Mme Saam 84

Saam ake etubom ikwọ. Akeene ndido ikwọ kittid. Ake nditọ ideen Kora.

1Abọọñ Andikponñkan,

itie idʌñ mfo ayaiya die!

2Ukpọñ mmi adọñ, anyʌñ akpa mba,

adidʌk ñkaa esịd akwere Abọọñ;

esịd mmi ye abʌkidem mmi etua eyem

aduuwem Abasi.

3Akpekọm nnʌñesiin akịt ufọk amọ,

akadañabasi anyʌñ anie efọk amọ ñko,

itie ake anye akamake nditọ amọ,

itie a-akpereke akpokoro uwa mfo,

Abọọñ Andikponñkan, Adidem mmi ye Abasi mmi.

4Afọfọn anọ mbon se idʌñ ke ufọk mfo;

ammọ utooro fiin ke nsi-nsi.

5Afọfọn anọ mbon se adudu ammọ ado ke afo,

mbon se esịd ammọ awʌhọ ke adika adisana itie mfo.

6Nte ammọ esañake eboiyo ke Abedeñ Baka,

ammọ enam anye ado itie mme ube mmọọñ edidiọñ;

edịmukwọ anyʌñ afʌk anye ye ñkpọdiọhọ mmọọñ.

7Ammọ ekọt ye adudu ke adudu,

tutu awo keedekeed akewuọ iso Abasi ke Saiyọn.

8Mbọk kop akam mmi, Abọọñ Abasi Andikponñkan;

kpañ utọñ nnọ miin, Abasi Yekọb.

9Tịm se atuekọñ ñnyịn, O Abasi;

dat mfọn mfo tịm se awo ake emaekeyet adan inịm.

10Usen keed ke ekwere mfo

afọn akan tọsịn usen ke itie mfen;

ami ñkpaama adido akpeme usʌñ ke ufọk Abasi mmi

ñkan adidʌñ ke atayad mbon ibak.

11Sia Abọọñ Abasi ado utịn ye atuekọñ;

Abọọñ ado andinọ mfọn ye ukpono;

anye ifʌttọ ubọk ke adinọ eti ñkpọ ndomokeed

esọk mbon se isañ uwem ammọ anana ndudue.

12Abọọñ Andikponñkan,

afọfọn anọ awo a-anieghe mbuọdidem ke afo.