Mme Saam 64

Ake etubom ikwọ. Saam Defid.

Edaara Ke Ntak Abọọñ

1Kop uyio mmi, Abasi mmi, naña ami nseeme;

kpeme uwem mmi mbaak uduak ibak mme asua mmi.

2Ndịp miin mbaak adu mbon ibak,

mbaak edioomo ndiọi awo.

3Ammọ eban edeme ammọ nte akañkañ

enyʌñ ewuuk ndiọi ikọ ammọ nte idañ ñkpa.

4Ammọ edịbe etop awo ammiidueghe isob;

ammọ etop usọp-usọp, ndịk ibaaha.

5Ammọ esọọñọ emọ-emọ esịd ke ndiọi uduak,

ammọ eneme ebaña adidịp mme afia ammọ;

ammọ ebo, “Anie adiikịt se ñnyịn inam?”

6Afịd ammọ edioomo ukwañ ikpe enyʌñ ebo,

“Ñnyịn imidioomo ataa eti uduak!”

Ke akpanikọ akikere ye esịd awo edo ndudiọ.

7Ado Abasi ayaatop ammọ ke mme idañ amọ;

ayaatịgha ammọ aduọọñọ ke unana idodanyen.

8Anye ayaanam edeme ammọ ekappa eta ammọ

anyʌñ aben ammọ adi ke nsobo;

afịd mbon se ikịt ammọ eyaesaha enyʌñ enyeeñe iwuod.

9Afịd awo eyaekop ndịk;

ammọ eyaebʌk ubọkutom Abasi

enyʌñ enekke ekere se anye anam.

10Mme ndinen awo eyaedaara ke Abọọñ

enyʌñ edịbe ke anye;

afịd mbon nti esịd eyaebọ ubọọñ ke anye!