Juray Soura Bible
ଞନଙ୍ଞଙ୍ବର୍ 1
ଅଡ଼୍କୋନ୍ କାଜାନ୍
ଞନଙ୍ଞଙ୍ମର୍, ଦାଉଦନ୍ ଆ ଡାଙ୍ଗଡ଼ାଅନ୍, ଜିରୁସାଲମନ୍ ଆ ରାଜା, ଆ ମନଙ୍ ଞନଙ୍ତିୟ୍ବରଞ୍ଜି କେନ୍ । ଞନଙ୍ଞଙ୍ମରନ୍ ବର୍ତନେ, “କାଜାନ୍ କାଜାନ୍, କାଜାନ୍ କାଜାନ୍, ଅଡ଼୍କୋନ୍ ମା କାଜାନ୍ ।” ଓୟୋଙନ୍ ଆଜାୟ୍ତା ମନ୍ରାନ୍ ଅଙ୍ଗା ଅଡ଼୍କୋନ୍ ଆ କାବ୍ବାଡ଼ାଲୋଙ୍ ମଙ୍ଗାତେ ତି ଅଡ଼୍କୋନ୍ ଇନ୍ନିଙ୍ ଲାବତଡ୍ ? ଅର୍ସଣ୍ତୋଙ୍କୋଡଞ୍ଜି ଜିର୍ତେ ଆରି ଆନ୍ନା ଅର୍ସଣ୍ତୋଙ୍କୋଡଞ୍ଜି ଜିର୍ତାୟ୍; ବନ୍ଡ ପୁର୍ତିନ୍ ଆଏଡ଼ଅର୍ ଡକୋତେ । ଆରି ଓୟୋଙନ୍ ଡୁଙ୍ତନାୟ୍ ଆରି ଓୟୋଙନ୍ ବୁବ୍ୟୋଙ୍ତେ, ବନ୍ଡ ଅଙ୍ଗାଗଡ୍ ଡୁଙ୍ୟୋଙ୍ତେ ତିଗଡ୍ ମା ଆରି ଲଜିର୍ ୟର୍ତନେ । ରିଙ୍ଗେନ୍ ଅର୍ଜଡ଼ୋମ୍ସିଗଡ୍ ଜିର୍ତେ ଆରି ଅର୍କାବଡ଼ିଗଡ୍ ୟର୍ତନାୟ୍; ତିଆତେ ଆଏଡ଼ର ପୁବ୍ୟୁର୍ତନେ ଆରି ତେତ୍ତେ ମା ୟର୍ତନାୟ୍ । ଅଡ଼୍କୋନ୍ ଆଲଡା ସମେଁୟ୍ଣ୍ତ୍ରାବାନ୍ ପେଲେ ଜିର୍ତଜି, ଡେଲୋଜନଙ୍ଡେନ୍ ସମେଁୟ୍ଣ୍ଡ୍ରାନ୍ ଅବରିଜେ; ଅଲଞ୍ଜି ଅଡ଼୍କୋନ୍ ରମ୍ମଙ୍ ରମ୍ମଙ୍ ଆପନ୍ନେ ଡରକୋନେଗଡ୍ ଆରି ୟର୍ତନାୟ୍ଜି । ଅଡ଼୍କୋ ଆକାବ୍ବାଡ଼ା ଲୁମ୍ଲେ ମଙ୍ଗାତଜି; ତିଆତେ ମନ୍ରାନ୍ ବର୍ରନ୍ ଅରପ୍ତିଏ; ଅମଡନ୍ ଆ ଗନିୟ୍ଗିୟ୍ ବାତ୍ତେ ଆଙ୍ଗିୟ୍ଜା ଅସୟୁମେ, ଅଡ଼େ ଅଲୁଡନ୍ ଆନମ୍ଡଙ୍ ବାତ୍ତେ ଆଙ୍ଗିୟ୍ଜା ଅସୟୁମେ । ଆରି ଅଙ୍ଗାଆତେ ଡେଏନ୍ ତିମା ଆତେ ଡେତେ; ଅଙ୍ଗା ଆକାବ୍ବାଡ଼ା ଲନୁମନ୍ ଡେଏନ୍, ତିମା ଆକାବ୍ବାଡ଼ା ଆରିବତର ଲନୁମନ୍ ଡେତେ, ଆରି ଓୟୋଙନ୍ ଆଜାୟ୍ତା ଇନ୍ନିଙ୍ ରଙ୍ ଆବିସୟ୍ ତଡ୍ । ଅଙ୍ଗା ଆବିସୟ୍ ମନ୍ରାଞ୍ଜି ବର୍ତଞ୍ଜି, ଗିୟ୍ବା, କେନ୍ଆତେ ରଙ୍ ଗନଡେଲ୍, କେନ୍ଆତେ ଅନ୍ତମ୍ ଇନ୍ନିଙ୍ ଆବିସୟ୍ ଡକୋପଙ୍ ? ତିଆତେ ତ ପୁର୍ବାନ୍ ଆଡିଡ୍ ମା ଡକୋଏନ୍ । ପୁର୍ବାନ୍ ଆମନ୍ରାଜି ଆବର୍ନେ ଇନ୍ନିଙ୍ ମନେନ୍ ଅଡ୍କୋଏ; ଅଡ଼େ ପୁର୍ବାଃତେ ଅଙ୍ଗା ଆମନ୍ରାଜି କନୋଡନ୍ ଡେତଜି, ଆରି ତିକ୍କି କନୋଡନ୍ ଆଡ୍ରେତେଞ୍ଜି ଆମନ୍ରାଜି ଆମଙ୍ଲୋଙ୍ ଇନି ଆତନଙଡ୍ ଡେତେ ତିଆତେ ମନନ୍ନେନ୍ ଅଡ୍ଏ ।
ଗିଆନନ୍ କାଜାନ୍
ଞେନ୍ ଞନଙ୍ତିୟ୍ମର୍, ଜିରୁସାଲମ୍ଲୋଙ୍ ଇସ୍ରାଏଲନ୍ ଆତୋଣ୍ତୋ ରାଜାନ୍ ଡକୋଲିଁୟ୍ । ରୁଆଙନ୍ ଆଜାୟ୍ତା ଅଡ଼୍କୋନ୍ ଆଲନୁମ୍ଜି ଆସନ୍ ଞେନ୍ଡମନ୍ ଆ ଗିଆନ୍ ବାତ୍ତେ ଅଲ୍ଲେ ଆସନାୟ୍ ଆସନ୍ ଗବ୍ରିଜିଲନାୟ୍; ଇସ୍ୱରନ୍ ମନ୍ରାଅନଞ୍ଜିଆଡଙ୍ ବିଜାର ଅବ୍ମେତେ, କେନ୍ଆତେ ପରାନ୍ଡଣ୍ଡନ୍ । ଓୟୋଙନ୍ ଆଜାୟ୍ତା ଆଡ୍ରେତେନ୍ ଅଡ଼୍କୋନ୍ ଆ କାବ୍ବାଡ଼ାଜି ଞେନ୍ ଗିୟ୍ଲାୟ୍; ଆରି ଗିୟ୍ବା, ତି ଅଡ଼୍କୋନ୍ ଏର୍ମନଙ୍, କେନ୍ଆତେ ରିଙ୍ଗେନ୍ ଗଙ୍ଲେ ଆ ଞରମ୍ତବନ୍ ଅନ୍ତମ୍ । ଅଙ୍ଗାଆତେ ଆବାଙ୍କଡ଼ୋ, ତିଆତେ ବିଙୟ୍ଲେ ଅରପ୍ତିନେ, ଆରି, ଅଙ୍ଗାତେ ଅବୟ୍ତଡ୍ ତିଆତେ ଆମନ୍ ଡିଡିଲେ ଅରପ୍ତିଏ । ଉଗ୍ଗର୍ଲୋଙ୍ଞେନ୍ ଇୟମ୍ଲେ ବର୍ରନାୟ୍, “ଗିୟ୍ବା, ଞେନ୍ ଅବୟ୍ ସୋଡ଼ାମର୍ ଡେଲିଁୟ୍, ଆନାଜି ଞେନ୍ ସିଲଡ୍ ଆମ୍ମୁଙ୍ ଜିରୁସାଲମନ୍ ସଡ଼ାୟେଞ୍ଜି ଆନିଞ୍ଜି ସିଲଡ୍ ଞେନ୍ ଅଗୋୟ୍ ଗିଆନମରନ୍ ଡକୋଲିଁୟ୍; ଓଓ ଇନି ଆ ପଡ଼େନେ ଡ ଆ ଗିଆନ ଡକୋ ତିଆତେ ଞେନ୍ ଜନା ।” ସିଲଡ୍ତ୍ତେ ଗିଆନନ୍ ଡ ବନାୟାନ୍, ବୁଡ୍ଡିନ୍ ଡ ଏର୍ବନୁଡ୍ଡିନ୍ ଆ ଜରୁବର୍ ଆଜନନା ଆସନ୍ ଡାଲୁଡ୍ଲେ ଅମ୍ଡଙ୍ଲାୟ୍; କେନ୍ ମା ଆତେ ରିଙ୍ଗେନ୍ ଆ ସନଣ୍ତୋଙ୍ ଗାମ୍ଲେ ଜନାଲିଁୟ୍ । ଇନିଆସନ୍ଗାମେଣ୍ତେନ୍ ଅଗୋୟ୍ ଗିଆନଲୋଙନ୍ ଅଗୋୟ୍ ଡଣ୍ତନ୍ ଡକୋ; ଆରି, ଆନା ପଡ଼େନେନ୍ ଅବ୍ଗୋଗୋୟ୍ତେ, ଆନିନ୍ ଡୁକ୍କନ୍ ଅବ୍ଗୋଗୋୟ୍ତେ ।
Juray Soura Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.