Mme Saam 52

Ake etubom ikwọ. Maskil ake Defid. Ke ini Dook, awo Edọm akekaaha akebo Sọọl ate: “Defid aka ufọk Ahimelek.”

Abasi Ada Ukara

1Afo awo uko, nsoo inam nọ afo aduaak inua abaña idiọọk?

Nsoo inam afo aduaak inua afịd usen,

afo a-adooho ñkpọ ndọk ke anyen Abasi?

2Afo a-anamma abiaña,

edeme mfo aduak nsobo;

anye aba nte akadañ e-ebannaban.

3Afo ama idiọọk utu ke eti ñkpọ,

nsu utu ke aditañ akpanikọ.

4Afo ama afịd ndiọi ikọ,

afo edeme abiaña!

5Ke akpanikọ Abasi ayausuuhọ fiin asịn ke nsobo nsi-nsi:

Anye ayauwappa fiin anyʌñ ubuuñ fiin asio ke atayad mfo;

anye ayauwịppe fiin asio ke isọñ mme aduuwem.

6Mme ndinen awo eyaekịt enyʌñ edịkke;

ammọ eyausak fiin, ebo ete,

7“Idahami se awo ado

i-imiikinamma Abasi ado ukad amọ

ado akebuọt idem ke akpọsọñ inie amọ

anyʌñ akọt ke adudu ato ke adisobo mbon mfen!”

8Ado ami mba nte eto ọlif

a-afọnnọ idem ke esịd ufọk Abasi;

Ami mbuọt idem ke nsọọñọnda ima Abasi

ke nsi-nsi nsi-nsi.

9Sia ami ñyautooro fiin afịd ini ke se afo anam

ke iso atu mme andunịm fiin ke akpanikọ.

Ndin ami ñyaadot anyen ke anyịñ mfo;

sia anyịñ mfo afọn.