Adiyaara Yọọn 15

Enyere Itiaba ye Unọmọ Itiaba

1Mmaakịt ke hefịn ekamba utịppe idiọọñọ mfen. Enyere itiaba ye mme akpatre unọmọ itiaba, akpatre sia ke ammọ iyadesịd Abasi a-akem. 2Ndin mmaakịt se ikitie nte akpainyañ a-kraasi a-akesakka ikañ. Mbon e-ekedaaha ediana akpainyañ ado ekedo mbon e-emaekekan idiọọk unam ye mbid amọ ye ibad anyịñ amọ. Ammọ emaekama ndido A-Abasi akenọọhọ ammọ, 3enyʌñ ekwọ ikwọ Moses, isʌñutom Abasi, ye ikwọ Ayịn Edọñ,

“Mme adinam mfo edoñño ñkpoon ye utịppe,

Abọọñ Abasi Andikponñkan.

Mme usʌñ mfo e-enen enyʌñ edoñño akpanikọ,

Adidem mme idịd.

4Mme anie imiiduubaaha fiin, O, Abọọñ ,

inyʌñ inọ anyịñ mfo ubọọñ?

Sia Afo ikpọọñ ado adisana.

Afịd mme idịd

eyaedukpono fiin,

sia eyaara1 mme ndinen utom mfo.”

5Ke ami amaakeboiyo, mmaakịt tembịd ke hefịn naña akʌkkọ, a-adooho atayad edioomo mbed. 6Mme enyere itiaba e-ekekamake mme unọmọ itiaba emaewuọñọ edi. Ammọ ekesịne nsasana, ñyayamma linen enyʌñ ebọbọ mme ñkpaha kold ekanna ikpanesịd ammọ. 7Ndin keed ke atu mme aduuwem unam inaañ ado amaanọ mme enyere itiaba mme bọwịd kold itiaba e-emaekeyọhọ ye ifiobesịd Abasi, a-aduuho uwem ke nsi-nsi nsi-nsi. 8Ndin tembịd amaayọhọ ye nsʌñikañ a-atooho ubọọñ Abasi ye adudu amọ, ndin awo ndomokeed ikikanna idʌk tembịd tutu mme unọmọ itiaba a-mme enyere itiaba ado ekekamake akweeñe.