Dagiti Salmo 116

1Ay-ayatek ni Yahweh gapu ta dengdenggenna ti timekko ken dagiti panagpakpakaasik. 2Gapu ta ipangpangagnak, umawagak kenkuana iti unos ti panagbiagko. 3Pinalikmutandak dagiti tali ti patay, ken tinubngarnak ti palab-og ti sheol; nakariknaak iti sanaang ken ladingit. 4Ket immawagak iti nagan ni Yahweh: “Pangngaasim O Yahweh, ispalem ti biagko.” 5Naasi ken awan panangidumduma ni Yahweh; manangngaasi ti Diostayo. 6Salakniban ni Yahweh dagiti awan gayawna; naipababaak ket insalakannak. 7Mabalinen nga agsubli ti kararruak iti paginanaanna, ta nagimbag ni Yahweh kaniak. 8Ta inispalmo ti biagko manipud iti patay, dagiti matak manipud kadagiti lulua, ken dagiti sakak manipud iti pannakaitublak. 9Agserbiak kenni Yahweh iti daga dagiti sibibiag. 10Namatiak kenkuana, uray idi imbagak “Kasta unay ti panagsagabak.” 11Dagusko nga imbaga, “Ulbod dagiti amin a tattao.” 12Kasano a masubadak ni Yahweh kadagiti amin a kinaimbagna kaniak? 13Itag-aykonto ti kopa ti pannakaisalakan, ken umawagak iti nagan ni Yahweh. 14Tungpalekto dagiti sapatak kenni Yahweh iti imatang dagiti amin a tattaona. 15Napateg iti imatang ni Yahweh ti ipapatay dagiti santona. 16Pudno, O Yahweh, adipennak; adipennak, ti anak a lalaki ti adipenmo a babai; winarwarmo dagiti kawarko. 17Idatonkonto kenka ti daton ti panagyaman ken umawagakto iti nagan ni Yahweh. 18Tungpalekto dagiti sapatak kenni Yahweh iti imatang dagiti amin a tattaona, 19kadagiti paraangan ti balay ni Yahweh, iti tengngam, Jerusalem. Idaydayawyo ni Yahweh.