Dagiti Salmo 121

1Ikitak dagiti matak kadagiti ban-bantay. Sadino ti paggapuan ti tulongko? 2Ti tulongko ket aggapu kenni Yahweh, a nangaramid iti langit ken daga. 3Saanna nga itulok a maipaglis ta sakam; saan nga agtugtuglep ti mangsalsalaknib kenka. 4Kitaem, saan a pulos nga agtugtuglep wenno matmaturog ti mangay-aywan iti Israel. 5Ni Yahweh ti mangay-aywan kenka; ni Yahweh ti salinong iti makannawanmo. 6Saannakanto a dangran ti init iti aldaw wenno ti bulan iti rabii. 7Salaknibannakanto ni Yahweh iti amin a pakadangram, ken salaknibanna ti biagmo. 8Salaknibannakanto ni Yahweh iti amin nga aramidem ita ken iti awan patinggana.