Juray Soura Bible
ଞନଙ୍ଞଙ୍ବର୍ 10
ଏଙ୍ଗାଲେ ଆରବୁ ଅରୟନ୍ କାନ୍ସନ୍ ଆବରିୟ୍ ଲଙିଡ୍ ମିଞଲନ୍ ଅବ୍ସଅତେ; ତିଅନ୍ତମ୍ ଅସୋୟ୍ ଉଲ୍ଲୁନ୍ ଗିଆନନ୍ ଡ ପନେମେଙନ୍ ଅବ୍ଗୁରୁଡ୍ଡେତେ । ଗିଆନମରନ୍ ଆ ଉଗର୍ ମନଙ୍ ତଙର୍ଗଡ୍ ଜିର୍ତେ; ବନ୍ଡ ଉଲ୍ଲୁନ୍ ଆ ଉଗର୍ ଆ ମନଙ୍ତଡନ୍ ଆତଙର୍ଗଡ୍ ଜିର୍ତେ । ଆରି, ଉଲ୍ଲୁମରନ୍ ତଙର୍ଲୋଙନ୍ ଆତ୍ରଙିୟ୍ତନ୍ ଆଡିଡ୍ ଆ ବୁଡ୍ଡିନ୍ ଅବାବ ଗିୟ୍ତାତେ, ଆରି ଆନିନ୍ ଡିଲେ ମନ୍ରାନ୍ଆଡଙ୍ ବର୍ତେ ଡ, ଆନିନ୍ ଉଲ୍ଲୁ । ଅସମୟ୍ଁ ରାଜ୍ୟପାଡ଼ନ୍ ଆମନ୍ଆଡଙ୍ ବରାବେନ୍ ଡେନ୍ ଆମନ୍ ଆଲନୁମନ୍ ଅମ୍ରେଙ୍ଡଙ୍, ଆମନ୍ ଅବ୍ସନ୍ନାଲନ୍ଡେନ୍ ସୋଡ଼ା ଇର୍ସେନ୍ କେମା ଡେତେ । ଓୟୋଙନ୍ ଆଜାୟ୍ତା ଞେନ୍ ଅବୟ୍ ପରାନ୍ସାତ୍ତିନ୍ ଆବିସୟ ଗିୟ୍ଲାୟ୍, ତିଆତେ ରାଜ୍ୟପାଡ଼ନ୍ ସିଲଡ୍ ସରିଡ୍ସିଡ୍ବର୍ ଅନ୍ତମ୍ ଗିୟ୍ତାତେ; ଉଲ୍ଲୁମରଞ୍ଜିଆଡଙ୍ ସୋଡ଼ା ଅଦିକାରନ୍ ତନିୟନ୍ ଡେତଜି, ଆରି ଗମାଙ୍ମରଞ୍ଜିଆଡଙ୍ ଜାୟ୍ତାନ୍ ଡରକୋନେନ୍ ତନିୟନ୍ ଡେତେ । ଞେନ୍ ଗିୟ୍ଲାୟ୍ ଡ କମ୍ୱାରିମରଞ୍ଜି କୁର୍ତାଲୋଙନ୍ ତଙ୍କୁମ୍ଲେ ଜିର୍ତଜି, ଆରି ସୋଡ଼ାଗଡ୍ମରଞ୍ଜି କମ୍ୱାରିମରଞ୍ଜି ଅନ୍ତମ୍ ତଙିୟ୍ଲନ୍ ଜିର୍ତଜି । ଆନା ଲୋଓଙନ୍ ଗାୟ୍ତେ, ଆନିନ୍ ତି ଆ ଲୋଓଙ୍ଲୋଙ୍ ଗଲୋତେ ଆରି ଅଙ୍ଗା ଆମନ୍ରା ବନୁମନ୍ ଗାୟ୍ତେ, ଆନିନ୍ଆଡଙ୍ ଜାଆଡନ୍ ଡୋଲ୍ତେ । ଅଙ୍ଗା ଆମନ୍ରା ଅରେଙନ୍ ସମ୍ନ୍ତେ ଆନିନ୍ ତି ବାତ୍ତେ ପାରାତେ; ଆରି, ଅଙ୍ଗା ଆମନ୍ରା ଅଙ୍ଲନ୍ ପାଲ୍ତେ ଆନିନ୍ ତି ବାତ୍ତେ ପାରାତେ । ଏଞ୍ଜୁମନ୍ ମୁତୁକୁଏନ୍ ଡେନ୍ ଆରି ମନ୍ରାନ୍ ତିଆତେ ଅନ୍ନାଗାଡ୍ଲଡେନ୍, ତିଆତେ ଆଞନମ୍ରମ୍ ଆସନ୍ ଅଗୋୟ୍ ବପ୍ପୁନ୍ ସନାୟ୍ସାୟ୍; ବନ୍ଡ କାବ୍ବାଡ଼ାନ୍ ଆଲନୁମ୍ ଆସନ୍ ଅବାମୁଙ୍ ଗିଆନନ୍ ସନାୟ୍ସାୟ୍ । ତନେୟ୍ମରନ୍ ଆବର୍ନେ ବାତ୍ତେ ଅନ୍ରଙ୍ ମଗାଡେନ୍ ଆମ୍ମୁଙ୍ ଆନିନ୍ଆଡଙ୍ ଜାଆଡନ୍ ଡୋଲେନ୍ଡେନ୍, ତି ତନେୟ୍ମରନ୍ ଇନ୍ନିଙ୍ ଲାବତଡ୍ । ଗିଆନମରନ୍ ଆମୁକ୍କା ଆବର୍ନେ ସନାୟୁମ୍ଡମ୍; ବନ୍ଡ ଉଲ୍ଲୁମରନ୍ ଆମୁକ୍କାନ୍ ଆବର୍ନେ ବାତ୍ତେ ଆନିନ୍ଆଡଙ୍ ଅବ୍ସେଡ୍ତନେ । ଆନିନ୍ ଆ ତଅଡନ୍ ଆବର୍ନେ ଅନ୍ରଙ୍ ବର୍ନେନ୍ ଆମ୍ମୁଙ୍ ଆନୁଲ୍ଲୁନ୍ ମା ଆରି ଆନଞିଡ୍ବରନ୍ ଆବନାୟାନ୍ ମା । ଉଲ୍ଲୁମରନ୍ ଅଗୋୟ୍ ବର୍ନେନ୍ ବର୍ତନେ; ଡେଲୋଜନଙ୍ଡେନ୍ ଇନି ତିକ୍କି ଡେତେ ତିଆତେ ମନ୍ରାନ୍ ଅଜ୍ଜନାଏ, ଆରି, ଆକୁନ୍ଡୋଙ୍ବାନ୍ ଇନି ଆତନଙଡ୍ ଡେତେ, ଆନ୍ନିଙ୍ ଆନିନ୍ଆଡଙ୍ ଅବ୍ଜନାଲେ ଅରପ୍ତିଏ ? ଡିଲେ ଉଲ୍ଲୁମରନ୍ ଆକାବ୍ବାଡ଼ା ଆନିନ୍ଆଡଙ୍ ଅମଙ୍ଗାତେ, ତିଆସନ୍ ଆନିନ୍ ଆ ଗଡ଼ାବାନ୍ ଆଜନିର୍ ତଙର୍ ଅମଡ୍ନ୍ନେ । ଏ ଡେସା, ରାଜାନମ୍ ପସିୟ୍ ଡେଏଡେନ୍ ଆରି ସୋଡ଼ାମର୍ନମ୍ଜି ଡୋତାନ୍ ଗାଗାତଞ୍ଜି, ଏତ୍ତେଲ୍ଡେନ୍ ଆମନ୍ ଆସନ୍ ୟୋଙ୍ ବରନ୍ତଙନ୍ । ଏ ଡେସା, ରାଜା କେଜ୍ଜା ଅନନ୍ ସିଲଡ୍ ରାଜାନ୍ ଡେଏନଙ୍ ଆରି ସୋଡ଼ାମର୍ନମ୍ଜି ବନ୍ନୁଲନ୍ ଆସନ୍ ତଡ୍, ବନ୍ଡ ବପ୍ପୁନ୍ ଆସନ୍ ଗାଗାତଞ୍ଜି, ଏତେଲ୍ଡେନ୍ ଆମନ୍ ସନେନ୍ସେନ୍ ! ଆଡ଼ସାଲୋଙନ୍ ବିଲେଙନ୍ ଲଡୁବ୍ତେ, ଆରି ଲମନ୍ସିନ୍ ବାତ୍ତେ ଅସିଂଙନ୍ ଡାଆନ୍ ପେତେ । ବୁଜିନ୍ କନିଜନ୍ ଆସନ୍ ଅନବ୍ଜାଡାନ୍ ଡେତେ, ଆରି ଦ୍ରାକ୍ୟାଡାନ୍ ଅନମେଙନ୍ ଅବ୍ସର୍ଡାତେ; ବନ୍ଡ ଆରନ୍ନା ବାତ୍ତେ ଅଡ଼୍କୋନ୍ ଡେତେ । ଆମନ୍ ରାଜାନ୍ଆଡଙ୍ ମନ୍ନେ ମନ୍ନେ ସୟ୍ପଡଙେ; ଆରି, ଗମାଙ୍ମରନ୍ଆଡଙ୍ ଆ ଲରୁଡ୍ଲୁଡ୍ ଅସିଂଙ୍ନମ୍ ସିଲଡ୍ ସୟ୍ପଡଙେ; ଇନିଆସନ୍ଗାମେଣ୍ତେନ୍ ଆମନ୍ ଇନି ବର୍ରନେ ତିଆତେ ଅନ୍ତିଡନ୍ ପାଙ୍ଲେ ଆନିନ୍ଆଡଙ୍ ଅବ୍ଜନାତେ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.