Biblica® Libre Ang Pulong Sang Dios
Hoseas 11
Ang Gugma sang Dios para sa Israel
Nagsiling ang Ginoo, “Sang pareho pa ang Israel sa isa ka bata,1 ginhigugma ko siya. Gintawag ko siya halin sa Egypt bilang akon anak.2 Pero karon, bisan sige ang tawag ko3 sa ila nga mga taga-Israel, labi na gid gani nga nagapalayo sila sa akon.4 Nagahalad sila sang mga halad kag nagasunog sang mga insenso sa mga imahen ni Baal. Ako ang nag-atipan sa ila; daw pareho lang nga gin-uyatan ko sila5 sa kamot kag gintudluan sa paglakat, pero wala nila ginkilala nga ako ang nag-atipan6 sa ila. Gintuytuyan ko sila nga may pagpalangga pareho sang pagpalangga sang isa ka tawo sa iya nga baka. Daw pareho lang nga ginkuha ko ang gota sa ila liog kag nagduko sa pagpakaon sa ila. Pero tungod nga indi nila gusto nga magbalik sa akon, sigurado nga magabalik sila sa Egypt, kag pagadumalahan sila sang Assyria. Salakayon sang mga kaaway ang ila mga banwa kag gub-on ang mga trangka sang mga puwertahan sini. Gub-on sang ila mga kaaway ang ila mga plano. Sila nga akon katawhan desidido nga magpalayo sa akon. Gani bisan magpanawag pa sila sing tingob sa akon indi ko sila pagluwason.7
“Mga taga-Israel, indi ko mahimo nga sikwayon kamo ukon pabay-an na lang. Indi ko mahimo nga laglagon kamo sing bug-os pareho sang ginhimo ko sa mga banwa sang Adma kag Zeboyim. Indi maagwanta sang akon balatyagon nga himuon ini sa inyo. Naluoy gid ako sa inyo. Indi ko na pag-ipakita ang akon puwerte nga kaakig; indi ko na paggub-on ang Israel, kay Dios ako kag indi tawo. Ako ang Balaan nga Dios nga kaupod ninyo, kag indi ako magkadto sa inyo nga akig.
“Magasunod kamo sa akon sa tion nga magangurob ako pareho sang leon. Sigurado gid nga magangurob ako, kag magadali-dali8 kamo puli halin sa west. Magaabot kamo sing madasig9 pareho sang mga pispis nga halin sa Egypt ukon pareho sang mga pating nga halin sa Assyria. Paestaron ko kamo liwat sa inyo mga balay. Ako, ang Ginoo, ang nagasiling sini.”
Silutan ang Israel kag ang Juda
Permi lang ako ginabutigan kag ginatunto sang mga taga-Israel. Ang mga taga-Juda padayon nga nagapalayo sa Dios nga balaan kag matutom.10
Source notes (10)
- Footnote Sang pareho…bata: sa literal, Sang bata pa ang Israel. Ini ang panahon nga ara ang mga Israelinhon sa Egypt ukon sa kamingawan.
- Footnote Gintawag…anak: ukon, Gintawag ko ang akon anak halin sa Egypt.
- Footnote ko: Amo ini sa iban nga mga kopya sang Septuagint. Sa Hebreo, nila.
- Footnote akon: Amo ini sa Septuagint. Sa Hebreo, ila.
- Footnote sila: sa Hebreo, Efraim. Makita man ang pulong nga Efraim sa Hebreo sa bersikulo 8, 9 kag 12. Tan-awa ang footnote sa 4:17 .
- Footnote nag-atipan: sa literal, nag-ayo
- Footnote Indi klaro ang buot silingon sang Hebreo sa sini nga bersikulo.
- Footnote magadali-dali: ukon, magakurog
- Footnote sing madasig: ukon, nga nagakurog
- Footnote padayon…matutom: ukon, padayon nga nagasunod kag matutom sa Dios nga balaan.
Biblica® Libre Ang Pulong Sang Dios. Copyright © 1996, 2006, 2011, 2022 Biblica, Inc. Licensed under CC BY-SA 4.0. Ang “Biblica”, kag ang Biblica logo mga trademark nga ginrehistro sang Biblica, Inc sa United States Patent and Trademark Office. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.