Mme Ikwọ Sọlọmọn 6

Mme Ufan

1Uke ke awoima mfo aka,

ñyaiyañkan ke atu mme ibaan?

Usʌñ uke ke awoima mfo akekanna adʌk,

yak ñnyịn ikpukeene fiin iyem anye?

Awonwaan

2Awoima mmi amaasọiyọ akaa inwañ amọ,

ke mme ikʌknnaa nneem ufịk ñkpadia amọ,

adikisaaña nseet mme inwañ

ñnyʌñ ñkịppe mme lili.

3Ami ndo ake awoima mmi awoima mmi anyʌñ ado ake mmi;

anye asaaña aseet ke atu mme lili.

Awodeen

4Afo ameyaiya ukem-ukem nte Tiasa, edima mmi,

anyʌñ ayaiya nte Yeruselem,

amenie uteeñe nte mbon ekọñ e-ekamake mme afọñidiọọñọ.

5Kunse ke anyen mfo;

sia ammọ emfoofuuk miin.

Ided mfo abit udịm ebod

e-esọiyọke eto Kilied.

6Eded mfo aba nte udịm edọñ

ewuọñọke ke itie uyieidem edi.

Ammọ keedekeed enie amanamba,

ibaaha ndomokeed ke atu ammọ a-asoppo usʌñ.

7Akpọiso mfo ke esịd ufʌkiso mfo

aba nte mbakka iba pomekrened.

8Akpekọm akpedo mbọọñibaan ata,

ye ibaan esa anaañ,

ye ananaibad ibaan ammiisappake idem;

9ado ibiom mmi, anana ndo mmi, ado asaña-asaña,

ukweeñe ayịn awonwaan e-eka amọ anieghe,

anye andikiman amaaha akan.

Ubọikpa emaekịt anye enyʌñ ekoot anye adidiọñ;

mbọọñibaan ye ibaan esa emaetooro anye.

Mme Ufan

10Anie awo ido ami a-awuọhọ nte usiere,

asana nte afiọñ, ayamma nte utịn,

anie uku nte mme ntantaafiọñ e-esañake ke udịm?

Awodeen

11Ami mmaasọiyọ ñkaa inwañ mme eto ekọm

adikise ufa sikọd ke abedeñ,

adise me mme fain emaesio emịne

me mme pomekrened emaesịññe ñkpokpoñ.

12Mbemiso ami ndiọọñọ,

udọñ mmi amamben miin asịn ke atu mme sariọd mbọọñ mbon mmi.

Mme Ufan

13Tịmme di, tịmme di, O awo Sulam;

tịmme di, tịmme di, yak ñnyịn inekke use fiin!

Awodeen

Ntak a-ndufo eyemme adinekke nse awo Sulam

nte ese unek ake mme Mahanaim?1