Dagiti Salmo 92

1Nasayaat iti agyaman kenni Yahweh ken iti agkanta iti pammadayaw iti naganmo, O Kangangatoan, 2ti mangiwaragawag iti kinapudnom ti tulagmo iti agsapa ken iti kinapudnom iti rinabii, 3a mabuyogan iti arpa nga addaan iti sangapulo a kwerdas ken ti makaay-ayo nga uni ti lira. 4Ta sika O Yahweh, pinaragsaknak babaen kadagiti aramidmo. Agkantaak a sirarag-o gapu kadagiti aramid dagiti imam. 5Anian a naindaklan dagiti aramidmo, O Yahweh! Nauneg unay dagiti kapanunotam. 6Saan nga ammo ti naranggas a tao, wenno saan a maawatan ti maag daytoy: 7No agtubo ti nadangkes a kasla iti ruot, ken uray rumang-ay amin nga agar-aramid iti kinadakes, naikeddengda latta iti agnanayon a pannakadadael. 8Ngem agnanayon nga agturayka O Yahweh. 9Pudno, kitaem dagiti kabusormo, O Yahweh; naiwarawara amin dagiti agar-aramid iti kinadakes. 10Impangatom ti sarak a kas kadagiti sara iti toro a baka; napulotanak iti barbaro a lana. 11Nakitak ti pannakatnag dagiti kabusorko; nangngegko ti pannakadusa dagiti managdakdakes a kabusorko. 12Lumangto dagiti nalinteg a kas kadagiti kayo ti palma; dumakkelda a kas iti sedro ti Libano. 13Naimulada iti balay ni Yahweh; lumangtoda kadagiti paraangan ti Diostayo. 14Agbungada uray nataengandan; agtalinaedda a nalangto ken maris bulong, 15tapno maiwaragawag a nalinteg ni Yahweh. Kasla dakkel a bato a pakatalgedak, ken awan ti kinakillo kenkuana.