Mme Ikwọ Sọlọmọn 8

1Akpekapado afo akeba nte ayịneka awodeen annọ miin,

e-ekekamake ke eba esịd eka mmi!

Ndin, ami ñkpukịt fiin ke esiin,

ami ñkpautʌm fiin inua,

ndin awo ndomokeed ikpinseghe miin ke ndek.

2Ami ñkpaudat fiin usʌñ

ñnyʌñ uben fiin ndʌk ufọk eka mmi,

anye a-akeñkpeebe miin.

Ami ñkpaunọ fiin ñwuaha ukọd nọ anwọñ,

inem mmọọñ mme pomekrened mmi.

3Ubọk ufiin amọ asịne ke idak iwuod mmi

ubọk nnasia amọ anyʌñ amfat miin.

4Nditọ ibaan Yeruselem, ami mmiwuuk ndufo nte

Ikiitịmede ikiinyʌñ idemme ima

tutu anye anie udọñ.

Mme Ufan

5Anie ado ami a-atooho anaan awuọ adi

a-abereke awoima amọ ke idem?

Awonwaan

Ke idak eto apịl ke ami ñkudịppe fiin udọñ;

do ke eka mfo akuyommo fiin,

do ke anye ake uman aketuuho akuman fiin.

6Nnịm miin nte ufiikñkpọ idiọọñọ ke esịd mfo,

nte ufiikñkpọ idiọọñọ ke ubọk mfo;

sia ima asọñ adudu nte ñkpa,

ufịb amọ asọñ ubọk nte udi.

Anye asak nte ekamba ikañ,

nte ataa ekamba edemeikañ.

7Uwak mmọọñ ikanna inịme ima;

Mme inyañ ikanna ikwọọk anye iduọọk.

Adieke awo akpenọọhọ

afịd inie ke ufọk amọ ke ntak ima,

ekpeneenekke esịn anye ke ata ndek.

Mme Ufan

8Ñnyịn iminie etək ayịneka awonwaan,

ndin eba amọ ikpoono ikem kaña.

Nsoo ke ñnyịn idiinam inọ ayịneka ñnyịn awonwaan

ke usen e-eyemme aditañ ikọ ndọ ibaña anye?

9Adieke anye adooho ndibene,

ñnyịn iyaibọp mme tọwa silfa inọ anye.

Adieke anye adooho usʌñ

ñnyịn iyaidat adukpọk sida ikọñ isịn anye.

Awonwaan

10Ami ndo ndibene,

eba mmi ñko etie nte mme tọwa.

Ke ntoro ami mmekappa ndo ke anyen amọ

nte awo a-adatta uyʌkkọ adi.

11Sọlọmọn amaanie inwañ fain ke Baal Hamọn;

anye amaayaak inwañ fain amọ anọ mme adidʌñ.

Ammọ keedekeed akena edat se ito mfịdinwañ edi

sekel silfa tọsịn keed1.

12Ado inwañ fain mmi ana annọ miin adinọ;

sekel silfa tọsịn keed edo ake mfo, Sọlọmọn,

ndin ikie iba2 anie mbon ekekpemeke mfịd ke inwañ.

Awodeen

13Afo a-adʌññọ ke mme inwañ

ye mme ufan mfo ke isañ,

yak ami ñkop uyio mfo!

Awonwaan

14Dakka di, awoima mmi,

nyʌñ ba nte edob

imiidooho ba nte nsek ebed

ke abod a-ayọhọke ye ñkpadia.