Dagiti Salmo 129

1“Masansan a rautendak sipud pay kinaagtutubok,” ibaga koma ti Israel. 2“Masansan a rautendak sipud pay kinaagtutubok, ngem saandak latta a naparmek. 3Nagarado iti likodak dagiti agar-arado; pinaatiddogda dagiti gulgulisda. 4Nalinteg ni Yahweh; pinutedna dagiti tali dagiti nadangkes.” 5Maibabainda koma amin ken tumallikodda, dagiti manggurgura iti Sion. 6Agbalinda koma a kasla iti ruot kadagiti tuktok ti balay a magango sakbay a dumakkel, 7a saanna a mapunno iti ima ti aggapgapas wenno ti barukong ti agrepreppet iti apit. 8Saan koma nga ibaga dagiti lumabas, “Maadda koma kadakayo ti bendision ni Yahweh; bendisionandakayo iti nagan ni Yahweh.”