Juray Soura Bible
ଞନଙ୍ଞଙ୍ବର୍ 7
ଗିଆନନ୍ ଡ ଏର୍ଗିଆନନ୍
ମାଡ୍ଡ ମଡ଼ଗାନ୍ ଆମିଞଲ୍ ଆପାଲ୍ତେଙ୍ ମନଙ୍ଡମନ୍ ଆଞୁମ୍ ମନଙ୍ ଆରି କନୋଡ୍ ଡିନ୍ନାନ୍ ଆପାଲ୍ତେଙ୍ ରନବୁ ଡିନ୍ନାନ୍ ମନଙ୍ । ବୁଜିସିଙନ୍ ଆନିୟ୍ ସିଲଡ୍ ୟେୟେଡାସିଙନ୍ ଆନିୟ୍ ମନଙ୍; ଇନିଆସନ୍ଗାମେଣ୍ତେନ୍ ରନବୁନ୍ ଅଡ଼୍କୋନ୍ଲେନ୍ ଆସନ୍ ଡକୋ ଗାମ୍ଲେ ଆମେଙ୍ମରଞ୍ଜି ଡିତାନ୍ ମନ୍ନନେନ୍ ସନାୟ୍ସାୟ୍ । କନିଜନ୍ ସିଲଡ୍ ଡୁକ୍କନ୍ ମନଙ୍; ଇନିଆସନ୍ଗାମେଣ୍ତେନ୍ ମୁକ୍କାନ୍ ଆ ମୁସୁକ୍କା ବାତ୍ତେ ଉଗ୍ଗରନ୍ ସର୍ଡାତେ । ଗିଆନମରଞ୍ଜି ଆ ଉଗର୍ ୟେୟେଡା ଅସିଙ୍ଲୋଙନ୍ ଡକୋତନ୍, ବନ୍ଡ ଉଲ୍ଲୁମରଞ୍ଜି ଆ ଉଗ୍ଗର୍ ସର୍ଡାସିଙ୍ଲୋଙନ୍ ଡକୋତନ୍ । ଉଲ୍ଲୁମରଞ୍ଜି ଆ କନନ୍ ଆନମ୍ଡଙ୍ ସିଲଡ୍ ଗିଆନମରଞ୍ଜି ଆକନଞ୍ ଆନମ୍ଡଙ୍ ମନଙ୍ । ଇନିଆସନ୍ଗାମେଣ୍ତେନ୍ ଏଙ୍ଗାଲେ ସୁତିନ୍ ଆଜାୟ୍ତା ଆଡ୍ରୁଡୁତେନ୍ ଉଲ୍ଲୁମରନ୍ ଆକନିୟ୍ ଆ ତୋର୍ତେର୍ତୋଡ୍ ଅନ୍ତମ୍; କେନ୍ଆତେ ଜାୟ୍ କାଜାନ୍ । ଆଜାଡ଼ିନ୍ ବୁର୍ଡଲେ ଆରନ୍ନା ଆଜନନା ଗିଆନମରନ୍ଆଡଙ୍ ଅବୁଲ୍ଲୁତେ ଆରି ତଙ୍କାନ୍ ଆଜନନା ବୁଡ୍ଡିନ୍ ଅବ୍ସେଡ୍ତେ । କାବ୍ବାଡ଼ାନ୍ ଆଉନେନ୍ ସିଲଡ୍ ଅନବ୍ଗଡନ୍ ମନଙ୍; ଆରି, ପୁରାଡ଼ାଲୋଙନ୍ ଆ କଙ୍କ୍ରି ସିଲଡ୍ ପୁରାଡ଼ାଲୋଙନ୍ ଆ ଲବଡ୍ଡି ମନଙ୍ । ପୁରାଡ଼ାଲୋଙ୍ନମ୍ ଅବାମୁଙ୍ ବରାବ୍ଡଙ୍; ଇନିଆସନ୍ଗାମେଣ୍ତେନ୍ ବନ୍ଡ୍ରାବନ୍ ଉଲ୍ଲୁମରଞ୍ଜି ଆମଙ୍ଲୋଙ୍ ଡକୋତନେ । “ନମି ଆ ଜୁଗା ସିଲଡ୍ ପୁର୍ବାଃନ୍ ଆ ଜୁଗା ଇନିଆସନ୍ ଅଗୋୟ୍ ମନଙ୍ ଡକୋଏନ୍,” କେନ୍ ଆବର୍ନେ ଆଙ୍ଗିୟ୍ ଏର୍ବଡଙ୍ନେ, ଇନିଆସନ୍ଗାମେଣ୍ତେନ୍ ଆମ୍ୱେନ୍ କେନ୍ ଆବିସୟ ଗିଆନଲୋଙନ୍ ଏସେକ୍କୁଏ । ଗିଆନନ୍, ଆପେୟ୍ସିଂଙନ୍ ଆନର୍ଜେ ଅନ୍ତମ୍ ମନଙ୍; ଆରି, ଆମେଙ୍ ଆଡ୍ରକୋତନ୍ ଆମନ୍ରାଜି ବୁଡ୍ଡିନ୍ ଆଞନାଙ୍ ଅଗୋୟ୍ ମନଙ୍ଡମ୍ । ଇନିଆସନ୍ଗାମେଣ୍ତେନ୍ ଏଙ୍ଗାଲେ ତଙ୍କାନ୍ ଡଅଙ୍ନମ୍ ଡୋବ୍ତେ, ତିଅନ୍ତମ୍ ଗିଆନନ୍ ଜାୟ୍ ଡଅଙ୍ନମ୍ ଡୋବ୍ତେ; ବନ୍ଡ ପଡ଼େନେନ୍ ସତଙ୍, ତିଆତେ ଗିଆନନ୍ ଆଞରାଙ୍ତେନ୍ ଆମନ୍ରା ଆପୁରାଡ଼ା ଡୋବ୍ତେ । ଇସ୍ୱରନ୍ ଆକାବ୍ବାଡ଼ା ଇୟମ୍ବା; ଇନିଆସନ୍ଗାମେଣ୍ତେନ୍ ଇନି ଆନିନ୍ ଅବାଙ୍କୋଡ଼ୋଏନ୍ ତିଆତେ ଆନା ବୁଙୟ୍ଲେ ରପ୍ତିଏ ? ଏରାମ୍ମୁୟ୍ ଏଡ୍ରକୋତନ୍ ଆଡିଡ୍ ସର୍ଡାନାବା ଆରି ଡୁକ୍କଇଙନ୍ ଆଡିଡ୍ ଇୟମ୍ବା; ଇସ୍ୱରନ୍ ସର୍ଡାନ୍ ଡ ଡୁକ୍କନ୍ ଗବ୍ରିଏନ୍, ଏଙ୍ଗାଲେ ତିକ୍କି ଇନି ଆ ଡୁକ୍କ ଗଟେତେ ତିଆତେ ମନ୍ରାନ୍ ଅଜ୍ଜନାଏ ତିଆସନ୍ ଇସ୍ୱରନ୍ ସୁକ୍କାନ୍ ଡ ଡୁକ୍କନ୍ ଅବ୍ଡମ୍ଲେ ଡକୋଏନ୍ । ଞେନ୍ କାଜାନ୍ ଅନମେଙ୍ ଆଡିଡ୍ କେନ୍ ଅଡ଼୍କୋନ୍ ଗିୟ୍ଲାୟ୍; ଡରମ୍ମମରନ୍ ଆନିନ୍ ଆ ଡରମ୍ମଲୋଙନ୍ ରବୁତେ, ଆରି ପେଲ୍ଲାମରନ୍ ଆନିନ୍ ଆ ପରାନ୍ସାତ୍ତିନ୍ କାବ୍ବାଡ଼ାଲୋଙନ୍ ଅଗୋୟ୍ ବର୍ସେଙ୍ ଅମେଙ୍ଲେ ଡକୋତନେ । ତିଆସନ୍ ଜବ୍ର ଡରମ୍ମମର୍ ଏଡେଡଙ୍; ଅଡ଼େ ଜବ୍ର ଗିଆନମରନ୍ ଏଡେଡଙ୍; ଆମନ୍ ଇନିଆସନ୍ ଅବ୍ସେଡ୍ଡମ୍ତନ୍ ? ଆରି ଜବ୍ର ପେଲ୍ଲାମର୍ ଏଡେଡଙ୍, ଅଡ଼େ ଉଲ୍ଲୁମର୍ ଏଡେଡଙ୍; ଡିନ୍ନାନ୍ ଅନ୍ରଙ୍ଅଡ଼ୋଆଞନ୍ ଆମ୍ମୁଙ୍ ଇନିବା ରବ୍ବୁଅମ୍ ? ଆମନ୍ କେନ୍ଆତେ ଞମ୍ଲେ ଡକୋନା, ଡ ଆମଙନ୍ ସିଲଡ୍ ଅସିନ୍ ତବ୍ଲେ ଅପାଙ୍ଲଡେନ୍ ଆମନ୍ ଆସନ୍ ମନଙ୍; ଇନିଆସନ୍ଗାମେଣ୍ତେନ୍ ଇସ୍ୱରନ୍ଆଡଙ୍ ଆବ୍ରତଙ୍ତେନ୍ ଆମନ୍ରା ଜିନୟ୍ତେ । ଗଡ଼ାଲୋଙ୍ ଦସ ସାସନମରଞ୍ଜି ସିଲଡ୍ ଅବୟ ଗିଆନମରନ୍ଆଡଙ୍ ଗିଆନ୍ ଅଗୋୟ୍ ଆବୋର୍ସାନ୍ ଅନ୍ତମ୍ । ଆଙ୍ଗିୟ୍ ଇର୍ସେନ୍ ଏର୍ଲନୁମନ୍ ମନଙ୍ କାବ୍ବାଡ଼ାନ୍ ଆର୍ଲୁମ୍ତେନ୍ ଅବୟ ଡରମ୍ମମରନ୍ ପୁର୍ତିଲୋଙନ୍ ଆନ୍ନିଙ୍ ଅବୟ୍ତଡ୍ । ମନ୍ରାଞ୍ଜି ଆବର୍ତଞ୍ଜି ଅଡ଼୍କୋନ୍ ଆବର୍ନେଲୋଙ୍ ଆମନ୍ ଡାଲୁଡ୍ଲେ ଅମ୍ଡଙ୍ଡଙ୍; ଓଡେନ୍ନଙ୍ କମ୍ୱାରିନମ୍ ଆମନ୍ଆଡଙ୍ ଆ ସରୟ୍ପତମନ୍ ଆଡିଡ୍ ଆମନ୍ ଅମ୍ଡଙ୍ତେ; ଇନିଆସନ୍ଗାମେଣ୍ତେନ୍ ଆମନ୍ ଆନ୍ନାମରଜିଆଡଙ୍ ନମିନ୍ନମି ସୟ୍ପଏଞ୍ଜି । ଗିଆନଞେନ୍ବାତ୍ତେ କେନ୍ ଅଡ଼୍କୋନ୍ ଅଲ୍ଲେ ଗିୟ୍ଲାୟ୍ । ଆରି ଞେନ୍ ବର୍ରନାୟ୍, “ଞେନ୍ ଗିଆନରମ୍ ଡେତିଁୟ୍,” ବନ୍ଡ କେନ୍ଆତେ ଅମଙ୍ଞେନ୍ ସିଲଡ୍ ସଙାୟ୍ ଡକୋଏନ୍ । ଇନିଜି ଡକୋ, ତିଆତେ ସଙାୟ୍ ଡକୋ ଆରି ଜବ୍ର ଜରୁ; ତିଆତେ ଆନା ଞାଙ୍ଲେ ରପ୍ତିଏ ? ବନ୍ଡ ଗିଆନନ୍ ଅଡ଼୍କୋନ୍ ଆଜନନା ଆସନ୍ ଉଗର୍ଡମ୍ଞେନ୍ ଡ ଅନପ୍ପୁଙ୍ ବର୍ନେଞେଞ୍ଜି ଆଞନାଙ୍ ଆସନ୍ ଞେନ୍ ସୋରୋପ୍ପାୟ୍ଡମ୍ଲନାୟ୍ । ଡ ଉଲ୍ଲୁନ୍, ପେଲ୍ଲାନ୍, ଡ ଉଲ୍ଲୁନ୍ ଆବନାଁୟ୍ ଞେନ୍ ଆଜନନା ସାୟ୍ଲାୟ୍ । ଆରି, ଞେନ୍ ଗିୟ୍ଲାୟ୍ ଡ, ଅଙ୍ଗା ଆଇବୟ୍ ଆ ଉଗ୍ଗରନ୍ ଡାତୁଲନ୍ ଡ ଜାଲନ୍ ଅନ୍ତମ୍ ଡ ଆନିନ୍ ଆସିଞ୍ଜି ଆଜନିବାଡ୍ ଅନ୍ତମ୍, ଆନିନ୍ ରନବୁନ୍ ଆପାଲ୍ତେଙ୍ ଗୋଗୋୟ୍ ଅସାଙ୍ଡମ୍; ଅଙ୍ଗା ଆମନ୍ରା ଇସ୍ୱରନ୍ଆଡଙ୍ ଅବ୍ସର୍ଡାତେ ତି ଆଇବୟ୍ ସିଲଡ୍ ଅନୁରନ୍ ଞାଙ୍ତେ, ବନ୍ଡ ଆନିନ୍ ଇର୍ସେମରନ୍ଆଡଙ୍ ଞମ୍ତେ । ଗିୟ୍ବା, ଞନଙ୍ଞଙ୍ବରନ୍ ବର୍ତନେ, ଅବୟ ଆବିସୟ୍ ଆଜନନା ଆସନ୍ ଆରି ଅବୟ ବର୍ନେନ୍ ବାତ୍ତେ ଅବ୍ଜଙ୍ଲାୟ୍ ବନ୍ଡ ତିଆତେ ମା ଞେନ୍ ଞାଙ୍ଲାୟ୍ । ପରାନ୍ନାଞେନ୍ ନମିଆନ୍ତାନ୍ ଜନାଲଙଞ୍ଜି ସାୟ୍ତେ, ବନ୍ଡ ଞେନ୍ ତିଆତେ ଅନ୍ରଙ୍ଞାଙାୟ୍; ବଅଜାରଲୋଙ୍ ବମନ୍ରାଆଡଙ୍ ରବାଙ୍ଲାୟ୍, ବନ୍ଡ ତି ଅଡ଼୍କୋନ୍ ଆଇବୟ୍ଜି ସିଲଡ୍ ଅବୟ ଆଇବଜନ୍ ଅନ୍ରଙ୍ଞାଙାୟ୍ । ଗିୟ୍ବା, ତି ଆତେତୁମ୍ ଞେନ୍ ଞାଙ୍ଲାୟ୍ ଇସ୍ୱରନ୍ ମନ୍ରାନ୍ଆଡଙ୍ ଲଗଡ୍ ଅମ୍ମେଲେ ତୁବେନ୍; ବନ୍ଡ ଆନିଞ୍ଜି ଅଗୋୟ୍ ଜନବନ୍ ତୁବ୍ଲେ ସାୟ୍ଡଙେଞ୍ଜି ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.