Dagiti Salmo 2

1Apay nga agrebelde dagiti nasion, ken agtutulag dagiti tattao iti awan serserbina? 2Agkaykaysa nga agsagana dagiti ari iti daga ken agkaykaysa dagiti mangiturturay nga agtutulag a maibusor kenni Yahweh ken iti Mesiasna, a kunada, 3“Pugsatentayo dagiti posas nga inkabilda kadatayo ken ibellengtayo dagiti kawarda.” 4Isuna a nakatugaw kadagiti langit, uyawennanto ida; lalaisen ti Apo ida. 5Ket agsao isuna kadakuada iti ungetna ken butbutngenna ida iti pungtotna, a kunana, 6Siak a mismo ti nangpulot iti arik idiay Sion, ti nasantoan a bantayko.” 7Ipakaammokto ti bilin ni Yahweh. Kinunana kaniak, “Sika ti anakko! Ita nga aldaw, nagbalinak nga amam. 8Agkiddawka kaniak, ket itedko kenka dagiti nasion a tawidmo ken dagiti kaadaywan a rehion iti daga a sanikuam. 9Burakemto ida babaen iti setro a landok; rumekemto ida a kasla banga ti agdamdamili.” 10Isu nga ita, dakayo nga ari, maballaagankayo; masuroankayo, dakayo a mangiturturay iti daga. 11Dayawenyo ni Yahweh nga addaan panagbuteng ken agrag-okayo nga addaan panagpigerger. 12Agkanyo ti anak amangan no makaungetto isuna kadakayo, ket mataykayo iti dalan inton dagus a sumged ti ungetna. Anian a nagasat dagiti amin nga agkamang kenkuana.