Juray Soura Bible
ଏଜ୍ରା 7
ଜିରୁସାଲମଲୋଙନ୍ ଏଜ୍ରାନ୍ ଆନଡ଼ୋ
କେନ୍ ଅଡ଼୍କୋନ୍ ଆଗନଟେ ସିଲଡ୍ ପାରସ୍ୟ ରାଜା ଅର୍ତକସ୍ତରନ୍ ଆସରାସନଏନ୍ ଆଡିଡ୍ ସରାୟନ୍ ଆଡାଙ୍ଗାଡ଼ାଅନ୍ ଏଜ୍ରାନ୍ ବାବିଲୋନ୍ ସିଲଡ୍ ତଙିୟ୍ଲନ୍; ତି ଆ ସରାୟ ଅସରିୟ ଆଅନ୍, ଅସରିୟ ଇଲ୍କିଅନ୍ ଆଅନ୍, ଇଲ୍କିୟନ୍ ସଲ୍ଲୁମ୍ମନ୍ ଆଅନ୍, ସଲ୍ଲୁମ୍ମନ୍ ସାଦୋକନ୍ ଆଅନ୍, ସାଦୋକନ୍ ଅଇଟୁବନ୍ ଆଅନ୍, ଅଇଟୁବନ୍ ଅମରିଅନ୍ ଆଅନ୍, ଅମରିଅନ୍ ଅସରିଅ ଆଅନ୍, ଅସରିଅ ମରାୟୋତନ୍ ଆଅନ୍, ମରାୟୋତନ୍ ସରଇଅନ୍ ଆଅନ୍, ସରିଇଅନ୍ ଉସିଅନ୍ ଆଅନ୍, ଉସିଅନ୍ ବୁକ୍କିନ୍ ଆଅନ୍, ବୁକ୍କିନ୍ ଅବିସୁଅନ୍ ଆଅନ୍, ଅବିସୁଅନ୍ ପିନ୍ଅସ୍ସନ୍ ଆଅନ୍, ପିନଅସନ୍ ଇଲିଆସନ୍ ଆଅନ୍, ଇଲିଆସନ୍ ସୋଡ଼ା ରାଓଡ଼ା ଆରୋଣନ୍ ଆ ଡାଙ୍ଗାଡ଼ାଅନ୍ । କେନ୍ ଆ ଏଜ୍ରା ବାବିଲୋନ୍ ସିଲଡ୍ ଡୁଙ୍ଲନ୍ ଜିର୍ରେନ୍; ଆନିନ୍ ଇସ୍ରାଏଲନ୍ ଆ ଇସ୍ୱର ପ୍ରବୁନ୍ ଆତନିୟ୍ ମସାନ୍ ଆ ବନାଁୟ୍ବର୍ ଆଗନିୟ୍ ଞନଙ୍ମର୍ ଡକୋଏନ୍; ଆରି, ଆନିନ୍ଆଡଙ୍ ଆ ଇସ୍ୱରନ୍ ପ୍ରବୁନ୍ ଆସନାଜ ଆସି ବାତ୍ତେ ରାଜାନ୍ ଡଅଙ୍ଡାଗୋ ଅଡ଼୍କୋନ୍ ଆସନାୟ୍ସାଜନ୍ ଆବିସୟ ଆନିନ୍ଆଡଅଙ୍ ତିୟେନ୍ । ଆରି ଅର୍ତକସ୍ତର ରାଜାନ୍ ଆସରସାନଏନ୍ ସାତ ବର୍ସେଙ୍ଲୋଙ୍ ଇସ୍ରାଏଲନ୍ ଆଅନଞ୍ଜି ଡ ରାଓଡ଼ାଞ୍ଜି ଆରି ଲେବିୟଞ୍ଜି ଆଅଞ୍ଜି ସିଲଡ୍ ଅସୋୟ୍ ମନ୍ରା, ଆରି କନନ୍ମରଞ୍ଜି ଜିରୁସାଲମ୍ବାନ୍ ଜିରେଞ୍ଜି । ଆରି ଏଜ୍ରାନ୍ ମନ୍ଲୟ୍ ଆଙ୍ଗାୟ୍ଲୋଙ୍, ଆଗ୍ରାମ୍ଗାମ୍, ରାଜାନ୍ ଆସରସାନଏନ୍ ସାତ ବର୍ସେଙ୍ ଆଡିଡ୍ ଜିରୁସାଲମନ୍ ଅଡ଼ୋଏଞ୍ଜି । ଇନିଆସନ୍ଗାମେଣ୍ଡେନ୍, ଆନିନ୍ ଆପର୍ତମ୍ମୁ ଆଙ୍ଗାୟ୍ ଆପର୍ତମ୍ମୁ ଡିନ୍ନାନ୍ ବାବିଲନ୍ ସିଲଡ୍ ଜନିରନ୍ ଆସନ୍ ସୁସୁଏଞ୍ଜି, ଆରି ଆନିଞ୍ଜିଆଡଙ୍ ଇସ୍ୱରନ୍ ଆ କାନକାରମ୍ସିନ୍ ବାତ୍ତେ ଆନିନ୍ ମୟ୍ଲୟ୍ ଆଙ୍ଗାୟ୍ ଆପର୍ତମ୍ମୁ ଡିନ୍ନାଲୋଙ୍ ଜିରୁସାଲମନ୍ ଅଡ଼ୋଏଞ୍ଜି । ତିଆସନ୍ ଏଜ୍ରାନ୍ ପ୍ରବୁନ୍ ଆବନାଁୟ୍ବର୍ ଆସନାୟ୍ ଡ ଆ ମନାନ୍ନେ ଆସନ୍, ଆରି ଇସ୍ରାଏଲ ମରଞ୍ଜି ଆମଙ୍ଲୋଙ୍ ଡକୋନ୍ ଆବନାଁୟ୍ବରନ୍ ଡ ସାସନ ଞନଙନ୍ ଆତନିୟ୍ ଆସନ୍ ଆନିନ୍ଡମ୍ ରଡୋ ଗାମ୍ଲେ ଗବ୍ରିନେତୋ ।
ଅର୍ତକ୍ୟସ୍ତନ୍ ଏଜ୍ରାନ୍ଆଡଙ୍ ଆତ୍ରିୟେନ୍ ଆ ସିଟି
ଅର୍ତକସ୍ତର ରାଜା ଆଞନଙ୍ମର୍ ଏଜ୍ରା ରାଓଡ଼ାନ୍ଆଡଙ୍, ଆଗ୍ରାମ୍ଗାମ୍, ପ୍ରବୁନ୍ ଆ ବନାଁୟ୍ବର୍ ଡ ଇସ୍ରାଏଲନ୍ ଆଡଙ୍ ଆନସଜନ୍ ଆ ଞନଙ୍ମରନ୍ଆଡଙ୍ ଅଙ୍ଗା ଆ ସିଟି ତିୟେନ୍, ତି ଆନିଡ୍ ସିଟି କେନ୍, ଆଗ୍ରାମ୍ଗାମ୍, “ରାଜାନ୍ ଅର୍ତକସ୍ତରନ୍ ରୁଆଙନ୍ ଆ ଇସ୍ୱର ବନାଁୟ୍ଞନଙ୍ମର୍, ସତଙ୍, ଏର୍ଜାଡ଼ିକାନ୍ ଏଜ୍ରା ରାଓଡ଼ାନ୍ ଆଡଙ୍, ଞେନ୍ ବାୟଁବର୍ତନାୟ୍ ଡ, ଡେସାଲୋଙ୍ ଞେନ୍ ଇସ୍ରାଏଲନ୍ ସିଲଡ୍ ଡିଅଁଙ୍ ମନ୍ରା, ଆରି ଆ ରାଓଡ଼ାଞ୍ଜି ଡ ଲେବିୟଞ୍ଜି ଜିରୁସାଲମ୍ବା ଆଇସୁମ୍ଡମଞ୍ଜି ଆଜନିର୍ ଇସୁମ୍ତଜି, ଆନିଞ୍ଜି ଆମନ୍ ସରିନ୍ ଜିରେତଜି । ଇନିଆସନ୍ଗାମେଣ୍ଡେନ୍ ଅସିଲୋଙ୍ନମ୍ ଇସ୍ୱରନମ୍ ଆବନାଁୟ୍ବ ସାତଟା ରାଜାନ୍ ଜିଉଦାନ୍ ଡ ଜିରୁସାଲମନ୍ ଆସନାୟ୍ଡଙ୍ ଆସନ୍, ଆରି ଜିରୁସାଲମ୍ଲୋଙନ୍ ଆନା ଆଡ୍ରକୋନେ ଡକୋ, ଇସ୍ରାଏଲନ୍ ଆ ଇସ୍ୱର ଆସନ୍ ରାଜାନ୍ ଡ ମନ୍ତ୍ରିଞ୍ଜି ଆ ଇସ୍ସୁମ୍ ତନିୟ୍ତିୟ୍ ସୁନ୍ନାନ୍ ଡ ରୁପାନ୍, ଆରି, ସମ୍ପରା ବାବିଲୋନ୍ ଡେସାଲୋଙ୍ ଆମ୍ୱେନ୍ ଅଙ୍ଗା ଅଡ଼୍କୋନ୍ ଆ ରୁପା ଡ ଆ ସୁନା ଏଞାଙ୍ତେ, ଆରି, ମନ୍ରାଜି ଡ ରାଓଡ଼ାଞ୍ଜି ଆ ଇସ୍ୱରଞ୍ଜି ଆସିଙ୍ ଜିରୁସାଲମଲୋଙ୍ ଇସୁମ୍ତନିୟ୍ତିୟନ୍ ଇନି ତିୟ୍ତଜି, ତି ଅଡ଼୍କୋନ୍ ଇସୁମ୍ତନିୟ୍ତିୟନ୍ ଆପନାଙ୍ ଆସନ୍ ଆମ୍ୱେନ୍ ରାଜାନ୍ ଡ ସପ୍ତ ଆ ମନ୍ତ୍ରିନ୍ ବାତ୍ତେ ପତାୟ୍ତବେନ୍ଞ୍ଜି ; ତିଆସନ୍ ଆମ୍ୱେନ୍ କେନ୍ ଆଡାବ୍ବୋ ବାତ୍ତେ ଜୁବାୟ୍ଲେ ସଣ୍ତନ୍, ମେଣ୍ତାନ୍, ଆଅନ୍ମେନନ୍, ଆଗନବ୍ରି ଜନୋମନ୍ ଡ ଦ୍ରାକ୍ୟାଡା ଅନମଙନ୍ ଞିଲେ ଜିରୁସାଲମଲୋଙ୍ ଇସ୍ୱରବେନ୍ ଆସିଙ୍ ଆ ତନମ୍ପିଲ୍ଲୋଙ୍ ସୋରୋପ୍ପାୟ୍ବା । ଆରି ଲାଙ୍ଲେଡ୍ ଆ ରୁପା ଡ ଆ ସୁନ୍ନା ବାତ୍ତେ ଆମ୍ୱେନ୍ଆଡଙ୍ ଡ ବୋଞାଙ୍ବେଞ୍ଜିଆଡଙ୍ ଅଙ୍ଗାତେ ମନଙ୍ ଗିୟ୍ତାତେ, ତିଆତେ ଆମ୍ୱେନ୍ ଇସ୍ୱରବେନ୍ ଆ ଇସ୍ସୁମ୍ ଅନ୍ତମ୍ ଲୁମ୍ବା । ଆରି, ଇସ୍ୱରବେନ୍ ଆସିଙ୍ ସନେବାନ୍ ଆସନ୍ ଅଙ୍ଗା ଆସିମ୍ମାଜି ଡଅଙ୍ବେନ୍ ତନିୟନ୍ ଡେନ୍, ତି ଅଡ଼୍କୋନ୍ ଆମ୍ୱେନ୍ ଜିରୁସାଲମନ୍ ଇସ୍ୱରନ୍ ଆତେମଡ୍ଲୋଙ୍ ସୋରୋପ୍ପାୟ୍ବା । ଆରି, ଇସ୍ୱରବେନ୍ ଆସିଙ୍ ଆସନାୟ୍ସାୟ୍ ଇନିଜି ତନିୟନ୍ ଡକୋ ଆମ୍ୱେନ୍ ତିୟ୍ବା, ତିଆତେ ରାଜାନ୍ ଆ ତନର୍ତୁମ୍ସିଙ୍ ସିଲଡ୍ ତିୟ୍ବା । ନମିଞେନ୍ ଅର୍ତକସ୍ତର ରାଜା ଆରି ରୁଆଙନ୍ ଆଡ୍ରକୋତନ୍ ଇସ୍ୱରନ୍ ଆ ଞନଙ୍ତିୟ୍ମର୍ ଏଜ୍ରା ରାଓଡ଼ାନ୍ ଅମଙ୍ବାବେନ୍ ସିଲଡ୍ ଇନି ଇନିଜି ସାୟ୍ତେ, ତିଆତେ ତିୟ୍ତବେନ୍ । ତି ଅଡ଼୍କୋନ୍ ବସଅ ତାଡ଼ନ୍ତ ଜାୟ୍ ରୁପାନ୍ ଡ ବସଅ ଆଡ୍ଡା ଜାୟ୍ ଗଅମନ୍1 ବସଅ ଆଡ୍ଡା ଜାୟ୍ ଦ୍ରାକ୍ୟାଡାନ୍ ଡ ବସଅ ଆଡ୍ଡା ଜାୟ୍ ମିଞଲନ୍2 ଡ ବକୁନୁଡ଼ାୟ୍ ବସିଡନ୍ ଜୁବାୟ୍ଲେ ଆତନିୟ୍ ଆସନ୍ ଞେନ୍ ଅର୍ତ୍ତକ୍ଷସ୍ତ ରାଜା ମିୟ୍ତାଲ୍ ଅଲନ୍ ଅଡ଼୍କୋନ୍ ଡେସାନ୍ ଡକୋଡାବ୍ମର୍ରନ୍ ଏବାଞ୍ତାୟ୍ । ରୁଆଙନ୍ ଆଡ୍ରକୋତନ୍ ଆ ଇସ୍ୱର ବାତ୍ତେ ଇନିଜି ଇନିଜି ବନାଞନ୍ ଡେଏନ୍, ତି ଅଡ଼୍କୋନ୍ ରୁଆଙନ୍ ଆଡ୍ରକୋତନ୍ ଆ ଇସ୍ୱର ଆସିଙ୍ ଆସନ୍ ମନଙ୍ ଲନୁମନ ଡେଏତୋ; ଇନିଆସନ୍ଗାମେଣ୍ଡେନ୍ ରାଜାନ୍ ଡ ଆ ଡାଙ୍ଗାଡ଼ାଅନଞ୍ଜି ଆରାଜ୍ୟ ଆ ବିରୁଦଲୋଙ୍ ଇନିବା ଆବନ୍ର୍ରାବନ୍ ଗତ୍ତରେ ? ଆରି, ରାଓଡ଼ାଞ୍ଜି ଡ ଲେବିୟଞ୍ଜି, କନନ୍ମରଞ୍ଜି, ଜଗେସିଙ୍ମରଞ୍ଜି, ସେବା କାବାଡ଼ାମର୍ରଞ୍ଜି ଡ ଇସ୍ୱରନ୍ କେନ୍ ଆସିଙ୍ ଆସନ୍ନେବାମର୍ଜି ଆନ୍ନିଙ୍ ଆଉପ୍ରେଙ୍ ପାନ୍ନୁନ୍, ଡେସାନ୍ ଆପାନୁ ଅଡ଼େ ମାସୁଲ୍ ଆବ୍ଗରିଲେ ଅନଗଡ୍ ସଙ୍ଗତ୍ତାନ୍ ଡେତେ ଗାମ୍ଲେ ଞେନ୍ ଆମ୍ୱେଞ୍ଜିଆଡଙ୍ ଅବ୍ଜନାଲବେନ୍ । ଆରି ଏ ଏଜ୍ରା, ଇସ୍ୱରନମ୍ ଆବର୍ନେ ଅଙ୍ଗା ଆଜନନା ଅସିଲୋଙ୍ନମ୍ ଡକୋ, ତି ଅନ୍ତମ୍ ମିୟ୍ତାଲ୍ ଅଲନ୍ ଆମନ୍ରା ଅଡ଼୍କୋନ୍ ଆନବ୍ପନ୍ସୁଆତିନ୍ ଆସନ୍ ଅଙ୍ଗା ମନ୍ରାଜି ଇସ୍ୱରନମ୍ ଆବନାଁୟ୍ବର୍ ଜନାଜି, ତିଅନ୍ତମ୍ ଡେସାନ୍ ଆସାସନ୍ମର୍ଜି ଡ ପନ୍ସ୍ସୁଆତିମରଞ୍ଜିଆଡଙ୍ ଆମନ୍ ତବ୍ନଙା; ଆରି, ଆନା ତିଆତେ ଜନା ତଡ୍, ଆମ୍ବେନ୍ ଆନିନ୍ଆଡଙ୍ ଞଙ୍ଞଙ୍ବା । ଆରି, ଆନ୍ନା ଇସ୍ୱରନମ୍ ଆ ବନାଁୟ୍ବର୍ ଡ ରାଜାନ୍ ଆ ବନାଁୟ୍ବର୍ ଆ ମନାନ୍ନେ ଅନିସ୍ସୁମେ, ତି ଡୋସା ଆସନ୍ ପରାନାନ୍ ଆପନବ୍ରଡ୍ ଅଡ଼େ ବଣ୍ତିନ୍ ଡାବ୍ବୋନ୍ ଅନବ୍ତାଣ୍ତେ ଅଡ଼େ ଜେଲନ୍ ଆଜନିର୍ ଡେଏତୋ ପଡ୍ସେଙ୍, ଜୁବାୟ୍ଲେ ତି ଆତେ ସାସନ୍ ଡେତେ ।”
ଏଜ୍ରାନ୍ ଇସ୍ୱରନ୍ଆଡଙ୍ ସେଙ୍କେଏନ୍
ପୁର୍ବାଃ ଜୋଜୋଲେଞ୍ଜି ଆ ଇସ୍ୱର ପ୍ରବୁନ୍ ଆସନ୍ ଜିରୁସାଲମଲୋଙନ୍ ଡକୋନ୍ ଆସିଙ୍ ଆନବ୍ପନେମେଙ୍ ଆସନ୍ ରାଜାନ୍ ଆ ଉଗ୍ଗର୍ ଏନ୍ନେଲେ ଅବ୍ନୁୟୁବେନ୍, ଆରି ରାଜାନ୍ ଡ ଆ ମନ୍ତ୍ରିଞ୍ଜି ଡ ରାଜାନ୍ ଆରନପ୍ତି ସୋଡ଼ାମରଞ୍ଜି ଅଡ଼୍କୋନ୍ ଆତେମଡ୍ଲୋଙ୍ ଞେନ୍ଆଡଙ୍ କାନକାରମ୍ ଅମେଲିଞ୍ଞ୍ଜି, ଆନିନ୍ ସନେନ୍ସେନ୍ ଡେଏତୋ । କେନ୍ ଅନ୍ତମ୍ ଞେନ୍ଆଡଙ୍ ପ୍ରବୁନ୍ ଇସ୍ୱରଞେନ୍ ଆସି ଆ ସନାୟ୍ସି ବାତ୍ତେ ଞେନ୍ ବୋର୍ସାଲିୟ୍ ଆରି ଞେନ୍ ସରିନ୍ ଆଜନିର୍ ଆସନ୍ ଇସ୍ରାଏଲନ୍ ସିଲଡ୍ ସୋଡ଼ାମରଞ୍ଜିଆଡଙ୍ ରୁକୁଲାୟ୍ ।
Source notes (2)
- Footnote ବସଅ ଆଡ୍ଡା ଜାୟ୍ ଗଅମନ୍, ଆଗ୍ରାମ୍ଗାମ୍ ୧୦,୦୦୦ କେଜି
- Footnote ବସଅ ଆଡ୍ଡା ଜାୟ୍ ଦ୍ରାକ୍ୟାଡାନ୍ ଡ ବସଅ ଆଡ୍ଡାନ୍ ଜାୟ୍ ମିଞଲନ୍ ଆଗ୍ରାମ୍ଗାମ୍ ୨୦୦୦ ଲିଟର୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.