Juray Soura Bible
ଞନଙ୍ଞଙ୍ବର୍ 12
ଆରି, ବନେଣ୍ଡିଆବେନ୍ ଆଡିଡ୍ ଗନଡ଼େମର୍ବେନ୍ଆଡଙ୍ ମନ୍ନେବା; ମିୟ୍ନୁମଞ୍ଜି ଅନ୍ରଙ୍ ଅଡ଼ୁଆଞନ୍ ଆମ୍ମୁଙ୍ ତି ଅଡ଼୍କୋଲୋଙ୍ ଞେନ୍ଆଡଙ୍ ଅବ୍ସର୍ଡାୟ୍ଁ ଗାମ୍ଲେ ଆମନ୍ ଅନ୍ରଙ୍ ବର୍ନେନ୍ ଆମ୍ମୁଙ୍, ଆମନ୍ ବନେଣ୍ତିଆଇଙ୍ନମ୍ ଆଡିନ୍ନାଲୋଙ୍ ଗନଡ଼େମର୍ନମ୍ଆଡଙ୍ ମନେଆ । ତିଆଡିନ୍ନା ଓୟୋଙନ୍, ଆଙ୍ଗାଜନ୍ ଡ ତୁତୁଜଞ୍ଜି ଆତନରାଡ୍ ଅନ୍ରଙ୍ ପଞିଡେନ୍ ଆମ୍ମୁଙ୍ ଆରି ତରୁବନ୍ ଆତିକି ଆରିବତର ମେଗତେ; ତି ଆଡିନ୍ନା ଅସିଂଙନ୍ ଆ ଡନୋବ୍ମର୍ଜି ତକର୍ତଜି ଆରି ବପ୍ପୁମରନ୍ ଆମନକୁନ୍ ଅବ୍ସନ୍ନାତଞ୍ଜି ଆରି ରିଡିଁୟ୍ବଜନ୍ ଅସୋଜେନ୍ ତିଆସନ୍ ଆନିଞ୍ଜି ଅଃକାବ୍ବାଡ଼ାନେଜି, ଆରି ଜର୍କାଗଡ୍ ଆଗରିୟ୍ତେଞ୍ଜି ଆମନ୍ରାଜି ଲୋଙଡ୍ଡାୟ୍ତେ; ଡ ତଙର୍ଲୋଙନ୍ ଆ ସନଙ୍ଜି ଅନିଙଡନ୍ ଡେତେ, ତି ଆଡିଡ୍ ରନିଡରନ୍ ଆସନଡ୍ଡା ଅସୋୟ୍ ଅନମ୍ଡଙନ୍ ଡେତେ, ଆରି ଅନ୍ତିଡନ୍ ଆସନଡ୍ଡା ବାତ୍ତେ ମନ୍ରାନ୍ ମଡ଼େତେ ଆରି ଡେବ୍ଡିଙ୍ ଡାଙ୍ଗଡ଼ିଞ୍ଜି ଆଡନେବ୍ ଅଲିସା ସଡ୍ଡାତେ; ଆରି, ଆନିଞ୍ଜି ତୋଣ୍ତୋ ଡରକୋନେଞ୍ଜି ଆସନ୍ ଡ ତଙର୍ଲୋଙନ୍ ତନଙଡନ୍ ଡେତଜି; ଆରି, ସେର୍ସନାନ୍ ଆନୁବ୍ ତାର୍ବାତେ ଡ ପପ୍ପରନ୍ ଆ ଲଗିନନ୍ ସିଲଡ୍ ଗୋଗୋୟ୍ ଲଗିନ୍ତେ ଆରି ଆଇସ୍ସୁମ୍ଡମନ୍ ଆ କାବ୍ବାଡ଼ାଜି ଅସୋୟ୍ତେ; ଇନିଆସନ୍ଗାମେଣ୍ତେନ୍ ମନ୍ରାନ୍ ଆଏଡ଼ର୍ ଆ ଡରକୋନେବାନ୍1 ଜିର୍ତେ ଡ ୟେୟେଡାମରଞ୍ଜି ତଙର୍ଲୋଙନ୍ ବୁଲ୍ଲେତଜି; ତି ଆଡିଡ୍ ରୁପା ମାଡ଼ିନ୍ ବଲାୟ୍ଲେ ଡୟ୍ଡୟ୍ତନେ, ସୁନାସିମନ୍ ପଲାଙ୍ତେ, ଲବସିମନ୍ ଆପନ୍ନେଡାବାନ୍ ରଡ଼ିଗୁଣ୍ତା ଡେତେ ଡ କୁଆଲୋଙନ୍ ଆ ଅରଟ ପଲାଙ୍ତେ; ଆରି, ଡଅଙ୍ଲେଞ୍ଜି ପୁର୍ତିନ୍ ଆ ଉମ୍ରିଲଲୋଙ୍ ମାୟ୍ତନେ, ଆରି ପୁରାଡ଼ାତିୟ୍ ଇସ୍ୱରନ୍ ଆମଙ୍ବା ପୁରାଡ଼ାନ୍ ୟର୍ତନେ । ଞନଙ୍ଞଙ୍ବରନ୍ ବର୍ତନେ, କାଜାନ୍ ଆ କାଜାନ୍, ତି ଅଡ଼୍କୋନ୍ କାଜାନ୍ ।
ଆନଞିଡ୍ ବରନ୍
ବନ୍ଡ ଞନଙ୍ଞଙ୍ମରନ୍ ଗିଆନମରନ୍ ଆଡ୍ରକୋଏନ୍ ଆସନ୍ ଆନିନ୍ ମନ୍ରାଞ୍ଜିଆଡଙ୍ ଆଏଡ଼ର୍ ଗିଆନ ଞନଙନ୍ ତିୟେନ୍; ଆରି, ଆନିନ୍ ଇୟମ୍ଲେ ଡ ସାୟ୍ଡଙ୍ଲେ ଜବ୍ର ମନଙ୍ ଞନଙ୍ବରନ୍ ଡାଡ଼ିଲେ ଡକୋଏନ୍ । ଞନଙ୍ଞଙ୍ମରନ୍ ଆବର୍ନେ ମନଅଁୟ୍ଡାନ୍ ଆରି ଲଗଡ୍ ଉଗରନ୍ ଅନ୍ତମ୍ ଗିୟ୍ତାଏନ୍, ତି ଆଜାଡ଼ି ବର୍ନେନ୍ ଆଞନାଙ୍ ଆସନ୍ ସାୟ୍ଡଙେନ୍ । ଗିଆନମରନ୍ ଆବର୍ନେ ଅଡ଼୍କୋନ୍ ସୁଜେର୍ଡାଙନ୍ ଅନ୍ତମ୍ ଆରି ସୋଡ଼ାମର୍ରଞ୍ଜି ଆବର୍ନେ ରଡୋ ଲଆଙ୍ ଅବ୍ବାନ୍ ଅନ୍ତମ୍, ତି ଅଡ଼୍କୋନ୍ ଅବୟ ତନୁର୍ତୁର୍ମରନ୍ ବାତ୍ତେ ତନିୟନ୍ ଡେଏନ୍ । ଆରି, ଏ ଡାଙ୍ଗଡ଼ାଅଞେନ୍, ଆମନ୍ ଞନଙ୍ବରନ୍ ଅମ୍ଡଙ୍ଗା; ଗୋଗୋୟ୍ଡମ୍ ବଇନ୍ ଆନିଡ୍ ଡକୋ; କେନ୍ଆତେ ଅନ୍ରଙ୍ ଅଞିଡେ; ଆରି, ଅଗୋୟ୍ ପଡ଼େନେନ୍ ଡଅଙନ୍ ଆସନ୍ ମଙ୍ଗାଡମ୍ । ଆନଞିଡ୍ବର୍ କେନ୍; ଅଡ଼୍କୋନ୍ ଅନମ୍ଡଙନ୍ ଡେଏନ୍; ଇସ୍ୱରନ୍ଆଡଙ୍ ବତଙା ଆରି ଆବନାଁୟ୍ବରନ୍ ଅଡ଼୍କୋନ୍ ମାନ୍ନେଆ; ଇନିଆସନ୍ଗାମେଣ୍ତେନ୍ କେନ୍ ମା ମନ୍ରାନ୍ ଆବରିୟ୍ କାବ୍ବାଡ଼ାନ୍ । ଇନିଆସନ୍ଗାମେଣ୍ତେନ୍ ଇସ୍ୱରନ୍ ଅଡ଼୍କୋନ୍ ଆକାବ୍ବାଡ଼ା, ଆରି ମନଙ୍ ଅଡ଼େ ମନଙତଡ୍ ଅଡ଼୍କୋ ଆସସ ବରଞ୍ଜି ଆସନ୍ ଅପସୁଆତିତେ ।
Source notes (1)
- Footnote ଆଗରାମ୍ଗାମ୍ ରନବ୍ବୁ ଡରକୋନେବାନ୍
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.