Mme Saam 45

Ake etubom mbon ikwọ. Ekwọ nte “Lili.” Ake nditọ Kora. Maskil. Ikwọ ndọ.

Ke Abaña Ndọ Ufọk Ubọọñ

1Esịd mmi ayọhọ aduọi ye eti iwuod ikọ;

naña ntañ uto mmi nnọ adidem;

edeme mmi ado etoñwed awedñwed a-ayọhọke ye ifiọk.

2Afo afọn akan ke atu ideen

ñko eduọk mfọn ke ñkpọkinua mfo,

sia Abasi udiọñ ke nsi-nsi.

3Faak akañkañ mfo ke ñkañ, afo awo uko;

ben uyai ye ubọọñ sịne ke idem.

4Wat uko-uko ke ubọọñ mfo

ke ntak akpanikọ, nsuukidem ye unen;

yak ubọk nnasia mfo anam mme anie ndịk ñkpọ.

5Yak mme usọb idañ mfo akịm esịd mme asua adidem;

yak mme idịd eduọññọ ke idak ukod mfo.

6O Abasi1, ebekpo mfo, adiida ke nsi-nsi nsi-nsi;

esañ unen adiido esañ ubọọñ mfo.

7Afo amema adinenido anyʌñ asua ukwañ ido;

ke ntoro Abasi, Abasi mfo, anam afo akoñ akan mme nsaña mfo

ke aduyet fiin adan inemesịd.

8Afịd afọñ mfo enie inem ufịk mee ye mme alo ye akesia;

ufọk ubọọñ e-ebanake ke nnʌk eniin

ikwọ e-ebreke ke ndido udʌk unọ fiin inemesịd.

9Nditọ ibaan mme ndidem esịne ke atu mme ibaan ukpono mfo;

anwaan ndọ abọọñ a-asịneke kold ake Ọfia ada ke ubọk nnasia mfo.

10Kop, ayịn awonwaan, nyʌñ nekke kpañ utọñ:

Fre baña mbon ndufo ye ufọk ete mfo.

11Yak uyai mfo adọñ adidem itọñ;

kpono anye, ke anye ado abọọñ mfo.

12Abio Tai ayaadi ye enọ,

mbon inie eyaeyem mfọn uto fiin.

13Adiaha adidem aba ubọọñ-ubọọñ ke ubeed amọ;

afọñidem amọ edat kold edọkkọ esịn uyai enam.

14Esịn anye mme udọdọk nsiine eben ebịne adidem;

mme ñkpʌk ubọikpa amọ ekeene anye,

mbon e-ekebenne edi ebo yak ediba ye anye.

15Eben ammọ edʌk ke idaara ye inemesịd,

ammọ edʌk akwa ufọk adidem.

16Nditọ ideen mfo eyaedat itie mme ete ndufo;

afo ayaaben ammọ anịm nte mbọọñ ke afịd abio.

17Ñyaanam etoiyo anyịñ mfo ke afịd emana;

ke ntoro mme idịd eyautooro fiin ke nsi-nsi nsi-nsi.