Abhɨɨbhuraaniya 1

Mungu agambirɨ kʉhɨtɨra ku Umwana waazɨ

1Ɨkarɨ hayo, Mungu akagamba na bhasʉʉkʉrʉ bhɨɨtʉ manga kaaru na kwa nzɨra nzaru, kʉhɨtɨra kʉbharʉʉtɨrɨri. 2Nawe zisikʉ za mʉtɨnɨrʉ zɨnʉ, Mungu agambirɨ na niitwɨ kʉhɨtɨra Umwana waazɨ.1 Akarobhora Umwana wuyo, agabhɨ ebhegero bhyʉsi, na kʉhɨtɨra kwawɨ Mungu akateema icharʉ. 3Umwana wuyo arabharya kʉbhʉgʉngʉ bhwa Mungu na areerecha habhwɨrʉ chɨmbu Mungu arɨ. Kʉhɨtɨra ʉbhʉnaja bhwɨ ɨngʼana yaazɨ, aragirya ebhegero bhyʉsi bhɨbhɨhʉ sikʉ zʉʉsi. Na akiihurucha ikimweso chu ukuruusha abhaatʉ ʉbhʉbhɨ, akaja mwisaarʉ, akiikara ʉrʉbhaara rwu ubhuryʉ rwa Mungu.

Yɨɨsu nɨ‑mʉkʉrʉ kʉkɨra bhamaraika

4Mungu akakora Umwana waazɨ mʉkʉrʉ kʉkɨra bhamaraika,2 chɨmbu iriina rɨnʉ aamʉhɨɨrɨ ni‑kʉrʉ kʉkɨra ga bhamaraika. 5Na atareeho maraika wʉnʉ Mungu aabhuuriirɨ amangʼana ganʉ aabhuuriirɨ Yɨɨsu,

“Awɨ ni‑Mwana waanɨ,

reero nɨbhɨɨrɨ Wuusʉ.”3

Na Mungu ataagambirɨ igʉrʉ wa maraika wʉwʉʉsi,

“Inyɨ nɨrabha Wiisɨ

neewe arabha Mwana waanɨ.”4

6Na hanʉ Mungu aatumirɨ Umwana waazɨ umumwɨmwɨ kʉʉsɨ, akabhuga,

“Bhamaraika bhʉʉsi bha Mungu bhasengere Umwana wuyo.”5

7Ni igʉrʉ wa bhamaraika abhugirɨ,

“Ahaakora bhamaraika bhaazɨ kʉbha ʉmʉkama,6

na abhahocha bhaazɨ kʉbha ɨmɨrɨngɨɨri jo omorero.”7

8Nawe igʉrʉ wu Umwana waazɨ akabhuga,

“Awɨ Mungu ʉratema kemerano,

nʉ ʉbhʉkangati bhwazʉ bhʉrabha bhwe eheene.

9Awɨ ʉhaasɨɨga amazʉmu,

na ʉhaabhiihirirwa amabhɨ.

Necho kiyo Mungu, Mungu waazʉ,

akʉhakirɨ amaguta go obhozomerwa,

korereke ʉbhɨ mʉkʉrʉ,

kʉkɨra abhakɨndichazʉ.”8

10Kwikɨ Mungu akabhuga,

“Ʉmʉkʉrʉ, awɨ ʉkateema ɨɨsɨ kwɨma kʉbhʉtangɨ,

na risaarʉ kʉmabhoko gaazʉ.

11Ebhegero bhiyo bhyʉsi bhɨrasira,

bhɨranyara ncha zengebho,

nawe awɨ ʉrarama.

12Na ʉrabhikunyakunya nche engebho,

bhɨragarurwa ncha zengebho.

Nawe awɨ ʉrasaaga wuryawurya,

ni imyaka jazʉ gɨtaana tɨnɨrʉ.”9

13Atareeho maraika wʉwʉʉsi wʉnʉ Mungu aamubhuuriirɨ,

“Ikara ʉrʉbhaara rwanɨ rwu ubhuryʉ,

kuhika hanʉ nɨkʉtʉʉra abhabhisa bhaazʉ iyaasɨ wa amagʉrʉ gaazʉ.”10

14Bhamaraika nɨ‑kɨgʉrʉkɨ? Ne‑zekoro na nɨ‑bhahocha bha Mungu, bharatumwa, bhajɨ kohokerya abhaatʉ bhanʉ bhakʉsabhurwa.