Mme Saam 62:1

Ake etubom ikwọ. Ake Yedutun. Saam Defid.

Abasi Anie Adudu Ye Mbọm

1Ke akpanikọ ukpọñ mmi anie nduọkadudu ke Abasi;

adinyaaña mmi ato anye.

2Ke akpanikọ anye ado itiad mmi ye adinyaaña mmi;

anye ado itie udịbe mmi, ñkpọ ndomokeed intəkkoke.

3Ndufo ediikaiso inwana ye ami ikpeene die?

Nte afịd ndufo eyaentop miin eduọọk ke isọñ,

ke ndibene a-anyʌkkọke mi, ke akọ a-awuudoke mi?

4Ke akpanikọ ammọ eduak adindooro miin mfep

ke uyaiya itie mmi;

ammọ ema nsu.

Ammọ edat ñkpọkinua ammọ ediọñ,

ado esuuñọ ke esịd ammọ.

5Ii, ukpọñ mmi, bọ nduọkadudu ke Abasi;

idodanyen mmi ato anye.

6Ke akpanikọ anye ado itiad mmi ye adinyaaña mmi;

anye ado itie udịbe mmi, ñkpọ ndomokeed intəkkoke.

7Adinyaaña mmi ye ukpono mmi ekọñọ ke Abasi,

anye ado akwa itiad mmi, itie udịbe mmi.

8Ibuọt idem ke anye afịd ini, ndufo mbon awo;

inwañña esịd ndufo inọ anye,

sia Abasi ado itie udịbe ñnyịn.

9Ke akpanikọ mbon usuuhọ itie emana eba nte afịm;

mbon ikpọ itie emana edo nsu.

Adieke edotto ke udomoñkpọ, ammọ idooho ñkpọ ndomokeed:

naña ammọ iba iwuọñọke ñkpọ ñkọm etañ ammọ edian keed.

10Kuubuọt idem ke ñkanubọk

me adinie ikpu-ikpu idodanyen ke mme ñkpọ eyịppeyịp;

akpesʌkado mme inie ndufo etọttọ

ikiisịn esịd ndufo ke ammọ.

11Abasi atañ ñkpọ keed,

ado ami mmekop ñkpọ iba:

“Adudu unie fiin, Abasi,

12ñko ke afo, Abọọñ, ke nsọọñọnda ima aba”;

ñko, “Afo anọ afịd awo utịb

akeene se ammọ enam.”