Mme Saam 33

Ikwọ Itooro Inọ Abọọñ

1Ikwọ ke idaara Inọ Abọọñ, ndufo ndinen awo;

adot ndinen awo aditooro anye.

2Itooro Abọọñ ye ekpa;

ibre ikwọ inọ anye ke ndido udʌk duob.

3Ikwọ ufa ikwọ inọ anye;

itịm ibre, inyʌñ isio ñkpo idaara.

4Sia ikọ Abọọñ anen anyʌñ ado akpanikọ;

anye awọt akpanikọ ke afịd se anye anam.

5Abọọñ ama adinenido ye unenikpe;

ederimbod ayọhọ ye ima amọ ake imiikpuuho.

6Ekedat ikọ Abọọñ enam anyọñ,

ekedat inweek inua amọ enam mme udịm ntantaafiọñ.

7Anye akpuut mmọọñ inyañ adọñ ke mme atu;

akoono utəño mmọọñ adọñ ke mme itie ubon ñkpọ.

8Yak afịd ederimbod ebaak Abọọñ;

yak afịd awo ke ekondo eteeñe anye.

9Sia anye amaatañ ikọ, ndin amaawuọ asu;

anye amaanọ ewʌhọ, ndin amaasọọñọ ada.

10Abọọñ abiat uduak mme idịd;

anye anam akikere mme ubon awo akpu.

11Ado uduak Abọọñ asọọñọ ada ke nsi-nsi,

akikere esịd amọ ada ke afịd emana.

12Afọfọn anọ idịd A-Abasi ammọ adooho Abọọñ,

mbon a-anye amekke nte udeeme amọ.

13Abọọñ atie ke anyọñ asuuk anyen ase isọñ

anyʌñ akịt ubon awo;

14atie ke itie idʌñ amọ ase

afịd awo se idʌñ ke ederimbod,

15anye a-akebotto esịd afịd awo,

a-adiọọñọke afịd se ammọ enam.

16Ibaaha adidem ndomokeed a-abọkkọke ato ntak ekamba udịm ekọñ amọ;

ibaaha awo ekọñ ndomokeed a-abọkkọ ato ekamba adudu amọ.

17Idodanyen ke enañmbakara ikemeke adinyaaña awo ndomokeed;

kpa ye akwa adudu amọ anye ikanna inyaaña awo.

18Ado anyen Abọọñ awʌhọ ke mbon se ibaak anye,

mbon ake edotto anyen ke nsi-nsi ima amọ,

19adinyaaña ammọ nsio ke ñkpa

ñnyʌñ nnịm ammọ uwem ke ini akañ.

20Ñnyịn ibet Abọọñ ye idodanyen;

anye ado unwam ñnyịn ye atuekọñ ñnyịn.

21Esịd ñnyịn edaara ke anye,

sia ñnyịn iminie mbuọdidem ke adisana anyịñ amọ.

22Yak nsi-nsi ima mfo aba ye ñnyịn, Abọọñ,

kpa naña ñnyịn idot anyen ke afo.