Biblica® Libre Ang Pulong Sang Dios
Salmo 127
Pagdayaw sa Kaayo sang Dios
Ang kanta samtang nagapasaka. Ginsulat ni Solomon.
Kon wala ang bulig sang Ginoo,
wala sing pulos ang pagpatindog sang balay ukon ang pagbantay sang siyudad,
kag wala man sing pulos ang pagbugtaw sing aga pa
kag ang pagtulog sing gab-i na sa pagtrabaho para may makaon.
Kay ang Ginoo amo ang nagahatag sang mga kinahanglanon sang iya mga ginahigugma,
bisan pa nga nagakatulog sila.
Ang mga anak grasya kag regalo halin sa Ginoo.
Ang mga anak nga natawo sang bataon pa ang ila amay
pareho sang mga pana sa kamot sang isa ka soldado.1
Bulahan ang tawo nga may madamo nga anak,2
kay mabuligan siya kon mag-atubangay sila sang iya mga kaaway sa hukmanan.
Source notes (2)
- Footnote Ang buot silingon, bintaha para sa amay nga may mga kabataan siya sang bataon pa siya sang sa tigulang na siya.
- Footnote anak: sa literal, pana
Biblica® Libre Ang Pulong Sang Dios. Copyright © 1996, 2006, 2011, 2022 Biblica, Inc. Licensed under CC BY-SA 4.0. Ang “Biblica”, kag ang Biblica logo mga trademark nga ginrehistro sang Biblica, Inc sa United States Patent and Trademark Office. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.