Mme Saam 36

Ake etubom ikwọ. Ake Defid ayịnufọk Abọọñ.

Idiọọkñkpọ Awo ye Mfọnido Abasi

1Mmenie etob nto Abasi ke esịd mmi

abaña idiọọkñkpọ awo ibak:

Mbaak Abasi ibaaha

ke iso ammọ.

2Ke anyen ammọ, ammọ ebiaña idem ammọ

tutu ikanna ikịt inyʌññọ ikan isua idiọọkñkpọ ammọ.

3Ikọ inua ammọ edo ibak ye abiaña;

ammọ inamma ñkpọ ye ifiọk inyʌññọ inam se ifọn.

4Ke idem ñkpana nnaa ammọ, ammọ ekere ibak;

ammọ esịn idem ammọ ke idiọọk usʌñ

inyʌññọ isịn se imiifọnnọ.

5Ima mfo, Abọọñ, asịm anyọñ,

akpanikọ mfo asịm ikpaanyọñ.

6Adinenido mfo aba nte mme abod se ikoñ ikan,

ikpe mfo aba nte akwa udem inyañ.

Afo, Abọọñ, anyaaña mme awo ye mme unam.

7O Abasi, ima mfo i-imiikpuuho asọñ die udua!

Mbon awo edịbe ke idak mba mfo.

8Ammọ edia eyʌkkọ ke uwak inie ufọk mfo;

afo anọ ammọ se enwọñ ato akpa inemesịd mfo.

9Sia idịm mmọọñ uwem ado ke afo;

ke unwana mfo ke ñnyịn ikịt unwana.

10Kaa iso ye ima mbon ake udiọọñọke fiin,

adinenido mfo ye mbon eti esịd.

11Kuuyak ñkpad mbon ntañidem ensịm miin,

kuunyʌñ uyak ubọk mbon ibak embịn miin esio.

12Se naña mbon ibak eduọññọ enaa,

etop ammọ eduọọk ke isọñ, ammọ ikanna idakka ida!