Juray Soura Bible
ଏଜ୍ରା 5
ସରେବାସିଙନ୍ ଆକାବ୍ବାଡ଼ା ଆ ବାର୍ତୁବ୍
ସିଲତ୍ତେ ଆଗୟ ପୁର୍ବାଃତେବର୍ନେମର୍ ଡ ଇଦୋରନ୍ ଆଡାଙ୍ଗାଡ଼ାଅନ୍ ଜିକରିଅନ୍, କେନ୍ ଆ ପୁର୍ବାଃତେ ବର୍ନେମରଞ୍ଜି ଜିଉଦାନ୍ ଡ ଜିରୁସାଲମ୍ଲୋଙନ୍ ଡକୋନ୍ ଆ ଜିଉଦିମରଞ୍ଜି ଆମଙ୍ବା ପୁର୍ବାଃତେବରନ୍ ଅପ୍ପୁଙ୍ବରେଞ୍ଜି; ଆନିଞ୍ଜି ଇସ୍ରାଏଲନ୍ ଆ ଇସ୍ୱର ଆଞୁମ୍ଲୋଙ୍ ଆମଙ୍ବାଞ୍ଜି ପୁର୍ବାଃତେବରନ୍ ଅପ୍ପୁଙ୍ବରେଞ୍ଜି; ସିଲତ୍ତେ ସଲ୍ଟିୟେଲନ୍ ଆଡାଙ୍ଗାଡ଼ାଅନ୍ ଜିରୁବାବିଲନ୍ ଡ ଜୋସାଦକନ୍ ଆଡାଙ୍ଗାଡ଼ାଅନ୍ ଜେସୁୟନ୍ ଜିରୁସାଲମଲୋଙ୍ ଇସ୍ୱରନ୍ ଆସରେବାସିଙ୍ ଆତନୁବ୍ ଆସନ୍ ଉଲଞ୍ଜି; ଆରି, ଇସ୍ୱରନ୍ ଆ ପୁର୍ବାଃତେ ବର୍ନେମରଞ୍ଜି ଆନିଞ୍ଜି ସରିନ୍ ଡକୋଲନ୍ ସାୟ୍ସିଏଞ୍ଜି । ତି ଆଡିଡ୍ ତତ୍ତନୟନ୍, ମିୟ୍ତାଲ୍ ଅଲନ୍ ଡେସାନ୍ ଆସୋଡ଼ାମର୍ ଡ ସତର-ବୋସଣୟନ୍ ଡ ଆଗଡ଼ିଞ୍ଜି ଆନିଞ୍ଜିଆଡଙ୍ ଇୟ୍ଲାୟ୍ବରେଜି, “କେନ୍ ଆସିଙ୍ ଆତନୁବ୍ ଆସନ୍ ଡ କେନ୍ ଆଡ୍ରଙ୍ନ୍ନେକିନ୍ତାଲ୍ ଆନବ୍ଞିଡ୍ ଆସନ୍ ଆନା ଆମ୍ୱେଞ୍ଜିଆଡଙ୍ ବାଞ୍ଲବେନ୍ ?” ସିଲତ୍ତେ ଞେନ୍ ଆନିଞ୍ଜିଆଡଙ୍ ଆବର୍ନେଞ୍ଜି ଅନ୍ତମ୍ ଏଜାଲଙ୍ଲାଜି; ଆନିଞ୍ଜି ବର୍ରଲେଞ୍ଜି, “କେନ୍ ଆତନ୍ରୁବ୍ମର୍ଜି ଆଞୁମ୍ ଇନି ?” ବନ୍ଡ ଜିଉଦିଞ୍ଜି ଆମ୍ମୁଙ୍ଗଡ୍ ମରଞ୍ଜି ସରିନ୍ ଆ ଇସ୍ୱରନ୍ ଆଡ୍ରକୋଏନ୍ ଆସନ୍ ଦାରିଆବସନ୍ ଆମଙ୍ କେନ୍ ଆବର୍ନେ ଅନ୍ରଙ୍ ଅଡ଼ୋଏନ୍ ଜାୟ୍ ଆରି ସିଟିନ୍ ବାତ୍ତେ କେନ୍ ଆବର୍ନେ ଅର୍ନବ୍ ଜନାଏଞ୍ଜି ଜାୟ୍ ବନେରାମରଞ୍ଜି ଆନିଞ୍ଜିଆଡଙ୍ ଏକାବ୍ବାଡଙ୍ନେ ଗାମ୍ଲେ ଅବର୍ରଞ୍ଜି ।
ଦାରିୟାବସ୍ ରାଜାନ୍ ଆମଙ୍ବା ତତ୍ତନୟନ୍ ଆ ସିଟି
ତତ୍ତନୟ, ମିୟ୍ତାଲ୍ ଅଲନ୍ ଡେସାନ୍ ଆସୋଡ଼ାମର୍ ଡ ସତର-ବୋସଣୟନ୍ ଡ ମିୟ୍ତାଲ୍ ଅଲନ୍ ଆ ସାଙ୍ଗନ୍ ଅପର୍ସକିଅଞ୍ଜି ଦାରିଆବସ ରାଜାନ୍ ଆମଙ୍ବା ଆନାପ୍ପାୟ୍ ସିଟିନ୍ ଆନିଡଲ୍; ଆନିଞ୍ଜି ଆମଙ୍ବା ଅଙ୍ଗା ଆ ସିଟି ଆପ୍ପାୟେଞ୍ଜି, ତେତ୍ତେ ଏନେଲେ ଆଇଡିଡ୍ ଡକୋଏନ୍; “ସୋଡ଼୍ ରାଜା ଦାରିଆବସନ୍ ସୋଡ଼ା ସନବ୍ୟୁନ୍ । ସୋଡ଼ା ରାଜାନ୍ ଆମଙ୍ ଆନବ୍ଜନ୍ନା କେନ୍ ଡ, ‘ଇନ୍ଲେଞ୍ଜି ଜିଉଦା ଡେସାଲୋଙ୍ ସୋଡ଼ା ଇସ୍ୱରନ୍ ଆସିଙ୍ ଏରିୟେନ୍ ଆଡିଡ୍, ତିଆତେ ସୋଡ଼ାରା ଅରେଙନ୍ ବାତ୍ତେ ତୁବ୍ତଜି ଆରି କିନ୍ତାଲ୍ଲୋଙନ୍ ପଟାନ୍ ଡାଲ୍ତଜି, ଆରି କେନ୍ ଆକାବ୍ବାଡ଼ା ଜୁବାୟ୍ଲେ ଆସିଞ୍ଜି ବାତ୍ତେ ଗବ୍ଡେଲ୍ତଜି ।’ ସିଲତ୍ତେ ଇନ୍ଲେଞ୍ଜି ପାପୁର୍ମରଞ୍ଜିଆଡଙ୍ ଅପ୍ପୁଙ୍ଲେ କେନ୍ଅନ୍ତମ୍ ଏବର୍ରାଜି, ‘କେନ୍ ଆସିଙ୍ ଆତନୁବ୍ ଆସନ୍ ଆରି କେନ୍ ଆ କିନ୍ତାଲନ୍ ଆନବ୍ଞିଡ୍ ଆସନ୍ ଆନା ଆମ୍ୱେଞ୍ଜିଆଡଙ୍ ବାଞ୍ଲବେନ୍ ?’ ତିଆସନ୍ ଆମନ୍ଆଡଙ୍ ଆନବ୍ଜନ୍ନା ଆସନ୍ ଇନ୍ଲେଞ୍ଜି ଆ ପାପୁର୍ମରଞ୍ଜି ଆଞୁମ୍ ଆନିଡ୍ ଆସନ୍ ଆଞୁମଞ୍ଜି ଏବର୍ରାଜି । ସିଲତ୍ତେ ଆନିଞ୍ଜି ଇନ୍ଲେଞ୍ଜିଆଡଙ୍ ଏନ୍ନେଲେ ଜାଲଙେଞ୍ଜି, ‘ଇନ୍ଲେଞ୍ଜି ରୁଆଙନ୍ ଡ ପୁର୍ତିନ୍ ଆ ଇସ୍ୱର ଆ କମ୍ୱାରି, ଆରି ଅଙ୍ଗା କେନ୍ ଆସିଙ୍ ଏତୁବ୍ତାୟ୍, କେନ୍ଆତେ ଗୋଗୋୟ୍ ବର୍ସେଙ୍ ଆମ୍ମୁଙ୍ ଆତନୁବ୍ ଡକୋଏନ୍, ଇସ୍ରାଏଲନ୍ ଆ ସୋଡ଼ା ରାଜା ଅବୟ୍ ତିଆତେ ତୁବ୍ଲେ ଅବ୍ଞିଡେନ୍ । ବନ୍ଡ ପୁର୍ବାଃ ଜୁଜୁଲେଞ୍ଜି ରୁଆଙନ୍ ଆ ଇସ୍ୱରଆଡଙ୍ ବାବିଲନ୍ ଆ ରାଜା କଲଦିଅନ୍ ନବୁକଦ୍ନିତ୍ସରନ୍ ଆସିଲୋଙ୍ ସୋରୋପ୍ପାୟେନ୍, ଆନିନ୍ କେନ୍ ଆସିଙ୍ ରୁବ୍ଡ଼ାଙ୍ଲେ ମନ୍ରାଞ୍ଜିଆଡଙ୍ ବାବିଲୋନ୍ ଓରୋଙେନ୍ । ବନ୍ଡ ବାବିଲନ୍ ଆ ରାଜା କୋରସନ୍ ଆପର୍ତମ୍ମୁ ବର୍ସେଙ୍ ଇସ୍ୱରନ୍ କେନ୍ ଆସିଙ୍ ଆତନୁବ୍ ଆସନ୍ କୋରସ୍ ରାଜାନ୍ ବାଞେନ୍ ।’ ଆରି, ନବୁକଦ୍ନିତ୍ସରନ୍ ଇସ୍ୱରନ୍ ଆସରେବାସିଙ୍ ଅଙ୍ଗା ଅଡ଼୍କୋନ୍ ଆ ସୁନା ଡ ରୁପାସିମ୍ମଞ୍ଜି ଜିରୁସାଲମଲୋଙନ୍ ଡକୋନ୍ ଆସରେବାସିଙ୍ ସିଲଡ୍ ପାଙ୍ଲେ ବାବିଲଲୋଙନ୍ ଡକୋନ୍ ଆଡେଉଡ଼ବା ପାଙ୍ଲାୟ୍, ତି ଅଡ଼୍କୋନ୍ କୋରସ୍ ରାଜାନ୍ ବାବିଲନ୍ ମଣ୍ତିର ସିଲଡ୍ ତବେନ୍, ଆରି ତିଆତେ ଅଡ଼୍କୋନ୍ ସେସବସରନ୍ ଆଞୁମ୍ମର୍ ରୟଙନ୍ ଆତନିୟ୍ ଡେସାନ୍ ଆସୋଡ଼ାମର୍ ଆସିଲୋଙ୍ ସୋରୋପ୍ପାୟେନ୍; ଆରି, ଆନିନ୍ ଆନିନ୍ଆଡଙ୍ ବରେନ୍, ‘କେନ୍ ଅଡ଼୍କୋନ୍ ଆସିମ୍ମା ପାଙ୍ଲେ ଜିରୁସାଲମନ୍ ଆସ୍ରେବାସିଙ୍ଲୋଙ୍ ଡକ୍କୋଆ ଆରି ଇସ୍ୱରନ୍ ଆସିଙ୍ ଲୋଙ୍ମା ତନୁବନ୍ ଡେଏତୋ ।’ ସିଲତ୍ତେ ତି ଆ ସେସବସରନ୍ ଜିର୍ରେ ଜିରୁସାଲମଲୋଙନ୍ ଇସ୍ୱରନ୍ ଆସିଙ୍ ଆ ଜିମ୍ମିତାଲ୍ ତୁବେନ୍; ଆରି ତି ଆଡିଡ୍ ସିଲଡ୍ ନମିଆନ୍ତାନ୍ ଜାୟ୍ ତିଆତେ ତନୁବନ୍ ଡେତେ, ଡେଲୋଜନଙ୍ଡେନ୍ ତିଆତେ ଅନ୍ରଙ୍ ଗଡେଲେ ।
ତିଆସନ୍ ଅଙ୍ଗା ଆଡିଡ୍ ସୋଡ଼ା ରାଜାନ୍ ମନଙ୍ ଗିୟ୍ତାତେ, ତିଡେନ୍ କୋରସ୍ ରାଜା ଜିରୁସାଲମଲୋଙ୍ ଇସ୍ୱରନ୍ କେନ୍ ଆସିଙ୍ ତନ୍ରୁବ୍ ବାଞେନ୍ ପଙ୍ ଅଡ଼େ ଇଜା, ତିଆତେ ବାବିଲନ୍ ଆ ସୋଡ଼ା ରାଜା ଆଡ୍ରକ୍କୋ ସିଙ୍ଲୋଙ୍ ସାୟ୍ନେତୋ, ଆରି କେନ୍ ଆବର୍ନେ ସୋଡ଼ା ରାଜାନ୍ ଇନ୍ଲେଞ୍ଜିଆଡଙ୍ ବର୍ରନେନମ୍ ଇନି ଆପ୍ପାୟାୟ୍ ।”
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.