲଞ୍ଜି । ତି ସିଲଡ୍ଲ୍ଲନ୍ ଆସୋଡ଼ା ଡାଙ୍ଗଡ଼ିଅନନ୍ ଆବୋଲ୍ମାଞନ୍ଆଡଙ୍ ବରେନ୍, “ଆପ୍ପେୟ୍ଲେନ୍ ଆବୁଡା, ଆରି, ଅଡ଼ାରନ୍ ଆଞନର୍ରମ୍ ଅନ୍ତମ୍ ଞେନ୍ ସରିନ୍ ବିବାନେନ୍ ଆସନ୍ କେନ୍ ଆଡେସାଲୋଙ୍ ଓବ୍ବାମରନ୍ ଅବୟ୍ ତଡ୍ । ୟାଆ, ଞେନ୍ ବାପାଲେନ୍ଆଡଙ୍ ଦ୍ରାକ୍ୟାଡାନ୍ ଅବ୍ଗାଏ ଆରି କେଜ୍ଜାଲେନ୍ ଆତନବ୍ନଙ୍ ଆସନ୍ ଆନିନ୍ସରିନ୍ ଏଲୁଡେ ।” ତି ସିଲଡ୍ଲ୍ଲନ୍ ତି ଆତଗଲ୍ ଆନିଞ୍ଜି ଆପ୍ପେୟଞ୍ଜିଆଡଙ୍ ଦ୍ରାକ୍ୟାଡାନ୍ ଅବ୍ଗାଲେ, ଆସୋଡ଼ା ଡାଙ୍ଗଡ଼ିଅନନ୍ ଜିର୍ରେ ଆପ୍ପେୟନ୍ ସରିନ୍ ଡଅଙ୍ଡାଗୋ ଆଇର୍ସେ କାବ୍ବାଡ଼ାନ୍ ଲୁମେନ୍; ବନ୍ଡ ଲୋଟନ୍ ଅଃଜ୍ଜନାଲୋ । ଆବାର୍ତାନ୍ ତି ଆସୋଡ଼ା ଡାଙ୍ଗଡ଼ିଅନନ୍ ଆବୋଲ୍ମାଞନ୍ଆଡଙ୍ ବରେନ୍, “ଗିଜା,ଞେନ୍ ଆଜିର୍ରେନ୍ ଆତଗଲ୍ ବାପାନ୍ ସରିନ୍ ଲୁଡ୍ଲାୟ୍, ୟାଆ, ଲଙେ ଆତଗଲ୍ ଜାୟ୍ ବାପାନ୍ଆଡଙ୍ ଦ୍ରାକ୍ୟାଡାନ୍ ଅବ୍ଗାଏତୋ; ସିଲଡ୍ତ୍ତେ ଆମନ୍ ବାପାନ୍ ଆ କେଜ୍ଜା ଆତନବ୍ନଙ୍ ଆସନ୍ ଆନିନ୍ ସରିନ୍ ଲୁଡା ।” ତି ସିଲଡ୍ଲ୍ଲନ୍ ଆନିଞ୍ଜି ତି ଆତଗଲ୍ ଜାୟ୍ ଆପ୍ପେୟଞ୍ଜିଆଡଙ୍ ଦ୍ରାକ୍ୟାଡାନ୍ ଅବ୍ଗାଲେ, ଆସନ୍ନା ଡାଙ୍ଗଡ଼ିଅନନ୍ ଆନିନ୍ ସରିନ୍ ଲୁଡେନ୍; ବନ୍ଡ ଲୋଟନ୍ ଅଃଜ୍ଜନାଲୋ । କେନ୍ ଅନ୍ତମ୍ ବାଗୁନ୍ ଆଡାଙ୍ଗଡ଼ିଅନନ୍ ଲୋଟନ୍ ଆପ୍ପେୟଞ୍ଜି ବାତ୍ତେ ତୁଲ୍କୋଡେଞ୍ଜି । ତି ସିଲଡ୍ଲ୍ଲନ୍ ଆସୋଡ଼ା ଡାଙ୍ଗଡ଼ିଅନନ୍ ଓବ୍ବା ଅନନ୍ କୋଡ୍ଲେ ମୋୟାବ ଗାମ୍ଲେ ଅବ୍ଞୁମେନ୍; ଆନିନ୍ ନମି ଆଜୋଗା ମୋୟାବିୟନ୍ ଆ ମନ୍ରାଜି ଆ ପୁର୍ବା ଆପ୍ପେୟ୍ । ଆରି, ଆସନ୍ନା ଡାଙ୍ଗଡ଼ିଅନନ୍ ଓବ୍ବା ଅନନ୍ କୋଡ୍ଲେ ବିନ-ଅମ୍ମି ଗାମ୍ଲେ ଅବ୍ଞୁମେନ୍; ଆନିନ୍ ନମି ଆଜୋଗା ଆମୋନିଅନ୍ ଆ ମନ୍ରାଜି ଆ ପୁର୍ବା ଆପ୍ପେୟ୍ ।
Source notes (1)
- Footnote ଆଗ୍ରାମ୍ଗାମ୍ ସନ୍ନା
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.