Juray Soura Bible
ତଙିୟ୍ନେ 32
ସୁନା ଆ ଅନ୍ତାଙ୍
(୨ ବିବରଣ ୯:୬-୯)
ମୋସାନ୍ ବରୁନ୍ ସିଲଡ୍ ପଡ୍ନେନ୍ ଆଡରିଙେନ୍ ମନ୍ରାଞ୍ଜି ଆରୋଣନ୍ ଆମଙ୍ ଇୟ୍ଲେ ରୁକ୍କୁଲନ୍ ଆନିନ୍ଆଡଙ୍ ବରେଞ୍ଜି, “ଡୋନା, ଇନ୍ଲେଞ୍ଜିଆଡଙ୍ ଅଙ୍ଗା ଆ ମନ୍ରା ମିସର୍ ଡେସାନ୍ ସିଲଡ୍ ଅମ୍ଡୁଙ୍ଲେ ଓରୋଙ୍ଲଲେନ୍ ତି ଆ ମୋସା ଇନିଡେନ୍ ଇନ୍ଲେଞ୍ଜି ଜନା ତଡ୍, ତାସନ୍ ଇନ୍ଲେଞ୍ଜି ଆନୋରୋଙ୍ ଆସନ୍ ଅବୟ୍ ସନୁମନ୍ ତୁବ୍ଲେ ତିୟ୍ଲେନ୍ ।”
ଆରୋଣନ୍ ଆନିଞ୍ଜିଆଡଙ୍ ବରେଞ୍ଜି, “ଏତ୍ତେଲ୍ଡେନ୍ ଆମ୍ବେନ୍ ରମ୍ମଙ୍ ଡୁକ୍କରିବେଞ୍ଜି ଡ ଡଙ୍ଗାଡ଼ାଅନ୍ବେଞ୍ଜି ଡ ଡାଙ୍ଗଡ଼ିଅନ୍ବେଞ୍ଜି ଆଲୁଡ୍ଲୋଙ୍ ଆସୁନ୍ନା ଉୟ୍ଲେ ପାଙାୟ୍ବା ।” ତିସିଲଡ୍ ଅଡ଼୍କୋ ମନ୍ରାନ୍ ତର୍ଡମ୍ ତର୍ଡମ୍ ଆଲୁଡ୍ଲୋଙ୍ ସିଲଡ୍ ସୁନ୍ନାନ୍ ଉୟ୍ଲନ୍ ଆରୋଣନ୍ ଆମ୍ମଙ୍ବା ପାଙ୍ଲାଜି । ଆନିନ୍ ଆସିଲୋଙଞ୍ଜି ସିଲଡ୍ ପାଙ୍ଲେ ଅବ୍ଲୋତୋର୍ରେ ତନନ୍ରୁବ୍ ସଞ୍ଚନ୍ ଲୋଙନ୍ ଲାଏନ୍, କି ଅବୟ୍ ଆ ଅନ୍ ତାଙନ୍ ତୁବେନ୍ ।
ମନ୍ରାଞ୍ଜି ବର୍ରଞ୍ଜି, “ଏ ଇସ୍ରାଏଲନ୍, ଅଙ୍ଗା ଆସନୁମ୍ ଆମ୍ୱେଞ୍ଜିଆଡଙ୍ ମିସର୍ଡେସାନ୍ ସିଲଡ୍ ଅମ୍ଡୁଙ୍ଲେ ଓରୋଙ୍ଲବେନ୍, କେନ୍ଆତେ ତି ଆସନୁମ୍ ।”
ତିସିଲଡ୍ ଆରୋଣନ୍ ତିଆତେ ଗିୟ୍ଲେ ଆମୁକାବାନ୍ ଅବୟ୍ ତନମ୍ପିଲନ୍ ତୁବେନ୍ ଆରି କେନ୍ ଆବର୍ନେ ଅବ୍ଜଏଞ୍ଜି, ଆରି “ଆବାର୍ତାନ୍ ପ୍ରବୁନ୍ ଆନବ୍ ସର୍ଡାନ୍ ଆସନ୍ ଅବୟ୍ ସୋବାନ୍ ତୁବେଞ୍ଜି ।” ତିସିଲଡ୍ ମନ୍ରାଞ୍ଜି ଆବାର୍ତାନ୍ ଡୋତାନ୍ ଡୋଲନ୍ ଜନ୍ତୁଜି ଅନମଙନ୍ ଆସନ୍ ସୋରୋପ୍ପାୟେଞ୍ଜି । ତିସିଲଡ୍ ମନ୍ରାଞ୍ଜି ଗାଗାନେନ୍ ଡ ଗାଡାନେନ୍ ତୁଙ୍କୁମେଞ୍ଜି, ଆରି ଜୁଣ୍ଡଡ଼ି ଜୋଣ୍ଡଡ଼ା ଲୁମନ୍ ଉଲଞ୍ଜି ।
ପ୍ରବୁନ୍ ମସାନ୍ଆଡଙ୍ ବରେନ୍, “ଆମନ୍ ତୋଣ୍ଡୋ ବିରନ୍ ସିଲଡ୍ ପଡ୍ଲନ୍ ଜିରା, ଇନିଆସନ୍ଗାମେଣ୍ଡେନ୍ ମନ୍ରାନମ୍ଞ୍ଜି, ଆନାଜି ମିସର୍ ଡେସନ୍ ସିଲଡ୍ ଆନବ୍ ଓରୋଙ୍ଲାଜି, ଆନିଞ୍ଜି ଇର୍ସେନ୍ ଲୁମେଞ୍ଜି ଆରି ଅମଙ୍ଞେନ୍ ସିଲଡ୍ ଆନିଞ୍ଜି ସଙାଜେଞ୍ଜି । ଞେନ୍ ଆନିଞ୍ଜିଆଡଙ୍ ଅଙ୍ଗା ଆତଙର୍ ଆବର୍ନେ ବର୍ରାଜି ତି ଆତଙର୍ ସିଲଡ୍ ଆନ୍ନା ଆତଙର୍ ଗଡ୍ ଞାଲଞ୍ଜି; ଆନିଞ୍ଜି ସଞ୍ଚଲୋଙନ୍ ପିଡ୍ଲେ ଅବୟ୍ ଆଅନ୍ତାଙନ୍ ତୁବ୍ଲେ ଆନିନ୍ଆଡଙ୍ ଲୋମେଞ୍ଜି ଆରି ଆମଙ୍ବାନ୍ ଅନମଙନ୍ ତିୟ୍ଲେ ବର୍ରଞ୍ଜି । ଅଙ୍ଗା ସନୁମ୍ ଆମ୍ବେଞ୍ଜିଆଡଙ୍ ମିସରନ୍ ଡେସାନ୍ ସିଲଡ୍ ଓରୋଙ୍ଲବେନ୍ ତି ଆସନୁମ୍ କେନ୍ । ପ୍ରବୁନ୍ ମସାନ୍ଆଡଙ୍ ଆରି ବରେନ୍, କେନ୍ ଆମନ୍ରାଜି ଞେନ୍ ଗିୟ୍ଲାଜିଡ ଆନିଞ୍ଜି ମାଡ୍ଡ ପେଲ୍ଲାମର୍ଜି । ତିଆସନ୍ ଆମ୍ୱେନ୍ ନମି ଞେନ୍ଆଡଙ୍ ଅମ୍ରେଙିୟ୍ବା, ଆନିଞ୍ଜିଆଡଙ୍ ଞେନ୍ ବବ୍ରାବ୍ତାୟ୍ ଆରି ଞେନ୍ ଆନିଞ୍ଜିଆଡଙ୍ ରବ୍ବୁତାଜି । ବନ୍ଡ ଆମ୍ବେନ୍ ଡ କେଜ୍ଜାବେଞ୍ଜିଆଡଙ୍ ଞେନ୍ ଅବ୍ଗୋଗୋୟ୍ତାୟ୍ ।”
ସିଲତ୍ତେ ମସାନ୍ ସଦାପ୍ରବୁ ଇସ୍ୱରନ୍ଆଡଙ୍ କାକୁର୍ତ୍ତିଲନ୍ ବର୍ନେ, “ଏ ପ୍ରବୁନ୍, ଆମନ୍ ମନ୍ରାଞ୍ଜି ସୋଡ଼ା ବୋର୍ସାନମ୍ ବାତ୍ତେ ମିସର୍ ଡେସାନ୍ ସିଲଡ୍ ଅମ୍ଡୁଙ୍ଲେ ଓରୋଙ୍ଲାଜି,ଆନିଞ୍ଜି ବିରୋଡଲୋଙ୍ନମ୍ ବରାବ୍ନମ୍ ଇନିଆସନ୍ ଡୁଡୁତେ ? ଆନିନ୍ ବରୁରେଙନ୍ ଆନିଞ୍ଜିଆଡଙ୍ ଅବ୍ସେଡ୍ଡାଲେ ପୁର୍ତିନ୍ ସିଲଡ୍ ସନବ୍ଙାଜନ୍ ଆସନ୍ ରନବ୍ବୁନ୍ ଆସନ୍ ଅମ୍ଡୁଙ୍ଲେ ଓରୋଙ୍ଲାଜି କେନ୍ ଆବର୍ନେ ଇନିବା ମିସବାଜି ସୋବ୍ସୋବ୍ଗୁର୍ ଗାମେଜି ? ଆମନ୍ ବନ୍ରାବ୍ନମ୍ ସିଲଡ୍ ୟର୍ନାୟ୍ ଆରି ମନ୍ରାନମ୍ଜି ଆ ବିରୁଦଲୋଙ୍ ସିଲଡ୍ କେନ୍ ଏନ୍ନେଲେ ଆରନବ୍ବୁ ଆବର୍ନେ କବ୍ରୋଡାନା । ଅବ୍ରାଆମନ୍ ଡ ଇସାକନ୍ ମନ୍ନେବା,ଆମ୍ୱେନ୍ ଅଞୁମ୍ଲୋଙ୍ବେନ୍ ସିବ୍ଡେୟ୍ବର୍ରନ୍ ଆନିଞ୍ଜି ବର୍ରତଞ୍ଜି,ଆମ୍ୱେନ୍ ରୁଆଙନ୍ ତୁତୁଜଞ୍ଜି ଆଜାଡ଼ିନ୍ ଆମ୍ୱେନ୍ କେଜ୍ଜାବେନ୍ ଏବ୍ଗୋଗୋୟ୍ବା ଡ କେନ୍ ଅଡ଼୍କୋନ୍ ଆଡେସାନ୍ ଆବର୍ନେ ଏବର୍ରନାୟ୍, ତିଆତେ କେଜ୍ଜାବେଞ୍ଜି ଏତିୟ୍ବା ଆନିଞ୍ଜି ଅଃନଞିଡେନ୍ ଡିନାଜାୟ୍ ଆନିଞ୍ଜି ଡେତେ ।” ତିଡେନ୍ ପ୍ରବୁନ୍ ଆ ମନ୍ରାଜି ଆଡଙ୍ ଅଙ୍ଗା ସଙ୍ଗତା ଆବର୍ନେ ଗାମେନ୍ ତିଲୋଙ୍ ଆନ୍ନାଲଞ୍ଜି ।
ତିସିଲଡ୍ ମସାନ୍ ବରୁଲୋଙନ୍ ସିଲଡ୍ ବାଗୁ ଅରେଙନ୍ ଆପଟା ଞମ୍ଲେ ପଲ୍ଲ୍ନାୟ୍; ତି ଆରେଙ୍ ବାତବାନେନ୍ ଆଇଡିଡ୍ ଡକୋଏନ୍ । ତି ଅରେଙ୍ଲୋଙ୍ ଆଇଡିଡ୍ ପଟାନ୍ ଇସ୍ୱରନ୍ ଆତନୁବ୍; ଆରି ତି ଆତାଙ୍ତାଙ୍ ଆଇଡଲ୍ ଇସ୍ୱରନ୍ ଆନିଡଲ୍ ଡକୋଏନ୍ । ମନ୍ରାଞ୍ଜି ସୋଡ଼ା ସର୍ରଙନ୍ ବାତ୍ତେ ଆବରାବ୍ବାବ୍ତେଞ୍ଜି ଜିଓସୟନ୍ ଅମ୍ଡଙେନ୍ ଆରି ମସାନ୍ଆଡଙ୍ ବରେନ୍, “ତମ୍ବୁସିଙ୍ ଡରକୋନେଲୋଙନ୍ ଅଲ୍ଜୁଜ୍ଜେ ସର୍ରଙନ୍ ଆସନଡ୍ଡା ଞେନ୍ ଅମ୍ଡଙ୍ଲାୟ୍ ।”
ମସାନ୍ ବର୍ରନେ, “କେନ୍ ଆତେ ଜନିନୟ୍ ଆସର୍ରଙ୍ ଆସନଡ୍ଡାତଡ୍, ଅଡ଼େ ଅନାରେନ୍ ଆସଡ୍ଡାତଡ୍, ବନ୍ଡ ଞେନ୍ କନନ୍ ଅମ୍ଡଙ୍ତାୟ୍ ।”
ଆନିନ୍ ତମ୍ବୁସିଙ୍ ଡରକୋନେବାନ୍ ଆରଡ଼ୋଏନ୍ ଆଅନ୍ତାଙନ୍ ଆରି ତଙ୍ସେଙନ୍ ଗିଜେନ୍, ମସାନ୍ ମାଡ୍ଡ ବରାବେନ୍ । ତିଆସନ୍ ଆସିଲୋଙନ୍ ସିଲଡ୍ ତି ବାଗୁ ଅରେଙନ୍ ସେଡ୍ଲେ ବରୁନ୍ ଆଜାୟ୍ତା ପାଲେନ୍ । ଆରି ଆନିଞ୍ଜି ଆତ୍ରୁବେଞ୍ଜି ଆଅନ୍ତାଙନ୍, ପାଙ୍ଲେ ତଗୋଲୋଙନ୍ ପିଡେନ୍, ତିଆତେ ରିଡ୍ଲେ ରବ୍ଡ଼ିଏନ୍, ଆରି ଡାଆଲୋଙନ୍ ଉରୁଡେନ୍ । ଆରି ଇସ୍ରାଏଲ ମରଞ୍ଜିଆଡଙ୍ ଅବ୍ଗାଏଞ୍ଜି । ମସାନ୍ ଆରୋଣନ୍ଆଡଙ୍ ବରେନ୍, “କେନ୍ ଆମନ୍ରାଜି ଆମନ୍ଆଡଙ୍ ଇନି ଏଙ୍ଗାଲମ୍ଜି, ଆମନ୍ ଆନିଞ୍ଜି ଆଉପରେଙଞ୍ଜି ଏନ୍ନେଗନ୍ ଆ ଇର୍ସେଲୋଙ୍ ଅମ୍ମେଙ୍ତଜି ?” ତିଲୋଙ୍ ଆରୋଣନ୍ ବର୍ରେନ୍, “ପ୍ରବୁଲେନ୍ ବ୍ବନ୍ରାବନ୍ ଡୁଡୁଡଙ୍ତଡ୍; ଆମନ୍ ଜନା କେନ୍ ଆ ମନ୍ରାଜି ପେଲ୍ଲାଲୋଙନ୍ ମଗାତଜି ।” କେନ୍ ଆନିଞ୍ଜି ବର୍ରଞ୍ଜି, “ଇନ୍ଲେଞ୍ଜି ଆମ୍ମୁଙ୍ଜନିରନ୍ ଆସନ୍ ଇନ୍ଲେଞ୍ଜି ଆସନ୍ ସନୁମନ୍ ତୁବ୍ବା; ଇନିଆସନ୍ଗାମେଣ୍ଡେନ୍ ଅଙ୍ଗା ଆମନ୍ରା ଇନ୍ଲେଞ୍ଜି ମିସର୍ ଡେସାନ୍ ସିଲଡ୍ ଅମ୍ଡୁଙ୍ଲେ ଓରୋଙ୍ଲଙ୍ଲଙ୍, ନିୟ୍ ମସାନ୍ ଇନିଡେନ୍, ତିଆତେ ଞେନ୍ ଜନାତଡ୍ ।” ଏତେଲ୍ଡେନ୍ ଞେନ୍ ବର୍ରନାୟ୍, “ଆମ୍ୱେଞ୍ଜିଲୋଙ୍ ଆନାଆତେ ଇନିଜାକିଁୟ୍ ଆସୁନ୍ନା ଡକୋଏଣ୍ଡେନ୍ ତିଆତେ ତବ୍ବା; ତିଲୋଙ୍ ଆନିଞ୍ଜି ଞେନ୍ ତିଆତେ ତିୟ୍ଲିୟ୍ଞ୍ଜି; ଞେନ୍ ତିଆତେ ପାଙ୍ଲେ ତଗୋଲୋଙନ୍ ପିଲାୟ୍, ତିଲୋଙ୍ କେନ୍ ଆଅନ୍ତାଙନ୍ ଡୁଙ୍ଲନ୍ ଜିର୍ରାୟ୍ ।” କେନ୍ ସିଲଡ୍ ଆରୋଣନ୍ ଆସରଙ୍ଗତାଏଞ୍ଜି ଆ ମନ୍ରାଜି ଲୋଙ୍ ବନେରାନ୍ ଡନେନ୍ ଆସନ୍ ମନ୍ରାଜି ଆଇସ୍ସୁମ୍ଲୋଙ୍ଜି ଅମ୍ରେଙେଞ୍ଜି ଗାମ୍ଲେ ମସାନ୍ ଗିଜେନ୍ । ତିଆସନ୍ ମସାନ୍ ଡରକୋନେସିଂନ୍ ଆଡୁଆରା ତନଙ୍ଡାଲେ ଗାମେନ୍, “ପ୍ରବୁନ୍ ଆଡନେମର୍ ଅନ୍ନା ଡକୋ ? ଆନିନ୍ ଅମଙ୍ଞେନ୍ ଜିରାୟ୍ତୋ,” ତିଲୋଙ୍ ଲେବିନ୍ ଆ ଅନ୍ଜି ଆମଙ୍ବାନ୍ ରୁକ୍କୁଲଞ୍ଜି । ତିଲୋଙ୍ ଆନିଞ୍ଜି ବର୍ରଞ୍ଜି, “ଇସ୍ରାଏଲନ୍ ପ୍ରବୁନ୍ ପରମେସ୍ୱରନ୍ କେନ୍ ଆବର୍ନେ ବର୍ରତନେ,ଆମ୍ୱେଞ୍ଜି ଅଡ଼୍କୋ ମନ୍ରାନ୍ ରମଙ୍ ରମ୍ମଙ୍ ଆବୁଲୁଲୋଙ୍ ଅତିଆର ଜିଲେ ଡରକୋନେସିଂନ୍ ଗଡ୍ ଅବୟ୍ ଡୁଆରାନ୍ ଅନ୍ନା ଡୁଆରାନ୍ଗଡ୍ ଜିର୍ରବା ଜିରାୟ୍ବା,ଅଡ଼୍କୋ ମନ୍ରାନ୍ ରମ୍ମଙ୍ ରମ୍ମଙ୍ ଆବୋଞାଙ୍, ସାଙ୍ଗନ୍ ଡ ତୟ୍ଲିସିଙ୍ମରନ୍ଆଡଙ୍ ରବ୍ବୁବା ।” ତିଲୋଙ୍ ଲେବିନ୍ ଆ ମନ୍ରାଜି ମସାନ୍ ଆବର୍ନେ ଅନ୍ତମ୍ ଲୁମେଞ୍ଜି,ତିୟ୍ଆଡିନ୍ନା ମନ୍ରାଞ୍ଜିଲୋଙ୍ ଅସୁୟ୍ଗୋଗୋୟ୍ ୟାଗି ଅଜାର ମନ୍ରାନ୍ ରବ୍ବୁଏଞ୍ଜି । ଆରି ମସାନ୍ ବର୍ନେ, “ଆମ୍ୱେନ୍ ଅଡ଼କୋନ୍ବେନ୍ ରମ୍ମଙ୍ ରମ୍ମଙ୍ ଆଅନ୍ ଡ ବୋଞାଙ୍ବେଞ୍ଜି ଆମଙ୍ଗଡ୍ ପ୍ରବୁନ୍ ଆସନ୍ ଡଅଙ୍ବେଞ୍ଜି ଆଙ୍ସାବା, ସିଲତ୍ତେ ଆନିନ୍ କେନ୍ ଆଡିଡ୍ ଆମ୍ୱେଞ୍ଜିଆଡଙ୍ ଆସିର୍ବାଦତବେନ୍ ।” ତି ଆବାର୍ତାନ୍ ମସାନ୍ ମନ୍ରାଜି ବର୍ରେନ୍, “ଆମ୍ୱେଞ୍ଜି ସୋଡ଼ା ଇର୍ସେନ୍ ଏଲୁମେନ୍ ନମି ଞେନ୍ ପ୍ରବୁନ୍ ଆମ୍ମଙ୍ବା ଜିର୍ତେ; ଡେନ୍ଡେନ୍ ଞେନ୍ ଇର୍ସେବେଞ୍ଜି ଆସନ୍ କେମ୍ମାନ୍ ଆଞନାଙ୍ ଆସନ୍ ଲୁମ୍ତାୟ୍ ।” କେନ୍ ସିଲଡ୍ ମସାନ୍ ପ୍ରବୁନ୍ ଆମ୍ମଙ୍ ୟର୍ରବରେନ୍, “ଆୟ୍, ଆୟ୍, କେନ୍ ଆ ମନ୍ରାଜି ଆ ଇର୍ସେନ୍ ଲୁମ୍ଲେ ରମ୍ମଙ୍ ରମ୍ମଙ୍ ଆସନ୍ ସୁନ୍ନାନ୍ ଆସନୁମ୍ ଗବ୍ଡେଲେଞ୍ଜି । ବନ୍ଡ ନମିଞେନ୍, ଆମ୍ୱେନ୍ ଆଇର୍ସେଞ୍ଜି କେମ୍ମାତଜି; ଏଲୁମ୍ଲଡେନ୍, ଏତେଲ୍ଡେନ୍ କାକୁର୍ତିତନାୟ୍, ଆଇଡିଡନ୍ ବଇଲୋଙ୍ନମ୍ ଅଞୁମ୍ଞେନ୍ ଆଇଡିଡନ୍ ସିଲଡ୍ ଗସଡ୍ଲେ ସେଡା ।”
ତିଲୋଙ୍ ପ୍ରବୁନ୍ ମସାନ୍ ବର୍ରେନ୍, “ଅଙ୍ଗା ଆମନ୍ରା ସଙ୍ଗତାଲୋଙ୍ଲେନ୍ ଇର୍ସେନ୍ ଲୁମ୍ମେନ୍, ବଇଲୋଙ୍ଞେନ୍ ଆଞୁମନ୍ ଗଲ୍ଲେସେତାୟ୍ । ନମିଞେନ୍ ଜିର୍ବା, ଞେନ୍ ଅଙ୍ଗା ଆଡେସା ଆବର୍ନେ ଆମ୍ବେଞ୍ଜିଆଡଙ୍ ବର୍ରବେନ୍ ତି ଆସେଡା ମନ୍ରାଞ୍ଜି ଓରୋଙ୍ବାଜି; ଗିୟ୍ବା, ପାଙ୍ଲଙ୍ବର୍ମର୍ଞେନ୍ ଆମ୍ମୁଙ୍ଲନ୍ ଜିର୍ତେ; ବନ୍ଡ ଞେନ୍ ଡନୁଲ୍ ତନିୟ୍ ଡିନାଇଙନ୍ ଆଇର୍ସେଞ୍ଜି ଆସନ୍ ଆନିଞ୍ଜିଆଡଙ୍ ଡୁଲ୍ତାଜି ।” ଆରି ପ୍ରବୁନ୍ ମନ୍ରାଜି ସନମନ୍ ଆସନ୍, ଇନିଆସନ୍ଗାମେଣ୍ତେନ୍ ଆରୋଣନ୍ ଆତ୍ରୁବେନ୍ ଆ ଅନ୍ତାଙନ୍ ଆନିଞ୍ଜି ତୁବେଞ୍ଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.