Mme Saam 60

Ake etubom ikwọ. Akeene uyioikwọ “Lili Edioomo.” Miktam ake Defid. E-edatta ekpeep ñkpọ. Ke ini anye akenwanake Aram Naharaim ye Aram Soba, ye ke ini Yoab aketịmmeke adi adisobo mbon Edọm awo tọsịn duob mme iba ke Abedeñ Inʌñ.

Afo Amekeme Adibuọt Idem Ke Abasi

1Abasi, afo amaisịn ñnyịn, anyʌñ anaminua ke ñnyịn;

afo ameyat esịd ye ñnyịn, mbọk tañ ñnyịn bok!

2Afo amaanyeeñe isọñ anyʌñ akʌppọ anye anịm inwañ;

diọñ ñwuudo amọ, ke asʌk anyeeñe.

3Afo amenam mbon mfo ekịt ini nsọñọñkpọ;

afo aminọ ñnyịn ukọd a-anamma ñnyịn ifịmme.

4Ado afo amedịppe afọñidiọọñọ afʌk mbon se ubaak fiin,

yak ebọkkọ utịgha.

5Inyaaña ñnyịn nyʌñ inwam ñnyịn ye ubọk nnasia mfo,

nọ mbon se afo ama ebọkkọ.

6Abasi atie ke adisana itie amọ atañ abo:

“Ke adikan ami ñyaabakka Sekem nsio ndaaha

ñnyʌñ ndomo Abedeñ Sukọd.

7Kilied ado ake mmi, Manase anyʌñ ado ake mmi;

Ifrem ado itamukpeme anọ iwuod mmi,

Yuda ado esañubọọñ mmi.

8Mọb ado besịn uyieubọk mmi,

ke Edọm ke ami ntop ikpaukod mmi ndot;

Ke Filistia ke ami nsio ñkpo idaara.”

9Anie awo adimben miin idʌk akpọsọñ abio?

Anie adindat miin usʌñ ika Edọm?

10Nte idooho afo, Abasi, afo ake akisịnne ñnyịn

unyʌññọ usaña aba ye mbon ekọñ ñnyịn?

11Inọ ñnyịn unwam ke abaña mme asua,

sia unwam awo ibaaha ufọn ndomokeed.

12Ke Abasi ñnyịn iyainie adikan,

anye ayaanyʌñ afiik mme asua ñnyịn ke ñkpad.