Biblica® Libre Ang Pulong Sang Dios
Salmo 130
Pagsalig sa Ginoo sa Tion sang Kalisod
Ang kanta samtang nagapasaka.
Sa puwerte nga kalisod nagapanawag ako sa imo, Ginoo.
Pamatii ang akon pagpakitluoy sa imo.
Ginoo, kon ginalista mo ang amon mga sala,
sin-o bala ang makapabilin sa imo presensya?1
Pero ginapatawad mo kami, gani ginatahod ka namon.
Nagahulat gid ako sa imo, Ginoo,
kag nagasalig ako sa imo pulong.
Nagahulat ako sa imo, Ginoo, labaw pa sa mga guwardya nga nagahulat sang kaagahon.
Mga taga-Israel, magsalig kamo sa Ginoo,
kay mahigugmaon siya kag handa permi nga magluwas.
Siya mismo ang magaluwas sa inyo sa tanan ninyo nga mga sala.
Source notes (1)
- Footnote makapabilin sa imo presensya: ukon, makapalagyo sa imo silot
Biblica® Libre Ang Pulong Sang Dios. Copyright © 1996, 2006, 2011, 2022 Biblica, Inc. Licensed under CC BY-SA 4.0. Ang “Biblica”, kag ang Biblica logo mga trademark nga ginrehistro sang Biblica, Inc sa United States Patent and Trademark Office. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.