Biblica® Libre Ang Pulong Sang Dios
Salmo 82
Ang Dios Labaw sa Tanan nga Manugdumala
Ang kanta nga ginsulat ni Asaf.
Ginapanguluhan sang Dios ang pagtilipon sang mga dios1
kag ginahukman niya sila.
Siling niya, “Hasta san-o pa bala kamo maghukom sang indi matarong?
Hasta san-o pa bala ninyo paboran ang mga malain?2
Hatagi ninyo sang hustisya ang mga wala sing ikasarang kag mga ilo.
Depensahi ninyo ang kinamatarong sang ginadaogdaog nga mga kubos.
Luwasa ang mga wala sing ikasarang kag ang mga imol sa gahom sang malain nga mga tawo!
“Wala kamo sing inalung-ong!
Wala kamo sing naintiendihan!
Nagakabuhi kamo sa kadulom, amo gani nga wala na sing kahusayan sa kalibutan.3
Ako, ang Labing Mataas nga Dios, nagsiling sa inyo nga mga dios kamo
kag tanan kamo mga anak ko.
Pero mapatay kamo pareho sa tawo.
Madula ang inyo kabuhi pareho sa bisan sin-o nga pangulo sa kalibutan.”
Sige na, O Dios, hukmi ang tanan nga nasyon sa kalibutan, kay imo sila.
Source notes (3)
- Footnote mga dios: Posible mga langitnon nga mga tinuga, ukon mga dios sang mga nasyon, ukon mga manugdumala sa kalibutan.
- Footnote Sa Hebreo may sugpon pa nga “sela,” nga indi klaro ang buot silingon.
- Footnote wala na…kalibutan: sa literal, nagatay-og ang tanan nga pundasyon sang kalibutan
Biblica® Libre Ang Pulong Sang Dios. Copyright © 1996, 2006, 2011, 2022 Biblica, Inc. Licensed under CC BY-SA 4.0. Ang “Biblica”, kag ang Biblica logo mga trademark nga ginrehistro sang Biblica, Inc sa United States Patent and Trademark Office. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.